Oʻzbekiston Respublikasining mazkur Qonuni bilan (6-ilovasi) Fargʻona viloyati mahalliy budjetining 2026-yilgi daromadlari 6 878,2 mlrd.soʻm, xarajatlari 9 190,8 mlrd.soʻm miqdorda ekanligi maʼlumot uchun qabul qilingan boʻlib, respublika budjetidan ajratiladigan tartibga soluvchi budjetlararo transferlar 2 312,6 mlrd.soʻm, shundan, aksiz soligʻi boʻyicha tushumlar hisobidan ajratiladigan mablagʻlar 392,4 mlrd.soʻm miqdorda (7-ilova) tasdiqlangan.

Shu oʻrinda, Oʻzbekiston Respublikasi Iqtisodiyot va moliya vazirligining 2025-yil 25 dekabrdagi 01/57-1-29235-sonli xati bilan viloyat mahalliy budjeti parametrlari yetkazilgan hamda 2026-yilgi Fargʻona viloyati mahalliy budjeti loyihasini xalq deputatlari viloyat Kengashiga tasdiqlash uchun kiritilishi, qonunchilikda belgilangan tartibda rasmiylashtirilishi boʻyicha koʻrsatma berilgan.

Viloyat mahalliy budjetining 2026-yilgi loyihasini tayyorlash, koʻrib chiqish va uni Oʻzbekiston Respublikasi Iqtisodiyot va moliya vazirligiga takdim etish ishlarini muvofiqlashtirish boʻyicha viloyat Ishchi guruhi tomonidan viloyatning 2026-yilgi mahalliy budjeti loyixasi ishlab chiqilib, viloyat Kengashiga kiritilgan.

Maʼlumki, Oʻzbekiston Respublikasining “Mahalliy davlat hokimiyati toʻgʻrisida”gi Qonuni hamda “Budjet kodeksi”da viloyatlar mahalliy budjetlarini, shuningdek tumanlar va shaharlar budjetlarini tegishincha viloyatlar, tumanlar va shaharlar hokimlarining taqdimnomasiga binoan koʻrib chiqish hamda qabul qilish, ularning ijro etilishi ustidan nazoratni amalga oshirish mahalliy Kengashlarning budjet sohasidagi vakolatlari hisoblanadi.

Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6, 24-moddalari, Budjet kodeksining 27, 99-moddalari, Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida” OʻRQ-1105-son Qonuniga muvofiq, Oʻzbekiston Respublikasi Hisob palatasining 2025-yil 20-oktabrdagi 02-1511-sonli va Iqtisodiyot va moliya vazirligining 2025-yil 25-dekabrdagi 01/57-1-29235-sonli xatlarini inobatga olib, Xalq deputatlari viloyat kengashi qaror qiladi:

1. Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi Qonuni (keyingi oʻrinlarda Qonun deb yuritiladi) rahbarlik va ijro uchun qabul qilinsin.

2. Mazkur Qonunga muvofiq, Fargʻona viloyati mahalliy budjetining 2026-yilgi daromadlari 6 878,2 mlrd.soʻm va xarajatlari 9 190,8 mlrd.soʻmga maʼlumot uchun qabul qilinganligi hamda respublika budjetidan ajratiladigan tartibga soluvchi budjetlararo transfertlar 2 312,6 mlrd.soʻm miqdorida, shundan aksiz soligʻi tushumlari hisobidan ajratiladigan transfertlar 392,4 mlrd.soʻm miqdorida tasdiqlanganligi; inobatga olinsin.

3. Quyidagilar:

Fargʻona viloyatining viloyat budjeti daromadlarining 2026-yil uchun asosiy prognoz koʻrsatkichlari 1-ilovaga;

viloyatning viloyat budjetidan 2026-yilda hududiy budjet mablagʻlarini taqsimlovchilarga ajratiladigan xarajatlarning umumiy cheklangan miqdorlari 2-ilovaga;

2026-yil uchun viloyatning viloyat budjeti hamda tumanlar va shaharlar budjetlariga tartibga soluvchi daromadlardan ajratmalarning normativlari 3-ilovaga;

viloyatning viloyat budjetidan tumanlar va shaharlar budjetlariga ajratiladigan tartibga soluvchi budjetlararo transfertlar miqdori 4-ilovaga muvofiq tasdiqlansin.

