Ózbekstan Respublikasınıń “Jergilikli mámleket hákimiyatı haqqında”ǵı Nızamınıń 6-, 24-statyaları, Byudjet kodeksiniń 27, 99-statyaları, Ózbekstan Respublikasınıń 2025-jıl 25-dekabrdegi “2026-jıl ushın Ózbekstan Respublikasınıń Mámleketlik byudjeti haqqında”ǵı ÓRN-1105-sanlı Nızamına, Qaraqalpaqstan Respublikası Joqarǵı Keńesi Prezidiumınıń 2025-jıl 29-dekabr kúngi “Qaraqalpaqstan Respublikasınıń 2026-jılǵı jergilikli byudjetin tastıyıqlaw tuwralı” 88/IX-sanlı qararına muwapıq hám Moynaq rayonı hákimligi tárepinen usınılǵan Moynaq rayonınıń 2026-jılǵı jergilikli byudjet parametrlerin kórip shıǵıp, Xalıq deputatları Moynaq rayonlıq Keńesi sheshim etedi:

1. Ózbekstan Respublikasınıń “2026-jıl ushın Ózbekstan Respublikasınıń Mámleketlik byudjeti haqqında”ǵı 2025-jıl 25-dekabrdegi ÓRN-1105-sanlı Nızamına, Qaraqalpaqstan Respublikası Joqarǵı Keńesi Prezidiumınıń 2025-jıl 29-dekabr kúngi “Qaraqalpaqstan Respublikasınıń 2026-jılǵı mámleketlik byudjeti parametrleri tuwralı” 88/IX-sanlı qararı (keyingi orınlarda qarar dep júrgiziledi) basshılıqqa alınıp orınlaw ushın qabıl etilsin.

2. Moynaq rayonı jergilikli byudjetiniń 2026-jılǵı dáramatları 77 686 715,0 mıń som hám qárejetleri 77 686 715,0 mıń somǵa maǵlıwmat ushın qabıl qılınǵanlıǵı, sonıń menen birge Moynaq rayonı jergilikli byudjetiniń jeke esap betindegi turǵan byudjet qarjılarına jol qoyılatuǵın eń kem muǵdarı 559,0 mln som etip belgilengenligi inábatqa alınsın.

3. Moynaq rayonı jerglikli byudjeti dáramatlarınıń 2026-jıl ushın tiykarǵı prognoz kórsetkishleri 1-qosımshaǵa hámde 2026-jıl ushın Moynaq rayonı jergilikli byudjet qárejetler kórsetkishleri 2-qosımshaǵa muwapıq, Moynaq rayonı jergilikli byudjet mákemelerine ajıratılatuǵın qarjılardıń sheklengen muǵdarları 3-qosımshaǵa muwapıq tastıyıqlansın.

4. Moynaq rayonı jergilikli byudjetiniń dáramatları hám de qárejetleriniń sheklengen muǵdarları 4-qosımshaǵa, Moynaq rayonı jergilikli byudjetiniń 2026-jıl ushın jol qoyılatuǵın eń kem qarjılar muǵdarı 5-qosımshaǵa muwapıq tastıyıqlansın.

5. Moynaq rayonı jergilikli byudjetiniń 2026-jıl ushın saqlawlı qorı muǵdarı 6-qosımshaǵa muwapıq hám Ulıwma mámleketlik salıqlardan rayon jergilikli byudjetine ajıratpalar normativleri 7-qosımshaǵa muwapıq tastıyıqlansın.

6. Rayon hákiminiń finans-ekonomika hám kambaǵallıqtı qısqartıw máseleleri boyınsha birinshi orınbasarı, rayonlıq Ekonomika hám finans bólimi (S. Iniyatov) hám rayonlıq Salıq inspekciyası (T. Adenbayev) menen birgelikte 2026-jıl jergilikli byudjeti ushın belgilengen kórsetkishlerdi óz waqtında hám nátiyjeli orınlanıwın támiyinlew ilájların kórsin.

7. Rayonlıq byudjet qarjıların bólistiriwshiler byudjetten ajıratılǵan qarjılardan maqsetli hám nátijeli paydalanıw, atap aytqanda is haqı hám oǵan teńlestirilgen tólewler, azıq-awqat, dári-dármaq, kommunal xızmetler hám mámleket baǵdarlamaları ushın belgilengen qárejetlerdi birinshi náwbette tolıq rejelestiriliwi hám óz waqtında tóleniwi hámde dawirli kompleks finanslıq esabatlardı tuwrı qáliplestiriw hám óz waqtında usınıs etiliwi támiyinlesin.

8. Usı sheshim “Aral balıqshısı” gazetasında jarıtılsın hámde rayon hákimliginiń rásmiy veb-saytına jaylastırılsın.

9. Usı sheshimniń orınlanıwın qadaǵalaw xalıq deputatları Moynaq rayonlıq Keńesiniń jergilikli byudjetti dúziw hám orınlaw, ekonomikalıq reformalardı ámelge asırıw hám isbilermenlikti rawajlandırıw máseleleri boyınsha turaqlı komissiyası (M. Abubakirov) hámde rayon hákiminiń finans-ekonomika hám kambaǵallıqtı qısqartırıw máselelri boyınsha birinshi orınbasarı (S. Iniyatov)na júkletilsin.

10. Usı sheshim 2026-jıl 1-yanvardan kúshke kiredi.