“Aholi bandligi toʻgʻrisida”gi Oʻzbekiston Respublikasi Qonunining 9-bobi hamda Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchunish oʻrinlarining eng kam sonini belgilash va zaxiraga qoʻyish tartibi toʻgʻrisida”gi Nizomga asosan 2026-yil uchun ish oʻrinlarini band qilib qoʻyish maqsadida, Oʻzbekiston Respublikasi “Mahalliy davlat hokimiyati toʻgʻrisida”gi qonunining 6, 21¹-moddalariga asosan, qaror qilaman:

1. Oʻzbekiston Respublikasi Prezidentining 2025-yil 4-avgustdagi PF-126-sonli farmoniga muvofiq:

xoʻjalik yurituvchi subyektlarda nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalar aʼzolari, muqobil joylashtirish shakllarida tarbiyalangan yetim shaxslar va ota-ona qaramogʻidan mahrum boʻlgan shaxslar uchun ish oʻrinlarining majburiy zaxiralari shakllantiriladi. Bunda majburiy zaxiralash xodimlar umumiy sonining 3 foizidan oshmasligi, shuningdek xodimlari soni 100 nafardan ortiq boʻlgan tashkilotlarga nisbatan tatbiq etilishi belgilanganligi;

byudjet tashkilotlari hamda davlat ulushi 50 foizdan yuqori boʻlgan korxonalarda esa yuqorida koʻrsatilgan toifalardan tashqari, jazoni ijro etish muassasalaridan ozod qilingan hamda odam savdosidan jabrlangan shaxslar uchun ham ish oʻrinlarining majburiy zaxiralari shakllantiriladi. Bunda majburiy zaxiralash xodimlar umumiy sonining 7 foizidan oshmasligi hamda xodimlari soni 20 nafardan ortiq boʻlgan tashkilotlarga nisbatan tatbiq etilishi belgilanganligi rahbarlik va ijro uchun qabul qilinsin.

2. Nurafshon shahri Kambagʻallikni qisqartirish va bandlikka koʻmaklashish boʻlimi hamda “Inson” ijtimoiy xizmatlar markazi shahar hududidagi tashkilotlar boʻyicha 2026-yilda aholining ijtimoiy ehtiyojmand toifalari uchun ish oʻrinlarini belgilash toʻgʻrisidagi takliflari maʼqullansin.

Bunda, xodimlar soni 20 nafardan ortiq boʻlgan davlat tashkilotlarida majburiy zaxiralanadigan ish oʻrinlari soni xodimlar umumiy sonining yetti foizidan oshmagan miqdorda hamda xodimlar soni 100 nafardan ortiq boʻlgan xoʻjalik yurituvchi subyektlarda (davlat ulushi 50 foizdan yuqori boʻlgan korxonalar bundan mustasno) majburiy zaxiralanadigan ish oʻrinlari soni xodimlar umumiy sonining uch foizidan oshmagan miqdorida kelgusi yil uchun 103 ta ish oʻrinlarini zaxiraga qoʻyish, jumladan:

nogironligi boʻlgan shaxslar uchun 8,73 foiz (9 kishi);

oilaviy (maishiy) zoʻravonlikdan jabrlangan shaxslar uchun 2,91 foiz ( 3 kishi);

kambagʻal oilalar reyestridagi oilalarning aʼzolari uchun 78,64 foiz ( 81 kishi);

muqobil joylashtirish shakllarida tarbiyalangan yetim va ota-ona qaramogʻidan mahrum boʻlgan shaxslar uchun 4,85 foiz (5 kishi);

jazoni ijro etish muassasalaridan ozod qilingan shaxslar uchun 4,87 foiz (5 kishi);

xodimlar soni 20 nafardan ortiq boʻlgan davlat tashkilotlarida majburiy zaxiralanadigan ish oʻrinlari soni xodimlar umumiy sonining 7 foizigacha miqdorda ish oʻrinlarining majburiy zaxiralari shakllantiriladi.

