Oʻzbekiston Respublikasining 1997-yil 25-apreldagi “Shahar yoʻlovchilar transporti toʻgʻrisida”gi 419-I sonli Qonuni, Oʻzbekiston Respublikasi Prezidentining 2024-yil 25-martdagi PQ–139-son “Jamoat transportini moliyalashtirish tizimini takomillashtirish boʻyicha qoʻshimcha chora-tadbirlar toʻgʻrisida”gi qarori, Vazirlar Mahkamasining 2012-yil 17-sentabrdagi 273-son qarori bilan tasdiqlangan “Oʻzbekiston Respublikasida yoʻlovchilar aylanmasini va umumiy foydalaniladigan avtomobil va elektr transportida shaharda, shahar atrofida, shaharlararo, xalqaro yoʻnalishlarda hamda soatlar boʻyicha tashilgan yoʻlovchilar sonini aniqlash tartibi toʻgʻrisidagi nizom”ga muvofiq hamda Buxoro viloyati hokimining birinchi oʻrinbosari B.Axmedovning 2025-yil 2-maydagi bildirgisiga asosan Buxoro va Kogon shaharlaridagi umumiy foydalaniladigan jamoat transportida koʻrsatilayotgan xizmatlarning sifatini oshirish, jamoat transportida toʻlovlar shaffofligini taʼminlash, yoʻlkira haqini toʻlashda elektron toʻlov tizimlaridan foydalanishni ragʻbatlantirish maqsadida qaror qilaman:

1. Quydagilar:

Oʻzbekiston Respublikasi Prezidentining 2024-yil 25-martdagi PQ–139-son “Jamoat transportini moliyalashtirish tizimini takomillashtirish boʻyicha qoʻshimcha chora-tadbirlar toʻgʻrisida” qaroriga muvofiq jamoat transportida yoʻlkira haqini toʻlashda elektron toʻlov tizimidan foydalanishni ragʻbatlantiruvchi tariflar joriy etilishi belgilanganligi;

Oʻzbekiston Respublikasining “Shahar yoʻlovchilar transporti toʻgʻrisida”gi Qonuniga muvofiq shahar yoʻlovchilar transportida yoʻlovchilar va bagaj tashish haqini toʻlash Qoraqalpogʻiston Respublikasi Vazirlar Kengashi, viloyatlar va Toshkent shahar davlat hokimiyati organlari tomonidan yoʻl qoʻyiladigan doirada belgilangan tariflar boʻyicha amalga oshirilishi qayd etilganligi maʼlumot uchun qabul qilinsin.

2. Buxoro va Kogon shaharlaridagi jamoat transporti yoʻnalishlarida (avtobus va yoʻnalishli taksi) qatnovlarni amalga oshirish uchun yoʻlkira haqining quyidagi cheklangan tariflari belgilansin:

а) bir yoʻlovchi qatnovi uchun cheklangan tarif – 3 000 (uch ming) soʻm. Bunda bir yoʻlovchi qatnovi uchun 1 (bir) martalik toʻlov elektron toʻlov tizimi orqali amalga oshirilganda ragʻbatlantiruvchi chegirma qoʻllanilgan holda – 2 000 (ikki ming) soʻm undiriladi;

b) bir yoʻlovchining bagajini tashish boʻyicha xizmat uchun – 4 000 (toʻrt ming) soʻm;

d) qatnovlar soniga bogʻliq holda belgilangan tarif rejalarini hisoblash uchun cheklangan tarif – 2 000 (ikki ming) soʻm.

e) Elektron toʻlovlarni amalga oshirishda amaldagi kunlik va oylik tariflarga qoʻshimcha ravishda qatnovlar sonidan kelib chiqib, koʻp martali tarif rejalari 1-ilovaga;

f) Elektron toʻlov tizimlari (transport kartalari)dan foydalanilgan holda bir soat ichida bir yoʻnalishli yoʻlovchi transportidan boshqasiga oʻtish sonidan kelib chiqqan holda imtiyozli tariflar miqdori 2-ilovaga asosan belgilansin;

3. Buxoro viloyati transport boshqarmasi (F.Rajabov) mazkur qaror talablaridan kelib chiqib, ikki kun muddatda qonunchilik hujjatlariga muvofiq yoʻlovchilarni tashuvchi tegishli tashkilot va korxonalar bilan tuzilgan tanlov (tender) shartnomalariga tegishli qoʻshimcha va oʻzgartirishlar kiritilishini taʼminlasin.

4. Buxoro viloyatihokimining 2024-yil 25-iyundagi 293-2-0-Q/24-son qarori oʻz kuchini yoʻqotgan deb hisoblansin.

5. Mazkur qaror “Buxoronoma” va “Buxarskiy vestnik” gazetalarida eʼlon qilinsin hamda hokimlikning buxoro.uz rasmiy veb-saytiga joylashtirilsin.

6. Ushbu qaror rasmiy eʼlon qilingan kundan eʼtiboran kuchga kiradi.

7. Mazkur qaror ijrosining nazorati viloyat hokimining oʻrinbosari J.Arashov hamda transport boshqarmasi boshligʻi F.Rajabov zimmalariga yuklansin.