Oʻzbekiston Respublikasining “Geografik obʼyektlarning nomlari toʻgʻrisida”gi Qonuni, Oʻzbekiston Respublikasi Prezidentining 2019-yil 21-oktabrdagi “Oʻzbek tilining davlat tili sifatidagi nufuzi va mavqeini tubdan oshirish chora-tadbirlari toʻgʻrisida”gi PF-5850-sonli Farmoni, Oʻzbekiston Respublikasi Vazirlar Mahkamasining 2012-yil 16-oktabrdagi “Geografik obʼyektlarning nomlari sohasidagi ishlarni tartibga solish chora-tadbirlari haqida”gi 295-sonli, 2020-yil 20-yanvardagi “Mamlakatda davlat tilida ish yuritishni samarali tashkil qilish chora-tadbirlari toʻgʻrisida”gi 34-sonli qarorlari ijrosini taʼminlash maqsadida, Iqtisodiyot va moliya vazirligi huzuridagi kadastr agentligi, Geografik obʼyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish ekspert komissiyasi tomonidan Buxoro shahridagi 44 ta geografik obʼyektni nomlash va qayta nomlash boʻyicha takliflardan 44 ta geografik obʼyektga taklif etilgan nom Oʻzbekiston Respublikasining “Geografik obʼyektlarning nomlari toʻgʻrisida”gi Qonun hujjatlari talablariga muvofiq deb topilib, belgilangan ekspertiza xulosasi tasdiqlangan.

Buxoro shahrida amalga oshirilishi kerak boʻlgan ishlar toʻgʻrisidagi shahar hokimining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi A. Zikrillayevning hisobotini atroflicha muhokama qilib, Xalq deputatlari Buxoro shahar Kengashi qaror qiladi:

1. Iqtisodiyot va moliya vazirligi huzuridagi kadastr agentligi, Geografik obʼyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish ekspert komissiyasining 2025-yil 2-oktabrdagi 02/02-65-sonli Ekspertiza xulosasi hamda shahar hokimining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi A. Zikrillayevning hisoboti maʼlumot uchun qabul qilinsin.

2. Buxoro shahri geografik obʼyektlariga beriladigan nomlar va ularni qayta nomlash takliflari ilovaga muvofiq maʼqullansin.

3. Buxoro shahar ichki ishlar faoliyatini muvofiqlashtirish boshqarmasi (A. Haydarov) nomlangan va qayta nomlangan koʻchalarga aholini roʻyxatga qoʻyish va tegishli yoʼl belgilariga oʻzgartirishlar kiritish bilan bogʻliq tashkiliy ishlarni amalga oshirsin.

4. Davlat kadastrlar palatasi Buxoro shahar filiali (Sh. Qazoqov), shahar statistika boʻlimi (U. Joʼrayev)larga:

yangi nomlangan va nomi oʻzgargan geografik obʼyektlarni shahar xaritasiga joylashtirish, shuningdek, tegishlicha statistika maʼlumotlariga oʻzgartirishlar kiritsin.

5. Buxoro shahar hokimligi axborot xizmati (D. Toʼymurodov), “Buxoro oqshomi” gazetasi tahririyati (I. Rajabova)lar Buxoro shahar hokimining maʼnaviy-maʼrifiy ishlar samaradorligini oshirish, davlat tili toʼgʼrisidagi qonun hujjatlariga rioya etilishini taʼminlash masalalari boʻyicha maslahatchisi A. Zikrillayev bilan birgalikda Oʻzbekiston Respublikasi “Geografik obʼyektlarning nomlari toʻgʻrisida”gi hamda “Davlat tili toʻgʻrisida”gi Qonunlari talablari asosida ushbu olib borilgan ishlarni shahardagi ommaviy axborot vositasi hamda ijtimoiy tarmoqlar orqali keng yoritib borish tavsiya etilsin.

6. Mazkur qarorning ijrosini nazorat qilish Xalq deputatlari shahar Kengashining Ijtimoiy soha, yoshlar siyosati, madaniyat va sport masalalari boʻyicha doimiy komissiyasi (J. Matniyazov) zimmasiga yuklatilsin.

7. Mazkur qaror qabul qilingan kundan eʼtiboran kuchga kiradi.