3. 2026-yilda aholining ijtimoiy ehtiyojmand toifalarini ishga joylashtirish maqsadida quyidagilar:

davlat tashkilotlari (byudjet tashkilotlari va davlat ulushi 50 foizdan yuqori boʻlgan korxonalar) tomonidan majburiy zaxira qoʻyiladigan ish oʻrinlarining manzilli roʻyxati 1-ilovaga muvofiq;

xodimlarining oʻrtacha yillik soni 100 nafardan ortiq boʻlgan xoʻjalik yurituvchi subyektlar (davlat ulushi 50 foizdan yuqori boʻlgan korxonalar bundan mustasno) tomonidan majburiy zaxira qoʻyiladigan ish oʻrinlarining manzilli roʻyxati 2-ilovaga muvofiq tasdiqlansin.

4. Korxonalar, tashkilotlar va muassasalar rahbarlari:

zaxiraga qoʻyiladigan ish oʻrinlari umumiy sonining kamida 25 foizi miqdorida ish oʻrinlarini yil boshlanishidan oldin, oʻn kundan kechiktirmay tayyor holatga keltirsin va bu haqda shahar Kambagʻallikni qisqartirish va bandlikka koʻmaklashish boʻlimini xabardor qilsin;

ish oʻrinlarining qolgan qismini birinchi chorak davomida toʻliq zaxiraga qoʻysin hamda bu haqda chorak yakunidan soʻng 10 kun ichida yuqoridagi boʻlimni xabardor qilsin;

ishga joylashtirish jarayonlari toʻgʻrisida har oyda, hisobot oyidan keyingi oyning 5-sanasiga qadar maʼlumot taqdim etib borsin.

Zaxiraga qoʻyiladigan ish oʻrinlarini saqlash shartlari Oʻzbekiston Respublikasining “Aholi bandligi toʻgʻrisida”gi qonunining 40-moddasiga muvofiq amalga oshiriladi.

5. Oʻzbekiston Respublikasi Prezidentining 2025-yil 14-fevraldagi PQ-64-son qaroriga muvofiq, aholining ijtimoiy ehtiyojmand toifalaridan boʻlgan shaxslarni belgilangan eng kam miqdordan ortiq miqdorda ishga qabul qilgan ish beruvchilarga har bir xodim uchun 12 oy davomida har oy bazaviy hisoblash miqdorining 2 baravari miqdorida subsidiya mablagʻlari toʻlab berilsin.

6. Oʻzbekiston Respublikasining “Aholi bandligi toʻgʻrisida”gi qonunining 3, 13, 34, 38, 39, 40, 41-moddalariga asosan aholining ijtimoiy ehtiyojmand toifalariga eng kam miqdordagi ish joylarini yaratish yuzasidan qabul qilingan mazkur qarorni bajarmaganlik uchun ish beruvchilar qonunchilikda belgilangan tartibda javobgarlikka tortiladi.

7. Oʻzbekiston Respublikasi Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibini yanada takomillashtirish chora-tadbirlari toʻgʻrisida”gi nizomning 21-bandi, 2-qismiga asosan, muhtojlar uchun ish oʻrinlarini zaxiraga qoʻyish boʻyicha shahar hokimining qarori bajarilmaganligi uchun jarima toʻlash tashkilotni zaxiraga qoʻyiladigan ish oʻrinlarining belgilangan sonini yaratish boʻyicha majburiyatdan ozod qilmaydi.

8. Nurafshon shahri Kambagʻallikni qisqartirish va bandlikka koʻmaklashish boʻlimi (M. Xudaykulov):

besh kun muddatda ushbu qaror nusxasini 1- va 2-ilovalarda koʻrsatilgan tashkilotlar rahbarlariga yetkazsin;

ushbu qaror ijrosini taʼminlasin va uning bajarilishi ustidan muntazam nazorat olib borsin;

qaror talablarini bajarmagan yoki ijtimoiy ehtiyojmand toifalarni asossiz ravishda ishga qabul qilishdan bosh tortgan mansabdor shaxslarni maʼmuriy javobgarlikka tortish choralarini koʻrsin.

9. Mazkur qaror ommaviy axborot vositalarida eʼlon qilinsin hamda hokimlikning rasmiy veb-saytiga joylashtirilsin.

10. Mazkur qaror qabul qilingan kundan kuchga kiradi.

11. Ushbu qarorning bajarilishini nazorat qilish shahar hokimining birinchi oʻrinbosari A. Eshbayev zimmasiga yuklansin.