Oʻzbekiston Respublikasi “Mahalliy davlat hokimiyati toʻgʻrisida”gi Qonunining 24-moddasi, Budjet kodeksining 27, 99-moddasi, Oʻzbekiston Respublikasining “2026-yil uchun Oʻzbekiston Respublikasining Davlat byudjeti toʻgʻrisida” 2025-yil 25-dekabrdagi OʻRQ-1105-sonli Qonuniga muvofiq, Oʻzbekiston Respublikasi Hisob palatasining 2025-yil 20-oktabrdagi 02-1515-sonli va Iqtisodiyot va moliya vazirligining 2025-yil 25-dekabrdagi 01/57-1-29241-sonli, viloyat iqtisodiyot va moliya boshqarmasining 2025-yil 25-dekabrdagi xatlari, viloyat iqtisodiyot va moliya boshqarmasi boshligʻining birinchi oʻrinbosari Sh.Jumayevning axboroti hamda bildirilgan fikr va mulohazalarni inobatga olib, Xalq deputatlari Navoiy viloyati Kengashi, qaror qiladi:

1. Oʻzbekiston Respublikasining 2025-yil 25-dekabrdagi “2026-yil uchun Oʻzbekiston Respublikasining Davlat budjeti toʻgʻrisida”gi OʻRQ-1105-sonli Qonuni ijro uchun qabul qilinsin.

2. Oʻzbekiston Respublikasining “2026-yil uchun Oʻzbekiston Respublikasining Davlat budjetitoʻgʻrisida”gi OʻRQ-1105-sonli Qonuniga (keyingi oʻrinlarda — Qonun deb ataladi) muvofiq, Navoiy viloyati viloyat mahalliy budjetining 2026-yil uchun budjet daromadlari4 095,6 mlrd. soʻm, xarajatlari 4 199,2 mlrd. soʻm, respublika budjetidan ajratiladigan tartibga soluvchi budjetlararo transfertlar 103,6 mlrd. soʻm shundan, aksiz soligʻi tushumlari hisobidan ajratiladigan mablagʻlar 103,6 mlrd. soʻm etib belgilanganligi maʼlumot uchun qabul qilinsin.

3. 2026-yil uchun Navoiy viloyatini rivojlantirishning asosiy makroiqtisodiy koʻrsatkichlari prognozi va 2027-2028-yillarga maqsadli moʻljallar 1-ilovaga muvofiq maʼlumot uchun qabul qilinsin.

4. Quyidagilar:

Navoiy viloyatining viloyat budjetidaromadlarining soliq turlari kesimida 2026-yildagi asosiy prognoz koʻrsatkichlari 2-ilovaga muvofiq;

2026-yilgi viloyat mahalliy budjetidan budjet tashkilotlari va mablagʻlarini taqsimlovchilarga ajratiladigan xarajatlarning umumiy cheklangan miqdorlari 3-ilovaga muvofiq;

2026-yil uchun tumanlar va shaharlar budjetlariga umumdavlat soliqlaridan ajratmalar meʼyorlari 4-ilovaga muvofiq tasdiqlansin.

Bunda, ajratmalar normativlari boʻyicha viloyat mahalliy budjeti bilan tuman va shaharlar mahalliy budjetlarining taqsimotini oʻrnatilgan tartibda Navoiy viloyati boʻyicha Gʻaznachilik xizmati boshqarmasi tomonidan amalga oshirilishi belgilab qoʻyilsin.

5. Shahar va tumanlar mahalliy budjetining 2026-yilgi daromadlari va xarajatlarining chegaraviy hajmi shuningdek, respublika budjetidan (aksiz soligʻi tushumlari hisobidan) hamda viloyat budjetidan tuman va shahar mahalliy budjetlariga ajratiladigan tartibga soluvchi budjetlararo transfertlar miqdorlari 5-ilovaga muvofiq tasdiqlansin.

Bunda, tartibga soluvchi budjetlararo transfertlar miqdorini tuman va shahar mahalliy budjetlari daromadlari prognozi ijrosidan qatʼiy nazar kamaytirishga yoʻl qoʻyilmasligi Qonunda belgilab qoʻyilganligi maʼlumot uchun qabul qilinsin.

6. 2026-yil uchun viloyatning viloyat budjeti zaxira jamgʻarmasi hajmlari 23,3 mlrd. soʻm miqdorida belgilansin.

