Ózbekstan Respublikası “Toǵay haqqında” ǵı Nızamı, Ózbekstan Respublikası “Tábiyattı qorǵaw haqqında“ǵı Nızamı, Ózbekstan Respublikası Ministrler Kabinetiniń 1999-jıl 22-noyabr kúngi “Respublika toǵayların qorǵaw boyınsha ayırım normativ hújjetlerdi tastıyıqlaw haqqında”ǵı 506-sanlı qararı hámde Aral boyı milliy tábiyat baǵınıń 2025-jıl 14-noyabr kúngi 80-sanlı qatnas xatın inabatqa alıp, Ózbekstan Respublikası “Jergilikli mámleketlik hákimiyatı haqqında”ǵı Nızamınıń 6-21¹-statyalarına tiykarlanıp sheshim etemen:

1. Ózbekstan Respublikası Ministrler Kabinetiniń 1999-jıl 22-noyabrdegi 506-sanlı qararı orınlaw ushın basshılıqqa alınsın

2. Aral boyı milliy tábiyat baǵı toǵay qorı aymaǵında hár jıldıń 31-dekabr kúnine shekem “Toǵay qorı jerlerinde órt qáwipsizligi máwsimi” dep belgilensin.

3. Aral boyı milliy tábiyat baǵında órt qáwipsizliginiń aldın alıp barıw hámde alıp barılǵan jumıslardı qadaǵalap barıwshı isshi topar quramı 1-qosımshaǵa muwapıq tastıyıqlansın.

4. Ózbekstan Respublikası «Toǵay haqqında»ǵı Nızamǵa tiykarlanıp Aral boyı milliy tábiyat baǵına qaraslı toǵayzarlarda órttiń aldın alıw hám oǵan qarsı gúresiwdi kúsheytiriw haqqındaǵı is-ilajlar 2-qosımshaǵa muwapıq tastıyıqlansın.

5. Rayon hákiminiń orınbasarı (B. Juzbaev) Aral boyı milliy tábiyat baǵı (E. Allaniyazov) menen birgelikte rayon aymaǵındaǵı xalıq jasawshı punktlerinde Ózbekstan Respublikasınıń 2018-jıl 16-aprel kúngi jańadan baspada qabıl etilgen «Toǵay haqqında»ǵı OʻRQ-475-sanlı Nızamın keńnen túsindiriw boyınsha úgit násiyat jumısların alıp barıw tapsırılsın

6. Aral boyı milliy tábiyat baǵı (E. Allaniyazov) na:

toǵaylarda órt kelip shıǵıwınıń aldın alıw maqsetinde toǵaylardı gúzetiwdi kúsheytiw hám qadaǵalap barıw;

órt qáwipsizligi talaplarınıń buzılıwınıń aldın alıw, toǵaylardıń áhmiyeti haqqında puqaralar arasında keń túsinik jumısların júrgiziw;

toǵaylarlarǵa kirer orınlarǵa arnawlı eskertiwshi belgiler ornatıw hám bar bolǵan belgilerdi qaytadan jańalaw;

toǵay fondı maydanlarında tábiyiy hám texnikalıq jaǵdaylardıń aldın alıw;

ayrıqsha jaǵdaylarda rayonlıq ayrıqsha jaǵdaylar bólimi, Ishki isler bólimi hám basqa da kárxanalar menen birgelikte keshiktirip bolmaytuǵin is-ilajlardı islep shıǵıw hám olardıń orınlanıwın támiyinlew wazıypaları tapsırılsın.

7. Toǵay qorında hám toǵay qorı jerleri menen shegaralasqan aymaqlardıń átirapların, jap-salmalardı tazalaw waqtında órt kelip shıǵıwınıń aldın alıw maqsetinde quwraǵan ot-shóplerdi órtten tazalaw qadaǵan etilsin hám ekologiyalıq ortalıqtı jaqsılaw boyınsha jumıslardı ámelge asırıw tapsırılsın.

8. Aymaqlardaǵı kárxana, shólkemler basshılarına, diyqan hám fermer xojalıqları baslıqlarına, usı aymaqlarda jasawshı xalıqqa toǵaylarda órtke qarsı is-ilájlar kóriw, ekologiyalıq ortalıqtı jaqsılaw boyınsha jumıslardı ámelge asırıw tapsırılsın.

9. Rayondaǵı puqaralar jıyınları, fermer xojalıqları basshıları toǵay fondı jerleri menen shegaralasqan atızlardıń átirapların, jap hám salmalardı tazalaw waqtında órt kelip shıǵıwınıń aldın alıw maqsetinde quwraǵan shóplerdiń jaǵıp jiberiliwine jol qoymaw sharaların kóriw tapsırılsın.

10. Usı sheshim ǵalaba xabar qurallarında járiyalansın hám hákimlik veb-saytında jaylastırılsın.

11. Bozataw rayonı hákiminiń 2023-jıl 25-aprel kúngi 45-13-216-Q/23-sanlı sheshimi óz kúshin joǵaltǵan dep tabılsın.

12. Usı sheshimniń orınlanıwın qadaǵalaw Bozataw rayonı hákiminiń orınbasarı B. Juzbaev hámde Aral boyı milliy tábiyat baǵı baslıǵı E. Allaniyazovqa júklensin.

13. Bul sheshim rásmiy túrde járiyalanǵan kúnnen baslap kúshke kiredi.