4. Tumanlar va shaharlar budjetlarining 2026-yil daromadlari va xarajatlari 5-ilovaga muvofiq maʼlumot uchun qabul qilinsin.

5. Viloyatning viloyat budjeti shaxsiy gʻazna hisobvaragʻida turgan budjet mablagʻlarining 2026-yilda yoʻl qoʻyiladigan eng kam miqdori 12 200,0 mln. soʻm kengash.gov.uz VII-15-160-11-0-K/25 etib hamda 2026-yil uchun tumanlar va shaharlar budjetlari shaxsiy gʻazna hisobvaraqlarida turgan budjet mablagʻlarining yoʻl qoʻyiladigan eng kam miqdori 6-ilovaga muvofiq belgilansin.

6. Viloyatning viloyat budjeti zaxira jamgʻarmasi hajmi 2026-yil uchun 44,7 mlrd.soʻm miqdorida belgilansin.

2026-yil uchun Fargʻona viloyatning viloyat budjeti, tumanlar va shaharlar budjetlarining zaxira jamgʻarmalari tegishli budjetlar tasdiqlangan umumiy xarajatlarining (bundan tumanlar va shaharlar budjetlarining jamoatchilik fikri asosida shakllantiriladigan tadbirlarni moliyalashtirishga doir mablagʻlari mustasno) kamida 1,0 foizi miqdorida shakllantiriladi.

Bunda tumanlar va shaharlar budjetlarining zaxira jamgʻarmalari miqdori oldingi-yildagi hajmidan kam boʻlmagan miqdorda shakllantirilishi hamda qoʻshimcha mablagʻlarni shakllantirish viloyatning viloyat budjeti zaxira jamgʻarmalari mablagʻlarini kamaytirish hisobidan amalga oshirilganligi inobatga olinsin.

7. Quyidagilar:

Qishloq xoʻjaligi uchun moʻljallanmagan yerlar uchun yuridik shaxslar boʻyicha mutlaq miqdorda 1 gektar yer uchun belgilangan bazaviy soliq stavkasiga kiritilayotgan kamaytiruvchi va oshiruvchi koeffitsientlar 7-ilovaga;

jismoniy shaxslar boʻyicha (dehqon xoʻjaligini yuritish uchun berilgan qishloq xoʻjaligiga moʻljallagan yerlardan tashqari) mutlaq miqdorda 1 m2 uchun belgilangan bazaviy soliq stavkalariga nisbatan kiritilayotgan kamaytiruvchi va oshiruvchi koeffitsientlar 8-ilovaga;

koʻchmas mulkka boʻlgan huquqlarni davlat roʻyxatidan oʻtkazuvchi organlarda roʻyxatdan oʻtkazilishi lozim boʻlgan binolar va inshootlarning 1 m2 uchun mutlaq miqdorda belgilangan minimal qiymatga nisbatan kiritilayotgan koeffitsientlar 9-ilovaga;

koʻchmas mulk obʼektlari boʻyicha ijara qiymatining 1 m2 uchun uchun oʻrnatilayotgan minimal miqdorlari 10-ilovaga;

noruda qurilish materiallari uchun (sement ishlab chiqarish uchun moʻljallangan ohaktoshdan tashqari) qatʼiy belgilangan soliq stavkalari miqdorlari 11-ilovaga;

yer usti va yer osti manbalaridan olinadigan suv resurslari uchun soliq stavkalari 1 m3 uchun mutlaq oʻlchamda belgilanadigan miqdorlari 12-ilovaga muvofiq tasdiqlansin.

