Ўзбекистон Республикасининг янги «Фуқаролик Процессуал кодекси» ва «Оила кодекси», шунингдек «Оммавий ахборот воситалари тўғрисида»ги Қонун қабул қилиниб, амалга киритилганлиги муносабати билан 1991 — 1997 йилларда қабул қилинган Олий суд Пленумининг қуйидаги қарорларига ўзгартириш ва қўшимчалар киритиш заруриятини ҳисобга олиб, Ўзбекистон Республикаси Олий судининг Пленуми қарор қилади:

1. 1991 йил 20 декабрдаги 1997 йил 2 майда ўзгартиришлар киритилган «Юридик аҳамиятга эга бўлган фактларни белгилаш ҳақидаги ишлар бўйича суд амалиёти тўғрисида»ги Пленум қарорининг кириш қисмининг 1-хатбоши қуйидаги таҳрирда баён қилинсин:

«Юридик аҳамиятга эга бўлган фактларни белгилаш ҳақидаги ишлар бўйича қонуний, асосли ва адолатли ҳал қилув қарорларини чиқариш фуқароларнинг ҳуқуқларини ҳимоя қилишни таъминлайди». Кириш қисмидаги 5-хат боши чиқарилсин.

Кириш қисмининг 6-хатбошидаги «актлари» сўзи «далолатномалари» сўзи билан алмаштирилсин ва 7-хатбоши қуйидаги таҳрирда баён қилинсин:

«Баён этилган жиддий камчиликларни бартараф этиш, қонунларни тўғри ва бир хилда қўлланилишини таъминлаш мақсадида Ўзбекистон Республикаси Олий суди Пленуми».

Қарорнинг 2,5 бандларидаги «ФПКнинг 274-моддаси» сўзлари «ФПКнинг 283-моддаси» сўзлари билан алмаштирилсин, 2-хат бошидаги «1968 йил 1 октябргача туғилган болаларга нисбатан оталикни тан олганлик (белгилаганлик) фактларини, оталик фактларини, оталикни қайд қилиш фактларини;» сўзлари «оталик фактларини, оталикни қайд қилиш фактларини, 1968 йил 1 октябргача туғилган болаларга нисбатан оталикни тан олганлик (белгилаганлик) фактларини;» сўзлари билан, «Улуғ Ватан» сўзлари «Иккинчи жаҳон» сўзлари билан алмаштирилсин. Қарорнинг 3 ва 12, 15, 17, 19, 20-бандларидаги «актлари», «актларини» сўзлари «далолатномалари», «далолатномаларини» сўзлари билан, 4-банддаги «ФПКнинг 271, 274-моддаларига» сўзлари «ФПКнинг 280, 283-моддаларига» сўзлари билан, 6-банди 2-хатбошидаги «ФПКнинг 31-моддасида» сўзлари «ФПКнинг 34-моддасида» сўзлари билан, шу банднинг 3-хатбошидаги «қонун билан» сўзлари «қонунда» сўзи билан алмаштирилсин ва қавс ичидаги «даъвогар ва жавобгарни» сўзлари чиқарилсин, 7-банддаги «274» рақами «283» рақами билан, 8-банддаги «актларини» сўзи «далолатномаларини» сўзи билан, «акт» сўзи «далолатнома» сўзи билан, «(ФПКнинг 298, 299-моддалари)» сўзлари «(ФПКнинг 274, 275-моддалари)» сўзлари билан алмаштирилсин.

10-банд 3-хатбошидаги «бўлиши» сўзидан кейин «ва у билан биргаликда яшаган бўлиши» сўзлари қўшилсин.

