Oʻzbekiston Respublikasi Prezidentining 2010-yil 26-apreldagi “Dehqon bozorlari va savdo komplekslari faoliyatini tashkil qilishni yanada takomillashtirish chora-tadbirlari toʻgʻrisida”gi PQ-1326-sonli qaroriga muvofiq, viloyat iqtisodiyot va moliya bosh boshqarmasining 2025-yil 3-apreldagi 01-12/20-04-38/803-sonli, viloyat soliq boshqarmasining 2025-yil 15-apreldagi 32-22752-sonli xatlari hamda viloyat hokimi birinchi oʻrinbosarining 2025-yil 12-martdagi 115/16-26-sonli bildirgisiga asoslanib, qaror qilaman:

1. Quyidagilar:

bozorlar va savdo komplekslarining maʼmuriyati tomonidan undirib olinadigan bir martalik yigʻimlar, ijara toʻlovi va koʻrsatiladigan xizmatlar qiymatining miqdorlari 1-ilovaga muvofiq;

Navoiy shahridagi “Navoiy savdo kompleksi” aksiyadorlik jamiyatiga qarashli 4 qavatli savdo kompleksida undirib olinadigan ijara toʻlovi miqdorlari 2-ilovaga muvofiq;

viloyatdagi bozorlar va savdo komplekslari hududidagi umumiy foydalaniladigan obyektlarni saqlash boʻyicha koʻrsatiladigan majburiy xizmatlar roʻyxati va qiymati 3-ilovaga muvofiq tasdiqlansin.

2. Viloyat soliq boshqarmasi (S. Nazarov), tuman (shahar) hokimlariga:

viloyatdagi bozorlar va savdo komplekslaridan tushadigan bir martalik yigʻimlar, ijara toʻlovi va koʻrsatilgan xizmatlar qiymatini belgilangan tartibda toʻliq undirilishini;ushbu qarorning 1-bandiga muvofiq tasdiqlangan bir martalik yigʻimlar, ijara toʻlovi va koʻrsatilgan xizmatlar qiymati miqdorlarini viloyatdagi barcha bozorlar va savdo komplekslari, sotuvchi va xaridorlar eʼtiboriga yetkazilishini, bu haqdagi maʼlumotlarni barcha bozorlar va savdo komplekslarida koʻrinarli joylarga joylashtirilishini hamda amalda tatbiq etilishi ustidan nazorat oʻrnatilishini;

koʻrsatiladigan xizmatlar uchun toʻlovlarning yangi miqdorlarini toʻgʻri qoʻllanilishi hamda toʻliq undirilishi va bozorlar daromadlarining belgilangan qismini mahalliy budjetga oʻz vaqtida oʻtkazilishi ustidan qatʼiy nazorat oʻrnatilishini taʼminlash topshirilsin.

3. Viloyat hokimining 2019-yil 8-fevraldagi “Viloyat bozorlari va savdo komplekslarida bir martalik yigʻimlar, ijara toʻlovlari va koʻrsatiladigan xizmatlar qiymatlarining miqdorlarini belgilash toʻgʻrisida”gi Q-24-sonli qarori oʻz kuchini yoʻqotgan deb hisoblansin.

4. Viloyat hokimligi axborot xizmati (Sh. Raubayeva) mazkur qarorni “Doʻstlik bayrogʻi” va “Знамя дружбы” gazetalarida rasmiy eʼlon qilinishini hamda viloyat hokimligining rasmiy veb-saytiga joylashtirilishini taʼminlasin.

5. Ushbu qaror 2025-yil 1-iyundan boshlab kuchga kiradi.

6. Mazkur qarorning bajarilishini nazorat qilish viloyat hokimining birinchi oʻrinbosari R. Sulaymonov, viloyat soliq boshqarmasi boshligʻi S. Nazarov zimmasiga yuklansin.