“Xalıqtıń bántligi haqqında”ǵı Ózbekstan Respublikası Nızamınıń 9-babı hám Ministrler Kabinetiniń 2017-jıl 5-dekabrdegi 965-sanlı qararı menen tastıyıqlanǵan “Sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń az sanın belgilew hám rezervke qoyıw tártibi haqqında”ǵı Rejege tiykarlanıp, 2026-jıl ushın jumıs orınların bántlep qoyıw maqsetinde “Jergilikli mámleketlik hákimiyat haqqında”ǵı Ózbekstan Respublikası Nızamınıń 6 hám 24-statyalarına tiykarlanıp Xalıq deputatları Nókis rayonlıq Keńesi sheshim etedi:

1. Tómendegiler:

a) Ózbekstan Respublikası Prezidentiniń “Ózbekstan Respublikasında jergilikli mámleketlik hákimiyat wákillikli uyımları jumısın 2030-jılǵa shekem rawajlandırıw koncepciyasın tastıyıqlaw haqqında”ǵı 2025-jıl 23-iyundaǵı PP-98-sanlı Pármanına tiykarlanıp sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń az sanın belgilew hám rezervke qoyıw wákillikleri Xalıq deputatları jergilikli Keńeslerine ótkerilgenligi;

b) Ózbekstan Respublikası Prezidentiniń “Miynet qatnasıqları hám kásipke tayarlaw sistemasın jetilistiriw jáne jumıs beriwshilerdi xoshametlewge baylanıslı qosımsha ilajlar haqqında”ǵı 2025-jıl 4-avgusttaǵı PP-126-sanlı Pármanına tiykarlanıp:

xojalıq júrgiziwshi subektler tek ǵana mayıplıǵı bolǵan shaxslar, shańaraqlıq (turmıslıq) zorlıqtan jábirlengen shaxslar, kámbaǵal shańaraqlar reestrindegi shańaraqlardıń aǵzaları, alternativ jaylastırıw túrlerinde tárbiyalanǵan jetimler, ata-ana qaramaǵınan ayırılǵan shaxslar ushın jumıs orınlarınıń májbúriy rezervleri qáliplestiriliwi, bunda májbúriy rezervlew xızmetkerlerdiń ulıwma sanınıń 3% nen aspawı hám xızmetkerleriniń sanı 100 den aslam bolǵan shólkemlerge qollanılıwı;

byudjet shólkemleri hám mámleketlik úlesi 50 procentten joqarı bolǵan kárxanalar tek ǵana mayıplıǵı bolǵan shaxslar, shańaraqlıq (turmıslıq) zorlıqtan jábirlengen shaxslar, kámbaǵal shańaraqlar reestrindegi shańaraqlardıń aǵzaları, alternativ jaylastırıw túrlerinde tárbiyalanǵan jetimler, ata-ana qaramaǵınan ayırılǵan shaxslar, jazanı orınlaw mákemelerinen azat etilgen jáne adam sawdasınan jábirlengen shaxslar ushın jumıs orınlarınıń májbúriy rezervleri qáliplestiriletuǵını, bunda májbúriy rezervlew xızmetkerler ulıwma sanınıń 7% nen aspawı hám xızmetkerleri sanı 20 dan aslam bolǵan shólkemlerge qollanılatuǵını belgilengenligi basshılıq hám orınlaw ushın qabıl etilsin.

2. Nókis rayonlıq Kámbaǵallıqtı qısqartıw hám bántlikke kómeklesiw bólimi hám Nókis rayonlıq "Insan" sociallıq xızmetler orayınıń Nókis rayonı aymaǵındaǵı shólkemler boyınsha 2026-jılı xalıqtıń sociallıq járdemge mútáj kategoriyaları ushın jumıs orınların belgilew haqqındaǵı tómendegi usınısları maqullansın:

xızmetkerler sanı 20 dan aslam bolǵan mámleketlik shólkemlerde májbúriy rezervlenetuǵın jumıs orınlarınıń sanı xızmetkerler ulıwma sanınıń 7% nen aspaǵan muǵdarda jáne xızmetkerler sanı 100 den artıq bolǵan xojalıq júrgiziwshi subektlerde (mámleketlik úlesi 50% ten joqarı bolǵan kárxanalar buǵan kirmeydi) májbúriy rezervlenetuǵın jumıs orınlarınıń sanı xızmetkerler ulıwma sanınıń 3% nen aspaǵan muǵdarda kelesi jıl ushın 30 jumıs ornın rezervke qoyıw, sonıń ishinde:

mayıplıǵı bolǵan shaxslar ushın 6,67 % (2 adam);

shańaraqlıq (turmıslıq) zorlıqtan jábirlengen shaxslar ushın 6,67 % (2 adam);

kámbaǵal shańaraqlar reestrindegi shańaraqlardıń aǵzaları ushın 80% (24 adam);

jazanı orınlaw mákemelerinen azat etilgen shaxslar ushın 6,67 % (2 adam);

3. 2026-jılı xalıqtıń sociallıq járdemge mútáj kategoriyaların jumısqa jaylastırıw maqsetinde tómendegiler:

mámleketlik shólkemler (byudjet shólkemleri hám mámleketlik úlesi 50% ten joqarı bolǵan kárxanalar) tárepinen májbúriy rezervlestiriletuǵın jumıs orınlarınıń mánzilli dizimi qosımshaǵa muwapıq tastıyıqlansın.

