Oʻzbekiston Respublikasining “Taʼlim toʻgʻrisida”gi Qonuni, Oʻzbekiston Respublikasi Vazirlar Mahkamasining 2017-yil 15-martdagi “Umumiy oʻrta taʼlim toʻgʻrisidagi nizomni tasdiqlash haqida”gi 140-son qarori, Oʻzbekiston Respublikasi Prezidentining 2022-yil 11- maydagi PF-134-sonli qaroriga muvofiq, 1-sinfga qabul qilishda ota-onalarga qulaylik yaratish uchun bolalarni davlat umumiy oʻrta taʼlim muassasalariga oʻqishga qabul qilish boʻyicha davlat xizmatlari joriy etish, hamda maktab yoshidagi bolalarni umumiy oʻrta taʼlimga toʻliq qamrab olish va umumtaʼlim muassasalariga hududlarni biriktirish maqsadida qaror qilaman:

1. 2025/2026-oʻquv yilida maktab yoshidagi bolalarni umumiy oʻrta taʼlimga toʻliq qamrab olish maqsadida umumtaʼlim muassasalariga biriktirilgan hududlar ilovaga muvofiq tasdiqlansin.

2. Shahar hokimining yoshlar siyosati, ijtimoiy rivojlantirish va maʼnaviy- maʼrifiy ishlar boʻyicha oʻrinbosari M. Saʼdullayeva, Kogon shahar maktabgacha va maktab taʼlimi boʻlimi v.v.b. A. Ziyayevlarga:

Oʻzbekiston Respublikasi Vazirlar Mahkamasining 2022-yil 1-iyundagi 295-son qarori bilan bolalarni davlat umumiy oʻrta taʼlim muassasalariga qabul qilish hamda oʻquvchilarni bir umumiy oʻrta taʼlim muassasasidan boshqasiga oʻtkazish boʻyicha davlat xizmatlari koʻrsatishning maʼmuriy reglamenti tasdiqlanganligi, 2025-2026-oʻquv yilida bolalarni umumiy oʻrta taʼlim maktablariga qabul qilish boʻyicha davlat xizmati Yagona interaktiv davlat xizmatlari portali (my.gov.uz) yoki maktabgacha va maktab taʼlimi vazirligining elektron davlat xizmatlari portali (my.maktab.uz) orqali amalga oshirilishi va Kogon shahrida 2025-2026 oʻquv yilida davlat umumiy oʻrta taʼlim maktablarining 1-sinfga qabuli boʻyicha davlat xizmati joriy etilishi tasdiqlanganligini inobatga olgan holda, maktab yoshidagi bolalarni umumiy oʻrta taʼlim muassasalariga toʻliq qamrab olinishini taʼminlash;

umumiy oʻrta taʼlim maktablariga farzandlarining hujjatlarini topshirish uchun kelgan ota-onalarni elektron navbatda belgilangan muddatda qabul qilinishini tashkil etish;

yangi oʻquv yiliga samarali tayyorgarlik koʻrish doirasida maktablarni malakali boshlangʻich sinf oʻqituvchilari bilan toʻldirish choralarini koʻrish;

qarorning mazmun-mohiyatini keng jamoatchilikka tushuntirib borish maqsadida ijtimoiy tarmoqlar va ommaviy axborot vositalarida muntazam yoritib borish;

mazkur qaror tasdiqlangan kundan eʼtiboran barcha umumtaʼlim muassasalariga yetkazish va ijrosini taʼminlash topshirilsin.

3. Kogon shahridagi barcha umumiy oʻrta taʼlim maktablari direktorlariga:

biriktirilgan hududlarda mahallalar bilan hamkorlikda 0 — 7 yoshdagi bolalarning sonini aniqlash ishlarini doimiy nazoratga olish;

2025/2026-oʻquv yilida 1-sinfga faqatgina 2018-yil 1-yanvardan keyin va 31-dekabrga qadar tugʻilgan bolalarni qabul qilish;

2025/2026-oʻquv yilida 1-sinfga oʻqishga qabul qilingan bolalar soni qabul rejasiga nisbatan oshib ketgan hamda oʻqitishga moddiy-texnik imkoniyati yetmaydigan maktablardan yashash joyi boʻyicha hududi biriktirilgan maktablarga qabul qilish (oʻtkazish) orqali taʼlim sifatini yaxshilash choralarini koʻrish;

mazkur qaror mazmun-mohiyatini aholiga, xususan maktab yoshidagi bolalari mavjud boʻlgan ota-onalarga tushuntirish ishlarini olib borish;

biriktirilgan hududdagi maktab yoshidagi bolalarni oʻz vaqtida umumtaʼlim muassasasiga oʻqishga jalb qilish uchun umumtaʼlim muassasalari rahbarlari shaxsan masʼul ekanligi belgilansin;

Umumiy oʻrta taʼlim maktabiga oʻqishga qabul qilinayotgan bolalarning ota-onalari umumtaʼlim muassasasi nizomi, ichki tartib-qoidalari va taʼlim-tarbiya jarayonini tartibga soluvchi boshqa hujjatlari talablariga rioya etilishini taʼminlasin.

4. Kogon shahar hokimining 2023-yil 27-iyundagi 123-2-208-Q/23-sonli “2023/2024-oʻquv yili maktab yoshidagi bolalarni umumiy oʻrta taʼlimga toʻliq qamrab olish va umumtaʼlim muassasalariga hududlarni biriktirish toʻgʻrisida” gi qarori oʻz kuchini yoʻqotgan deb hisoblansin.

5. Mazkur qaror rasmiy eʼlon qilingan kundan boshlab qonuniy kuchga kiradi.

6. Mazkur qarorning ijrosini nazorat qilish shahar hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari M. Saʼdullayeva zimmasiga yuklatilsin.