Oʻzbekiston Respublikasi Prezidentining “Resurs soliqlari va mol-mulk soligʻini yanada takomillashtirish toʻgʻrisida” 2020-yil 3-dekabrdagi PF-6121-son Farmoni va “Soliq majburiyatlarini bajarishda tadbirkorlik subyektlariga yanada qulay shart-sharoitlar yaratish chora-tadbirlari toʻgʻrisida” 2021-yil 7-sentabrdagi PF-6307-son Farmoni, Oʻzbekiston Respublikasi Soliq kodeksining 429, 437-moddalari hamda Zarafshon shahar soliq inspeksiyasining 2025-yil 12-dekabrdagi 14-13481-son xatini inobatga olib, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6, 24-moddalariga asosan xalq deputatlari shahar Kengashi qaror qiladi:

1. Shahar soliq inspeksiyasi boshligʻi oʻrinbosari B. Berdiyevning 2026-yil uchun yuridik va jismoniy shaxslarning MFY kesimida ularning iqtisodiy rivojlanishiga qarab kamaytiruvchi va oshiruvchi koeffitsiyentlarini qoʻllagan holda yer soligʻi, yer qaʼridan foydalanganlik soliq va suv resurslaridan foydalanganlik uchun soliq stavkalarini belgilash toʻgʻrisidagi hisoboti maʼlumot uchun qabul qilinsin.

2. Shaharning iqtisodiy rivojlanishidan kelib chiqib, jismoniy shaxslar boʻyicha 2026-yil uchun qishloq xoʻjaligiga moʻljallanmagan yerlar uchun tavsiya etiladigan yer soligʻi stavkasi 1-ilovaga, yuridik shaxslar boʻyicha 2026-yil uchun qishloq xoʻjaligiga moʻljallanmagan yerlar uchun tavsiya etiladigan yer soligʻi stavkasi 2-ilovaga, yuridik shaxslar boʻyicha 2026-yil uchun yer qaʼridan foydalanganlik uchun soliq stavkasi 3-ilovaga muvofiq hamda 2026-yil uchun suv resurslaridan foydalanganlik uchun soliq stavkasi 4-ilovaga muvofiq tasdiqlansin.

3. Qaror “Oltin vodiy” gazetasida rasmiy eʼlon qilinsin hamda shahar hokimligining rasmiy veb-saytiga joylashtirilsin.

4. Qaror ijrosini taʼminlash shahar soliq inspeksiyasi boshligʻi R. Baxronov hamda nazorat qilish xalq deputatlari shahar Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiya raisi R. Nurnazarov zimmasiga yuklansin.