Tumanlar va shaharlar budjetlarining 2025-yil uchun zaxira jamgʻarmalari tegishli budjetlar tasdiqlangan umumiy xarajatlarining kamida 1,0 foizi miqdorida shakllantirilsin.

Bunda davlat tibbiy sugʻurtasi mexanizmlari joriy etilgan hududlarda tegishli tumanlar va shaharlar budjetlarining zaxira jamgʻarmalari ushbu mexanizmlar joriy etilgan yildan oldingi yildagi hajmdan kam boʻlmagan miqdorlarda shakllantiriladi hamda qoʻshimcha mablagʻlarni shakllantirish tegishincha yuqori turuvchi budjetlarning zaxira jamgʻarmalari mablagʻlarini kamaytirish hisobiga amalga oshiriladi.

Belgilab qoʻyilsinki, Navoiy viloyati viloyat budjetining, tumanlar va shaharlar budjetlarini ijro etish chogʻida yuqori turuvchi budjetdan ajratiladigan budjetlararo transfertlarning miqdorlari oshgan taqdirda, tegishlibudjetlarining zaxira jamgʻarmalarining tegishli miqdorlari qayta koʻrib chiqilmaydi.

Navoiy viloyati mahalliy budjetihamda shahar va tumanlari budjetlarida yoʻl qoʻyiladigan eng kam mablagʻlar miqdori 6-ilovaga muvofiq belgilansin.

7. Qonun bilan 2026-yilda xalq deputatlari mahalliy Kengashlarining mahalliybudjetlarni boshqarishda, xususan mahalliy budjet xarajatlarini hududiy budjet mablagʻlari taqsimlovchilar kesimida tasdiqlash va ularning Kengash oldidagi hisobdorligini belgilash boʻyicha vakolatlari kengaytirilganligi inobatga olinsin.

8. 2026-yilda quyidagi soliq turlari:

a) tuman (shahar) budjetlariga toʻliq hajmda oʻtkaziladi:

jismoniy shaxslardan olinadigan mol-mulk soligʻi;

jismoniy shaxslardan olinadigan yer soligʻi;

mol-mulkni ijaraga berishdan olinadigan yillik daromad toʻgʻrisidagi deklaratsiyaga asosan jismoniy shaxslar tomonidan toʻlanadigan daromad soligʻi;

suv resurslaridan foydalanganlik uchun soliq;

noruda qurilish materiallari boʻyicha yer qaʼridan foydalanganlik uchun soliq;

aylanmadan olinadigan soliq;

yuridik shaxslarning mol-mulkiga solinadigan soliq (bundan yirik soliq toʻlovchilar tomonidan toʻlanadigan soliq mustasno);

yuridik shaxslardan olinadigan yer soligʻi (bundan yirik soliq toʻlovchilar tomonidan toʻlanadigan soliq mustasno);

davlat aktivlarini ijaraga berishdan tushumlar.

Ushbu moddaning birinchi qismida nazarda tutilgan daromadlar turlari qoʻllanilganda, tumanlar va shaharlar budjetlarining daromadlari xarajatlaridan koʻp boʻlgan taqdirda, xalq deputatlari viloyat Kengashi yuqori turuvchi budjetga ajratmalarni nazarda tutishi mumkin.

b) viloyatning viloyat budjeti daromadlari viloyat mahalliy budjetiga toʻliq hajmda oʻtkaziladi:

yirik soliq toʻlovchilar tomonidan toʻlanadigan, yuridik shaxslarning mol-mulkiga solinadigan soliq;

yirik soliq toʻlovchilar tomonidan toʻlanadigan, yuridik shaxslardan olinadigan yer soligʻi;

benzinni, dizel yoqilgʻisini va gazni yakuniy isteʼmolchilarga realizatsiya qilishdagi aksiz soligʻi;

tamaki mahsulotlari (import orqali kirgan mahsulotlardan tashqari) uchun aksiz soligʻi boʻyicha tushumlar, tegishincha oʻtgan moliya yilining 1-iyul holatiga koʻra Oʻzbekiston Respublikasi Milliy statistika qoʻmitasidan olingan Navoiy viloyati aholisining soni tuman va shaharlar aholi soni ulushiga muvofiq, bunda daromadlar Navoiy viloyatining viloyat budjeti boʻyicha prognozning bajarilmagan qismi respublika budjeti mablagʻlari hisobidan qoplanishi, daromadlar boʻyicha prognozning oshirib bajarilgan qismi esa respublika budjeti ixtiyorida qolishi maʼlumot uchun qabul qilinsin.

