Ózbekstan Respublikası Ministrler Kabinetiniń 2022-jıl 14-fevraldaǵı “Awıl xojalıǵına qaratılmaǵan jer uchastkaların menshiklestiriw haqqında”ǵı Ózbekstan Respublikası Nızamın ámelge asırıw ilajları haqqında”ǵı 71-sanlı qararı menen tastıyıqlanǵan isbilermenlik hám qala qurılısı iskerligin ámelge asırıw ushın jer uchastkaların múlk huqıqı hám ijara huqıqı tiykarında elektron onlayn-aukcion arqalı beriw tártibi haqqındaǵı Rejesiniń 22-bánti talapların orınlaw maqsetinde, sonday-aq, “Qaraqalpaqstan Respublikası Ministrler Keńesi haqqında”ǵı Nızamınıń 35-statyasına tiykarlanıp, Qaraqalpaqstan Respublikası Ministrler Keńesi qarar etedi:

1. Qaraqalpaqstan Respublikasınıń Nókis qalası hám rayonlarında 2025-jıl ushın isbilermenlik hám qala qurılısı iskerligin ámelge asırıw maqsetinde awıl xojalıǵına qaratılmaǵan bos turǵan jer uchastkaların elektron onlayn-aukcion sawdaları arqalı ijara huqıqı menen beriwdiń bir kvadrat metr jer uchastkası ushın eń kem muǵdarı bir kvadrat metr jer uchastkasınıń bir jıllıq bazalıq salıq muǵdarın hám aymaqtaǵı bar bolǵan hám keleshekte oraylasqan dárekler esabınan payda bolıwı rejelestirilgen injenerlik kommunikaciya tarmaqlarına jalǵanıw noqatların inabatqa alıp qosımshaǵa muwapıq tastıyıqlansın.

2. Nókis qalası hám rayonlar hákimleri Qurılıs ministrligi, Kadastr agentliginiń Qaraqalpaqstan Respublikası basqarması, Mámleketlik kadastrları palatasınıń Qaraqalpaqstan Respublikası basqarması hámde tiyisli ministrlik, mákemeler menen birgelikte belgilengen tártipte yuridikalıq hám fizikalıq shaxslarǵa isbilermenlik hám qala qurılısı iskerligin ámelge asırıw ushın jer uchastkalardı ijara huqıqı menen beriw maqsetinde ekektron aukcion sawdalarına shıǵarılıwın támiyinlesin.

Bunda aymaqlarda jer uchastkalardı ijara huqıqı menen beriwdiń eń kem muǵdarların belgilewde jer uchastkasınıń maydanı (kv.m.), bir kvadrat jer uchastkası ushın ijaraǵa beriwdiń eń kem muǵdarı (swm/kv.m.), jer uchastkasın ijaraǵa beriw múddeti (jıl), jer uchastkasın tańlaw materialların tayarlaw jumıslarınıń bahası, jer uchastkasına bolǵan huqıqlardı mámleketlik dizimnen ótkeriwge tiyisli qárejetler (som) inabatqa alınsın.

3. Nókis qalası hám rayonlar hákimleri nızamshılıqta belgilengen tiykarlar hám tártipte:

Elektron aukcion sawdalarında satılǵan jer uchastkalarınan maqsetli hám nátiyjeli paydalanıwın turaqlı monitoringin alıp barsın hámde maqsetsiz paydalanıw jaǵdayları anıqlanǵan jaǵdayda jer uchastkasın hákimlik rezervine alıw;

Ekonomika hám finans ministrligi, Salıq basqarması, Kadastr agentliginiń Qaraqalpaqstan Respublikası basqarması, Mámleketlik kadastrları palatası Qaraqalpaqstan Respublikası basqarması, Mámleket aktivlerin basqarıw agentliginiń Qaraqalpaqstan Respublikası aymaqlıq basqarması menen birgelikte aymaqlarda isbilermenlik hám qala qurılısı iskerligin ámelge asırıw maqsetinde awıl xojalıǵına qaratılmaǵan bos jer uchastkaları hám ımarat (bina)lardıń belgilengen eń kem muǵdarǵa qatań ámel etiliwin hámde jergilikli byudjetke pul túsimlerin waqtında hám tolıq túsiriliwin támiyinlew ilajların kórsin.

4. Aymaqlıq salıq inspekciyaları tárepinen Nókis qalası, rayonlar hám óz aldına alınǵan aymaqlar (massivler), kishi sanaat, jaslar sanaat hám isbilermenlik zonaları ushın jer uchastkasın ijaraǵa beriwdiń eń kem muǵdarı belgilengen tártipte usı qarar tastıyıqlanǵan sáneden baslap bir jumıs kúni ishinde “Yerelektron” avtomatlastırılǵan elektron sistemasına kirgizilsin.

5. Qaraqalpaqstan Respublikası Ministrler Keńesiniń Málimleme xızmeti, Mámleketlik salıq basqarması hámde Kadastr agentliginiń Qaraqalpaqstan Respublikası basqarması, Qaraqalpaqstan Respublikası Xabar hám ǵalaba kommunikaciyalar basqarması Qaraqalpaqstan Respublikası teleradiokompaniyası, “Erkin Qaraqalpaqstan” hám “Vesti Karakalpakstana” gazetaları redakciyası menen birgelikte belgilengen tártipte usı qarardı xalıq hám isbilermenler ortasında úgit-násiyatlaw, maqalalardı baspadan shıǵarıw hámde ǵalaba xabar quralları arqalı sáwlelendiriw jumısların alıp barsın.

6. Qaraqalpaqstan Respublikası Ministrler Keńesiniń Málimleme xızmetine nızamshılıqta belgilengen tártipte usı qarardı rásmiy dáreklerde járiyalaw wazıypası tapsırılsın.

7. Qaraqalpaqstan Respublikası Ministrler Keńesiniń 2023-jıl 23-may kúngi 153-13-0-Q/23-sanlı qararı óz kúshin joytqan dep esaplansın.

8. Usı qarardıń orınlanıwın nátiyjeli shólkemlestiriwge juwapker Salıq basqarması baslıǵı X.Bekchanov, Qurılis ministri K.Aytbaev, Kadastr agentliginiń Qaraqalpaqstan Respublikası basqarması baslıǵı I. Tleuov belgilensin.

Qarardıń orınlanıwın talqılaw, atqarıw ushın juwapker shólkemlerdıń jumısın muwapıqlastırıw hám qadaǵalaw Qaraqalpaqstan Respublikası Ministrler Keńesi baslıǵınıń birinshi orınbasarı N. Erlepesovqa júklensin.