Bozataw rayonı “Suw jetkerip beriw xızmeti” mámleketlik mákemesi tárepinen rayonda fermer xojalıqları, klasterler hám basqa suw qarıydarlarǵa 2025-jıl vegetaciya dáwiri ushın ajıratılǵan suw limitin tastıyıqlaw haqqındaǵı máseleni qarap shıǵıp hámde «Jergilikli mámleketlik hákimiyat haqqında»ǵı Qaraqalpaqstan Respublikası Nızamınıń 21-statyasına muwapıq Xalıq deputatları Bozataw rayonlıq Keńesi Sh E Sh I M E T E D I:

1. Ózbekstan Respublikası Prezidentiniń 2024-jıl 5-yanvardaǵı PQ-5-sanlı qararına tiykarlanıp Ózbekstan Respublikası Suw xojalıǵı Ministrliginiń 2025-jıl 19-mart kúngi №54-sanlı hám Qaraqalpaqstan Respublikası Suw xojalıǵı Ministrliginiń 2025-jıl 25-mart kúngi № 67-sanlı «2025-jıl suwǵarıw dáwiri ushın suw alıw limitin tastıyıqlaw tuwrısında»ǵı buyrıqların orınlaw ushın basshılıqqa alınsın.

2. Bozataw rayonında fermerler kesiminde ajıratılǵan suw alıw limitleri qosımshaǵa muwapıq tastıyıqlansın.

3. Rayonlıq “Suw jetkerip beriw xızmeti” Mámleketlik mákemesi direktorı w.w.a (I.Artıqbaev) rayonda fermer xojalıqları, klasterler hám basqa suw qarıydarlarǵa 2025-jıl vegetaciya dáwiri ushın ajıratılǵan suw limitin bólistiriw boyınsha zárúr ilajlardı belgilesin.

4. Rayonlıq “Suw jetkerip beriw xızmeti” Mámleketlik mákemesi (I.Artıqbaev), rayonlıq tiyisli mákemeler menen birgelikte:

Ózbekstan Respublikası Prezidentiniń 2024-jıl 5-yanvardaǵı PQ-5-sanlı qararına tiykar, shor juwıw hámde suwǵarıw dáwirleri ushın ajıratılǵan limitler 2025-jıl suwǵarıw dáwiri ushın fermerler kesiminde egin túrlerine qarap ajıratılǵan suw alıw limitleri belgilesin.

fermer, diyqan xojalıqlarınıń hám puqaralardıń úy qaptalı qıytaq jerlerine suw jetkerip beriwdi támiyinlew maqsetinde xojalıqlar aralıq kanallar hámde ishki xojalıq jap-salmalardı qazıp-tazalaw, gúzgi qısqı shor juwıw hám báhárgi suwǵarıw jumısların óz múddetinde ótkeriw boyınsha ayqın ilajlar belgilew;

diyqan xojalıqlarınıń hám puqaralardıń úy qaptalı qıytaq jerlerine suw jetkerip beriw hám fermerler kesiminde ajıratılǵan suw alıw limitleri boyınsha islengen jumıslar haqqında 2025-jıldıń jıl juwmaǵına shekem Xalıq deputatları Bozataw rayonlıq Keńesi sessiyasında esabat beriw tapsırılsın.

5. Xalıq deputatları Bozataw rayonlıq Keńesiniń 2025-jıl 27-mart kúngi VII-8-54-13-216-K/25 sanlı sheshimi normativlik hújjetlerge sáykes túrde qabıl etilmegenligi sebepli biykar etilsin.

6. Usı sheshimniń orınlanıwın támiyinlew rayon hákiminiń awıl hám suw xojalıǵı máseleleri boyınsha orınbasarı (J.Amanlıkov) na hám rayonlıq “Suw jetkerip beriw xızmeti” Mámleketlik mákemesi (I.Artıqbaev) ne júklensin.

7. Usı sheshimniń orınlanıwın qadaǵalaw Xalıq deputatları Bozataw rayonlıq Keńesiniń agrar, suw xojalıǵı máseleleri hám ekologiya boyınsha turaqlı komissiyasına júklensin.

8. Sheshim qabıl etilgen kúnnen baslap kúshke kiredi.