Oʻzbekiston Respublikasi Prezidentining “Oʻzbekiston Respublikasida aholi va qishloq xoʻjaligini roʻyxatga olish tadbirini oʻtkazish toʻgʻrisida” 2025-yil 19-sentabrdagi PF-173-son Farmoni ijrosini taʼminlash maqsadida, qaror qilaman:

1. Viloyat hokimining 2025-yil 25-sentabrdagi “Oʻzbekiston Respublikasi Prezidentining “Oʻzbekiston Respublikasida aholi va qishloq xoʻjaligini roʻyxatga olish tadbirini oʻtkazish toʻgʻrisida” 2025-yil 19-sentabrdagi PF-173-son Farmoni ijrosini taʼminlash haqida”gi 547-8-0-Q/25-sonli qarori rahbarlik va ijro uchun qabul qilinsin.

2. Oʻzbekiston Respublikasi Prezidentining mazkur qarori bilan:

Oʻzbekiston Respublikasida aholi va qishloq xoʻjaligini roʻyxatga olish (keyingi oʻrinlarda - roʻyxatga olish tadbiri) 2026-yil 15-yanvar holatiga koʻra 2026-yil 15-yanvardan 28-fevralga qadar oʻtkazilishi belgilanganligi;

Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha hududiy komissiyalarning namunaviy tarkibi tasdiqlanganligi;

roʻyxatga olish tadbiri doirasida quyidagilar:

davlat organlari va tashkilotlari 2026-yil 15-yanvardan 31-yanvarga qadar oʻz tizimida faoliyat yuritayotgan barcha xodimlarning census.stat.uz portalida roʻyxatdan oʻtishini;

Oliy taʼlim, fan va innovatsiyalar vazirligi respublikadagi barcha oʻrta maxsus va kasbiy taʼlim tashkilotlari, shuningdek, davlat, nodavlat va xorijiy oliy taʼlim tashkilotlari va ularning filiallarida tahsil olayotgan talabalarning census.stat.uz portalida roʻyxatdan oʻtishini;

Qishloq xoʻjaligi vazirligi Oʻzbekiston fermerlari kengashi, Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman hokimliklari bilan birgalikda fermer xoʻjaliklari, yuridik shaxs tashkil etgan dehqon xoʻjaliklari, qishloq xoʻjaligi faoliyatini amalga oshiruvchi tashkilotlar va asosiy faoliyati qishloq xoʻjaligi boʻlmagan qishloq xoʻjaligi yerlaridan foydalanayotgan korxona va tashkilotlarning internet tarmogʻi orqali roʻyxatdan oʻtishini taʼminlanishi belgilanganligi inobatga olinsin.

3. Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha tuman komissiyasining tarkibi ilovaga muvofiq tasdiqlansin.

4. Tuman hokimining tarmoqlar boʻyicha oʻrinbosarlari B.Xasanov, Z.Abdanov, N.Xaydarqulov, Z.Mirzayeva tegishli korxona va tashkilotlar bilan birgalikda:

2025-yil 20-oktabrga qadar hududiy komissiyaning chora-tadbirlar rejasini tasdiqlasin.

2025-yil 1-noyabrga qadar:

tumanda roʻyxatga olish shtabi faoliyatini tashkil etilishini hamda roʻyxatga olish tadbirida ishtirok etadigan asosiy hamda zaxira xodimlar roʻyxatini shakllantirilishini va tasdiqlanishini;

roʻyxatga olish tadbirini oʻtkazishga jalb etiladigan xodimlarni oʻqitish uchun mebellar va aloqa vositalari bilan jihozlangan vaqtincha bino yoki xonalarni ajratilishini;

2025-yil 15-noyabrga qadar tumanni roʻyxatga olish va hisob uchastkalariga boʻlgan holda tashkiliy rejalarni tasdiqlanishini;

doimiy ravishda roʻyxatga olish tadbirining aholi oʻrtasida keng yoritilishini;

roʻyxatga olish tadbirining oʻz vaqtida va sifatli oʻtkazilishini hamda buning uchun amalga oshirilayotgan ishlar boʻyicha kunlik nazorat oʻrnatilishini taʼminlasin.

5. Tuman Ichki ishlar boʻlimi, tuman Mudofaa boʻlimi, tuman Favqulodda vaziyatlar boʻlimi, Oʻzbekiston Respublikasi Milliy gvardiyasining Uzun tuman boʻlimi, Oʻzbekiston musulmonlari idorasi Uzun tuman vakili, tuman Tibbiyot birlashmasi, tuman “Inson” ijtimoiy xizmatlar markazi bilan birgalikda 2025-yil 1-noyabrdan boshlab maxsus muassasa va tashkilotlardan biriktirilgan masʼul xodimlar tomonidan maxsus idoralardagi ayrim toifadagi aholini roʻyxatga olishni amalga oshirsin.

6. Tuman hokimligining matbuot kotibi Oʻ.Mingboyeva 2025-yil 1-oktabrdan 2026-yil 15-yanvarga qadar roʻyxatga olishni oʻtkazish haqida aholini xabardor qilish, aholini Internet orqali roʻyxatdan oʻtish jarayoniga tayyorlab borish maqsadida OneID tizimiga roʻyxatdan oʻtishlari boʻyicha targʻibot-ishlarini amalga oshirish tavsiya etilsin.

7. Tuman hokimining qishloq va suv masalalari boʻyicha oʻrinbosari N.Xaydarqulov, tuman Fermerlar kengashi va boshqa aloqador tashkilotlar bilan birgalikda 2026-yil 15-yanvardan 31-yanvarga qadar tumanda mavjud fermer xoʻjaliklari, yuridik shaxs tashkil etgan dehqon xoʻjaliklari, qishloq xoʻjaligi faoliyatini amalga oshiruvchi tashkilotlar va asosiy faoliyati qishloq xoʻjaligi boʻlmagan qishloq xoʻjaligi yerlaridan foydalanayotgan korxona va tashkilotlarni “hisobot.stat.uz” portalida Internet tarmogʻi orqali roʻyxatdan oʻtishlarini taʼminlasin.

8. Roʻyxatga olish tadbirini toʻgʻri tashkil etish va samarali oʻtkazishga tuman hokimining oʻrinbosarlari, tuman Statistika boʻlimi boshligʻi B.Mamatqulov, Oʻzbekiston mahallalari uyushmasining tuman boʻlimi boshligʻi T.Kucharov masʼul va shaxsiy javobgar etib belgilansin.

9. Ushbu qarorning bajarilishini nazorat qilish tuman hokimining birinchi oʻrinbosari B.Xasanov zimmasiga yuklansin.