“Xalıq bántligi haqqında”ǵı Ózbekstan Respublikası Nızamınıń 9-babı hám de Ministrler Kabinetiniń 2017-jıl 5-dekabrdegi 965-sanlı qararı menen tastıyıqlanǵan “Sociallıq qáwipsizlikke mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń kem sanın belgilew hám rezervke qoyıw tártibi haqqında”ǵı Qaǵıydaǵa tiykarlanıp 2026-jıl ushın jumıs orınların bánt etip qoyıw maqsetinde, “Jergilikli mámleketlik hákimiyat haqqında”ǵı Ózbekstan Respublikası Nızamınıń 6 hám 24-statyalarına tiykarlanıp xalıq deputatları Moynaq rayonlıq Keńesi sheshim etedi:

1. Tómendegiler:

a) Ózbekstan Respublikası Prezidentiniń “Ózbekstan Respublikasında jergilikli mámleket hákimiyatı wákillik shólkemleri iskerligin 2030-jılǵa shekem rawajlandırıw konsepsiyasın tastıyıqlaw haqqında”ǵı 2025-jıl 23-iyundaǵı PF-98-sanlı Pármanına tiykarlanıp sociallıq qáwipsizlikke mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń kem sanın belgilew hám rezervke qoyıw kepillikleri Xalıq deputatları jergilikli Keńeslerine ótkerilgenligi;

b) Ózbekstan Respublikası Prezidentiniń “Miynet qatnasıqları hám kásipke tayarlaw sistemasın jetilistiriw hám de jumıs beretuǵınlardı xoshametlewge tiyisli qosımsha ilajlar haqqında”ǵı 2025-jıl 4-avgustdaǵı PF-126-sanlı Pármanına tiykarlanıp:

xojalıq jurgiziwshi subyektler tek mayıplıǵı bolǵan shaxslar, shańaraqqa tiyisli (xojalıq) zorlıqshılıqtan jábirlengen shaxslar, kambaǵal shańaraqlar reestrindegi shańaraqlardıń aǵzaları, alternativ jaylastırıw formalarında tárbiyalanǵan jetim shaxslar, ata-ana qarawınan ayrılǵan shaxslar ushın jumıs orınlarınıń májburiy rezervleri qáliplestiriliwi, bunda májburiy rezervlew xızmetkerler ulıwma sanınıń 3 payızınan aspawı hám de xızmetkerleri sanı 100 danadan artıq bolǵan shólkemlerge salıstırǵanda qollanılıwı;

byudjet shólkemleri hám mámleket úlesi 50 payızdan joqarı bolǵan kárxanalar tek mayıplıǵı bolǵan shaxslar, shańaraqqa tiyisli (xojalıq) zorlıqtan jábirlengen shaxslar, kambaǵal shańaraqlar reestrindegi shańaraqlardıń aǵzaları, alternativ jaylastırıw formalarında tárbiyalanǵan jetim shaxslar, ata-ana qaramaǵınan ayrılǵan shaxslar, jazanı otew mákemelerinen azat etilgen hám de adam sawdasınan jábirlengen shaxslar ushın jumıs orınlarınıń májburiy rezervleri qáliplestiriliwi, bunda májburiy rezervlew xızmetkerler ulıwma sanınıń 7 payızınan aspawı hám de xızmetkerleri sanı 20 danadan artıq bolǵan shólkemlerge salıstırǵanda qollanılıwı belgilengenligi basshılıq hám orınlaw ushın qabıl etilsin.

2. Moynaq rayonı Kámbaǵallıqtı qısqartıw hám bántlikke kómeklesiw bólimi hám de Moynaq rayonı “Insan” social xızmetler orayınıń Moynaq rayonı aymaǵındaǵı shólkemler boyınsha 2026-jılda xalıqtıń sociallıq mútajligi bar taypaları ushın jumıs orınların belgilew haqqındaǵı tómendegi usınısları maqullansın:

xızmetkerler sanı 20 danadan artıq bolǵan mámleket shólkemlerinde májburiy rezervlenetuǵın jumıs orınlarının sanı xızmetkerler ulıwma sanınıń 7 payızınan aspaǵan muǵdarda hám de xızmetkerler sanı 100 danadan artıq bolǵan xojalıq jurgiziwshi subyektlerde (mámleket úlesi 50 payızdan joqarı bolǵan kárxanalar bunnan tısqarı) májburiy rezervlenetuǵın jumıs orınlarının sanı xızmetkerler ulıwma sanınıń 3 payızınan aspaǵan muǵdarında kelesi jıl ushın 48 jumıs orınlarının rezervge qoyıw, atap aytqanda:

mayıplıǵı bolǵan shaxslar ushın 14,5 payız (7 kisi);

shańaraqqa tiyisli (xojalıq) zorlıqtan jábirlengen shaxslar ushın 4,2 payız (2 kisi);

kambaǵal shańaraqlar reestrindegi shańaraqlardıń aǵzaları ushın 70,9 payız (34 kisi);

alternativ jaylastırıw formalarında tárbiyalanǵan jetim hám ata-ana qarawınan ayrılǵan shaxslar ushın 4,2 payız (2 kisi);

jazanı otew mákemelerinen azat etilgen shaxslar ushın 6,2 payız (3 kisi);

3. 2026-jılda xalıqtıń sociallıq mútajligi bar taypaların jumısqa jaylastırıw maqsetinde tómendegiler:

mámleket shólkemleri (byudjet shólkemleri hám mámleket úlesi 50 payızdan joqarı bolǵan kárxanalar) tárepinen májburiy rezerv qoyılatuǵın jumıs orınlarınıń mánzilli dizimi 1-qosımshaǵa muwapıq;

xızmetkerleriniń dizimdegi ortasha jıllıq sanı júz danadan artıqtı quraytuǵın xojalıq jurgiziwshi subyektler (mámleket úlesi 50 payızdan joqarı bolǵan kárxanalar bunnan tısqarı) tárepinen májburiy rezerv qoyılatuǵın jumıs orınlarınıń mánzilli dizimi 2-qosımshaǵa muwapıq tastıyıqlansın.

