Oʻzbekiston Respublikasining “2026-yil uchun Oʻzbekiston Respublikasining Davlat byudjeti toʻgʻrisida”gi OʻRQ-1105-sonli Qonuni qabul qilinganligi munosabati bilan Oʻzbekiston Respublikasi Soliq kodeksining 445- va 452-moddalariga muvofiq, tuman soliq inspeksiyasining 2025-yil 5-dekabrdagi P-09845-sonli, tuman hokimining birinchi oʻrinbosari Sh.Aliyevning 2025-yil 9-dekabrdagi 8392-sonli xatlariga muvofiq, xalq deputatlari Narpay tumani Kengashining yettinchi chaqiriq, oʻn sakkizinchi sessiyasi qaror qiladi:

1. Oʻzbekiston Respublikasining “2026-yil uchun Oʻzbekiston Respublikasining Davlat byudjeti toʻgʻrisida”gi OʻRQ-1105-sonli Qonuni, Oʻzbekiston Respublikasi Soliq kodeksining 445- va 452-moddalari maʼlumot uchun qabul qilinsin.

2. Tuman Soliq inspeksiyasi hududlarning iqtisodiy rivojlanganlik darajasi hamda tuman hokimligining 2026-yil uchun belgilangan mahalliy byudjet prognozidan kelib chiqib, tuman boʻyicha 2026-yilda suv resurslaridan foydalanganlik uchun soliq va yer qaʼridan foydalanganlik uchun soliq stavkalarining mutlaq miqdorlariga nisbatan kamaytiriluvchi va oshiriluvchi koeffitsientlarni qoʻllash boʻyicha takliflari inobatga olinsin.

3. 2026-yil uchun suv resurslaridan foydalanganlik uchun soliq stavkalariga 2026-yil uchun qoʻllaniladigan koeffitsientlar 1-ilovaga hamda noruda qurilish materiallari uchun (sementdan tashqari) belgilangan qatʼiy stavkalariga 2026-yil uchun qoʻllaniladigan koeffitsientlar 2-ilovaga muvofiq tasdiqlansin.

4. Tuman hokimining birinchi oʻrinbosari (Sh.Aliyev), tuman Iqtisodiyot va moliya boʻlimi boshligʻi oʻrinbosari (U.Ruziyev), tuman soliq inspeksiyasi (Z.Turdiyev) bilan birgalikda mazkur qaror oʻz vaqtida va samarali bajarilishini taʼminlash choralarini koʻrsin.

5. Tuman hokimligi Axborot xizmati rahbari (S.Jabborov), “Navqiron Narpay” gazetasi muharriri (T.Toshmurodov)lar mazkur qarorni tegishli tahririyatlar va ommaviy axborot vositalarida yoritilishi tavsiya etilsin hamda tuman hokimligining rasmiy veb-saytiga joylashtirsin.

6. Ushbu qarorni bajarilishini nazorat qilish Narpay tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiya (U.Namazov)ga, ijrosini taʼminlash tuman hokimining birinchi oʻrinbosari (Sh.Aliyev) zimmasiga yuklatilsin.

7. Mazkur qaror rasmiy eʼlon qilingan kundan boshlab kuchga kiradi.