Ўзбекистон Республикаси Олий Мажлиси Қонунчилик палатаси Аграр ва сув хўжалиги масалалари қўмитасининг (бундан буён матнда Қўмита деб юритилади) 2025 йил биринчи чорагидаги фаолияти тўғрисидаги ахборотини кўриб чиқиб, Ўзбекистон Республикаси Олий Мажлиси Қонунчилик палатасининг (бундан буён матнда Қонунчилик палатаси деб юритилади) Кенгаши таъкидлайдики, ўтган даврда Қўмита томонидан аграр ва сув хўжалиги соҳасидаги ислоҳотларнинг ҳуқуқий асосларини янада мустаҳкамлаш, шунингдек соҳада олиб борилаётган ишлар устидан таъсирчан парламент назоратини таъминлаш борасида қатор ишлар амалга оширилган.

Хусусан, сувдан ва сув хўжалиги объектларидан самарали фойдаланиш, сувни муҳофаза қилиш соҳасидаги муносабатларни тартибга солиш, ҳайвонларни идентификация қилиш тартибини белгилаш, қишлоқ хўжалиги таваккалчиликларини суғурта қилиш, ер участкаларидан фойдаланиш тизимини такомиллаштириш, суғориладиган ерларни муҳофаза қилишнинг ҳуқуқий асосларини янада мустаҳкамлашга доир 3 та яхлит, айрим қонунларга ўзгартириш ва қўшимчалар киритишга қаратилган 5 та қонун лойиҳаси ҳамда Қонунчилик палатасининг 1 та қарори лойиҳаси устида иш олиб борилган ва улар маъқуллаш учун Ўзбекистон Республикаси Олий Мажлисининг Сенатига юборилган.

Кўриб чиқилаётган даврда давлат органлари томонидан қонунларнинг ижро этилиш ҳолатини жойларга чиқиб ўрганишга, давлат органлари мансабдор шахсларининг ўз фаолиятига доир масалалар юзасидан ахборотини эшитишга қаратилган 4 та назорат-таҳлил тадбири ўтказилган.

Жумладан, Қўмита ташаббуси билан 2025 йил 19 февраль куни Қонунчилик палатасининг мажлисида Ўзбекистон Республикаси Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги директори И. Эргашевнинг «Қишлоқ хўжалиги уруғлик материаллари ва озиқ-овқат маҳсулотларини карантин назоратидан ўтказиш, кимёвий воситаларни (пестицидларни) рўйхатга олиш ва савдосини тартибга солиш ҳамда зарарли ҳашаротларга қарши курашиш борасида амалга оширилаётган ишлар тўғрисида»ги ахбороти эшитилган.

Шунингдек 2025 йил 19 февраль куни Қонунчилик палатасида ташкил этилган «ҳукумат соати»да «Сув ресурсларидан самарали фойдаланиш, сув тежовчи технологияларни жорий этиш, каналлар ва суғориш тармоқларини бетонлаштириш ишларининг бориши тўғрисида»ги масала юзасидан Қонунчилик палатаси депутатларининг саволларига Ўзбекистон Республикаси сув хўжалиги вазири Ш. Хамраевнинг жавоблари эшитилган.

Бундан ташқари Қўмита мажлисларида Ўзбекистон Республикаси Сув хўжалиги вазирлиги, Камбағалликни қисқартириш ва бандлик вазирлиги, Қишлоқ хўжалиги вазирлиги, Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси ҳамда Ўсимликлар карантини ва ҳимояси агентлиги раҳбарларининг томчилатиб суғориш тизимини ва бошқа тежамкор суғориш технологияларини жорий этиш, паррандачиликни ривожлантириш, яйловлардан самарали фойдаланиш, томорқа ва ижарага берилган ерларда даромадли маҳсулот етиштириш бўйича белгиланган вазифаларнинг ижроси юзасидан ахбороти эшитилган.

Шунингдек Қўмита аъзолари томонидан «Фермер хўжалиги тўғрисида»ги Ўзбекистон Республикаси Қонунининг ижроси доирасида ҳудудларда агросаноат соҳасига янги бозор механизмларини жорий этиш, саноатлашган боғлар ва токзорларни барпо қилиш борасидаги ишларнинг ҳолати Фарғона вилояти мисолида назорат-таҳлил тартибида ўрганилган. Мазкур ўрганиш якунлари Қўмита мажлисларида соҳа мутасаддилари иштирокида атрофлича муҳокама этилиб, тегишли қарор қабул қилинган.