v) soliqlar viloyat mahalliy budjetiga quyidagi ulushlarda oʻtkaziladi:

jismoniy shaxslardan olinadigan daromad soligʻidan tushgan tushumlarning (jismoniy shaxslar mol-mulkni ijaraga berishdan olinadigan yillik daromad toʻgʻrisidagi deklaratsiyaga asosan toʻlaydigan, shuningdek yakka tartibdagi tadbirkorlar toʻlaydigan jismoniy shaxslardan olinadigan daromad soligʻidan tashqari) Navoiy viloyati budjeti ixtiyorida 66 foiz qolishi;

foyda soligʻidan tushgan tushumlarning (Oʻzbekiston Respublikasi Prezidentining qarori bilan tasdiqlanadigan roʻyxatga muvofiq yirik soliq toʻlovchilar, Oʻzbekiston Respublikasida doimiy muassasa orqali faoliyatni amalga oshiruvchi Oʻzbekiston Respublikasi norezidentlari tomonidan, shuningdek, norezidentlarning toʻlov manbaidan ushlab qolinadigan daromadlaridan toʻlanadigan foyda soligʻidan tashqari) Navoiy viloyatibudjeti ixtiyorida 67 foiz qolishi;

qoʻshilgan qiymat soligʻidan tushgan tushumlarning (Oʻzbekiston Respublikasi Prezidentining qarori bilan tasdiqlanadigan roʻyxatga muvofiq yirik soliq toʻlovchilardan tashqari) viloyatda 20 foizi;

alkogol mahsulotlari, shu jumladan, pivo (import qilinadigan alkogol mahsulotlari va pivodan tashqari) uchun ishlab chiqaruvchilar tomonidan toʻlanadigan aksiz soligʻining 30 foizi oʻtkazilishi belgilanganligi maʼlumot uchun qabul qilinsin.

g) qonunchilikda belgilangan miqdorlarda quyidagi daromadlar respublika va viloyat mahalliy budjeti oʻrtasida taqsimlanadi:

davlat bojlari;

jarimalar;

yigʻimlar;

davlat daromadiga oʻtkazilgan mol-mulkni realizatsiya qilishdan tushumlar;

Qonunchilikda belgilangan tartibda davlat aktivlarini sotishdan tushadigan tushumlar tegishli ravishda obyektjoylashgan tuman (shahar) mahalliy budjetilariga va viloyat budjetiga teng ulushlarda taqsimlanadi.

Jismoniy shaxslardan olinadigan daromad soligʻi tushumlarining kamida 50 foizi (bundan yirik soliq toʻlovchilar tomonidan toʻlanadigan soliq mustasno) tuman va shaharlar mahalliy budjetlariga oʻtkaziladi.

9. Viloyat Iqtisodiyot va moliya bosh boshqarmasi (Sh. Jumayev) Oʻzbekiston Respublikasi Prezidentining 2025-yil 26-dekabrdagi PQ-387-sonli qaroriga muvofiq:

respublika budjetidan Navoiy viloyatining viloyat budjetiga oʻtkazib beriladigan daromadlar prognozining oshirib bajarilgan qismining 50 foizi viloyat budjetiga qolgan 50 foizi2025-yil 1-dekabr holatiga statistika organlaridan olingan tuman (shahar)lar aholisidagi ulushiga muvofiq tuman (shahar)lar budjetlariga;

dehqon bozorlari, ixtisoslashtirilgan va buyum bozorlaridan tushgan soliqlar boʻyicha viloyat budjetiga oʻtkazilgan mablagʻlarni ushbu sohadagi hamda mahallalarda infratuzilmani yaxshilash uchun mazkur bozorlar joylashgan tuman (shahar)lar budjetlariga toʻliq oʻtkazilishini taʼminlasin.

