1. Ўзбекистон Республикаси Вазирлар Маҳкамаси ҳузуридаги Олий аттестация комиссияси (ОАК)нинг эксперт кенгашлари аттестация тизими ишининг энг муҳим йўналишлари ҳамда илмий даражалар ва илмий унвонлар бериш масалалари бўйича тавсиялар ишлаб чиқувчи ва уларни амалга оширувчи илмий-ижтимоий органдир. Эксперт кенгаши ўз фаолиятида ОАК тўғрисидаги Низомга амал қилади. У ихтисослашган кенгаш (бундан кейин кенгаш) тўғрисидаги, илмий даражалар ва илмий унвонлар бериш тўғрисидаги Низомларга, шунингдек ушбу Низомга мувофиқ ўз зиммасига юкланган вазифаларни бажариш учун масъулдир.

2. Эксперт кенгашининг асосий вазифалари:

а) юқори малакали илмий ва илмий-педагог ходимларни тайёрлаш ҳамда аттестациядан ўтказишга оид ташкилотлар ва муассасалар таклифларини ўрганиш, уларга баҳо бериш;

б) фан ва техниканинг энг янги йўналишларини ҳисобга олган ҳолда илмий ходимлар ихтисосликлари номенклатурасини такомиллаштиришга оид таклифларни кўриб чиқиш ва тайёрлаш;

в) ихтисослашган ҳамда илмий кенгашларда илмий даражалар ва илмий унвонлар бериш ишларини назорат қилиш;

г) олий ўқув юртларида, илмий-тадқиқот муассасаларида диссертация ёқлаш бўйича кенгаш тузишда иштирок этиш;

д) диссертацияларнинг илмий савиясини, уларнинг илмий ва амалий қимматини баҳолаш, илмий даража ва илмий унвон даъвогарларига қўйиладиган талабларнинг ягоналигини, диссертацияларнинг юқори савияда экспертизадан ўтказилишини таъминлаш;

е) диссертация натижаларини таҳлил қилиш ҳамда уларнинг илмий-техникавий ва ижтимоий тараққиёт йўналишларига қанчалик мослигига баҳо бериш.

3. Эксперт кенгаши ўз зиммасидаги вазифаларга мувофиқ:

а) кенгашларнинг мақбул шахобчаларини шакллантиришда иштирок этади;

б) кенгашларни. тузиш ва қайта тасдиқлашга оид материалларни кўриб чиқади ҳамда уларнинг малака даражаси ва тузишнинг мақсадга мувофиқ ёки мувофиқ эмаслиги тўғрисида хулоса чиқаради;

в) илмий даражалар ва илмий унвонлар берувчи кенгашларнинг иш тажрибасини таҳлил этади ва умумлаштиради;

г) кенгашларнинг олий ўқув юртлари ва илмий-тадқиқот муассасалари ходимларига илмий даража ва илмий унвонлар бериш тўғрисидаги илтимосномаларини кўриб чиқади ҳамда ОАК Ҳайъати ва Раёсатига тавсиялар тайёрлайди;

д) ҳимоя қилинган диссертациялар мавзуларини, илмий ва амалий натижаларини таҳлил этиб, Ўзбекистон Республикаси Ҳукумати, вазирликлари, давлат қўмиталари, идоралари учун тегишли материаллар тайёрлайди;

е) илмий ходимлар ихтисосларининг номенклатурасини такомиллаштиришга, янги ихтисослар бўйича паспортларни ва номзодлик имтиҳонлари дастурларини тайёрлашга оид таклифларни кўриб чиқишда қатнашади;

ж) фуқароларнинг таклиф, ариза ва шикоятларини кўриб чиқишда иштирок этади;

з) ОАК илмий кенгаши, Раёсати ва раҳбариятининг топшириғига биноан илмий ва илмий-педагог ходимларни аттестациядан ўтказишга алоқадор бошқа масалаларни кўриб чиқади.

4. Эксперт кенгашига қуйидаги ҳуқуқлар берилган:

а) зарур ҳолларда диссертацияни қўшимча хулоса олиш учун кенгашга юбориш;

б) етарлича асосланмаган хулосани мукаммаллаштириш учун кенгашга қайтариш;

в) илмий даража талабгорларини, диссертация ҳимояси ёки унинг жамоавий тақризи ўтказилган кенгашнинг раҳбарини, расмий оппонентларни, илмий раҳбар ва илмий маслаҳатчиларни, шунингдек, етакчи ташкилот вакилларини ўз мажлисларига таклиф қилиш;

