Oʻzbekiston Respublikasi Byudjet kodeksining 27 va 99-moddalari, Oʻzbekiston Respublikasi Soliq kodeksining 429-va 437-moddalari, Oʻzbekiston Respublikasining 2025-yil 25-dekabrdagi “2026-yil uchun Oʻzbekiston Respublikasining Davlat byudjeti toʻgʻrisida”gi OʻRQ-1105-son Qonuni, Oʻzbekiston Respublikasi Prezidentining 2020-yil 3-dekabrdagi “Resurs soliqlari va mol-mulk soligʻini yanada takomillashtirish toʻgʻrisida”gi PF-6121-son Farmoni, Xalq deputatlari Samarqand viloyati Kengashining 2025-yil 30-dekabrdagi VII-24-191-7-0-K/25-son qarori, Samarqand viloyati Iqtisodiyot va moliya bosh boshqarmasining 2025-yil 24-oktyabrdagi 02/01-38-3023-son xati, Ishtixon tumani hokimining birinchi oʻrinbosari Q.Nuriddinovning 2025-yil 24-oktyabrdagi 147-son bildirgisi, Ishtixon tumani Iqtisodiyot va moliya boʻlimining 2025-yil 24-oktyabrdagi 01-38-790-son xatiga, Ishtixon tuman Davlat soliq inspeksiyasining 2025-yil 27-oktyabrdagi P-10616-son xati, Ishtixon tumani Adliya boʻlimining 2025-yil 30-dekabrdagi 5/17-25-son xulosasga muvofiq, Xalq deputatlari Ishtixon tumani Kengashining yettinchi chaqiriq, 17-sessiyasi qaror qiladi:

1. Oʻzbekiston Respublikasining 2025-yil 25-dekabrdagi “2026-yil uchun Oʻzbekiston Respublikasining Davlat byudjeti toʻgʻrisida”gi OʻRQ-1105-son Qonuni, Xalq deputatlari Samarqand viloyati Kengashining 2025-yil 30-dekabrdagi VII-24-191-7-0-K/25-son qarori, Samarqand viloyati Iqtisodiyot va moliya bosh boshqarmasining 2025-yil 24-oktyabrdagi 02/01-38-3023-son xati hamda Ishtixon tumani hokimining birinchi oʻrinbosari Q.Nuriddinovning 2025-yil 24-oktyabrdagi 147-son bildirgisi maʼlumot uchun qabul qilinsin.

2. Qarorga muvofiq, Ishtixon tuman byudjetining 2026-yilgi daromadlari 173 261,947 mln soʻm, xarajatlari esa 173 261,947 mln soʻm miqdorida maʼlumot uchun qabul qilinganligi hamda Ishtixon tumani byudjetining shaxsiy gʻazna hisobvaragʻida turgan byudjet mablagʻlarining yoʻl qoʻyiladigan eng kam miqdori 1 147,0 mln soʻm etib belgilanganligi inobatga olinsin.

3. Ishtixon tumani byudjeti daromadlarining 2026-yil uchun asosiy prognoz koʻrsatkichlari 1-ilovaga, tuman byudjetidan 2026-yilda hududiy byudjet mablagʻlarini taqsimlovchilarga ajratiladigan xarajatlarning cheklangan miqdorlari 2-ilovaga, Ishtixon tumani byudjetining shaxsiy gʻazna hisobvaragʻida turgan byudjet mablagʻlarining yoʻl qoʻyiladigan eng kam miqdori 3-ilovaga muvofiq tasdiqlansin.

4. Ishtixon tumani byudjeti zaxira jamgʻarmasi hajmi 2026-yil uchun 2 058,2 mln soʻm miqdorida belgilansin.

Bunda zaxira jamgʻarmasi mablagʻlarini amaldagi byudjet qonunchiligiga muvofiq, byudjet tizimi byudjetlari shakllantirilayotganda oldindan nazarda tutib boʻlmaydigan xarajatlarni, shuningdek ijtimoiy-iqtisodiy beqarorlik yuzaga kelgan vaziyatlarda amalga oshirilishi zarur boʻlgan tadbirlarni moliyalashtirish uchun yoʻnaltirilishi taʼminlansin.