10. Xalq deputatlari viloyat Kengashi:

tegishli darajadagi mahalliy budjetlarga ajratiladigan soliqlarni va boshqa turdagi daromadlarni hamda budjetlararo transfertlarni taqsimlashga;

daromadlarning prognozini oshirib bajarishdan olingan mablagʻlarning bir qismini tumanlar va shaharlar budjetlariga hududni ijtimoiy-iqtisodiy rivojlantirish dasturlarini amalga oshirish uchun berilishga;

Qonunning 8-ilovasi 1-bandida belgilangan ijara toʻlovining eng kam stavkalariga nisbatan tumanlar va shaharlar kesimida, ularning iqtisodiy rivojlanish darajasiga qarab 2,0 (ikki) gacha oshiruvchi koeffitsiyentni joriy etishga;

xalq deputatlari tuman va shahar Kengashlari tuman hamda shaharlarning ommaviy dam olishga va (yoki) turizmga ixtisoslashtirilgan ayrim hududlarda mol-mulkni ijaraga beruvchi jismoniy shaxslar uchun belgilangan ijara toʻlovining eng kam stavkalariga Toshkent shahri uchun belgilangan miqdorlargacha oʻsib boruvchi koeffitsiyentlarni joriy etishga haqliligi maʼlumot uchun qabul qilinsin.

Qonunga muvofiq berilgan vakolatlardan kelib chiqib:

Quyidagilar:

viloyat mahalliy budjetiga qoʻshilgan qiymat soligʻidan tushgan tushumlarning viloyatdagi 20 foiz miqdoridagi ulushi viloyat budjeti hamda shahar va tumanlar budjetlari oʻrtasida Karmana tumaniga 18 foiz, Navoiy shahriga 34 foiz, Qiziltepa, Tomdi, Xatirchi tumanlariga 50 foiz, Zarafshon va Gʻozgʻon shaharlariga hamda Navbahor, Nurota, Konimex, Uchquduq tumanlariga 100 foiz miqdorida (yirik soliq toʻlovchilar tomonidan toʻlanadigan soliqlar bundan mustasno);

viloyat mahalliy budjetiga jismoniy shaxslardan olinadigan daromad soligʻidan tushgan tushumlarning 66 foiz miqdoridagi ulushi viloyat budjeti hamda shahar va tumanlar budjetlari oʻrtasida Navoiy shahriga 2 foiz, Karmana tumaniga 5 foiz, Tomdi tumaniga 20 foiz, Xatirchi tumaniga 50 foiz, Qiziltepa tumaniga 55 foiz, Konimex tumaniga 62 foiz, Zarafshon shahriga 95 foiz, Gʻozgʻon shahar va Navbahor, Nurota, Uchquduq tumanlariga 100 foiz miqdorida (yirik soliq toʻlovchilar tomonidan toʻlanadigan soliqlar bundan mustasno);

viloyat mahalliy budjetiga foyda soligʻidan tushgan tushumlarning viloyati budjeti ixtiyoridagi 67 foiz miqdoridagi ulushi viloyat budjetihamda shahar va tumanlar budjetlarioʻrtasida Tomdi tumaniga 20 foiz, Qiziltepa tumaniga 30 foiz, Zarafshon shahriga va Nurota, Konimex, Xatirchi tumanlariga 50 foiz, Gʻozgʻon shahriga va Navbahor, Uchquduq tumanlariga 100 foiz miqdorida (yirik soliq toʻlovchilar tomonidan toʻlanadigan soliqlar bundan mustasno) budjetga taqsimlansin.

Tomdi tumanida suv resurslaridan foydalanganlik uchun soliq mahalliy budjet daromadining xarajatidan yuqori boʻlganligini inobatga olib, ushbu soliq tushumining 90 foizi Tomdi tumani mahalliy budjetiga, 10 foizi viloyat budjetiga (yirik soliq toʻlovchilar tomonidan toʻlanadigan soliqlar);

2025-yilda transfertdan chiqarish uchun benzin, dizel yoqilgʻisi va gazni oxirgi isteʼmolchiga realizatsiya qilishda toʻlanadigan aksiz soligʻi boʻyicha toʻlovning 50 foizi Nurota, Konimex tumanlariga, 70 foizi Qiziltepa tumaniga va 100 foizi Zarafshon shahar hamda Navbahor, Xatirchi, Uchquduq tumanlariga;

viloyat mahalliy budjeti oʻrtasida taqsimlanadigan davlat boji toʻlovining 25 foizi Tomdi tumaniga, 29 foizi Qiziltepa tumaniga, 51 foizi Navbahor tumaniga, 55 foizi Xatirchi tumaniga, 60 foizi Zarafshon shahriga, 100 foizi Gʻozgʻon shahar va Nurota, Konimex, Uchquduq tumanlariga;