4. Kárxanalar, shólkemler hám mákemeler basshıları:

rezervke qoyılatuǵın jumıs orınları ulıwma sanınıń keminde 25% ti muǵdarında rezervke qoyılatuǵın jumıs orınlarınıń tayarlıǵın jıldıń baslanıwınan keminde 10 kún aldın támiyinlewi, sonday-aq, bul haqqında jıldıń baslanıwına shekem Nókis rayonı Kámbaǵallıqtı qısqartıw hám bántlikke kómeklesiw bólimin xabardar etedi;

jumıs orınlarınıń qalǵan bólegin rezervke qoyıw shólkem (jumıs beriwshi) tárepinen kalendar jıldıń birinshi sheregi dawamında támiyinleniwi, bul haqqında Nókis rayonı Kámbaǵallıqtı qısqartıw hám bántlikke kómeklesiw bólimin birinshi sherek juwmaqlanǵannan soń, 10 kúnnen keshikpey xabardar etedi;

jumısqa jaylastırıw haqqında Nókis rayonı Kámbaǵallıqtı qısqartıw hám bántlikke kómeklesiw bólimine hár ayda, esap beriw ayınan keyingi aydıń 5-sánesine shekem málimleme usınadı.

rezervke qoyılatuǵın jumıs orınların saqlaw shártleri Ózbekstan Respublikasınıń “Xalıqtıń bántligi haqqında”ǵı Nızamınıń 40-statyasına muwapıq belgilengen tártipte ámelge asırıladı.

5. Ózbekstan Respublikası Prezidentiniń “Xalıqtı isbilermenlikke tartıw hám bántligin támiyinlew ushın finanslıq járdemler ajıratıw sistemasın jetilistiriwge baylanıslı qosımsha ilajlar haqqında”ǵı 2025-jıl 14-fevraldaǵı PQ-64-sanlı qararına muwapıq xalıqtıń sociallıq járdemge mútáj kategoriyalarınan bolǵan shaxslardı jumıs orınlarınıń belgilengen eń az sanınan artıq muǵdarda jumısqa qabıl etiw ushın jumıs beriwshilerge - hár bir xızmetker ushın 12 ay dawamında hár ayda bazalıq esaplaw muǵdarınıń 2 esesi muǵdarında subsidiya qarjıların tólep berilsin.

6. Ózbekstan Respublikasınıń “Xalıqtıń bántligi haqqında”ǵı Nızamı 3-, 13-, 34-, 38-, 39-, 40-, 41-statyalarına tiykarlanıp xalıqtıń sociallıq járdemge mútáj kategoriyalarına eń az muǵdardaǵı jumıs orınların jaratıw boyınsha qabıl etilgen usı qarardı orınlamaǵanı ushın jumıs beriwshiler nızamshılıqta belgilengen tártipte juwapkershilikke tartıladı.

7. Ózbekstan Respublikası Ministrler Kabinetiniń 2017-jıl 5-dekabrdegi 965-sanlı qararı menen tastıyıqlanǵan “Sociallıq qorǵawǵa mútáj, jumıs tabıwda qıyınlasıp atırǵan hám miynet bazarında teń shártlerde básekilese almaytuǵın shaxslardı jumısqa jaylastırıw ushın jumıs orınlarınıń eń kem sanın belgilew hám rezervke qoyıw tártibin bunnan bılay da jetilistiriw ilajları haqqında”ǵı Rejeniń 21-bánti, 2-bólimine tiykarlanıp, mútájler ushın jumıs orınların rezervke qoyıw boyınsha Nókis rayonlıq Keńesiniń sheshimi orınlanbaǵanı ushın járiyma tólew shólkemdi rezervke qoyılatuǵın jumıs orınlarınıń belgilengen sanın jaratıw boyınsha minnetlemeden azat etpeydi.

8. Nókis rayonı Kámbaǵallıqtı qısqartıw hám bántlikke kómeklesiw bólimi w.w.a B.Jannazarov:

bes kún múddette usı sheshimniń nusqasın qosımshada kórsetilgen shólkemlerdiń basshılarına jetkersin hám usı sheshimniń orınlanıwı ústinen qadaǵalawdı támiyinlesin.

xalıqtıń sociallıq járdemge mútáj kategoriyaları ushın jumıs orınlarınıń eń az sanın belgilew boyınsha Xalıq deputatları Nókis rayonlıq Keńesiniń usı sheshimi orınlanbaǵanda;

sonday-aq, olardı jumısqa qabıl etiw tiykarsız túrde biykarlanǵanı ushın shólkemlerdiń lawazımlı shaxslarına nızam hújjetlerinde belgilengen tártipte hákimshilik juwapkershilikke tartıw támiyinlensin.

9. Usı sheshim ǵalaba xabar qurallarında járiyalansın hám hákimliktiń rásmiy veb-saytına jaylastırılsın.

10. Usı sheshimniń orınlanıwın támiyinlew rayon hákiminiń birinshi orınbasarı B.Tileuovqa júklensin.

11. Usı sheshimniń orınlanıwın qadaǵalaw Xalıq deputatları Nókis rayonlıq Keńesiniń Jergilikli byudjet, isbilermenlikti rawajlandırıw hám ekonomikalıq reformalar máseleleri boyınsha turaqlı komissiyasınıń baslıǵı Ǵ.Saburovqa júklensin.

12. Usı sheshim qabıl etilgen kúnnen kúshke kiredi.