11-банддаги «сақланмаган» сўзидан кейин «ва» боғловчи қўшилиб, «ўтказиб юборилган» сўзлари ўрнига «тушириб қолдирилган» сўзлари ёзилсин, «актларини» сўзи «далолатномаларини» сўзи билан, «маълумотлар бўлса» сўзларидан кейинги «ёки» сўзи «ёинки» сўзи билан, «ФПКнинг 261-1, 264-7-моддалари» сўзлари «ФПКнинг 269 — 271-моддалари» сўзлари билан,

12 ва 13-бандлардаги «ФПКнинг 274-моддасининг» сўзлари «ФПКнинг 283-моддасининг» сўзлари билан алмаштирилсин.

14-банддаги «ФПКнинг 264-1, 264-7-моддаларига» сўзлари «ФПКнинг 266-267-моддаларига» сўзлари билан, 15-банддаги «Никоҳ ва оила кодексининг 220, ФПКнинг 298-моддасига» сўзлари «Оила кодексининг 228, ФПКнинг 274-моддасига» сўзлари билан алмаштирилсин.

17-банддаги «ФПКнинг 274-моддасининг 8-бандига «сўзлари «ФПК 283-моддасининг 10-бандига» сўзлари билан, «ФПКнинг 278 — 282-моддалари» сўзлари «ФПКнинг 286 — 289-моддалари» сўзлари билан алмаштирилсин ва у 20-банд деб юритилсин.

17, 18 ва 19-бандлар қуйидагича таҳрирда баён этилсин:

«17. Бахтсиз ҳодиса факти одатда белгиланган шаклда тузилган акт билан тасдиқланади. Ушбу актда бахтсиз ҳодиса қаерда ва қандай шароитда (иш жойида ёки кўчадаги ҳодиса натижасидами) келиб чиққанлиги кўрсатилади. Агар бахтсиз ҳодиса иш юритиш вақтида келиб чиқса, у ҳақида далолатнома тузиш маъмурият ва касаба уюшмаси ваколатига киради. Маъмурият далолатнома тузишни рад қилса ёки жабрланувчи далолатномада кўрсатилган ҳолатлардан норози бўлса, у касаба уюшмасига меъёрий ҳужжатларда белгиланган муддатда мурожаат қилишга ҳақли, касаба уюшмаси қарори эса маъмурият учун мажбурийдир.

Бахтсиз ҳодиса ҳақидаги фактни судсиз тартибда ҳал қилиш имконияти бўлмасагина ва бу тегишли ҳужжат билан тасдиқланса, суд бахтсиз ҳодиса фактини белгилашга ҳақли. Суд бахтсиз ҳодиса фактини белгилаш ҳақидаги аризани қуйидаги ҳолатлардан бири мавжуд бўлганида қабул қилиши лозим:

бахтсиз ҳодиса ҳақида акт умуман тузилмаган ёки ҳозирги вақтда уни тузиш имконияти бўлмаса;

бахтсиз ҳодиса ҳақида акт тузилган, лекин аризачи томонидан у йўқотилган ва уни маъмурий тартибда тиклаш мумкин бўлмаса;

уни тузишда хатоликка ёки уни исботловчи кучидан маҳрум қилувчи ноаниқликка йўл қўйилган бўлса ва буни тегишли орган тузата олмаса, меҳнати туфайли келиб чиққан, яъни ходимни корхона, ташкилотлардаги иши билан боғлиқ ҳолда соғлиғига зарар етказган бахтсиз ҳодисагина юридик аҳамиятга эга».

«18. ФПКнинг 283-моддаси 8-бандига мувофиқ, иморатга хусусий мулк ҳуқуқи асосида эгалик қилиш фактини белгилаш тегишли органлар маъмурий тартибда ушбу фактни белгилашни рад қилган бўлса ва аризачини ушбу иморатларга бўлган ҳуқуқини бошқа шахслар инкор этмаётган бўлсаларгина судга тааллуқлидир.

Судга эгалик ҳуқуқини эмас, балки иморатни аризачига эгалик ҳуқуқи асосида тегишли эканлигини тасдиқловчи ҳужжатларни бўлганлик фактини, шунингдек, агар аризачида ўз вақтида эгалик ҳуқуқи тўғрисидаги ҳужжат бўлган бўлиб, лекин у йўқолган ва уни тиклаш мумкин бўлмаганида белгилайди.

