Ózbekstan Respublikasınıń "Toǵay haqqında"ǵı Nızamınıń 15,17 hám 23-statyaları, Ózbekstan Respublikası “Tábiyattı qorǵaw haqqındaǵı” Nızamı, Ózbekstan Respublikası Ministrler Kabinetiniń 1999-jıl 11-noyabrdegi 506-sanlı qararınıń 1-qosımsha menen tastıyıqlanǵan “Respublika toǵayların qorǵaw boyınsha ayırım normativ hújjetlerdi tastıyıqlaw haqqında”ǵı Rejege hám Ózbekstan Respublikası “Jergilikli mámleketlik hákimiyat haqqında”ǵı Nızamınıń 6-statyasına tiykarlanıp, sheshim etemen:

1. Qanlıkól qánigelestirilgen mámleketlik toǵay xojalıǵı jer fondında 2025-jıl 1-may sánesinen baslap 2025-jıl 31-dekabr sánesine shekem “Toǵay fondı jerlerinde órt qáwipsizligi máwsimi” dep belgilensin.

2. Qanlıkól qánigelestirilgen mámleketlik toǵay xojalıǵına jer fondında órt qáwipsizligin támiyinlew boyınsha jumıslardı qadaǵalap barıwshı komissiya quramı 1-qosımshaǵa, órt qáwipsizligin támiyinlew boyınsha is ilajlar rejesi 2-qosımshaǵa muwapıq tastıyıqlansın.

3. Órt qáwipsizligi máwsiminde yuridikalıq hám fizikalıq shaxslarǵa qoyılatuǵın talaplar etip tómendegiler belgilensin:

toǵay xojalıǵı jerleri shegarası hámde toǵay xojalıǵı uchastkalarında órt qáwipsizligi waqtında órttiń jaǵılmawı:

toǵay xojalıǵı jerlerinde ań ańlaw waqtında tez janıp ketetuǵın yaki tútep janatuǵın materiallardan paydalanbaw:

maylaw materialları, benzin, kerosin hám basqa tez alısıwshı zatlar sińdirilgen tazalaw materialların uchastkalarda usı maqsetler ushın názerde tutılmaǵan orınlarda qaldırmaw:

toǵay xojalıǵı uchastkalarında dvigatel islep turǵan waqıtta janılǵı baklarına janılǵı quyılmawı, dvigateldińenergiya sisteması nasaz bolǵan mashinalardan paydalanbaw, janılǵı quyılatuǵın mashinalar janında shegiw yamasa ashıq órtten paydalanbaw:

toǵay uchastkalarında, otlaq jerlerde otlardı hámde qorǵanıw hám kóklemzarlastırıw terekzarlarına tikkeley tutasqan jer uchastkalarında órt jaqpaw:

Qalǵan orınlarda átirapı keminde 4 metr bolǵan keńliktegi maydanshalarda órt jaǵıwǵa ruxsat etiledi hám paydalanıwdan keyin tezde puxtalıq penen óshiriliwi shárt.

4. Rayondaǵı mákeme, kárxana hám shólkemler bashıları:

a) toǵay uchastkası jerlerinde jumıslar islengende janılǵı hám maylaw materialların tiyisli standarttaǵı jabıq ıdıslarda saqlawǵa, órt qáwipsizligi máwsiminde olar saqlanatuǵın orınlarda ósimlik qatlamınan, terek qaldıqlarınan hám basqa tez janatuǵın materiallardan tazalawın hámde keminde 1,4 metr keńlikte mádeniylestirilgen qorǵaw maydanı menen dógeregin orawı;

b) obyektler jaylasqan orınlarda yamasa mádeniy-ǵalabalıq hámbasqa ilajlar ótkerilgende aymaqta Ózbekstan Respublikası Toǵay xojalıǵı mámleketlik Komiteti hám Ayrıqsha jaǵdaylar boyınsha Ministrligi tárepinen tastıyıqlanatuǵın normalar boyınsha toǵaylardaǵı órtlerdi óshiriw ushın órtke qarsı ásbap-úskenelerge iye bolıwı; Kórsetip ótilgen órt óshiriw ásbap-úskenelerin paydalanıwǵa tolıq tayar halda saqlawdı;

Órtlerdi óshiriw ushın órtke qarsı ásbap-úskeneler menen támiyinlew normaları tastıyıqlanbaǵan kárxanalar, mekeme hám shólkemler hámde obyektler jaylasqan orınlarda dáslepki órt óshiriw ásbap-úskeneler (suw quyılǵan bochkalar, qum salınǵan qutılar, baltalar, beller, sipse hám basqalar)ǵa iye bolıwın;

v) Órt qáwipsizligi máwsiminde óziniń diziminde yamasa toǵayda jumıslardı orınlawshı ayırım bólimlerde, sonday-aq, toǵaylarda jaylasqan qorǵanlarda islewshi hám basqa puqaralardan ibarat órtke qarsı kómekshi drujinalar dúziwdi támiyinlesin.

5. Toǵay xojalıǵı uchastkasında jumıs orınlawshı yamasa obyektlerge iye bolǵan kárxanalar, mákeme hám shólkemler basshıları órt qáwipsizligi máwsimi baslanıwı aldınan, toǵay xojalıǵı jerlerinde mádeniy-ǵalabalıq hám basqa ilajlar ótkeriliwi ushın juwapker shaxslar bolsa, toǵay uchastkalarına barıw aldınan órt qáwipsizligi qaǵıydalarına ámel etiw hám órtler payda bolıwınıń aldın alıw haqqında, sonday-aq, olardı óshiriw usılları haqqında xızmetkerlerge yamasa mádeniy-ǵalabalıq hám basqa ilajlar qatnasıwshılarına texnika qáwipsizlik dáptershesine imza qoydırǵan halda qollanbalardıń beriliwin támiyinlesin.

6. Qanlıkól qánigelestirilgen mámleketlik toǵay xojalıǵı (B.Ametov) hám rayonlıq Ayrıqsha jaǵdaylar bólimi (T.Xudaybergenov), tiysli APJ, MPJ basshıları menen birgelikte:

“Toǵay fondı jerlerinde órt qáwipsizliginiń máwsimi” haqqında xalıq arasında keń turde úgit-násiyat jumısların alıp barsın.

7. Rayon hakimligi málimleme xızmeti (M.Daryabaev) hám «Qanlıkól xabarları» gazetası redakciyası (G.Ametova)na, usı sheshimdi rayon hákimliginiń veb saytına jaylastırıw hám rayonlıq «Qanlıkól xabarları» gazetasında járiyalaw tapsırılsın.

8. Usı sheshimniń orınlanıwın qadaǵalaw rayon hákiminiń orınbasarları J.Jeksembiev hám N.Abdullaevlarǵa júklensin.