4. Kárxanalar, shólkemler hám mákemeler basshıları:

rezervke qoyılatuǵın jumıs orınların ulıwma sanınıń keminde jigirma bes payızı muǵdarında rezervke qoyılatuǵın jumıs orınlarınıń tayınlıǵın jıl baslanıwınan aldın on kúnnen keshiktirmey támiyinlewi, sonıń menen birge, bul haqqında jıl baslanǵanǵa shekem Moynaq rayonı Kámbaǵallıqtı qısqartıw hám bántlikke kómeklesiw bólimin xabardar etedi;

jumıs orınlarınıń qalǵan bólegin rezervke qoyıw shólkem (jumıs beretuǵın) tárepinen kalendar jıldıń birinshi sheregi dawamında támiyinlewi, bul haqqında Moynaq rayonı Kambaǵallıqtı qısqartıw hám bántlikke kómeklesiw bólimin birinshi sherek tamam bolǵanınan keyin, 10 kúnnen keshikpey xabardar etedi;

jumısqa jaylastırıw haqqında Moynaq rayonı Kambaǵallıqtı qısqartıw hám bántlikke kómeklesiw bólimine hár ayda, esap beriw ayınan keyingi aydıń 5-sánesine shekem málimleme usınıs etedi.

Rezervke qoyılatuǵın jumıs orınların saqlaw shártleri Ózbekstan Respublikasınıń “Xalıq bántligi haqqında”ǵı Nızamınıń 40-statyasına muwapıq belgilengen tártipte ámelge asırıladı.

5. Ózbekstan Respublikası Prezidentiniń “Xalıqtı isbilermenlikke tartıw hám bántligin támiyinlew ushın finanslıq járdemler ajıratıw sistemasın jetilistiriwge tiyisli qosımsha ilajlar haqqında”ǵi 2025-jıl 14-fevraldaǵı PQ-64-sanlı qararına muwapıq xalıqtıń sociallıq mútajligi bar taypalarınan bolǵan shaxslardı jumıs orınlarınıń belgilengen eń kem sanınan artıq muǵdarda jumısqa qabıllaw ushın jumıs beriwshiler hár bir xızmetker ushın 12 ay dawamında hár ayda bazalıq esaplaw muǵdarınıń 2 esesi muǵdarında subsidiya qarjıları tolep berilsin.

6. Ózbekstan Respublikasınıń “Xalıq bántligi haqqında”ǵı Nızamı 3-, 13-, 34-, 38-, 39 -, 40 -, 41-statyalarına tiykarlanıp xalıqtıń sociallıq mútajligi bar taypalarına eń kem muǵdardaǵı jumıs orınların jaratıw tuwralı qabıl etilgen usı qarardı orınlamaganı ushın jumıs beretuǵınlar nızamshılıqta belgilengen tártipte juwapkerlikke tartıladı.

7. Ózbekstan Respublikası Ministrler Kabinetiniń 2017-jıl 5-dekabrdegi 965-sanlı qararı menen tastıyıqlanǵan “Sociallıq qáwipsizlikke mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń kem sanın belgilew hám rezervke qoyıw tartibin jáne de jetilistiriw ilajları haqqında”ǵı Qaǵıydanıń 21-banti, 2-bólimine tiykarlanıp, mútájler ushın jumıs orınların rezervke qoyıw boyınsha Moynaq rayonı Keńesiniń qararı orınlanbaǵanlıǵı ushın járiyma tólew, shólkemdi rezervke qoyılatuǵın jumıs orınlarınıń belgilengen sanın jaratıw boyınsha minnetlemeden azat etpeydi.

8. Moynaq rayonı Kámbaǵallıqtı qısqartıw hám bántlikke kómeklesiw bólimi baslıǵı (Yu.Toǵızbaev):

bes kún múddette bul qarar kóshirmesin 1- hám 2-qosımshalarda kórsetilgen shólkemler basshıların jetkersin hám bul qarar orınlanıwı ústinen qadaǵalawdı támiyinlesin.

xalıqtıń sociallıq mútajligi bar taypaları ushın jumıs orınlarınıń eń kem sanın belgilew boyınsha xalıq deputatları Moynaq rayonlıq Kenesiniń bul qararı orınlanbaǵanda, sonıń menen birge, olardı jumısqa qabıllaw sebepsiz túrde biykar etilgenligi ushın shólkemlerdiń lawazımlı shaxslarına nızam hújjetlerinde belgilengen tártipte hákimshilik juwapkerlikke tartıw támiyinlensin.

9. Usı qarar ǵalaba xabar qurallarında jariyalansın hám de hákimliktiń rásmiy veb-saytına jaylastırılsın.

10. Usı qarardıń orınlanıwın baqlaw rayon hákiminiń birinshi orınbasarı S.Iniyatovqa júkletilsin.

11. Usı qarar qabıl etilgen kúnnen kúshke kiredi.