Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6, 24-moddalari, Budjet kodeksining 27, 99-moddalari, “2026-yil uchun Oʻzbekiston Respublikasining Davlat budjeti toʻgʻrisida”gi OʻRQ-1105-sonli qonuniga va xalq deputatlari Navoiy viloyati Kengashining “Navoiy viloyatining 2026-yilgi mahalliy budjetini tasdiqlash toʻgʻrisida”gi VII-22-165-5-0-K/25-sonli qaroriga muvofiq hamda Navoiy viloyati Iqtisodiyot va moliya bosh boshqarmasining 01-12/20-01-38/3532-sonli xatini inobatga olib, xalq deputatlari tuman Kengashi qaror qiladi:

1. Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi OʻRQ-1105-sonli qonuni hamda Xalq deputatlari Navoiy viloyati Kengashining 2025-yil 29-dekabrdagi “Navoiy viloyatining 2026-yilgi mahalliy budjetini tasdiqlash toʻgʻrisida”gi VII-22-165-5-0-K/25-sonli qarori ijro uchun qabul qilinsin.

2. Xalq deputatlari Navoiy viloyati Kengashining 2025-yil 29-dekabrdagi “Navoiy viloyatining 2026-yilgi mahalliy budjetini tasdiqlash toʻgʻrisida”gi VII-22-165-5-0-K/25-sonli qaroriga muvofiq, Uchquduq tumanining mahalliy budjeti 2026-yil uchun daromadlari 74 183,403 mln. soʻm, xarajatlari 99 312,900 mln. soʻm, jami ajratiladigan tartibga soluvchi transfertlar miqdori 25 129,497 mln. soʻm tasdiqlanganligi maʼlumot uchun qabul qilinsin.

3. Quyidagilar:

Uchquduq tumani mahalliy budjeti daromadlarining 2026-yilgi asosiy prognoz koʻrsatkichlari 1-ilovaga muvofiq;

2026-yil uchun tuman mahalliy budjet mablagʻlarini taqsimlovchilarga ajratiladigan mablagʻlarning cheklangan miqdori 2-ilovaga muvofiq tasdiqlansin.

4. Xalq deputatlari Navoiy viloyati Kengashining “Navoiy viloyatining 2026-yilgi mahalliy budjeti parametrlarini tasdiqlash toʻgʻrisida”gi ilovasi bilan tasdiqlangan Uchquduq tumani budjetiga soliqlaridan ajratmalar meʼyorlari 3-ilovaga muvofiq maʼlumot uchun qabul qilinsin.

Bunda, ajratma meʼyorlari boʻyicha tuman mahalliy budjetining taqsimotini oʻrnatilgan tartibda tuman gʻaznachilik xizmati tomonidan amalga oshirilishi belgilab qoʻyilsin.

5. 2026-yil uchun tuman budjet daromadlari va xarajatlari prognozlari 4-ilovaga muvofiq maʼlumot uchun qabul qilinsin.

6. Tuman mahalliy budjetiga ajratiladigan tartibga soluvchi budjetlararo transfertlar miqdorlari 5-ilovaga muvofiq tasdiqlansin.

7. Tuman mahalliy budjetining shaxsiy gʻazna hisobvaraqlarida turgan budjet mablagʻlarining yoʻl qoʻyiladigan eng kam mablagʻlar miqdori 6-ilovaga muvofiq tasdiqlansin.

Bunda, tartibga soluvchi budjetlararo transfertlar miqdorini tuman mahalliy budjeti daromadlari prognozi ijrosidan qatʼi nazar kamaytirishga yoʻl qoʻyilmasligi Qonunda belgilab qoʻyilganligi maʼlumot uchun qabul qilinsin.

8. 2026-yil uchun tumanning tuman budjeti zahira jamgʻarmasi hajmlari 1 202,009 mln. soʻm miqdorida belgilansin.

Bunda, tuman budjetining 2026-yil uchun zahira jamgʻarmasi tegishli budjetlar tasdiqlangan umumiy xarajatlarining kamida 1,0 foizi miqdorida shakllantirilsin.

Tuman mahalliy budjetini ijro etishda yuqori turuvchi budjetdan ularga ajratiladigan budjetlararo transfertlarning prognozidan oshgan qismi uchun tegishli budjetlarining zaxira jamgʻarmalar miqdorlariga aniqlashtirish kiritilmaydi.