viloyat mahalliy budjeti oʻrtasida taqsimlanadigan yigʻim toʻlovining 25 foizi Tomdi tumaniga, 29 foizi Qiziltepa tumaniga, 50 foizi Navbahor tumaniga, 56 foizi Xatirchi tumaniga, 66 foizi Zarafshon shahriga, 100 foizi Gʻozgʻon shahar va Nurota, Konimex, Uchquduq tumanlariga;

viloyat mahalliy budjeti oʻrtasida taqsimlanadigan jarima toʻlovining 25 foizi Tomdi tumaniga, 28 foizi Qiziltepa tumaniga, 50 foizi Navbahor tumaniga, 55 foizi Xatirchi tumaniga, 65 foizi Zarafshon shahriga, 100 foizi Gʻozgʻon shahar va Nurota, Konimex, Uchquduq tumanlariga oʻtkazilsin.

Davlat ulushi boʻyicha dividendlar, soliqsiz va boshqa daromad toʻlovlari viloyat budjeti ixtiyorida qoldirilsin.

11. Viloyat hokimining birinchi oʻrinbosari (R. Sulaymonov), viloyat iqtisodiyot va moliya bosh boshqarmasi (Sh. Jumayev), soliq boshqarmasi (S. Nazarov) tuman (shahar) hokimliklari hamda masʼul boshqarma va tashkilotlar bilan birgalikda:

tegishli budjetlarni birinchi navbatda ish haqi va unga tenglashtirilgan toʻlovlar, oziq-ovqat va dori-darmon va kommunal xizmatlar xarajatlarini rejalashtirilishini nazarda tutgan holda shakllantirish;

mahalliy budjetining prognoz koʻrsatkichlarni oʻz vaqtida va samarali bajarish;

budjet mablagʻlaridan maqsadli va samarali foydalanish;

budjet intizomiga rioya etilishi ustidan nazorat va masʼuliyatni yanada kuchaytirish;

tegishli mahalliy budjetlarga soliqlar va boshqa majburiy toʻlovlarning toʻliq tushumini taʼminlash;

budjet daromadlar bazasini oshirish va qoʻshimcha rezervlarni aniqlash zarurligiga alohida eʼtibor qaratsin.

12. Viloyat soliq boshqarmasi (S. Nazarov)ga:

soliqlarning toʻliq va toʻgʻri hisoblanishini hamda ushbu soliqlarni oʻz vaqtida budjetga undirilishi ustidan soliq nazoratini kuchaytirilishini;

barcha soliq turlaridan doimiy tahlillar oʻtkazgan holda, soliqlarni toʻliq hisoblanishini hamda ushbu soliq toʻlovlari boʻyicha soliq qarzdorligiga yoʻl qoʻymaslik choralari koʻrilishini;

Kadastr agentligining viloyat boshqarmasi bilan birgalikda viloyatda mavjud soliq toʻlovchilarning mol-mulklari maydonlarini chuqur tahlil etgan holda ushbu mol-mulklarga nisbatan soliqlarning toʻliq hisoblanishini;

aylanmadan soliq turi boʻyicha soliq toʻlovchilar tomonidan naqd pul aylanmalarining soliq hisobotlarida toʻliq aks ettirilishi ustidan doimiy soliq nazorati oʻrnatilishini hamda kameral soliq nazorati tadbirlarini oʻtkazilishini taʼminlash topshirilsin.

Bunda, mazkur yoʻnalishda jamoatchilik nazoratini kuchaytirish maqsadida fuqarolarga xarid chekini talab qilib olishni targʻib etuvchi ijtimoiy roliklar hamda video materiallar tayyorlab, ijtimoiy tarmoqlar va ommaviy axborot vositalarida keng targʻibot-tashviqot ishlarini olib borishga alohida eʼtibor qaratsin.

13. Viloyat soliq boshqarmasi (S. Nazarov) Kon-geologiya faoliyatini nazorat qilish inspeksiyasi Navoiy mintaqaviy inspeksiyasi hamda tuman (shahar) hokimliklari bilan birgalikda:

noruda qurilish materiallarini qazib olish sohasida noqonuniy faoliyat olib borayotgan karyerlarni aniqlash boʻyicha xatlovlar oʻtkazish;

xatlov natijalari boʻyicha aniqlangan noqonuniy faoliyat olib borayotgan karyerlar faoliyatini qonuniylashtirish hamda ularni soliq bazasiga qamrab olish;

noruda qurilish materiallarini qazib olish sohasida faoliyat olib borayotgan karyerlar tomonidan qazib olinayotgan noruda qurilish materiallar hajmining soliq hisobotlarida toʻliq aks ettirish ustidan doimiy nazorat oʻrnatsin.