8. Oʻzbekiston Respublikasi Prezidentining 2025-yil 26-dekabrdagi PQ-387-sonli qaroriga muvofiq viloyat Iqtisodiyot va moliya bosh boshqarmasi:

respublika budjetidan Fargʻona viloyatining viloyat budjetiga oʻtkazib beriladigan daromad prognozining oshirib bajarilgan qismidan 50 foizini 2025-yil 1-dekabr holatiga statistika organlaridan olingan tuman (shahar)lar aholisining jami viloyat aholisi ulushiga muvofiq tuman (shahar)lar budjetlariga belgilangan muddatlarda oʻtkazish;

dehqon bozorlari, ixtisoslashtirilgan va buyum bozorlaridan tushgan soliqlar boʻyicha viloyat budjetiga oʻtkazilgan mablagʻlarni ushbu sohadagi hamda mahallalarda infratuzulmani yaxshilash uchun mazkur bozorlar joylashgan tuman (shahar)lar budjetlariga toʻliq oʻtkazilishini taʼminlasin.

9. Viloyat hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari M. Ubaydullaev, viloyat Iqtisodiyot va moliya bosh boshqarmasi (Z. Roʻzaliev), viloyat Soliq boshqarmasi (M. Mamatxanov) tuman (shahar) hokimliklari bilan birgalikda 2026-yil mahalliy budjeti uchun belgilangan koʻrsatkichlarni oʻz vaqtida va samarali bajarilishini taʼminlash choralarini koʻrsin.

10. Tumanlar va shaharlar hokimliklari, hududiy budjet mablagʻlari taqsimlovchilar 2026-yil uchun ajratilayotgan budjet mablagʻlaridan maqsadli va samarali foydalanish, budjet intizomiga rioya etilishi ustidan nazorat va masʼuliyatni yanada kuchaytirish, tegishli mahalliy budjetlarga soliqlar va boshqa majburiy toʻlovlarning toʻliq tushumini taʼminlash hamda budjet daromadlar bazasini oshirish va qoʻshimcha rezervlarni aniqlash zarurligigaalohida eʼtibor qaratsin.

11. Viloyat soliq boshqarmasi (M. Mamatxanov) hududiy soliq organlari bilan birgalikda Oʻzbekiston Respublikasi Soliq kodeksida belgilangan vakolatlardan kelib chiqib:

soliqlarning toʻliq va toʻgʻri hisoblanishini hamda ushbu soliqlarni oʻz vaqtida budjetga undirilishi ustidan soliq nazoratini oʻrnatish;

yer soligʻi, suv resurslaridan foydalanganlik uchun soliq va mol-mulk soliqlari boʻyicha doimiy tahlililar oʻtkazgan holda, soliqlarni toʻliq hisoblanishini taʼminlash hamda ushbu soliq toʻlovlari boʻyicha soliq qarzdorligiga yoʻl qoʻymaslik choralarini koʻrish;

aylanmadan soliq turi boʻyicha soliq toʻlovchilar tomonidan naqd pul aylanmalarining soliq hisobotlarida toʻliq aks ettirilishi ustidan doimiy soliq nazoratini oʻrnatish hamda zarur hollarda xronometraj va kameral soliq nazorati tadbirlarini oʻtkazish;

yer va mol-mulk soligʻining soliq bazasini oshirish, yaʼni xatlov ishlarini samarali va muntazam tashkil etib borish vazifalari yuklatilsin.