Tuman budjetining zaxira jamgʻarmalari mablagʻlarini budjet tizimi budjetlari shakllantirilayotganda oldindan nazarda tutib boʻlmaydigan xarajatlarni, shuningdek, ijtimoiy-iqtisodiy beqarorlik yuzaga kelgan vaziyatlarda amalga oshirilishi zarur boʻlgan tadbirlarni moliyalashtirish uchun ajratilishi taʼminlansin.

9. 2026-yil uchun tuman mahalliy budjeti shaxsiy gʻazna hisob-varaqlarida turgan budjet mablagʻlarining yoʻl qoʻyiladigan eng kam miqdori 1 364,729 mln. soʻmni hamda tuman budjeti shaxsiy gʻazna hisob-varaqlarida turgan budjet mablagʻlarining yoʻl qoʻyiladigan eng kam miqdori 6-ilovaga muvofiq belgilansin.

10. 2026-yilda xalq deputatlari Kengashlarini mahalliy budjetlarni boshqarishda, xususan mahalliy budjet xarajatlarini hududiy budjet mablagʻlari taqsimlovchilar kesimida tasdiqlash va ularning Kengash oldidagi hisobdorligini belgilash boʻyicha vakolatlari kengaytirilganligi inobatga olinsin.

Shuningdek, 2026-yilda quyidagi soliq turlari:

a) tuman mahalliy budjetiga oʻtkaziladi:

yuridik shaxslarning mol-mulkiga solinadigan soliq, bundan yirik soliq toʻlovchilar tomonidan toʻlanadigan soliq mustasno;

yuridik shaxslardan olinadigan yer soligʻi, bundan yirik soliq toʻlovchilar tomonidan toʻlanadigan soliq mustasno;

jismoniy shaxslardan olinadigan mol-mulk soligʻi;

jismoniy shaxslardan olinadigan yer soligʻi;

jismoniy shaxslarga tegishli mol-mulkni ijaraga berishdan soligʻi;

suv resurslaridan foydalanganlik uchun soliq;

norudaqurilish materiallari boʻyicha yer qaʼridan foydalanganlik uchun soliq (Qurilish materiallari bo'yicha);

aylanmadan olinadigan soliq;

Aksiz soligʻi(benzin, dizel yoqilg'isi va gazni oxirgi iste'molchiga realizatsiya qilishda to'lanadigan aksiz soligʻi)

Foyda soligʻi

Qoʻshilgan qimmat soliq(tegishli ajratma qismi)

Davlat mulkini ijarasidan tushumlar

Jarimalar

Yigʻimlar

Davlat boji

b) jismoniy shaxslardan olinadigan daromad soligʻi (bundan yirik soliq toʻlovchilar tomonidan toʻlanadigan soliq mustasno) tuman mahalliy budjetiga oʻtkaziladi.

c) Boshqa soliq turlarining tegishli qismi oʻrnatilgan tartibda tuman mahalliy budjetga oʻtkaziladi.

11. Tuman mahalliy budjetining qoʻshimcha manbalaridan foydalanish toʻgʻrisidagi qarorlari, farmoyishlari tegishli ravishda xalq deputatlari tuman Kengashi tomonidan tumandagi tegishli korxona va tashkilotlarning takliflari hamda murojaatlariga asosan tegishli xarajatlarga yoʻnaltirish maqsadida qabul qilinadi.

tuman hokimi favqulodda vaziyatlarda va shunga oʻxshash kechiktirib boʻlmaydigan choralar koʻrilishi talab etiladigan hollarda ishlatilgan mablagʻlar toʻgʻrisida xalq deputatlari tuman Kengashiga hisobot berish sharti bilan qoʻshimcha manbalarni yoʻnaltirish boʻyicha qaror va farmoyishlarni qabul qiladi.

12. Tuman hokimligi tashabbusi bilan amalga oshiriladigan tadbirlar uchun talab etiladigan mablagʻlar tegishliligi boʻyicha ushbu mahalliy budjetlarning ijrosi davomida shakllangan qoʻshimcha manba va zaxira jamg`armasi hisobidan amalga oshirilishi qatʼiy belgilab qoʻyilsin.

