Ўзбекистон Республикаси Вазирлар Маҳкамаси томонидан қонунчилик ташаббуси ҳуқуқи асосида киритилган «Ўзбекистон Республикасининг Тадбиркорлик кодексини тасдиқлаш тўғрисида»ги Ўзбекистон Республикаси қонуни лойиҳаси Ўзбекистон Республикаси Олий Мажлисининг Қонунчилик палатаси томонидан Қонун сифатида қабул қилинган. Мазкур Қонун Ўзбекистон Республикаси Олий Мажлисининг Сенати томонидан маъқулланган.

Мазкур Қонун қабул қилинганидан кейин тадбиркорлик фаолиятини тартибга солишга оид бир қатор концептуал хусусиятга эга норматив-ҳуқуқий ҳужжатлар қабул қилинганлиги муносабати билан 2025 йил 15 январда Ўзбекистон Республикаси Президенти томонидан таклифлар билан Ўзбекистон Республикасининг Олий Мажлисига қайтарилган.

«Ўзбекистон Республикасининг Тадбиркорлик кодексини тасдиқлаш тўғрисида»ги Ўзбекистон Республикаси Қонунини қайта кўриб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатаси Бюджет ва иқтисодий масалалар қўмитасининг «Ўзбекистон Республикасининг Тадбиркорлик кодексини тасдиқлаш тўғрисида»ги Ўзбекистон Республикаси Қонунини қайта кўриб чиқиш ҳақидаги хулосаси маълумот учун қабул қилинсин.

2. «Ўзбекистон Республикасининг Тадбиркорлик кодексини тасдиқлаш тўғрисида»ги Ўзбекистон Республикаси Қонуни бўйича Ўзбекистон Республикаси Президенти томонидан билдирилган таклифлар концептуал хусусиятга эга эканлиги инобатга олинган ҳолда ҳамда уни Ўзбекистон Республикаси Олий Мажлисининг Қонунчилик палатасида маромига етказиш имкони мавжуд эмаслиги сабабли мазкур Қонун Ўзбекистон Республикаси Олий Мажлиси Қонунчилик палатасининг бундан буёнги кўриб чиқишидан олиб ташлансин.

3. Ўзбекистон Республикаси Вазирлар Маҳкамасига «Ўзбекистон Республикасининг Тадбиркорлик кодексини тасдиқлаш тўғрисида»ги Ўзбекистон Республикаси қонуни лойиҳасини тадбиркорлик соҳасидаги қонунчиликдаги сўнгги ўзгаришлардан келиб чиқиб, ишчи гуруҳ тузган ҳолда қайта кўриб чиқиш ва Ўзбекистон Республикаси Олий Мажлисининг Қонунчилик палатасига киритиш тавсия этилсин.

4. Ушбу Қарор маълумот учун Ўзбекистон Республикаси Президентига, Ўзбекистон Республикаси Олий Мажлисининг Сенатига ва Ўзбекистон Республикаси Вазирлар Маҳкамасига юборилсин.

5. Ушбу Қарор қабул қилинган кундан эътиборан кучга киради.