12. Viloyat Iqtisodiyot va moliya bosh boshqarmasi (Z. Roʻzaliyev) Oʻzbekiston Respublikasi Budjet kodeksining 30-moddasida belgilangan budjet sohasidagi vakolatlaridan kelib chiqib, quyidagi ishlarni amalga oshirsin:

soliqlar va boshqa majburiy toʻlovlarni ularning manbalari kesimida toʻliq va oʻz vaqtida tushishi ustidan monitoringni amalga oshirib borish;

tegishli budjetning ijro etilishi jarayonida unga tushumlarni koʻpaytirish boʻyicha qoʻshimcha zaxiralarni aniqlab borish;

budjet tashkilotlariga va budjet mablagʻlari oluvchilarga ular uchun nazarda tutilgan budjetdan ajratiladigan mablagʻlar hajmlarini yetkazish;

budjet tashkilotlarining xarajatlar smetalari va shtat jadvallarini hamda budjet mablagʻlari oluvchilarning xarajatlar smetalarini, shuningdek ularga kiritilgan oʻzgartirishlarni roʻyxatdan oʻtkazish;

tegishli budjetlarning mablagʻlaridan maqsadli foydalanilishi ustidan nazoratni amalga oshirish.

13. Majburiy ijro byurosi Fargʻona viloyat boshqarmasi (O. Salmonov), viloyat soliq boshqarmasi (M. Mamatxanov) bilan hamkorlikda soliqlar va boshqa majburiy toʻlovlar boʻyicha mavjud soliq qarzdorliklarini budjetga undirish yuzasidan tegishli choralar koʻrib borsinlar hamda choraklar yakuni bilan soliq qarzdorliklarining chorak boshiga nisbatan kamayib borishi boʻyicha barcha kompleks chora-tadbirlar koʻrish vazifasi yuklatilsin.

14. Davlat aktivlarini boshqarish agentligi Fargʻona viloyat hududiy boshqarmasi (Sh.Xakimov) Boʻsh turgan obʼektlaridan samarali foydalanishni tashkil etish markazining Fargʻona viloyat hududiy boshqarmasi (E. Eshonov) bilan birgalikda:

boʻsh turgan davlat mulki obʼektlarini aniqlash boʻyicha doimiy ravishda xatlov ishlarini tashkil etish;

xatlov natijalariga koʻra viloyatda mavjud boʻsh turgan davlat mulki obʼektlari roʻyxatini shakllantirish, ijaraga berish yoki sotish boʻyicha tegishli takliflar tayyorlash vazifasi yuklatilsin.

15. “Sirdaryo-Soʻx” irrigatsiya tizimlari havza boshqarmasi (F. Tursunov) va viloyat soliq boshqarmasi (M. Mamatxanov) tuman va shahar hokimlari bilan birgalikda viloyatda sugʻorishga sarflanayotgan suv hajmlari boʻyicha aniq hisobkitoblar yuritgan holda mazkur isteʼmol hajmlari boʻyicha suv resurslaridan foydalanganlik uchun soliqlarni toʻliq hisoblanishini hamda moliya-yili yakuniga qadar mahalliy budjetlarga toʻliq undirib olish vazifasi yuklatilsin.

Bunda, qishloq xoʻjaligi korxonalari tomonidan isteʼmol qilinayotgan suv resurslari hajmlari va ushbu hajmlar boʻyicha hisoblanayotgan suv soliqlari boʻyicha doimiy tahlillar oʻtkazishga alohida eʼtibor qaratilsin.

16. Viloyat ichki ishlar boshqarmasi (A. Ikramov), Adliya boshqarmasi (A. Omonov) viloyatda budjetga hisoblangan boj, jarima va yigʻimlarni oʻz vaqtida toʻliq budjetga undirish choralarini koʻrib borsinlar.

17. Xalq deputatlari hududiy Kengashlar hamda tuman (shahar) hokimlari Oʻzbekiston Respublikasining Budjet kodeksining 27 va 28-moddalarida belgilangan budjet sohasidagi vakolatlaridan kelib chiqib, budjetga va davlat

maqsadli jamgʻarmalariga tushumlar toʻliq va oʻz vaqtida tushishi hamda budjet mablagʻlarining maqsadli sarflanishi ustidan nazorat oʻrnatsin.

