Oʻzbekiston Respublikasi Byudjet kodeksining 126-moddasi va Oʻzbekiston Respublikasi Oliy Majlisi Senati kengashining 2024-yil 29-noyabrdagi “Qoraqolpogʻiston Respublikasi respublika byudjetining, viloyatlar viloyat byudjetlarining, Toshkent shahri shahar byudjetining, tumanlar va shaharlar byudjetlarining qoʻshimcha manbalarini aniqlash va ulardan foydalanishni tartibga solishni takomillashtirish toʻgʻrisida”gi KQ-5-V-sonli qaroriga muvofiq shahar mahalliy byudjetining 2025-yil III-chorak yakuni buyicha shakllangan qoʻshimcha manbalaridan foydalanish boʻyicha Xalq deputatlari Qoʻqon shahar Kengashi qaror qiladi:

1. Oʻzbekiston Respublikasi Oliy Majlisi Senati Kengashining 2024-yil 29-noyabrdagi KQ-5-V-son qarori bilan tasdiqlangan nizomga muvofiq mahalliy byudjetning qoʻshimcha manbalaridan foydalanishda faqatgina (favqulodda holatlar bundan mustasno) xalq deputatlari mahalliy Kengashlari qarorlari asosida yoʻnaltirilishini taʼminlash koʻrsatib oʻtilganligi inobatga olinsin.

2. Shahar mahalliy byudjetining 2025-yil III-chorak yakuni boʻyicha shakllangan qoʻshimcha mablagʻidan ilovaga muvofiq ajratilsin.

3. Mazkur qaror asosida mablagʻ ajratilayotgan byudjet tashkilotlari, byudjet buyurtmachilari va byudjet mablagʻi oluvchilar rahbarlari ajratilgan mablagʻlardan maqsadli va samarali foydalanishini hamda moliyalashtirish manbasini ochish uchun oʻrnatilgan tartibda rasmiylashtirilgan hujjatlarni hamda mablagʻlarni ishlatish yakuni bilan tegishli hisobotlarni shahar iqtisodiyot va moliya hamda Gʻaznachilik xizmati boʻlimlariga taqdim etilishini taʼminlash vazifalari yuklatilsin.

4. Shahar Iqtisodiyot va moliya boʻlimi (M.Sanginov)ga ajratilgan mablagʻlar doirasida xarajatlar smetasiga belgilangan tartibda tegishli oʻzgartirishlar kiritish, shahar Gʻaznachilik xizmati boʻlimi (O.Soliev)ga toʻlovlarni oʻrnatilgan tartibda va oʻz vaqtida amalga oshirish vazifalari topshirilsin.

5. Mazkur Kengash qarori bajarilishini nazorat qilish Xalq deputatlari shahar Kengashining “Mahalliy byudjet, iqtisodiy isloxotlarni amalga oshirish, investitsiyalar va tadbirkorlikni rivojlantirish masalalari boʻyicha doimiy komissiyasi hamda shahar hokimining birinchi oʻrinbosari N.Xamedov zimmasiga yuklatilsin.