Қўмита аъзолари томонидан сайловчилар билан тизимли мулоқотни кучайтириш, жойларда мавжуд муаммоларни ўз вақтида аниқлаб, тезкорлик билан бартараф этиш масалаларига устувор аҳамият қаратилган. Шунингдек ўтган даврда Қўмита жисмоний ва юридик шахсларнинг 158 та мурожаатлари билан ишлаган.

Қўмита фаолиятида очиқлик ва шаффофликни таъминлаш, соҳага оид қабул қилинаётган қонун ҳужжатларининг мазмун-моҳиятини жамоатчиликка етказишга ҳам алоҳида эътибор берилган. Бу борада оммавий ахборот воситалари билан яқин ҳамкорликда иш олиб борилганлиги натижасида ўтган даврда Қўмитанинг фаолияти уларда жами 759 маротаба ёритилган.

Шу билан бирга ўтган даврдаги фаолият таҳлили Қўмита томонидан ҳали эътибор қаратилиши лозим бўлган айрим масалалар ҳам мавжудлигини кўрсатмоқда.

Хусусан, Ўзбекистон Республикаси Олий Мажлиси палаталарининг қарорларида, Ўзбекистон Республикаси Президентининг фармонлари ва қарорларида ҳамда давлат дастурларида белгиланган Қўмита фаолиятига тааллуқли вазифаларнинг ижроси устидан назоратни кучайтириш ва унинг самарадорлигини ошириш талаб этилмоқда.

Аграр соҳани янада ривожлантириш ҳамда қишлоқ хўжалиги маҳсулотлари етиштиришни қўллаб-қувватлашга, аграр тармоқдаги ташкилотлар фукнцияларини қайта кўриб чиқишга қаратилган қонун ташаббускорлигини кучайтириш, Қўмита масъуллигидаги қонун лойиҳаларини жамоатчилик ва соҳа вакиллари иштирокида муҳокама қилиш ишларини янада кенгайтириш мақсадга мувофиқ.

Қишлоқ хўжалигига мўлжалланган ер участкаларини ажратиш, сувни тежаш технологияларини жорий этиш, томорқадан самарали фойдаланиш бўйича юзага келаётган масалаларни ҳал этишга, фермер хўжаликлари ҳуқуқларини ҳимоя қилишга ҳамда соҳадаги тармоқ хўжаликларини ривожлантиришга қаратилган қонунчиликни такомиллаштириш бўйича таклифлар ишлаб чиқилиши лозим.

Мамлакатимизда қишлоқ хўжалигини тараққий эттириш борасидаги ислоҳотлар самарадорлигини таъминлаш борасида Қўмитага бириктирилган республика ижро этувчи ҳокимият органлари, тегишли вазирлик ва идоралар билан ҳамкорликни янги босқичга кўтариш зарур.

Шунингдек жисмоний ва юридик шахсларнинг мурожаатлари билан ишлаш, фуқаролардан қонун лойиҳалари бўйича келиб тушаётган таклифларни бевосита уларнинг иштирокида Қўмита мажлисларида муҳокама этиб боришга алоҳида эътибор қаратилиши лозим.

Юқорида баён этилганлардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Аграр ва сув хўжалиги масалалари қўмитасининг 2025 йил биринчи чорагидаги фаолияти тўғрисидаги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси:

аграр соҳада белгиланган вазифаларнинг сифатли ижро этилиши устидан таъсирчан парламент назоратини амалга ошириш ва унинг якунлари бўйича қабул қилинган қарорларнинг натижадорлигини доимий равишда мониторинг қилиб бориш;

қонун ташаббускорлиги борасидаги таклифларни кўпайтириш, Қўмита масъул бўлган қонун лойиҳалари жамоатчилик ва соҳа вакиллари билан мунтазам равишда муҳокама этилишини ташкил қилиш;

ер участкаларини ажратиш, сувни тежаш технологияларини жорий этиш, томорқадан самарали фойдаланиш, фермер хўжаликлари ҳуқуқларини ҳимоя қилиш ҳамда соҳадаги тармоқ хўжаликларини ривожлантиришга қаратилган қонунчилик ҳужжатларини такомиллаштириш бўйича таклифлар ишлаб чиқиш;

соҳани ривожлантиришга қаратилган давлат дастурларининг ва бошқа дастурларнинг масъул вазирлик ва идоралар томонидан бажарилиши бўйича самарали парламент назоратини олиб бориш;

жисмоний ва юридик шахсларнинг мурожаатлари билан ишлаш тизимини такомиллаштириш ҳамда қонунчилик ҳужжатлари бўйича фуқаролар томонидан берилган таклифларни бевосита улар иштирокида Қўмита мажлисларида муҳокама қилиш чораларини кўрсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари М. Ходжаева зиммасига юклатилсин.

4. Ушбу Қарор қабул қилинган кундан эътиборан кучга киради.