18. Hududiy budjet mablagʻlarini taqsimlovchilar har chorak yakuni bilan budjet mablagʻlarining samarali va maqsadli sarflanganligi, xarajatlarning amaliy natijalari yuzasidan xalq deputatlari Fargʻona viloyat Kengashiga hisobot berib borsinlar.

Bunda, hududiy budjet mablagʻlarini taqsimlovchilar:

budjetdan ajratilgan mablagʻlardan maqsadli va samarali foydalanish, xususan ish haqi va unga tenglashtirilgan toʻlovlar, oziq-ovqat, dori-darmon, kommunal xizmatlar va davlat dasturlari uchun belgilangan xarajatlarni toʻliq rejalashtirilishi va oʻz vaqtida toʻlanishi;

oʻzlarining va tasarrufidagi tashkilotlarning xarajatlar smetasi va shtat jadvallari hamda daromadlar va xarajatlar smetalarining toʻgʻri tuzilishi;

budjetdan ajratilgan mablagʻlarning maqsadli sarflanishi va maqsadli indikatorlarning toʻliq bajarilishi;

tasarrufidagi tizim tashkilotlariga budjetdan ajratiladigan mablagʻlarning toʻgʻri taqsimlanishi;

oʻz tasarrufidagi tizimda budjet intizomiga amal qilinishi ustidan nazorat qilinishini;

budjet jarayonining ochiqligini taʼminlash maqsadida rasmiy veb-saytlarda maʼlumotlarni joylashtirib borilishini taʼminlasinlar.

19. Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish Qoʻmitasi viloyat hududiy boshqarmasi (A. Xomatov) tumanlar va shaharlar hokimliklari bilan birgalikda tashqi reklama obʼektlarini toʻliq xatlovdan oʻtkazgan holda, ushbu tashqi reklama obʼektlari boʻyicha shartnomalar tuzish choralarini koʻrsin hamda ushbu shartnomalar boʻyicha yigʻimlarni budjetga toʻlanishi ustidan doimiy nazorat oʻrnatsin.

20. Oʻzbekiston Respublikasi Bosh Prokuraturasi Huzuridagi Iqtisodiy jinoyatlarga qarshi kurashish Departamentining Davlat moliyaviy nazorati Inspeksiyasi Fargʻona viloyati boshqarmasi (E.Usmonov) budjetdan ajratilgan mablagʻlarni maqsadli ishlatilishini nazorat qilish va amalga oshirilayotgan ishlar yuzasidan har chorakda xalq deputatlari viloyat Kengashi sessiyalarida axborot berib borish vazifalari yuklatilsin.

21. Viloyat hokimligi Axborot xizmati (M. Sulaymonov), Soliq boshqarmasi (M.Mamatxanov), Iqtisodiyot va moliya bosh boshqarmasi (Z. Roʻzaliev) bilan birgalikda viloyat teleradiokompaniyasi hamda viloyatdagi boshqa ommaviy axborot vositalarida, hokimlik muassisligidagi gazetalarda Qonunda belgilangan ayrim soliqlar va toʻlov stavkalari, soliq solish tartiblari hamda boshqa maʼlumotlarni eʼlon qilinishi hamda hokimliklarning rasmiy veb-saytlariga joylashtirilishini tashkil etsin.

22. Mazkur qaror tegishli tahririyatlar va ommaviy axborot vositalarida yoritilishi tavsiya etilsin hamda viloyat hokimligining rasmiy veb-saytiga joylashtirilsin.

23. Xalq deputatlari tuman (shahar) Kengashlariga mazkur qaror qabul qilinganidan soʻng uch ish kuni ichida ushbu qarorga muvofiqlashtirilgan holda tegishincha tuman (shahar) budjetlari toʻgʻrisida qarorlar qabul qilish tavsiya etilsin.

24. Mazkur qaror bajarilishini nazorat qilish xalq deputatlari viloyat Kengashining Mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari doimiy komissiyasi (R. Kamolov) hamda viloyat hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari M. Ubaydullaev zimmasiga yuklatilsin.