Ўтган йиллар давомида суд-ҳуқуқ тизимини тубдан ислоҳ қилиш ва демократлаштириш, судларнинг холислиги ҳамда мустақиллигини, қонун устуворлигини, инсон ҳуқуқ ва эркинликлари ишончли ҳимояланишини таъминлаш бўйича амалга оширилган изчил ишлар натижасида фуқароларнинг судга бўлган ишончи тобора мустаҳкамланиб бораётган ҳозирги пайтда қонун талабларига оғишмай амал қилиш, ишларнинг қонуний муддатларда кўрилиб ҳал этилиши ҳамда судлар томонидан қабул қилинаётган ҳар бир қарорнинг амалдаги қонун меъёрларига тўла мос бўлиши инсон ҳуқуқ ва эркинликларини таъминловчи муҳим омил ҳисобланади.

Судлар томонидан процессуал қонунчилик нормаларига риоя этилиши ва бу нормаларини амалиётда қўллаш муаммолари таҳлилий ўрганилиб, Фуқаролик процессуал кодексини янада такомиллаштириш заруратидан келиб чиққан ҳолда₇ ушбу қонун лойиҳаси тайёрланди. Лойиҳада Ўзбекистон Республикаси Фуқаролик процессуал кодексининг:

суднинг иш юритишни тўхтатиб туриш ҳуқуқи ҳақидаги 93-моддасини Кодекснинг 65 ва 390-моддаларига мувофиқ суд томонидан суд топшириғи юборилган ҳолларда фуқаролик иши бўйича иш юритишни тўхтатиб туриш ҳақидаги 6-банд билан;

иш юритишни тўхтатиб туриш вақти ҳақидаги 94-моддасини суд топшириғи юборилиши билан боғлиқ иш юритиш вақтини белгиловчи 9-банд билан;

фуқаролик ишларини судда кўришга тайёрлаш ва кўриш муддатлари ҳақидаги 131-моддасининг учинчи қисмида белгиланган бир ойлик ишни кўриш муддатини ўта мураккаб ишлар бўйича судьянинг асослантирилган ажримига биноан икки ойгача узайтирилиши мумкинлиги ҳақидаги қоида билан тўлдириш;

кодекснинг ишни апелляция инстанциясида кўриш муддатлари ҳақидаги 331-моддасидаги йигирма кунлик иш кўриш муддатини бир ойга ўзгартириш;

суднинг ажрими устидан шикоят бериш ҳақидаги 368-моддасининг 1-қисмига ҳал қилув қарори, ажрим ёки қарорни янги очилган ҳолатлар бўйича қайта кўриш ҳақидаги аризани қаноатлантириш ёки рад қилиш тўғрисидаги суднинг ажрими устидан хусусий шикоят берилиши ёки хусусий протест келтирилиши мумкинлиги ҳақида ўзгартириш киритиш назарда тутилган.

Қонун лойиҳасини тайёрлашда суд амалиётидаги фуқаролик процесси билан боғлиқ мавжуд муаммолар таҳлил қилинган, халқаро тажриба қиёсий ўрганилган.

Қонун лойиҳасида назарда тутилган ўзгартиш ва қўшимчалар келгусида фуқаролик судлов ишларини юритишнинг сифат ва самарадорлигини янада оширишга хизмат қилишини инобатга олиб, Ўзбекистан Республикаси Конституциясининг 83-моддаси ва «Судлар тўғрисида»ги Қонуннинг 12, 17-моддаларига асосланиб, Олий суд Пленуми қарор қилади:

1. «Ўзбекистон Республикаси Фуқаролик процессуал кодексига ўзгартиш ва қўшимчалар киритиш тўғрисида»ги Қонун лойиҳаси маъқуллансин ва Ўзбекистан Республикаси Олий Мажлисининг Қонунчилик палатасига кўриб чиқиш учун киритилсин.

2. Ўзбекистон Республика Олий судининг фуқаролик ишлар бўйича ҳайъати раиси Ёдгоров Холмумин Буврабоевич, Олий суд ҳузуридаги Тадқиқот марказининг бўлим бошлиғи Хакимов Мухтор Абдуллаевич Узбекистан Республикаси Олий Мажлисининг палаталарида юқорида кўрсатилган қонун лойиҳасини кўриб чиқишда иштирок этувчи вакиллар этиб тасдиқлансин.