Уй-жойга эгалик ҳуқуқи ҳокимиятда рўйхатдан ўтказилганлиги тўғрисида маълумот ва уй қуриш тўғрисида шартнома бўлмаса, қурилган уйнинг кимга тегишли эканлиги тўғрисидаги масала умумий асосларда ФКнинг 212-моддаси бўйича ҳал қилинади.

Ўзбошимчалик билан қурилган ёхуд қуриб битказилган ва фойдаланиш учун қабул қилинмаган биноларни, шунингдек, олдин бошқа шахс номига рўйхатдан ўтказилган ёки аризачи томонидан тегишли тартибда расмийлаштирилмасдан сотиб олинган биноларга эгалик ҳуқуқини белгилаш ҳақидаги аризалар алоҳида иш юритиш тартибида судда кўрилиши мумкин эмас.

Агар фуқаро нотариал тартибда тасдиқланмаган ёзма шартнома билан уй сотиб олган бўлса, бу уйга унинг эгалик ҳуқуқини белгилаш тўғрисидаги масала ФКнинг 112-моддасининг 2-қисми Қоидалари бўйича даъво тартибида ҳал этилиши мумкин».

«19. Манфаатдор шахс мерос ҳуқуқи қабул қилганлиги ва мулкни мерос қилиб олганлигини тасдиқловчи далилларни тақдим қила олмаганлиги сабабли, нотариал идора ворислик ҳақида гувоҳнома беришни рад қилган ҳолларда меросни қабул қилиш ва меросни очилиш жойи фактини белгилаш ФПКнинг 283-моддасининг 9-бандига асосан амалга оширилади.

Мерос қолдирувчининг охирги доимий яшаб турган жойи, яъни фуқаронинг доимий яшаб келган жойи, мероснинг очилиш жойи ҳисобланади, агар унинг охирги яшаб турган жойи номаълум бўлса, унга тегишли бўлган кўчмас мулк ёки унинг асосий қисми турган жой мерос очилган жой деб ҳисобланади» .

18-банд чиқарилсин, 19-банддаги «ФПКнинг 298, 299-моддалари» сўзлари «ФПКнинг 274, 275-моддалари» сўзларига алмаштирилсин, у 21-банд деб юритилсин.

20-банддаги «ФПКнинг 213-моддасига» сўзлари «ФПКнинг 206-моддасида», «ФПКнинг 274-моддасининг» сўзлари «ФПКнинг 283-моддасининг» сўзларига, «ФПКнинг 274-моддасига» сўзлари «ФПКнинг 16-моддасига» сўзларига алмаштирилиб, у 22-банд деб юритилсин.

21-банддаги «ФПКнинг 235-моддасига» сўзлари «ФПКнинг 19-моддасига» сўзларига алмаштирилсин ва у 23-банд деб, 22-банд эса 24, 23-банд 25-банд деб юритилсин.

2. 1992 йил 19 июндаги 1997 йил 2 майда қўшимча ва ўзгартиришлар киритилган «Суд амалиётида фуқаро ва ташкилотларнинг шаъни, қадр-қиммати ва ишчанлик обрўсини ҳимоя қилиш ҳақидаги қонунларни қўллаш тўғрисида»ги қарорнинг кириш қисми 3-хатбоши қуйидагича баён қилиниб, мавжуд 3-хатбоши 4-хатбоши ҳисоблансин: «Фуқаролар Ўзбекистон Республикаси Фуқаролик кодексининг 100-моддасига мувофиқ ўзининг шаъни, қадр-қиммати ва ишчанлик обрўсига путур етказувчи маълумотлар юзасидан, башарти бундай маълумотларни тарқатган шахс уларнинг ҳақиқатга тўғри келишини исботлай олмаса, суд йўли билан раддия талаб қилишга ҳақли», 4-хатбоши 5-хатбоши деб ҳисобланиб, 1-гап: «Пленум «Оммавий ахборот воситалари тўғрисида»ги Қонунни суд амалиётида қўллашда қандай маълумотлар тарқатилганлиги ва улар қадр-қимматга қанчалик путур етказгани каби масалалар юзасидан муаммолар юзага келганлигини таъкидлайди» деб, 7-хатбоши «Судлар фаолиятидаги камчиликларни бартараф қилиш ва келиб чиққан масалаларни инобатга олиб, Ўзбекистон Республикаси Олий суди Пленуми» деб ўзгартирилсин.

