Ўзбекистон Республикаси Президенти Ш.М. Мирзиёевнинг 2024 йил 18 ноябрь куни Ўзбекистон Республикаси Олий Мажлиси Қонунчилик палатасининг биринчи мажлисидаги нутқида депутатларнинг сайлов округларидаги фаолиятини самарали ташкил этиш борасида қатор таклифлар ва ташаббуслар билдирилди. Хусусан, мамлакатда кенг кўламли ислоҳотларни ҳамда улкан вазифаларни амалга оширишда депутатлар ўз округларида энг фаол иштирокчи ва тарғиботчи бўлишлари зарурлиги алоҳида таъкидланди.

Бу, ўз навбатида, Ўзбекистон Республикаси Олий Мажлиси Қонунчилик палатасидаги сиёсий партиялар фракциялари ва депутатлардан сайлов округларидаги ишларни бугунги кун талаблари асосида йўлга қўйишни, ушбу йўналишдаги вазифаларни аниқ режа асосида, пухта ташкил қилишни тақозо этади.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатаси депутатларининг сайловчилар билан доимий мулоқотини сифат жиҳатидан янги даражага кўтариш ҳамда мамлакатимизда амалга оширилаётган кенг кўламли ислоҳотлар жараёнида депутатлар корпусининг фаол иштирокини таъминлаш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси депутатларининг сайлов округларидаги ишлари самарадорлигини янада ошириш бўйича чора-тадбирлар режаси (бундан буён матнда Чора-тадбирлар режаси деб юритилади) иловага мувофиқ тасдиқлансин.

2. Ўзбекистон Республикаси Олий Мажлиси Қонунчилик палатасидаги сиёсий партиялар фракцияларига Чора-тадбирлар режасидаги тадбирларни ўз вақтида ва сифатли амалга ошириш чораларини кўриш тавсия этилсин.

3. Ўзбекистон Республикаси Олий Мажлиси Қонунчилик палатасининг қўмиталари Чора-тадбирлар режасида назарда тутилган назорат-таҳлил тадбирларини ўз вақтида амалга ошириш чораларини кўрсин.

4. Ўзбекистон Республикаси Олий Мажлиси Қонунчилик палатаси Девонининг Назорат-таҳлил бўлими Чора-тадбирлар режасининг ижроси юзасидан доимий мониторинг ўрнатиб, ҳар ойда Ўзбекистон Республикаси Олий Мажлиси Қонунчилик палатасининг раҳбариятига умумлаштирилган маълумот киритиб борсин.

5. Ўзбекистон Республикаси Олий Мажлиси Қонунчилик палатаси Девонининг Матбуот хизмати Чора-тадбирлар режаси доирасида амалга ошириладиган ишларнинг оммавий ахборот воситаларида кенг ёритилишини таъминласин.

6. Чора-тадбирлар режасида назарда тутилган тадбирларнинг бажарилишини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.

7. Ушбу Қарор қабул қилинган кундан эътиборан кучга киради.