13. Tuman hokimining birinchi oʻrinbosari, Iqtisodiyot va moliya boʻlimi (J.Bobomurodov), davlat soliq inspeksiyasi (A.Usmanov), masʼul korxona va tashkilotlar bilan birgalikda:

tegishli budjetlarni birinchi navbatda ish haqi va unga tenglashtirilgan toʻlovlar, oziq-ovqat va dori-darmon va kommunal xizmatlar xarajatlarining rejalashtirilishini nazarda tutgan holda shakllantirsin;

mahalliy budjeti prognoz koʻrsatkichlarni oʻz vaqtida va samarali bajarish;.

budjet mablagʻlaridan maqsadli va samarali foydalanish;

budjet intizomiga rioya etilishi ustidan nazorat va masʼuliyatni yanada kuchaytirish;

tegishli mahalliy budjetlarga soliqlar va boshqa majburiy toʻlovlarning toʻliq tushumini taʼminlash;

budjet daromadlar bazasini oshirish va qoʻshimcha rezervlarni aniqlash zarurligiga alohida eʼtibor qaratsin.

14. Tuman davlat soliq inspeksiyasi (A.Usmanov) tegishli masʼullar bilan birgalikda Oʻzbekiston Respublikasi “Soliq kodeksi”da belgilangan vakolatlaridan kelib chiqib:

soliqlarning toʻliq va toʻgʻri hisoblanishini hamda ushbu soliqlarni oʻz vaqtida budjetga undirilishi ustidan soliq nazoratini kuchaytirish;

yer soligʻi, suv resurslaridan foydalanganlik uchun soliq va mol-mulk soliqlari boʻyicha doimiy tahlillar oʻtkazgan holda, soliqlarni toʻliq hisoblanishini taʼminlash hamda ushbu soliq toʻlovlari boʻyicha soliq qarzdorligiga yoʻl qoʻymaslik choralarini koʻrish;

aylanmadan soliq turi boʻyicha soliq toʻlovchilar tomonidan naqd pul aylanmalarining soliq hisobotlarida toʻliq aks ettirilishi ustidan doimiy soliq nazoratini oʻrnatish hamda zarur hollarda xronometraj va kameral soliq nazorati tadbirlarini oʻtkazish;

bunda, mazkur yoʻnalishda jamoatchilik nazoratini kuchaytirish maqsadida fuqarolarga xarid chekini talab qilib olishni targʻib etuvchi ijtimoiy roliklar hamda video materiallar tayyorlab, ijtimoiy tarmoqlar va ommaviy axborot vositalarida keng targʻibot-tashviqot ishlarini olib borishga alohida eʼtibor qaratish;

xatlov ishlarini samarali tashkil etish orqali yer va mol-mulk soligʻining soliq bazasini oshirish vazifasi yuklatilsin.

15. Tuman davlat soliq inspeksiyasi (A.Usmanov)ga:

soliqlarning toʻliq va toʻgʻri hisoblanishini hamda ushbu soliqlarni oʻz vaqtida budjetga undirilishi ustidan soliq nazoratini kuchaytirilishini;

barcha soliq turlardan doimiy tahlillar oʻtkazgan holda, soliqlarni toʻliq hisoblanishini hamda ushbu soliq toʻlovlari boʻyicha soliq qarzdorligiga yoʻl qoʻymaslik choralari koʻrilishini;

xatlov ishlarini samarali tashkil etish orqali yer va mol-mulk soligʻining soliq bazasi oshirilishini;

Kadastr agentligining tuman bo`linmasi bilan birgalikda tumanda mavjud soliq toʻlovchilarning mol-mulklari maydonlarini chuqur tahlil etgan holda ushbu mol-mulklarga nisbatan soliqlarning toʻliq hisoblanishini;

aylanmadan soliq turi boʻyicha soliq toʻlovchilar tomonidan naqd pul aylanmalarining soliq hisobotlarida toʻliq aks ettirilishi ustidan doimiy soliq nazorati oʻrnatilishini hamda kameral soliq nazorati tadbirlarini oʻtkazilishini taʼminlash topshirilsin.

Bunda, mazkur yoʻnalishda jamoatchilik nazoratini kuchaytirish maqsadida fuqarolarga xarid chekini talab qilib olishni targʻib etuvchi ijtimoiy roliklar hamda video materiallar tayyorlab, ijtimoiy tarmoqlar va ommaviy axborot vositalarida keng targʻibot-tashviqot ishlarini olib borishga alohida eʼtibor qaratsin.

