Ўзбекистон Республикаси Олий Мажлиси Қонунчилик палатаси Спикерининг ўринбосари Х. Гаппоровнинг «Ўзбекистон Республикаси Олий Мажлиси Қонунчилик палатасида 2024 йилнинг биринчи ярим йиллигида жисмоний ва юридик шахсларнинг мурожаатлари билан ишлаш ҳолати тўғрисида»ги ахборотини эшитиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Ўзбекистон Республикаси Олий Мажлиси Қонунчилик палатасида (бундан буён матнда Қонунчилик палатаси деб юритилади) жисмоний ва юридик шахсларнинг мурожаатлари билан ишлаш самарадорлигини оширишга қаратилган тизимли ишлар амалга оширилган.

Ўзбекистон Республикаси Президентининг Халқ қабулхоналари ва Виртуал қабулхонаси ташкил этилганлиги натижасида жисмоний ва юридик шахсларнинг ҳуқуқ ва эркинликлари ҳамда қонуний манфаатларини тўлақонли ҳимоя қилиш кафолатлари мустаҳкамланди, давлат органлари билан фуқаролар ўртасидаги ҳамкорликнинг самарали механизми жорий этилди.

Қонунчилик палатасида жисмоний ва юридик шахсларнинг мурожаатлари билан ишлаш «Ўзбекистон — 2030» стратегияси ҳамда «Ёшлар ва бизнесни қўллаб-қувватлаш йили» давлат дастурида белгиланган вазифаларга ҳамоҳанг равишда ташкил этилган.

Ҳисобот даврида Қонунчилик палатаси депутатларининг ҳудудларда кўпроқ фаолият олиб боришига эътибор қаратилган. Бу эса мурожаатлар билан ишлаш борасидаги фаолият самарадорлигини кучайтириш, аҳолининг турмуш шароитларини ўрганиш ҳамда аниқланган муаммоларни парламент назорати шаклларидан фойдаланган ҳолда ҳал этиш имконини берган.

Қонунчилик палатасида хат-ҳужжатлар ва мурожаатлар билан ишлаш «edo.ijro.uz» ахборот тизими орқали электрон шаклда амалга оширилган. Натижада мурожаатларни кўриб чиқиш муддатлари устидан тизимли назорат олиб борилган ҳамда мурожаатларнинг ва уларга берилган жавоб хатларининг яхлит электрон базаси яратилган.

2024 йилнинг биринчи ярим йиллигида Қонунчилик палатасига жисмоний ва юридик шахслардан 3 002 та мурожаат келиб тушган ва уларнинг белгиланган тартибда кўриб чиқилиши таъминланган. Уларнинг 2 409 таси ариза, 386 таси шикоят, 207 таси таклифлардир.

Жисмоний ва юридик шахсларнинг қонун ҳужжатларини такомиллаштириш юзасидан билдирган 207 та таклифи Қонунчилик палатасининг масъул қўмиталари мажлисларида муҳокама қилинган ҳамда улардан қонун лойиҳаларини такомиллаштириш жараёнида фойдаланилган.

Ҳисобот даврида Қонунчилик палатаси қўмиталари томонидан қонун ижодкорлиги жараёнида жами 110 та қонун лойиҳаси устида иш олиб борилиб, 340 та ишчи гуруҳ ҳамда 61 та экспертлар гуруҳи йиғилиши ўтказилган. Қонунчиликка таклифлар мазкур қонун лойиҳаларини маромига етказиш мобайнида ишчи гуруҳ ва экспертлар гуруҳи йиғилишларида батафсил кўриб чиқилган.

Хусусан, фуқаролар И. Расулов ва Х. Курбанованинг «Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида»ги ҚЛ-1129-сонли Ўзбекистон Республикаси қонуни лойиҳаси бўйича таклифлари Қонунчилик палатасининг Аграр ва сув хўжалиги масалалари қўмитаси томонидан мурожаатчилар иштирокида муҳокама этилган ҳамда таклифлардан мазкур қонун лойиҳасини маромига етказишда фойдаланилган.

Депутатларнинг сайловчилар билан ўтказган мунтазам учрашувлари, улар томонидан кўтарилган муаммоларни ҳудуднинг ўзида ўрганиб, ҳал этиб келинаётганлиги, Қонунчилик палатасининг Фуқаролар қабулхонасига келган мурожаатчиларга ҳуқуқий тушунтиришлар берилганлиги натижасида келиб тушган мурожаатлар сони ўтган йилнинг мос даврига нисбатан 775 тага (21 фоизга) камайган.