Bunda, ushbu sohada faoliyat olib borayotgan karyerlarning qazib olish hajmlarini doimiy tahlil qilib borish hamda zarur hollarda qazib olish hajmlarini aniqlashda mahalliy budjetning qoʻshimcha manbalari hisobidan “marksheyderlik” xizmatlaridan foydalanish lozimligi alohida belgilab qoʻyilsin.

14. Majburiy ijro byurosi Navoiy viloyat boshqarmasi viloyat soliq boshqarmasi bilan hamkorlikda soliqlar va boshqa majburiy toʻlovlar boʻyicha mavjud soliq qarzdorliklarini budjetgaundirish yuzasidan hamda choraklar yakuni bilan soliq qarzdorliklarining chorak boshiga nisbatan kamayib borishi boʻyicha barcha kompleks chora-tadbirlarni koʻrib borsin.

15. Tuman va shahar hokimliklari jismoniy shaxslarning yer va mol-mulk soliqlari boʻyicha joriy hisoblangan soliqlarni hamda ushbu soliqlardan mavjud soliq qarzdorliklarini undirish yuzasidan soliq organlariga amaliy yordam koʻrsatsin.

16. Davlat aktivlarini boshqarish agentligi Navoiy viloyat hududiy boshqarmasi (N. Atajanov) Boʻsh turgan obyektlaridan samarali foydalanishni tashkil etish markazining Navoiy viloyat hududiy boshqarmasi (A. Sharipov) bilan birgalikda:

boʻsh turgan davlat mulki obyektlarini aniqlash boʻyicha xatlov ishlarini samarali tashkil etish;

xatlov natijalariga koʻra viloyatda mavjud boʻsh turgan davlat mulki obyektlari roʻyxatini shakllantirish;

shakllantirilgan roʻyxatga asosan boʻsh turgan davlat mulki obyektlarini ijaraga berish yoki sotish boʻyicha tegishli takliflar tayyorlash;

boʻsh turgan davlat mulki obyektlarini ijaraga berish yoki sotish boʻyicha ijtimoiy tarmoqlar va ommaviy axborot vositalarida roliklar va video-materiallar tayyorlash;

xususiylashtirilishi moʻljallangan boʻsh turgan davlat mulki obyektlarini "e-auksion" elektron savdo platformasi orqali sotish ishlarini tashkillashtirish choralarini koʻrsin.

17. Davlat aktivlarini boshqarish agentligi Navoiy viloyat hududiy boshqarmasi (N. Atajanov), viloyat soliq boshqarmasi (S. Nazarov), viloyat iqtisodiyot va moliya bosh boshqarmasi (Sh. Jumayev) davlat korxonalari hamda ustav kapitalida 50 foiz va undan ortiq davlat ulushi mavjud boʻlgan yuridik shaxslar tomonidan 2026-yilning 1-iyuliga qadar 2025-yil yakunlari boʻyicha oʻz sof foydasining 50 foizidan kam boʻlmagan miqdoridagi ajratmalar va davlat ulushi boʻyicha dividendlarni 2026-yilning 1-sentabridan kechiktirmay tegishli darajadagi budjetlarga oʻtkazilishini taʼminlasin.

18. Viloyat soliq boshqarmasi (S. Nazarov), Raqobatni rivojlantirish va isteʼmolchilar huquqlarini himoya qilish boshqarmasi (A. Muhammadiyev) tuman va shahar hokimliklari bilan birgalikda tashqi reklama obyektlarini toʻliq xatlovdan oʻtkazgan holda, ushbu tashqi reklama obyektlari boʻyicha shartnomalar tuzish choralarini koʻrsin hamda ushbu shartnomalar boʻyicha yigʻimlarni budjetga toʻlanishi ustidan doimiy nazorat oʻrnatsin.

