Oʼzbekiston Respublikasi “Mahalliy davlat hokimiyati toʼgʼrisida”gi Qonunining 6, 24-moddalari, Budjet kodeksining 27, 99-moddalari, “2026 yil uchun Oʼzbekiston Respublikasining Davlat budjeti toʼgʼrisida”gi 2025-yil 25-dekabrdagi OʼRQ-1105-son Qonuniga va, xalq deputatlari tuman Kengashi qaror qiladi:

1. Oʼzbekiston Respublikasining “2026-yil uchun Oʼzbekiston Respublikasining Davlat budjeti toʼgʼrisida”gi Qonuni (keyingi oʼrinlarda Qonun deb yuritiladi) rahbarlik va ijro uchun qabul qilinsin.

2. Qarorga muvofiq, Navbahor tuman budjetining 2026-yilgi daromadlari 128 444 510,0 ming soʼm va xarajatlari esa 128 444 510,0 ming soʼmga maʼlumot uchun qabul qilinganligi, shuningdek Navbahor tuman budjetining shaxsiy gʼazna hisobvaragʼida turgan budjet mablagʼlarining yoʼl qoʼyiladigan eng kam miqdori 1 098 057,0 ming soʼm etib belgilanganligi inobatga olinsin.

3. Tuman budjeti daromadlarining 2026-yil uchun asosiy prognoz koʼrsatkichlari 1-ilovaga muvofiq hamda tuman budjetidan 2026-yilda hududiy budjet mablagʼlarini taqsimlovchilarga ajratiladigan xarajatlarning cheklangan miqdorlari 2-ilovaga muvofiq tasdiqlansin.

4. Tuman budjeti zaxira jamgʻarmasi hajmi 2026-yil uchun 1 759 697,0 ming soʼm miqdorida belgilansin.

Bunda, zaxira jamgʼarmasi mablagʻlarini amaldagi budjet qonunchiligiga muvofiq, budjet tizimi budjetlari shakllantirilayotganda oldindan nazarda tutib boʼlmaydigan xarajatlarni, shuningdek ijtimoiy-iqtisodiy beqarorlik yuzaga kelgan vaziyatlarda amalga oshirilishi zarur boʼlgan tadbirlarni moliyalashtirish uchun yoʼnaltirilishi taʼminlansin.

5. Tuman hokimining moliya-iqtisodiyot va kambagʼallikni qisqartirish masalalari boʼyicha birinchi oʼrinbosari M. Jumaboev, tuman Iqtisodiyot va moliya boʼlimi (N. Xotamov), tuman soliq inspektsiyasi (Sh. Berdiev) bilan birgalikda 2026-yil mahalliy budjeti uchun belgilangan koʼrsatkichlarni oʼz vaqtida va samarali bajarilishini taʼminlash choralarini koʼrsin.

6. Hududiy budjet mablagʼlarini taqsimlovchilar har chorak yakuni bilan budjet mablagʼlarining samarali va maqsadli sarflanganligi, xarajatlarning amaliy natijalari yuzasidan xalq deputatlari tuman Kengashiga hisobot berib borsinlar.

Bunda, hududiy budjet mablagʻlarini taqsimlovchilar:

budjetdan ajratilgan mablagʻlardan maqsadli va samarali foydalanish, xususan ish haqi va unga tenglashtirilgan toʼlovlar, oziq-ovqat, dori-darmon, kommunal xizmatlar va davlat dasturlari uchun belgilangan xarajatlarni toʼliq rejalashtirilishi va oʻz vaqtida toʼlanishi;

oʼzlarining va tasarrufidagi tashkilotlarning xarajatlar smetasi va shtat jadvallari hamda daromadlar va xarajatlar smetalarining toʻgʻri tuzilishi;

budjetdan ajratilgan mablagʼlarning maqsadli sarflanishi va maqsadli indikatorlarning toʼliq bajarilishi;

tasarrufidagi tizim tashkilotlariga budjetdan ajratiladigan mablagʼlarning toʼgʼri taqsimlanishi;

oʼz tasarrufidagi tizimda budjet intizomiga amal qilinishi ustidan nazorat qilinishini;

budjet jarayonining ochiqligini taʼminlash maqsadida rasmiy veb-saytlarda maʼlumotlarni joylashtirib borilishini taʼminlasinlar.

7. Mazkur qaror tegishli tahririyatlar va ommaviy axborot vositalarida yoritilishi tavsiya etilsin hamda tuman hokimligining rasmiy veb-saytiga joylashtirilsin.

8. Mazkur qaror bajarilishini nazorat qilish xalq deputatlari Navbahor tuman Kengashining mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari doimiy komissiyasi (T. Аbdiev) hamda tuman hokimining moliya-iqtisodiyot va kambagʼallikni qisqartirish masalalari boʼyicha birinchi oʼrinbosari M. Jumaboev zimmasiga yuklatilsin.