16. Tuman davlat soliq inspeksiyasi (A.Usmanov), tegishli masʼul tashkilotlar bilan birgalikda:

noruda qurilish materiallarini qazib olish sohasida noqonuniy faoliyat olib borayotgan karerlarni aniqlash boʻyicha xatlovlar oʻtkazish;

xatlov natijalari boʻyicha aniqlangan noqonuniy faoliyat olib borayotgan karʼerlar faoliyatini qonuniylashtirish hamda ularni soliq bazasiga qamrab olish;

noruda qurilish materiallarini qazib olish sohasida faoliyat olib borayotgan karʼerlar tomonidan qazib olinayotgan noruda qurilish materiallar hajmining soliq hisobotlarida toʻliq aks ettirilishi ustidan doimiy nazorat oʻrnatsin. Bunda, ushbu sohada faoliyat olib borayotgan karerlarning qazib olish hajmlarini doimiy tahlil qilib borish hamda zarur hollarda qazib olish hajmlarini aniqlashda mahalliy budjetning qoʻshimcha manbalari hisobidan “marksheydrlik” xizmatlaridan foydalanish lozimligi alohida belgilab qoʻyilsin.

17. Majburiy ijro byurosi Uchquduq tuman boʻlimi, tuman davlat soliq inspeksiyasi bilan hamkorlikda soliqlar va boshqa majburiy toʻlovlar boʻyicha mavjud soliq qarzdorliklarini budjetga undirish yuzasidan tegishli choralar koʻrib borsin hamda choraklar yakuni bilan soliq qarzdorliklarining chorak boshiga nisbatan kamayib borishi boʻyicha barcha kompleks chora-tadbirlar koʻrish vazifasi yuklatilsin.

18. Tumandagi mahalla va ovul fuqarolar yigʻinlari raislari jismoniy shaxslarning yer va mol-mulk soliqlari boʻyicha joriy hisoblangan soliqlarni hamda ushbu soliqlardan mavjud soliq qarzdorliklarini undirish yuzasidan soliq organlariga amaliy yordam koʻrsatsin.

19. Tuman hokimining birinchi oʻrinbosari, davlat aktivlarini boshqarish agentligi Navoiy viloyat hududiy boshqarmasi bilan hamkorlikda:

boʻsh turgan davlat mulki obʼektlarini aniqlash boʻyicha xatlov ishlarini samarali tashkil etish;

xatlov natijalariga koʻra tumanda mavjud boʻsh turgan davlat mulki obʼektlari roʻyxatini shakllantirish;

shakllantirilgan roʻyxatga asosan boʻsh turgan davlat mulki obʼektlarini ijaraga berish yoki sotish boʻyicha tegishli takliflar tayyorlash;

boʻsh turgan davlat mulki obʼektlarini ijaraga berish yoki sotish boʻyicha ijtimoiy tarmoqlar va ommaviy axborot vositalarida roliklar va videomateriallar tayyorlash;

xususiylashtirilishi moʻljallangan boʻsh turgan davlat mulki obʼektlarini “e-auksion” elektron platformasi orqali sotish ishlarini tashkillashtirish vazifasi yuklatilsin.

20. Tuman davlat soliq inspeksiyasi (A.Usmanov) tuman hokimining tegishli oʻrinbosarlari bilan birgalikda tumanda fermer xoʻjaliklari va boshqa korxonalarga sarflanayotgan suv hajmlari boʻyicha aniq hisob-kitoblar yuritgan holda mazkur isteʼmol hajmlari boʻyicha suv resurslaridan foydalanganlik uchun soliqlarni toʻliq hisoblanishini hamda moliya yili yakuniga qadar mahalliy budjetlarga toʻliq undirib olish vazifasi yuklatilsin.

Bunda, qishoq xoʻjaligi korxonalari tomonidan isteʼmol qilinayotgan suv resuslari hajmlari va ushbu hajmlar boʻyicha hisoblanayotgan suv soliqlari boʻyicha doimiy tahlillar oʻtkazishga alohida eʼtibor qaratilsin.