Қарорнинг 1-хат боши қуйидагича баён қилинсин:

1. «Ўзбекистон Республикаси Фуқаролик кодексининг 100-моддаси ва «Оммавий ахборот воситалари тўғрисида»ги Ўзбекистон республикаси Қонунининг 27-моддасига мувофиқ юридик ва жисмоний шахс оммавий ахборот воситасида эълон қилинган, ҳақиқатга тўғри келмайдиган ва ўзининг шаъни хамда қадр-қимматига доғ туширадиган маълумотлар бўйича раддия беришни таҳририятдан талаб қилишга ҳақли эканлигига судларнинг эътибори қаратилсин».

2. 1-банд 2чи ҳисобланиб, «ишларни» сўзидан кейин «судлар» сўзи, «кўриш» сўзи «кўришлари» сўзи билан алмаштирилиб, «зарур» сўзидан кейин нуқта қўйилиб, «эканлигига судларнинг эътибори қаратилсин» сўзлари матндан чиқарилсин.

Қарорнинг 2-банди чиқарилсин.

3-банди қуйидагича баён қилинсин ва мавжуд 3-банд 4-банд деб ҳисоблансин.

3. «Ўзбекистон Республикасининг «Оммавий ахборот воситалари тўғрисида»ги Қонунининг 27-моддасига биноан эълон қилинган материал туфайли ҳуқуқлари ва қонуний манфаатлари бузилган юридик ва жисмоний шахслар ўз раддиясини мазкур оммавий ахборот воситаси орқали эълон қилишга ҳақлидир. Раддия ёки жавоб газеталардан улар келган кундан эътиборан бир ой муддат ичида, бошқа даврий нашрларда эса навбатдаги сонда эълон қилинади.

Оммавий ахборот воситаси раддия ёки жавоб эълон қилишдан бош тортса ёхуд уларни эълон қилиш учун белгилаб қўйилган муддатни бузса, юридик ёки жисмоний шахс даъво билан судга мурожаат қилишга ҳақлидир».

4, 5, 6, 7, 8, 9, 10, 11, 12, 13-бандлар тегишлигича 5, 6, 7, 8, 9, 10, 11, 12, 13, 14-бандлар деб ҳисоблансин.

Мавжуд 4-банд 2-хатбошидаги «Даъвогар бундай маълумотларни тарқатилганлигини тасдиқловчи далилларни тақдим этолмаса» сўзлари «Даъво ариза ФПКнинг 149 ва 150-моддалари талабларига риоя қилинмай берилган ҳолларда» сўзлари билан алмаштирилиб, ундан кейинги «даъво ариза» сўзлари чиқарилсин, «ФПКнинг 144-моддасига» сўзлари «ФПКнинг 154-моддасига» сўзлари билан алмаштирилсин, «қайтарилади» сўзидан кейин «бу Ҳақда ажрим чиқарилади» сўзлари қўшилсин.

