Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2019 yil 14 sentyabrdagi “Toʻylar, oilaviy tantanalar, maʼraka va marosimlar oʻtkazilishini tartibga solish tizimini yanada takomillashtirish toʻgʻrisida”gi 2736-III/QQ-592-III-son Qoʻshma qarori ijrosini taʼminlash hamda toʻylar, oilaviy tantanalar, maʼraka va marosimlar oʻtkazishni ixchamlashtirish, namunali oilaviy tadbirlar oʻtkazilishini tashkil etish va ushbu masalada targʻibot-tashviqot ishlarini kuchaytirish hamda doimiy monitoringini yoʻlga qoʻyish maqsadida xalq deputatlari Qoʻqon shahar Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2019 yil 14 sentyabrdagi “Toʻylar, oilaviy tantanalar, maʼraka va marosimlar oʻtkazilishini tartibga solish tizimini yanada takomillashtirish toʻgʻrisida”gi 2736-III/QQ-592-III-son Qoʻshma qarori maʼlumot va ijro uchun qabul qilinsin.

2. Toʻylar, oilaviy tantanalar, maʼraka va marosimlar oʻtkazilishini tartibga solish toʻgʻrisidagi nizom (keyingi oʻrinlarda - Nizom) 1-ilovaga, xalq deputatlari Qoʻqon shahar Kengashi huzurida Toʻylar, oilaviy tantanalar maʼraka va marosimlar oʻtkazilishini muvofiqlashtirish boʻyicha komissiyasi (keyingi oʻrinlarda - Komissiya) tarkibi 2-ilovaga muvofiq tasdiqlansin.

3. Sharoitdan kelib chiqib, osh berish marosimining vaqti haftaning dushanba, seshanba, chorshanba, payshanba va juma kunlari soat 06:00 dan 08:00 gacha, haftaning shanba va yakshanba kunlari soat 06:00 dan 14:00 gacha etib belgilansin.

4. Qoʻqon shahar hokimining oʻrinbosari (A.Ergashev), shahar madaniyat boʻlimi:

toʻylar, oilaviy tantanalar, maʼraka va marosimlarni milliy qadriyatlarga mos tarzda ixcham va kamxarj oʻtkazishga erishish uchun sanʼatkorlar tomonidan xizmatlar koʻrsatilishini tartibga solish choralarini koʻrsin.

5. Shahar IIB boshligʻi (A.Parpiyev):

toʻylar, oilaviy tantanalar, maʼraka va marosimlar oʻtkazilishida jamoat tartibi va yoʻl harakati xavfsizligini taʼminlash hamda fuqarolar xavfsizligiga jiddiy xavf solishi mumkin boʻlgan koʻngilsiz holatlarning oldini olish choralarini doimiy ravishda koʻrib borsin.

6. Shahar bosh imom xatibi (A.Isaqov):

toʻylar, oilaviy tantanalar, maʼraka va marosimlar davomida muqaddas dinimiz talablariga zid boʻlgan turli odat va rasm-rusumlar oʻtkazilishining oldini olish boʻyicha qoʻshimcha choralarni koʻrsin, bu borada diniy tashkilotlarning vakolatli vakillari masʼuliyatini yanada kuchaytirsin.

7. Shahar IIB boshligʻi (A.Parpiyev), shahar hokimi oʻrinbosari (A.Ergashev) va Maxalllar uyushmasi shahar boʻlinmasi (Z.Djoʻrayev) bilan birgalikda Nizom talablaridan kelib chiqib, toʻylar, oilaviy tantanalar, maʼraka va marosimlarni tashkil etish va oʻtkazishda ichki ishlar organlari profilaktika inspektorlari hamda mahalla fuqarolari yigʻinlari raislarining faoliyatini tashkil etish choralarini koʻrsin.

8. Shahar hokimligi matbuot xizmati (U.Norboyev):

Ommaviy axborot vositalari va ijtimoiy tarmoqlarda toʻylar, oilaviy tantanalar, maʼraka va marosimlarni oʻtkazish tartibiga rioya etilishi holati, urf-odatlarimiz va anʼanalarimizning haqiqiy mohiyati hamda ahamiyatini keng yoritib borish, aholi orasida targʻibot-tashviqot ishlarini tizimli tashkil etish tavsiya etilsin.

Mazkur qaror www.regulation.gov.uz normativ-huquqiy hujjatlar loyihalari portalida muhokamadan oʻtganligi maʼlumot uchun qabul qilinsin, qaror matni shahar hokimligining rasmiy veb-saytiga joylashtirilishi taʼminlansin.

9. Komissiya toʻylar, oilaviy tantanalar, maʼraka va marosimlar oʻtkazilishining doimiy monitoringini amalga oshirib borsin va uning natijalariga koʻra tegishli takliflarni xalq deputatlari shahar Kengashiga kiritib borsin.

10. Xalq deputatlari Qoʻqon shahar Kengashi ushbu Qarorning ijrosi yuzasidan yil yakunlari boʻyicha Xalq deputatlari viloyat Kengashiga axborot kiritib borsin.

11. Mazkur qarorning ijrosini nazorat qilish xalq deputatlari Qoʻqon shahar Kengashining doimiy komissiyalari zimmasiga yuklatilsin.

12. Ushbu qaror qabul qilingan kundan eʼtiboran kuchga kiradi