5. Quyidagilar:

Qishloq xoʻjaligi uchun moʻljallanmagan yerlar uchun yuridik shaxslar boʻyicha mutlaq miqdorda 1 gektar yer uchun belgilangan bazaviy soliq stavkasiga kiritilayotgan kamaytiruvchi va oshiruvchi koeffitsientlar 4-ilovaga;

Jismoniy shaxslar boʻyicha (dehqon xoʻjaligini yuritish uchun berilgan qishloq xoʻjaligiga moʻljallagan yerlardan tashqari) mutlaq miqdorda 1 m² uchun belgilangan bazaviy soliq stavkalariga nisbatan kiritilayotgan kamaytiruvchi va oshiruvchi koeffitsientlar 5-ilovaga;

Koʻchmas mulkka boʻlgan huquqlarni davlat roʻyxatidan oʻtkazuvchi organlarda roʻyxatdan oʻtkazilishi lozim boʻlgan binolar va inshootlarning 1 m² uchun mutlaq miqdorda belgilangan minimal qiymatga nisbatan kiritilayotgan koeffitsientlar 6-ilovaga muvofiq tasdiqlansin.

6. Ishtixon tumani hokimining birinchi oʻrinbosari (Q.Nuriddinov), Ishtixon tumani soliq inspeksiyasi (O.Usmonov) va Ishtixon tumani Iqtisodiyot va moliya boʻlimi (S.Ibragimov) bilan birgalikda 2026-yil mahalliy byudjeti uchun belgilangan koʻrsatkichlarning oʻz vaqtida va samarali bajarilishini taʼminlash choralarini koʻrish topshirilsin.

7. Hududiy byudjet mablagʻlarini taqsimlovchilar har chorak yakunida byudjet mablagʻlarining samarali va maqsadli sarflanishi hamda xarajatlarning amaliy natijalari yuzasidan xalq deputatlari tuman Kengashiga hisobot berib borsinlar.

Bunda hududiy byudjet mablagʻlarini taqsimlovchilar:

byudjetdan ajratilgan mablagʻlardan maqsadli va samarali foydalanishni, xususan ish haqi va unga tenglashtirilgan toʻlovlar, oziq-ovqat, dori-darmon, kommunal xizmatlar hamda davlat dasturlari uchun belgilangan xarajatlarning toʻliq rejalashtirilishi va oʻz vaqtida toʻlanishini;

oʻzlarining va tasarrufidagi tashkilotlarning xarajatlar smetasi, shtat jadvallari, daromadlar va xarajatlar smetalarining toʻgʻri tuzilishini;

byudjetdan ajratilgan mablagʻlarning maqsadli sarflanishi va maqsadli indikatorlarning toʻliq bajarilishini;

tasarrufidagi tizim tashkilotlariga byudjetdan ajratiladigan mablagʻlarning toʻgʻri taqsimlanishini;

oʻz tizimida byudjet intizomiga amal qilinishini;

byudjet jarayonining ochiqligini taʼminlash maqsadida rasmiy veb-saytlarda tegishli maʼlumotlarni joylashtirib borilishini taʼminlasinlar.

8. Ishtixon tumani hokimligi axborot xizmati rahbari-matbuot kotibi (M.Tursunov), “Ishtixon ovozi” gazetasi muharriri (M.Rabbimova)larga mazkur qarorni ommaviy axborot vositalari orqali keng yoritib borish hamda tuman hokimligining rasmiy veb-saytiga joylash tavsiya etilsin.

9. Mazkur qarorning ijrosini nazorat qilish Xalq deputatlari Ishtixon tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (S.Abdugʻaniyev) hamda Ishtixon tumani hokimining birinchi oʻrinbosari (Q.Nuriddinov) zimmasiga yuklatilsin.

10. Mazkur qaror qabul qilingan kundan eʼtiboran kuchga kiradi.