6-банд 1-хатбошидаги «ФПКнинг 5-моддасига» сўзлари «ФКнинг 100-моддаси 2-қисмига» сўзлари билан, 2-хатбошидаги «ФПКнинг 42-моддаси тартибида прокурор даъво ҳуқуқига эгадирлар» сўзлари «ФПКнинг 46-моддаси тартибида прокурор ариза билан судга мурожаат қилиш ҳуқуқига эгадирлар» сўзлари билан,

7-банд 1-хатбошидаги «Фуқаро ёки ташкилотларнинг» сўзлари «Юридик ёки жисмоний шахсларнинг» сўзлари билан алмаштирилиб, 3-хат бошидаги «туҳмат қилгани учун» сўзларидан кейин «Жиноят кодексининг 139, 140-моддалари ёки Ўзбекистон Республикаси Маъмурий жавобгарлик тўғрисидаги кодексининг 40, 41-моддаларига кўра» сўзлари қўшилсин;

9-банд 1-хатбоши 2-гапдаги «Даъво» сўзи чиқарилиб, «аризада» сўзи катта ҳарф билан «Аризада» деб кўрсатилиши ва «Қонуннинг 31-моддаси» сўзлари «Қонуннинг 28-моддаси» сўзлари билан,

10-банд «б» кичик банддаги «фуқаро ёки ташкилотларнинг» сўзлари «юридик ёки жисмоний шахснинг» сўзлари билан алмаштирилсин.

11-банд 3, 4-хатбоши қуйидагича баён қилинсин:

«ФКнинг 1021-моддаси 2-қисмига биноан агар зарар қадр-қиммат ва ишчанлик обрў-эътиборини ҳақоратловчи маълумотларни тарқатиш туфайли етказилган бўлса, маънавий зарар уни етказувчининг айбидан қатъий назар қопланишини назарда тутиш лозим.

ФКнинг 1022-моддасига мувофиқ маънавий зарарни қоплаш миқдорини аниқлашда судлар жабрланувчининг унга етказилган маънавий зарарнинг оғирлигига субъектив баҳоси, шунингдек даъвогарнинг жисмоний ва маънавий азобларининг даражасини тасдиқловчи объектив маълумотлар, уни хусусияти ва ҳақоратловчи ёлғон маълумотларни тарқатилган сферани ҳамда бошқа аҳамиятга молик ҳолатларни эътиборга олишлари керак».

12-банддаги «вақтли» сўзи «оммавий даврий» сўзи билан алмаштирилсин.

13-банднинг 1-хатбошиси чиқарилиб, 2-хатбоши 14-банд деб юритилсин.

14, 15 ва 16-бандлар тегишлигича 15, 16 ва 17-бандлар деб ҳисоблансин.

3. 1992 йил 13 ноябрдаги 5-ПЛ-92 сонли 1997 йил 2 майда ўзгартиришлар киритилган «Тақдим этувчига деб берилган ҳужжатлар йўқотилган тақдирда уларга бўлган ҳуқуқларини тиклаш (чақириб иш юргизиш) ҳақидаги аризаларни судлар томонидан кўрилиши тўғрисида»ги Пленум қарорининг сарлавҳасидаги «йўқотилган» сўзи «йўқолган» сўзига, «ҳуқуқларини» сўзи «ҳуқуқларни» сўзига, қарорнинг кириш қисмидаги «саволларни» сўзи, «муаммолар» сўзи билан алмаштирилсин.

Қарорнинг 1-бандидаги 1-гап қуйидагича таҳрирда баён қилинсин: «Ўзбекистон Республикаси Фуқаролик процессуал кодексининг 35-бобида белгиланганига кўра шахс пул маблағлари қўйилганлиги ҳақида ёки қимматли нарсалар ёхуд давлат заёми облигациялари сақлаш учун топширилганлиги тўғрисида банк томонидан тақдим этувчига берилган қимматли ҳужжатни йўқотган тақдирда, шунингдек қонунда назарда тутилган бошқа ҳолларда, суддан йўқолган ҳужжатни ҳақиқий эмас деб топиш ва йўқолган ҳужжат бўйича ҳуқуқларини тиклаш тўғрисида илтимос қилиш мумкин».

