Shofirkon tumani mahalliy budjetining 2025-yil 1-chorak ijrosi yuzasidan hisobotga koʼra, amalda mahalliy budjet daromadlari 27817,6 mln. soʼm yoki rejaga nisbatan ijrosi 100,6 foizga foizga taʼminlangan.

Hisobot davrida tuman mahalliy budjeti xarajatlari jami 37021,5 mln. soʻm amalga oshirilib, shundan ijtimoiy soha xarajatlari 16556,8 mln. soʻm yoki 44,7 foizni tashkil etgan.

Bunda, mahalliy budjetda koʼzda tutilgan birinchi darajali toʼlovlarni va davlat dasturlariga asosan belgilangan tadbirlarni oʼz vaqtida moliyalashtirishga asosiy eʼtibor qaratilgan.

Shuningdek, Oʻzbekiston Respublikasi Budjet kodeksining 143 va 147-moddalarida budjet ijrosi jarayonida 2024-yil mahalliy budjet daromadlari prognoz koʻrsatkichlari hamda budjet parametrlari doirasida xarajatlar rejasiga tegishli oʻzgartirishlar kiritish nazarda tutilgan.

Oʻzbekiston Respublikasi Budjet kodeksining 27- va 126-moddalariga asosan tuman Iqtisodiyot va moliya boʻlimi boshligʻi oʼrinbosari N.Naimovning tuman mahalliy budjetining 2025-yil 1-chorak ijrosi, daromadlari va xarajatlari rejasiga oʻzgartirishlar kiritish yuzasidan hisobotini koʻrib chiqib, xalq deputatlari tuman Kengashi qaror qiladi:

1. Shofirkon tumani Iqtisodiyot va moliya boʼlimi boshligʻi oʼrinbosari N.Naimovning tuman mahalliy budjetining 2025-yil 1-chorak ijrosi yuzasidan hisoboti maʼlumot uchun qabul qilinsin.

2. Budjet ijrosi jarayonida daromadlari va xarajatlari boʼyicha koʼrsatkichlar 1-2 ilovaga muvofiq tasdiqlansin.

3. Tuman Soliq inspeksiyasi (O.Muqimov):

budjet daromadlari bazasini kengaytirish hamda mahalliy budjetga qoʻshimcha soliq tushirish manbalarini aniqlash va mavjud imkoniyatlardan samarali foydalanish topshirilsin.

4. Tuman iqtisodiyot va moliya boʻlimi (N.Naimov), tuman Gʻaznachilik xizmati (D.Jabborov):

- mahalliy budjet parametrlarida koʻzda tutilgan xarajatlarni, xususan birinchi darajali toʻlovlarni oʻz vaqtida moliyalashtirish taʼminlash.

- budjet mablagʻlaridan maqsadli va samarali foydalanilishi hamda budjet intizomiga rioya etilishi ustidan nazorat oʻrnatilishini taʼminlasin.

5. Tuman hokimi oʻribosarlari va tegishli budjet tashkilotlari:

- tuman mahalliy budjetidan ajratilgan mablagʻlarni Oʻzbekiston Respublikasining “Davlat xaridlari toʻgʻrisida”gi Qonuni talablari asosida belgilangan tartibda ishlatilishini taʼminlasin.

-infratuzilma obektlarida belgilangan tadbirlarni oʻz vaqtida moliyalashtirish va foydalanishga topshirilishini taʼminsin.

6. Mazkur qarorning ijrosini nazorat qilish Xalq deputatlari tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʼyicha doimiy komissiyasi (N.Sadulloyev) zimmasiga yuklatilsin.