21. Iqtisodiyot va moliya boʻlimi (J.Bobomurodov) va boshqa tegishli korxona va tashkilotlar bilan birgalikda:

budjet intizomiga qatʼiy rioya etilishi ustidan doimiy monitoring ishlarini kuchaytirsin;

budjet intizomini buzish holatlari boʻyicha har chorak yakuni bilan xalq deputatlari tuman Kengashga axborot kiritib borsin;

oʻtkazilgan nazorat tadbirlari yakuni boʻyicha kamomad va noqonuniy oʻzlashtirishga yoʻl qoʻygan soha rahbarlarining hisoboti har chorakda eshitib borilsin.

22. Qoʻshimcha manbalari hisobidan xarid qilingan tovarlar va xizmatlar, qurish, rekonstruksiya va taʼmirlash ishlari olib borilayotgan obʼektlar roʻyxati, shuningdek, qurilish-taʼmirlash ishlarining moliyalashtirilishi toʻgʻrisidagi maʼlumotlarni tegishli ravishda majburiy tartibda oʻz rasmiy veb-saytlarida joylashtirib borsin.

Tuman mahalliy budjeti jami xarajatlarining 9 888,000 mln soʻmi hamda shakllangan qoʻshimcha mablagʻlarining kamida 30 foizini jamoatchilik fikri asosida shakllantiriladigan tadbirlarni moliyalashtirish uchun “Fuqarolar tashabbusi jamgʻarmasi”ga yoʻnaltirilsin. Shunindek,

Bunda, xalq deputatlari tuman Kengashi, Yoshlar ishlar agentligi, tuman hokimligi huzuridagi Jamoatchilik kengashlari hamda hokim yordamchilari budjet jarayonida fuqarolarning faol ishtirokini taʼminlash maqsadida aholiga keng targʻibot-tashviqot ishlarini olib borishga masʼul etib belgilansin.

Mahalliy budjetlarning qoʻshimcha manbalari hisobidan xarid qilingan tovarlar va xizmatlar, qurilish, rekonstruksiya qilish va taʼmirlash ishlari olib borilayotgan obʼektlar roʻyxati, shuningdek, qurilish-taʼmirlash ishlarining moliyalashtirilishi toʻgʻrisidagi maʼlumotlar oʻrnatilgan tartibda tegishli hokimlik rasmiy veb-saytlariga joylashtirib borilsin.

23. Tuman hokimligi mazkur tegishli qonun va qarorlarga asosan tegishli ravishda hududiy budjet mablagʻlari taqsimlovchilarning budjet mablagʻlaridan samarali foydalanilishi hamda erishilgan natijalar boʻyicha hisobotlarini tegishlililigi boʻyicha xalq deputatlari tuman Kengashiga taqdim etib borsin.

24. Tuman hokimining birinchi oʻrinbosari, Iqtisodiyot va moliya boʻlimi (J.Bobomurodov) va tuman davlat soliq inspeksiyasi (A.Usmanov) budjet daromadlari va xarajatlarining koʻrsatkichlarini bajarilishini taʼminlash, soliq bazasini kengaytirish hamda iqtisodiy salohiyatini oshirish yuzasidan zarur chora-tadbirlar koʻrish, budjet mablagʻlaridan maqsadli va samarali foydalanishi ustidan qatʼiy nazorat oʻrnatish uchun tegishliligi boʻyicha xalq deputatlari tuman Kengashiga maʼlumot kiritib borilsin.

25. Tuman davlat soliq inspeksiyasi (A.Usmanov) qonunda belgilangan ayrim soliqlar va toʻlov stavkalari, soliq solish tartiblari hamda boshqa maʼlumotlarni ommaviy axborot vositalarida yoritilishini taʼminlasin.

26. Tuman hokimligi axborot xizmati rahbari - matbuot kotibi (R.Qodirova), “UCHQUDUQ” gazetasi tahririyatiga:

mazkur qaror “UCHQUDUQ” gazetasida rasmiy eʼlon qilish va tuman hokimligining rasmiy veb-saytiga joylashtirish tavsiya etilsin.

27. Ushbu qaror rasmiy eʼlon qilingan kundan boshlab kuchga kiradi.

28. Mazkur qaror bajarilishini nazorat qilish tuman hokimining birinchi oʻrinbosari S.Hamroyev va Xalq deputatlari Uchquduq tuman Kengashining mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (U.Xudoyqulov) zimmasiga yuklatilsin.