Кейинги гап «Бундай ҳуқуқларни тиклаш банк томонидан» деб бошланиб, «тақдим этувчига деб берилган» сўзлар билан давом эттирилсин, 2-хатбошидаги «варақаси ёки» сўзларидан кейин «давлат заёми» сўзлари қўшилсин, 2-банддаги «ФПКнинг 139-моддасида» сўзлари «ФПКнинг 149-моддасида» сўзлари билан алмаштирилсин.

4. 1992 йил 13 ноябрдаги 5-сонли «Фуқаролик ҳолати актлари ёзувларидаги хатоликларни белгилашни тартибга солувчи қонунчиликни судлар томонидан қўллаш ҳақида»ги Пленум қарорининг номидаги «актлари» сўзи «далолатномалари» сўзи билан, «қўллаш» сўзи «қўлланиш» сўзи билан алмаштирилсин. Қарорнинг кириш қисми матни қуйидагича баён қилинсин:

«Ўзбекистон Республикаси Оила ва Фуқаролик процессуал кодексларини амалга киритилганлиги, шунингдек судларда тушунтиришлар берилиши лозим бўлган масалалар келиб чиққанлиги сабабли Ўзбекистон Республикаси Олий суди Пленуми».

Қарорнинг 1-қисми 1-хатбошидаги «суд» сўзидан кейин «Ўзбекистон Республикаси Оила кодексининг 228-моддаси ва Фуқаролик процессуал кодексининг 274-моддасига биноан» сўзлари билан, қарордаги «актлари, актларини» сўзлари тегишинча «далолатномалари, далолатномаларини» сўзлари билан алмаштирилсин.

Қарорнинг 1-банди 2-хатбоши чиқарилсин, бу банд қуйидаги таҳрир билан тўлдирилсин:

«Ўзбекистон Республикаси ҳудудида тузилган Фуқаролик ҳолати далолатномалари ёзувларига ўзгартириш, тузатиш ва қўшимчалар киритиш етарли асослар мавжуд бўлиб, манфаатдор шахслар ўртасида низо бўлмаганда ушбу далолатнома ёзувлари сақланаётган жойдаги фуқаролик ҳолати далолатномаларини ёзиш органи томонидан амалга оширилади. Агар манфаатдор шахсларни ҳуқуқи бўйича низо бўлса, бундай аризалар даъво иши юргизиш тартибида кўрилади».

2-банд қуйидаги таҳрирда баён этилсин:

«Ўзбекистон Республикаси ҳудудидан ташқарида тузилган фуқаролик ҳолати далолатномалари ёзувларига тузатишлар киритиш ҳақидаги аризалар ариза берувчининг яшаш жойидаги фуқаролик ҳолати далолатномаларини ёзиш органида кўриб чиқилади».

3-банд куйидаги таҳрирда баён этилсин:

«Ўн олти ёшга тўлмаган шахсларнинг туғилиш ҳақидаги ёзувлар дафтарига ўзгартиришлар киритиш уларнинг ота-онаси аризасига биноан амалга оширилади.

Ўн олти ёшга тўлган шахсларнинг туғилиш, никоҳ тузиш, никоҳдан ажралишни қайд этиш дафтарларига ўзгартиришлар киритиш уларнинг аризаларига биноан амалга оширилади».

Қарорнинг 2-банди 4-банд деб ҳисобланиб, «хатоларни тузатиш» сўзларидан кейин «ва» сўзи «ёки» деб ўзгартирилиб, «ўзгартиш» сўзидан кейин «ёхуд қўшимчалар» сўзи қўшилсин.

3-банд 5-банд деб, унинг 2-хат боши чиқарилсин, 4-банд 6-банд деб ўзгартирилсин, 5-бандга «органларидан» сўзидан кейин «зарур бўлган» сўзлари қўшилсин, «олиши лозим» сўзлари «олишда ёрдам кўрсатиш лозим» сўзлари билан алмаштирилсин ва у 7-банд деб юритилсин.

