“Mahalliy davlat hokimiyati toʻgʻrisida”gi Oʻzbekiston Respublikasi Qonunining 21¹-moddasiga va Oʻzbekiston Respublikasi Prezidentining “Dehqon bozorlari va savdo komplekslari faoliyatini tashkil qilishni yanada takomillashtirish chora-tadbirlari toʻgʻrisida” 2010-yil 26-apreldagi PQ-1326-son qaroriga asosan hamda “Munitsipal aktivlarni boshqarish markazi” DUKning 2025-yil 6-oktabrdagi 01-1973-son murojaatini inobatga olib, qaror qilaman:

1. “Eski Juva dehqon bozori” va “Mirobod dehqon bozori” aksiyadorlik jamiyatlarida toʻlovlarni elektron toʻlov tizimlari orqali undirish bilan bogʻliq barcha tashkiliy ishlar yakuniga yetkazilganligi maʼlumot uchun qabul qilinsin.

2. 2025-yil 1-dekabrdan boshlab “Mirobod dehqon bozori” va “Eski Juva dehqon bozori” aksiyadorlik jamiyatlarida undirib olinadigan bir martalik (bozor pattasi) toʻlovi, inventarlarni ijaraga berish va koʻrsatiladigan xizmatlar uchun undiriladigan toʻlovlar, bino va inshootlardan foydalanganlik uchun ijara toʻlovlari, umumiy foydalaniladigan obyektlarni saqlash boʻyicha koʻrsatiladigan xizmatlar uchun toʻlovlarni elektron tarzda qabul qilish amaliyoti joriy etilsin.

3. Toshkent shahar Davlat soliq boshqarmasi (Y. Nasimdjanov), Iqtisodiy jinoyatlarga qarshi kurashish departamenti Toshkent shahar boshqarmasi (Z. Karayev), “Munitsipal aktivlarni boshqarish markazi” DUK (A. Razzoqov):

“Eski Juva dehqon bozori” va “Mirobod dehqon bozori” aksiyadorlik jamiyatlari bilan birga jamiyatlarda undirib olinadigan bir martalik (bozor pattasi) toʻlovlari, inventarlarni ijaraga berish va koʻrsatiladigan xizmatlar uchun undiriladigan toʻlovlar, bino va inshootlardan foydalanganlik uchun ijara toʻlovlari, umumiy foydalaniladigan obyektlarni saqlash boʻyicha koʻrsatiladigan xizmatlar qiymatini elektron tarzda qabul qilishni;

bozorlar va savdo komplekslarining rahbarlari bilan birga inventarlarni ijaraga berish va koʻrsatiladigan xizmatlar uchun undiriladigan yangi miqdorlarni joriy etish boʻyicha belgilangan tartibda zarur tadbirlar oʻtkazilishini taʼminlasin.

4. “Munitsipal aktivlarni boshqarish markazi” DUK (A. Razzoqov):

“Eski Juva dehqon bozori” va “Mirobod dehqon bozori” aksiyadorlik jamiyatlari rahbarlari bilan birga mazkur jamiyatlarda undirib olinadigan bir martalik (bozor pattasi) toʻlovlarini, inventarlarni ijaraga berish va koʻrsatiladigan xizmatlar uchun undiriladigan toʻlovlarni, bino va inshootlardan foydalanganlik uchun ijara toʻlovlarini, umumiy foydalaniladigan obyektlarni saqlash boʻyicha koʻrsatiladigan xizmatlar uchun toʻlovlarni elektron tarzda qabul qilish;

bozorlar va savdo komplekslarining rahbarlari bilan birga inventarlarni ijaraga berish va koʻrsatiladigan xizmatlar uchun undiriladigan yangi miqdorlar boʻyicha eʼlonlarni bozorlar hamda savdo komplekslarining kirish qismlariga joylashtirish choralarini koʻrsin.

5. Toshkent shahar hokimining “Toshkent shahridagi bozorlar va savdo komplekslarining maʼmuriyati tomonidan undirib olinadigan bir martalik yigʻimlar, ijara toʻlovlari va koʻrsatiladigan xizmatlar qiymatining yangi miqdorlarini joriy etish toʻgʻrisida” 2025-yil 14-fevraldagi 101-14-0-Q/25-son qaroriga ilovaga muvofiq oʻzgartirish va qoʻshimchalar kiritilsin.

6. Toshkent shahar hokimining oʻrinbosari (A. Xen), Toshkent shahar hokimligi Matbuot xizmati (G. Kasimova) mazkur qaror rasmiy eʼlon qilinishi va “www.toshkent.uz” veb-sahifasiga joylashtirilishini taʼminlansin.

7. Ushbu qaror rasmiy eʼlon qilingan kundan eʼtiboran kuchga kiradi.

8. Mazkur qarorning ijrosini nazorat qilish Toshkent shahar hokimining birinchi oʻrinbosari B. Xaydarov zimmasiga yuklansin.