Bozataw rayonında ekologiyalıq ortalıqtı jaqsılaw hám toǵaylardı kóbeytiw ushın órttiń aldın alıw, oǵan qarsı gúresiwdi kúsheytiw maqsetinde, Bozataw mámleketlik toǵay xojalıǵınıń 2025-jıl 19-aprel kúngi 4/29-snalı xatın inabatqa alıp Ózbekstan Respublikası Ministrler Kabinetiniń 1999-jıl 22-noyabrdegi “Respublika toǵayların qorǵaw boyınsha ayırım normativ hújjetlerdi tastıyıqlaw haqqında”ǵı 506-sanlı qararına tiykarlanıp, Ózbekstan Respublikasınıń «Toǵay haqqında»ǵı Nızamı (16.04.2018 OʻRQ-475-son)nıń 15,17 hám 23-statyaları hámde «Jergilikli mámleketlik hákimiyatı haqqında»ǵı Ózbekstan Respublikası Nızamınıń 6-21¹-statyasına tiykar sheshim etedi:

1. Ózbekstan Respublikası Ministrler Kabinetiniń 1999-jıl 22-noyabrdegi “Respublika toǵayların qorǵaw boyınsha ayırım normativ hújjetlerdi tastıyıqlaw haqqında”ǵı 506-sanlı qararı orınlaw ushın basshılıqqa alınsın.

2. Bozataw mámleketlik toǵay xojalıǵınıń toǵay fondı aymaǵında 2025-jıl 31-dekabrge shekem «Toǵaylarda órt qáwipsizligi máwsimi» dep belgilensin.

3. Rayon hákiminiń orınbasarları (R.Berdimuratov, J.Amanlıkov) Bozataw mámleketlik toǵay xojalıǵı (Q.Jamalov) menen birgelikte rayon aymaǵındaǵı xalıq jasawshı punktlerinde Ózbekstan Respublikasınıń 2018-jıl 16-aprel kúngi jańadan baspada qabıl etilgen «Toǵay haqqında»ǵı OʻRQ-475-sanlı Nızamın keńnen túsindiriw boyınsha úgit násiyat jumısların alıp barıw tapsırılsın.

4. Bozataw mámleketlik toǵay xojalıǵı (Q.Jamalov) na:

-toǵaylarda órt kelip shıǵıwın boldırmaw maqsetinde toǵaylardı gúzetiwdi kúsheytiw hám qadaǵalap barıw;

- órt qáwipsizligi talaplarınıń buzılıwınıń aldın alıw;

- toǵaylardıń áhmiyeti haqqında puqaralar arasında keń túsinik jumısların júrgiziw;

- toǵaylarda órtke qarsı jollardı taza uslawǵa ayrıqsha itibar qaratıw;

- toǵaylarǵa kirer orınlarǵa arnawlı eskertiw belgiler qoyıw hám eskilerin jańalaw;

- toǵay fondı maydanlarında tábiyiy hám texnikalıq jaǵdaylardıń aldın alıw;

- ayrıqsha jaǵdaylar júzege kelgende tiyisli jergilikli hákimiyat organları, rayonlıq órtke qarsı gúresiw, ishki isler bólimi hám basqa kárxanalar menen birgelikte keshiktirip bolmaytuǵın ilájlar islep shıǵıp olardıń orınlanıwın támiyinlesin.

5. Aymaqlardaǵı kárxana, shólkemler basshılarına, dıyqan hám fermer xojalıqları baslıqlarına, usı aymaqlarda jasawshı xalıqqa toǵaylarda órtke qarsı
is-ilájlar kóriw, ekologiyalıq ortalıqtı jaqsılaw boyınsha jumıslardı ámelge asırıw tapsırılsın.

6. Rayondaǵı puqaralar jıyınları, fermer xojalıqları basshıları toǵay fondı jerleri menen shegaralasqan atızlardıń átirapların, jap hám salmalardı tazalaw waqtında órt kelip shıǵıwınıń aldın alıw maqsetinde quwraǵan shóplerdiń jaǵıp jiberiliwine jol qoymaw sharaların kóriw tapsırılsın.

7. Rayon aymaǵındaǵı toǵayzarlarda órt qáwpiniń aldın alıw, haywanatlar hám ósimlikler dúnyasın órt qáwpinen qorǵaw boyınsha 2025-jıl islenetuǵın tiykarǵı
is-ilajları 1-qosımshaǵa muwapıq;

Ózbekstan Respublikası «Toǵay haqqında» ǵı Nızamǵa tiykarlanıp Bozataw mámleketlik toǵay xojalıǵına qaraslı toǵayzarlarda órttiń aldın alıw hám oǵan qarsı gúresiwdi kúsheytiriw haqqındaǵı is-ilajları 2-qosımshalarǵa muwapıq tastıyıqlansın.

8.Usı sheshim ǵalaba xabar qurallarında járiyalansın hám hákimlik veb-saytında jaylastırılsın.

9. Bozataw rayonı hákiminiń 2024-jıl 28-iyun kúngi 103-13-216-Q/24-sanlı sheshimi óz kúshin joǵaltǵan dep tabılsın.

10. Usı sheshimniń orınlanıwın qadaǵalaw Bozataw rayonı hákiminiń birinshi orınbasarı R.Berdimuratov, Bozataw rayonı hákiminiń orınbasarı J.Amanlıkov hámde Bozataw mámleketlik toǵay xojalıǵı baslıǵı Q.Jamalovqa júklensin.

11. Bul sheshim rásmiy túrde járiyalanǵan kúnnen baslap kúshke kiredi.