6-банднинг 2-хатбошидаги «ўзгартишлар» сўзидан кейин «ёки қўшимчалар» сўзлари қўшилиши ва бу банд 8-банд деб юритилсин, 7-банд 9-банд деб ўзгартирилсин, 8-банддаги «миллати» сўзидан кейин «ҳақидаги маълумотлар» сўзлари ёзилиб, у 10-банд деб, 9-банд 11-банд қилиб ўзгартирилсин, 10-банддаги «ўзгартиришлар» сўзидан кейин «ёки қўшимчалар» сўзлари киритилиб, бу банд 12-банд деб юритилсин.

5. «Судлар томонидан мулкни рўйхат (арест)дан чиқариш ҳақидаги ишларни кўришда қонунчиликни қўлланиши тўғрисида»ги 1993 йил 16 апрелдаги 5-13-93-сонли 1997 йил 2 майда ўзгартиришлар киритилган Пленум қарорига қуйидаги ўзгартиришлар киритилсин:

Қарорнинг 2-бандидаги «ФПКнинг 131-моддасига» сўзлари «ФПКнинг 242-моддасига» сўзлари билан, «135-моддасининг» сўзлари «146-моддасининг» сўзлари билан, 3-банддаги «Ўзбекистон Республикаси ФПКнинг 404, 459-моддасида» сўзлари «тегишли қонунларда» сўзлари билан, 4-банддаги «ФПКнинг 236-моддасининг» сўзлари «ФПКнинг 92-моддасининг» сўзлари билан,

5-банд 3-хатбошидаги, 7-банд 3-хатбошидаги «тегишли молия идораси» сўзлари «тегишли солиқ хизмати» сўзлари билан алмаштирилсин. 7-банд 1-хатбошидаги «ёки сўзидан кейинги «суд» сўзи чиқарилсин.

8-банддаги «Ўзбекистон Республикаси ФПКнинг 397-моддасининг 4-банди тартибида» сўзлари, 9-банд 2-хатбошидаги «ёки» сўзидан кейинги «суд» сўзи чиқарилсин.

9-банд 2-хатбошидаги «ФПКнинг 53-моддаси тартибида далилларни тўплашда ташаббус» сўзлари «ФПКнинг 57-моддаси тартибида далилларни тўплашда уларга ёрдам» сўзлари билан, шу банднинг 3-хатбошидаги «(Ўзбекистон Республикаси ФПКнинг 52-моддаси)» сўзлари «(Ўзбекистон Республикаси ФПКнинг 56-моддаси)» сўзлари билан алмаштирилсин.

10-банддаги «Ўзбекистон Республикаси ФПКнинг 405-моддасига мувофиқ» сўзлари чиқарилиб, «агарда» сўзи катта ҳарф билан «Агар» деб кўрсатилсин, шу банддаги «биргаликдаги» сўзидан кейин «умумий» сўзи қўшилсин, 3-хатбошидаги «жараён» сўзидан кейин «уни» сўзи қўшилсин.

11-банд 1-хатбошидаги «расмийлаштирилган» сўзидан кейин вергул қўйилиб, «бўлиб» сўзи чиқарилсин.

13-банддаги «Никоҳ ва Оила кодексининг 25-моддаси» сўзлари «Оила кодексининг 23, 27-моддаларига» сўзлари билан алмаштирилиб, 2-хатбоши қуйидаги таҳрирда баён қилинсин:

«Суд вояга етмаган болалар манфаатларидан ва (ёки) эр ва хотиндан бирининг эътиборга лойиқ манфаатини ҳисобга олиб, жумладан, агар эр ёки хотиннинг умумий мол-мулкини оила манфаатларига зарар етказган ҳолда сарфлаган бўлса, эр ва хотиннинг умумий мол-мулкидаги улушлари тенглигидан чекинишга ҳақлидир (Оила кодекси 28-модда)».