Мурожаатларда кўтарилган масалаларнинг соҳалар бўйича таҳлили ижтимоий соҳага тааллуқли мурожаатлар ўтган йилнинг мос даврига нисбатан 229 тага (35 фоизга), маҳаллий давлат ҳокимияти органлари фаолиятига оид мурожаатлар 150 тага (19 фоизга), қонунчилик ва суд-ҳуқуқ соҳасига тааллуқли мурожаатлар 88 тага (14 фоизга) камайганлигини кўрсатмоқда.

Қонунчилик палатасининг Фуқаролар қабулхонасида 1 330 нафар жисмоний шахслар ва юридик шахсларнинг вакиллари қабул қилинган. Фуқаролар қабули жараёнида 606 та мурожаат, шу жумладан 37 та оғзаки мурожаат қабул қилиб олиниб, 468 нафар фуқарога ҳуқуқий тушунтиришлар берилган.

Қонунчилик палатасига келиб тушган, ижобий тарзда ва ҳуқуқий тушунтириш бериш орқали ҳал этилган мурожаатларнинг сони 411 тани ташкил этган.

Қонунчилик палатасининг қўмиталари мажлисларида мурожаатларда кўтарилган масалалар қай даражада ҳал этилаётганлиги бўйича давлат органлари раҳбарларининг ахбороти 6 маротаба эшитилган.

Жисмоний ва юридик шахсларнинг мурожаатлари билан ишлаш борасида амалга оширилган ишлар билан бир қаторда эътибор қаратилиши лозим бўлган айрим масалалар ҳам мавжуд.

Таҳлиллар шуни кўрсатдики, мурожаатларнинг аксарият қисми суд, ҳуқуқни муҳофаза қилувчи ва маҳаллий давлат ҳокимияти органларининг фаолияти билан боғлиқ масалалар, шунингдек қонунчиликка зид бўлган идоравий қарорларни бекор қилиш, ишга жойлашиш, соғлиқни сақлаш, банк кредитларини олиш масалалари юзасидан келиб тушмоқда.

Шунга кўра Қонунчилик палатасининг қўмиталари ўз йўналишидан келиб чиққан ҳолда, мурожаатларни соҳалар кесимида таҳлил этиши ҳамда таҳлил натижаларидан тегишли қонун ҳужжатларини такомиллаштириш, шунингдек давлат органларининг ахборотини эшитишда фойдаланиши лозим.

Айрим ҳолларда «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунида белгиланган мурожаатларни кўриб чиқиш муддатларининг бузилиши ҳоллари кузатилмоқда.

«Edo.ijro.uz» ахборот тизимини янада такомиллаштириш, ундан фойдаланиш юзасидан Қонунчилик палатаси депутатларининг ва Девони ходимларининг малакасини ошириб бориш зарур.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Спикери ўринбосари Х. Гаппоровнинг «Ўзбекистон Республикаси Олий Мажлиси Қонунчилик палатасида 2024 йилнинг биринчи ярим йиллигида жисмоний ва юридик шахсларнинг мурожаатлари билан ишлаш ҳолати тўғрисида»ги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг қўмиталари:

жисмоний ва юридик шахслардан келиб тушган мурожаатларнинг «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунига қатъий амал қилган ҳолда, тўлиқ, холис ва ўз вақтида кўриб чиқилишини таъминласин;

ўз йўналишидан келиб чиққан ҳолда, мурожаатларни соҳалар кесимида таҳлил этсин ҳамда таҳлил натижаларидан тегишли қонун ҳужжатларини такомиллаштириш, шунингдек давлат органларининг ахборотини эшитишда фойдалансин;

қонун ҳужжатлари нормаларини такомиллаштириш юзасидан жисмоний шахслар ва юридик шахсларнинг вакиллари томонидан берилган асосли таклифларни қўмита мажлисларида ушбу шахсларни жалб этган ҳолда муҳокама этиб бориш амалиётини кенгайтирсин;

жисмоний ва юридик шахсларнинг қонунчилик таклифларини кўриб чиқишда Қонунчилик палатаси ҳузуридаги Парламент тадқиқотлари институтининг салоҳиятидан янада кенг фойдаланиш чораларини кўрсин.

3. Ўзбекистон Республикаси Олий Мажлиси Қонунчилик палатасининг Девони:

«edo.ijro.uz» ахборот тизимини янада такомиллаштириш чораларини кўрсин ҳамда ушбу тизимдан фойдаланиш юзасидан Ўзбекистон Республикаси Олий Мажлиси Қонунчилик палатаси депутатларининг ва Девони ходимларининг малакасини ошириб борсин;

Қонунчилик палатасида жисмоний ва юридик шахсларнинг мурожаатлари билан ишлаш ҳолати юзасидан Қонунчилик палатаси қўмиталарига ҳар ой якуни бўйича ахборот киритиб борсин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари Х. Гаппоров зиммасига юклатилсин.

5. Ушбу Қарор қабул қилинган кундан эътиборан кучга киради.