Ўзбекистон Республикаси Президенти Ш.М. Мирзиёевнинг 2024 йил 18 ноябрь куни Ўзбекистон Республикаси Олий Мажлиси Қонунчилик палатасининг биринчи мажлисидаги нутқида қуйи палата қўмиталари фаолиятида фуқаролик жамияти институтлари билан мулоқотни кучайтириш борасида билдирилган ташаббусларни ўз вақтида ҳаётга татбиқ қилиш, шунингдек қонун ижодкорлиги жараёнининг сифати ва самарадорлигини янада ошириш ҳамда кенг жамоатчиликнинг қонун лойиҳаларини ишлаб чиқишдаги иштирокини кенгайтириш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси қўмиталари ҳузуридаги Жамоатчилик кенгашлари фаолиятини ташкил этиш бўйича тавсиялар иловага мувофиқ тасдиқлансин.

2. Ўзбекистон Республикаси Олий Мажлиси Қонунчилик палатасининг қўмиталари:

Ўзбекистон Республикаси Олий Мажлиси Қонунчилик палатасининг қўмиталари ҳузурида экспертлар, мутахассислар ва фуқаролик жамияти институтлари вакилларидан иборат Жамоатчилик кенгашларини тузиш чораларини кўрсин;

қонун лойиҳалари муҳокамаси жараёнларида, шунингдек давра суҳбатлари, конференциялар, семинарлар ва бошқа тадбирларни ташкил этишда ўзларининг ҳузурида тузиладиган Жамоатчилик кенгашлари орқали экспертлар, мутахассислар ва фуқаролик жамияти институтлари вакиллари билан ҳамкорликни йўлга қўйишга алоҳида эътибор қаратсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.

4. Ушбу Қарор қабул қилинган кундан эътиборан кучга киради.