13-банд 8-хатбошидаги «Ўзбекистон Республикаси ФПКнинг 407-моддасида белгиланган тартибда, яъни» сўзлари,

15-банд 2-хатбошидаги «(биргаликдаги)» сўзи 18-банд 2-хатбошидаги «Ўзбекистон Республикаси ФПКнинг 459-модда 6-қисмига мувофиқ» сўзлари чиқарилсин.

18-банд 2-хатбошидаги «Ўзбекистон Республикаси ФПКнинг 459-модда 6-қисмига мувофиқ» сўзлари чиқарилсин.

6. «Фуқароларнинг ҳуқуқлари ва эркинликларини бузадиган хатти — ҳаракатлар ва қарорлар устидан келтирилган шикоятларни судларда кўриш амалиёти тўғрисида»ги Пленумнинг 1996 йил 19 июлдаги 18-сонли қарорига ҳам қуйидаги ўзгартиришлар киритилсин:

Қарорнинг кириш қисми охирги хатбошидаги «Қонунларга ўзгартириш киритилганлиги муносабати билан ва» сўзлари чиқарилиб, «Фуқароларнинг» сўзлари катта ҳарф билан ёзилсин.

Қарорнинг 7-бандидаги «ФПКнинг 42-моддасига» сўзлари ФПКнинг 46-моддасига» сўзлари билан, «ФПКнинг 49-моддасига» сўзлари «ФПКнинг 54-моддасига» сўзлари билан,

9-банддаги «ФПКнинг 273-моддасига» сўзлари «ФПКнинг 282-моддасига» сўзлари билан алмаштирилсин.

Қарорнинг 9 ва 12-бандларидаги «ФПКнинг 139 ва 140-моддаларига» сўзлари «ФПКнинг 149, 150-моддаларига» сўзлари билан,

9-банддаги «ФПКнинг 139-моддасида» сўзлари «ФПКнинг 149-моддасида» сўзлари билан, «ФПКнинг 144-моддасида» сўзлари «ФПКнинг 154-моддасида» сўзлари билан,

Қарорнинг 13-бандидаги «ФПКнинг 24^-бобида» сўзлари «ФПКнинг 27-бобида» сўзлари билан алмаштирилсин.

Қарорнинг 15-банди «а» кичик бандидаги «(Уй-жой кодексининг 33-моддаси)» сўзлари чиқарилсин.

7-банддаги «ёки жиноят иши қўзғатиш масаласини ҳал қилиш» сўзлари чиқарилсин, бу сўздан олдинги «юбориш» сўзи билан, «(ФПКнинг 235-моддаси» сўзлари «ФПКнинг 19-моддаси» сўзлари алмаштирилсин.

7. Ўзбекистон Республикаси Олий суди Пленумининг 1997 йил 2 майдаги «Хусусийлаштирилган турар жойларга эгалик қилиш, улардан фойдаланиш ва уларни тасарруф қилиш билан боғлиқ ишлар бўйича суд амалиёти ҳақида»ги қарорига қуйидаги ўзгартиришлар киритилсин.

Қарорнинг кириш қисми қуйидаги таҳрирда баён қилинсин:

«Ўзбекистон Республикасининг Фуқаролик ва Оила кодекслари қабул қилиниб, амалга киритилиши ва «Давлат уй-жой фондини хусусийлаштириш тўғрисида»ги Ўзбекистон Республикаси Қонунини қўллаш жараёнида баъзи тушунмовчиликлар юзага келаётганлиги муносабати билан Ўзбекистон Республикаси Олий судининг Пленуми қарор қилади».

Қарорнинг 1-бандидаги «Фуқаролик» сўзидан кейин «ва» Уй-жой» сўзлари қўшилсин, «Қонун билан» сўзидан кейин «Уй-жой кодексининг 139²-моддаси» сўзлари чиқарилсин.

17-банддаги «Никоҳ ва» сўзлари чиқарилсин ва «Оила» сўзи катта ҳарф билан ёзилсин, «25, 27-моддаларини» сўзлари «23-24-моддаларини» сўзлари билан алмаштирилсин.