Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligi oshirish chora-tadbirlari toʻgʻrisida”gi PQ-5-sonli qarori bilan belgilangan ustuvor vazifalarni Jomboy tumani miqyosida amalga oshirish, suv resurslarini boshqarish boʻyicha quyi boʻgʻinlarni mustahkamlash, suvdan foydalanishning samaradorligini oshirish, ilgʻor va tejamkor texnologiyalarni joriy qilish orqali suv taʼminotining barqarorligini taʼminlash maqsadida, Oʻzbekiston Respublikasi “Mahalliy davlat hokimiyati toʻgʻrisida”gi qonunining 6, 24-moddalariga asosan xalq deputatlari tuman Kengashining oʻn sakkizinchi sessiyasi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori ijro uchun qabul qilinsin hamda mazkur qarorda belgilangan ustuvor vazifalarning Jomboy tumanida samarali amalga oshirilishini taʼminlash chora-tadbirlari belgilab olinsin.

2. Mazkur qaror doirasida, Jomboy tumanida olib borilgan ishlar va kelgusidagi ustuvor vazifalar yuzasidan Jomboy tuman suv yetkazib berish xizmati davlat muassasasi boshligʻi Mavlyanov Zoxid Umurzoqovichning hisoboti eshitilib, maʼlumot uchun qabul qilinsin.

3. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qaroriga hamda Oʻzbekiston Respublikasi Prezidenti rahbarligida 2023-yil 29-noyabr kuni kengaytirilgan tarzda oʻtkazilgan videoselektor yigʻilishida belgilab berilgan topshiriqlarni ijrosini taʼminlash maqsadida, suv resurslari kamayganligi inobatga olib Jomboy tumanidagi klaster va fermer xoʻjaliklari suvini isrof qilmaslik uchun ariqlarni betonlash ishlarini olib borish vazifalari topshirilsin.

4. Jomboy tumani boʻyicha 2025-yil 1-oktabrdan 2026-yil 31-martga qadar novegetatsiya davrida isteʼmolchilar kesimida sugʻorish ishlari uchun ajratilgan suv (limiti) ilovaga muvofiq tasdiqlansin.

5. Jomboy tuman hokimining oʻrinbosari (S.Saidov) va Jomboy tuman suv yetkazib berish xizmati davlat muassasasi (Z. Mavlyanov)larga:

Jomboy tumanida suv resurslarini boshqarish tizimini takomillashtirish, hisobga olish, taqsimlash, monitoring va samaradorlikni oshirish hamda suv tejovchi texnologiyalarni keng joriy qilish boʻyicha chora-tadbirlar belgilash;

suv yetkazib berish rejalarini suv limitlariga asoslangan holda ishlab chiqib, suv foydalanuvchilar (fermer xoʻjaliklari, shirkatlar) bilan shartnomaviy tizim joriy etish;

suvdan foydalanishda aholi va kichik xoʻjaliklar uchun limit va grafikka amal qilinishini taʼminlash;

2025-yil yakunigacha tumandagi ekin maydonlarining kamida 30 foizida suv tejaydigan texnologiyalar (tomchilab sugʻorish, lazer tekislash)ni joriy etish rejalashtirish;

2026-yil 1-martga qadar sugʻorish tarmoqlarida raqamli suv oʻlchagich tizimlarini joriy qilish;

har chorakda aholi, fermerlar va suv foydalanuvchilari uchun seminar, davra suhbati, treninglar tashkil etish;

“Suv — milliy boylik” shiori ostida targʻibot va tushuntirish ishlarini kuchaytirish;

har oyda suv isteʼmoli boʻyicha elektron hisobotlar tayyorlansin va tuman xalq deputatlari Jomboy tumani Kengashiga taqdim etib borish vazifalari topshirilsin;

qaror ijrosi uchun barcha tegishli tashkilotlar, hokimlik tuzilmalari, xizmat koʻrsatuvchi muassasalar, klaster va fermer xoʻjaliklari masʼul etib belgilansin.

6. Mazkur qarorning ijrosini nazorat qilish Agrar, qurilish, kommunal sohalar, ekologiya, sanoat va transport masalalari boʻyicha doimiy komissiyasi raisi (N. Mamatqulov) zimmasiga yuklatilsin.

7. Ushbu qaror qabul qilingan kundan kuchga kiradi.