Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6, 24-moddalari, Byudjet kodeksining 27, 99-moddalari, “2026-yil uchun Oʻzbekiston Respublikasining Davlat byudjeti toʻgʻrisida”gi 2025-yil 25-dekabrdagi OʻRQ-1105-son Qonuniga va Qoraqalpogʻiston Respublikasi Joʻqorgʻi Kengesining 2025-yil 29-dekabrdagi 88/IX-sonli qaroriga muvofiq, xalq deputatlari Toʻrtkoʻl tumani Kengashi qaror qiladi:

1. Oʻzbekiston Respublikasining “2026-yil uchun Oʻzbekiston Respublikasining Davlat byudjeti toʻgʻrisida”gi Qonuni hamda Qoraqalpogʻiston Respublikasi Joʻqorgʻi Kengesining 2025-yil 29-dekabrdagi 88/IX-son qarori (keyingi oʻrinlarda qaror deb yuritiladi) rahbarlik va ijro uchun qabul qilinsin.

2. Qarorga muvofiq, Toʻrtkoʻl tumani byudjetining 2026-yilgi daromadlari 137 542,6 mln.soʻm va xarajatlari esa 137 542,6 mln soʻmga maʼlumot uchun qabul qilinganligi, shuningdek Toʻrtkoʻl tumani byudjetining shaxsiy gʻazna hisobvaragʻida turgan byudjet mablagʻlarining yoʻl qoʻyiladigan eng kam miqdori 828,0 mln soʻm etib belgilanganligi inobatga olinsin.

3. Tuman byudjeti daromadlarining 2026-yil uchun asosiy prognoz koʻrsatkichlari 1-ilovaga muvofiq hamda tuman byudjetidan 2026-yilda hududiy byudjet mablagʻlarini taqsimlovchilarga ajratiladigan xarajatlarning cheklangan miqdorlari 2-ilovaga muvofiq, shuningdek Toʻrtkoʻl tumani mahalliy byudjetiga umumdavlat soliqlari va boshqa soliqsiz tushumlardan ajratmalar meʼyorlari 3-ilovaga muvofiq tasdiqlansin.

4. Tuman byudjeti zaxira jamgʻarmasi hajmi 2026-yil uchun 2 509,6 mln soʻm miqdorida 4-ilovaga muvofiq belgilansin.

Bunda, zaxira jamgʻarmasi mablagʻlarini amaldagi byudjet qonunchiligiga muvofiq, byudjet tizimi byudjetlari shakllantirilayotganda oldindan nazarda tutib boʻlmaydigan xarajatlarni, shuningdek ijtimoiy-iqtisodiy beqarorlik yuzaga kelgan vaziyatlarda amalga oshirilishi zarur boʻlgan tadbirlarni moliyalashtirish uchun yoʻnaltirilishi taʼminlansin.

5. Toʻrtkoʻl tumani mahalliy byudjetining 2025-yil uchun yoʻl qoʻyiladigan eng kam mablagʻlar miqdori 5-ilovaga muvofiq, Toʻrtkoʻl tumani mahalliy byudjetining 2026-yilgi daromadlari va xarajatlari mablagʻlarining miqdori 6-ilovaga muvofiq tasdiqlansin.

6. Tumandagi qishloq xoʻjaligiga moʻljallanmagan yerlar uchun yuridik shaxslar boʻyicha eng kam miqdori 1 gektar uchun belgilangan bazaviy soliq stavkasi kiritilishi toʻgʻrisidagi kamaytiruvchi va oshiruvchi koeffitsientlari 7-ilovaga muvofiq hamda tumandagi jismoniy shaxslar boʻyicha (dehqon xoʻjaligi yuritish uchun berilgan qishloq xoʻjaligiga moʻljallangan yerlardan tashqari) eng kam miqdori 1 kv.metr uchun belgilangan bazaviy soliq stavkasi kiritilishi toʻgʻrisidagi kamaytiruvchi va oshiruvchi koeffitsientlari 8-ilovaga, belgilangan limit doirasida yer usti va yer osti manbalaridan olinadigan suv resurslari uchun soliq stavkalari mutloq miqdorda bir kub metr uchun belgilangan bazaviy soliq stavkalariga nisbatan kiritilayotgan kamaytiruvchi va oshiruvchi koeffitsientlari 9-ilovaga, 2026-yilda qazib olingan 1m3 noruda qurilish materiallari (sement ishlab chiqarish uchun moʻljallangan ohaktoshdan tashqari) uchun qatʼiy belgilangan soliq stavkalariga kiritilayotgan oshiruvchi koeffitsientlar 10-ilovaga, koʻchmas mulkka boʻlgan huquqlarni Davlat roʻyxatidan oʻtkazuvchi organlarda roʻyxatdan oʻtkazilishi kerak boʻlgan bino va inshootlarning 1 kv. metri uchun Absolyut (qatʼiy) miqdorda belgilangan minimal bahosiga solishtirganda kiritilayotgan kamaytiruvchi koeffitsent miqdori 11-ilovaga muvofiq tasdiqlansin.

7. Tuman hokimining birinchi oʻrinbosari (Z. Ismailov), tuman Iqtisodiyot va moliya boʻlimi (I. Baqqayev), tuman Soliq inspektsiyasi (J. Annayev) bilan birgalikda 2026-yil mahalliy byudjeti uchun belgilangan koʻrsatkichlarni oʻz vaqtida va samarali bajarilishini taʼminlash choralarini koʻrsin.

8. Hududiy byudjet mablagʻlarini taqsimlovchilar har chorak yakuni bilan byudjet mablagʻlarining samarali va maqsadli sarflanganligi, xarajatlarning amaliy natijalari yuzasidan xalq deputatlari tuman Kengashiga hisobot berib borsinlar.

Bunda, hududiy byudjet mablagʻlarini taqsimlovchilar:

byudjetdan ajratilgan mablagʻlardan maqsadli va samarali foydalanish, xususan ish haqi va unga tenglashtirilgan toʻlovlar, oziq-ovqat, dori-darmon, kommunal xizmatlar va davlat dasturlari uchun belgilangan xarajatlarni toʻliq rejalashtirilishi va oʻz vaqtida toʻlanishi;

oʻzlarining va tasarrufidagi tashkilotlarning xarajatlar smetasi va shtat jadvallari hamda daromadlar va xarajatlar smetalarining toʻgʻri tuzilishi;

byudjetdan ajratilgan mablagʻlarning maqsadli sarflanishi va maqsadli indikatorlarning toʻliq bajarilishi;

tasarrufidagi tizim tashkilotlariga byudjetdan ajratiladigan mablagʻlarning toʻgʻri taqsimlanishi;

oʻz tasarrufidagi tizimda byudjet intizomiga amal qilinishi ustidan nazorat qilinishini;

byudjet jarayonining ochiqligini taʼminlash maqsadida rasmiy veb-saytlarda maʼlumotlarni joylashtirib borilishini taʼminlasinlar.

9. Tuman hokimligining Axborot xizmati rahbari (M. Bekchanova)ga mazkur qarorni tuman hokimligining rasmiy veb-saytiga joylashtirish va ommaviy axborot vositalarida eʼlon qilish vazifasi yuklansin.

10. Mazkur qaror bajarilishini nazorat qilish xalq deputatlari Toʻrtkoʻl tumani Kengashining mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (A. Madraymov) hamda tuman hokimining birinchi oʻrinbosari Z. Ismailov zimmasiga yuklatilsin.

11. Ushbu qaror rasmiy eʼlon qilingan kundan kuchga kiradi.