19.Quyi Zarafshon irrigatsiya tizimlari havza boshqarmasi (O. Sadinov), viloyat soliq boshqarmasi (S. Nazarov) tuman va shahar hokimliklari bilan birgalikda viloyatda sugʻorishga sarflanayotgan suv hajmlari boʻyicha aniq hisob-kitoblar yuritgan holda mazkur isteʼmol hajmlari boʻyicha suv resurslaridan foydalanganlik uchun soliqlarni toʻliq hisoblanishini hamda moliya yili yakuniga qadar mahalliy budjetlarga toʻliq undirib olish boʻyicha tizimli ishlarni olib borilishini taʼminlasin.

Bunda, qishloq xoʻjaligi korxonalari tomonidan isteʼmol qilinayotgan suv resurslari hajmlari va ushbu hajmlar boʻyicha hisoblanayotgan suv soliqlari boʻyicha doimiy tahlillar oʻtkazishga alohida eʼtibor qaratilsin.

20. Viloyat ichki ishlar boshqarmasi (A. Tasbayev), viloyat yoʻl harakati xavfsizligi boshqarmasi hisoblangan boj, jarima va yigʻimlarni oʻz vaqtida oʻrnatilgan tartibda budjetga undirish choralarini koʻrib borsin.

21. Davlat moliyaviy nazorati inspeksiyasi (N. Toshev) viloyat maktabgacha va maktab taʼlimi hamda sogʻliqni saqlash boshqarmalarining ichki audit xizmatlari bilan birgalikda:

budjet intizomiga qatʼiy rioya etilishi ustidan doimiy monitoring ishlarini kuchaytirsin;

budjet intizomini buzish holatlari boʻyicha har chorak yakuni bilan xalq deputatlari viloyat Kengashiga axborot kiritib borsin.

Oʻtkazilgan nazorat tadbirlari yakuni boʻyicha kamomad va noqonuniy oʻzlashtirishga yoʻl qoʻygan soha rahbarlarining hisoboti har chorakda eshitib borilsin.

22. Xalq deputatlari viloyat Kengashining mahalliy budjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari boʻyicha doimiy komissiyasi:

mahalliy budjetning qoʻshimcha manbalaridan foydalanish toʻgʻrisidagi hokimlik tomonidan taqdim etilgan takliflar asosida budjet qonunchiligiga toʻliq rioya etilgan holda Kengash qarori loyihasini ishlab chiqilishiga;

Kengash qarori asosida mahalliy budjetning qoʻshimcha manbalari hisobidan ajratilgan mablagʻlarni samarali va maqsadli foydalanishi ustidan nazorat oʻrnatishga, natijalari boʻyicha tavsiyalar berishga, monitoring qilishga;

mahalliy budjet xarajatlarining qonunchilikda belgilangan qismining jamoatchilik fikri asosida shakllantirilgan tadbirlarni moliyalashtirishga yoʻnaltirilishiga hamda ushbu mablagʻlarning maqsadli sarflanishi ustidan nazoratni amalga oshirishga masʼul etib belgilansin.

23. Viloyat hokimining birinchi oʻrinbosari (R. Sulaymonov), xalq deputatlari viloyati Kengashi kotibiyati, tuman va shahar hokimliklari, tegishli boshqarma boshliqlari:

mahalliy budjet daromad va xarajatlarining prognoz koʻrsatkichlari bajarilishi hamda soliq bazasini kengaytirish yuzasidan koʻrilgan chora-tadbirlar;

ajratilgan budjet mablagʻlaridan maqsadli va samarali foydalanishi yuzasidan erishilgan natijalar boʻyicha xalq deputatlari mahalliy Kengashlariga bir chorakda kamida bir marotaba hisobot kiritib borsin.

24. Viloyat hokimligi Qonunda belgilangan ayrim soliqlar va toʻlov stavkalari, soliq solish tartiblari hamda boshqa maʼlumotlarni ommaviy axborot vositalarida yoritilishini taʼminlasin.

25. Mazkur qaror “Doʻstlik bayrogʻi” va “Знамя дружбы” gazetalarida rasmiy eʼlon qilinsin hamda viloyat hokimligining rasmiy veb-saytiga joylashtirilsin.

26. Ushbu qaror 2026-yil 1-yanvardan eʼtiboran kuchga kiradi.

27. Mazkur qaror bajarilishini nazorat qilish viloyat hokimining birinchi oʻrinbosari (R. Sulaymonov) va xalq deputatlari viloyat Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (N. Isoqov) zimmalariga yuklatilsin.