г) ўз мажлисларида ихтисослашган ва илмий (илмий-техникавий) кенгаш раҳбарларининг ҳисоботини эшитиш, ОАК Раёсатининг у ёки бу кенгашнинг бундан буён ишлаши мақсадга мувофиқ ёки мувофиқ эмаслигига доир тавсияларни тайёрлаш;

д) зарур ҳолларда диссертация бўйича расмий оппонентларни тавсия этиш;

е) лозим бўлганда кенгаш мажлисларига ўз вакилларини юбориш:

ж) фан соҳалари бўйича бўлинмаларнинг ва давлат инспекцияси бўлимининг ходимлари билан биргаликда кенгаш фаолиятини текширишда иштирок этиш;

з) кенгаш ишлаб турган ўқув юртлари ва илмий муассасаларда сайёр мажлислар ўтказиш.

5. ОАКнинг эксперт кенгашлари фаннинг турли соҳаларидаги етакчи олимлардан ва халқ хўжалиги мутахассисларидан тузилади.

Эксперт кенгашларининг сони ва таркиби ОАК Раёсати томонидан кейинчалик камида учдан бир қисмини янгилаш шарти билан уч йил муддатга тасдиқланади. Эксперт кенгаши таркибини уч йил ичида қисман ўзгартириш ОАК Ҳайъатининг қарори билан амалга оширилади.

ОАК эксперт кенгаши таркибида узлуксиз ишлашнинг умумий муҳлати икки муддатдан ошмаслиги шарт.

Эксперт кенгаши таркибига фақат фан докторлари киради. Истисно тариқасида кенгашнинг илмий котиби этиб фан номзоди ҳам тайинланиши мумкин. Эксперт кенгашининг таркиби, одатда, 21 кишидан ошмаслиги керак.

Эксперт кенгашининг раиси ва унинг ўринбосари бир ташкилот ёки муассасанинг ходимлари бўлиши мумкин эмас.

Эксперт кенгашининг раиси, раис ўринбосари ва илмий котиби оппонент этиб тайинланишлари мумкин эмас.

Эксперт кенгаши аъзоси эксперт кенгаши билан келишилган ҳолда истисно тарзида расмий оппонент этиб тайинланиши мумкин.

Эксперт кенгашининг аъзолари кенгашнинг раиси ёки раис ўринбосари этиб тасдиқланиши мумкин эмас. Эксперт кенгашининг аъзолари кенгашнинг аъзоси бўлиши тавсия этилмайди.

ОАК илмий кенгашининг секциялари эксперт кенгаши раиси ва аъзолигига номзодлар юзасидан тавсия беради, улар ОАК Раёсати ва Ҳайъати томонидан тасдиқланиши лозим.

6. Эксперт кенгаши ўз ишига эксперт сифатида фаннинг тегишли соҳалари бўйича мутахассис бўлган фан докторларини жалб қилиши мумкин. Эксперт кенгашининг топшириғига биноан экспертлар диссертацияни таҳлил қилиш ҳамда аттестация ишларини кўриб чиқишда қатнашадилар.

ОАК Раёсати ва илмий кенгашининг аъзолари эксперт кенгаши ишида қатнашишлари мумкин эмас.

Эксперт кенгашига таклиф қилинган мутахассислар эксперт кенгашида фақат маслаҳат овози билан қатнашиш ҳуқуқига эгадирлар.

ОАК масъул ходимлари эксперт кенгаши ишида фақат ОАК раҳбариятининг рухсати билан қатнашадилар.

7. Эксперт кенгашининг мажлислари раис раҳбарлигида, у йўқлигида эса раис ўринбосари раҳбарлигида ўтказилади.

Эксперт кенгашининг тавсиялари ва хулосалари очиқ овоз бериш тарзида кўпчилик овоз билан қабул қилинади. Зарур ҳолларда ёки эксперт кенгаши ақалли бир аъзосининг таклифига биноан ёпиқ ҳолда ўтказилади.

8. Эксперт кенгаши фаолиятини ОАК раҳбарияти ва ОАК фан соҳалари бўйича бўлинмаларининг раҳбарлари назорат қилиб боради.

ОАКнинг фан соҳалари бўйича бўлинмалари ва бошқа қисмлари эксперт кенгаши ҳамда экспертлар иши учун шароитни, шунингдек, у қабул қилган тавсия ва хулосаларнинг рўёбга чиқарилишини таъминлайдилар.

Эксперт кенгашининг мажлиси белгиланган тартиб бузилган ҳолда ўтказилган ёки қабул қилинган қарор етарлича асосланмаган тақдирда, ОАК Ҳайъати ёки фан соҳалари бўйича бўлинма раҳбари эксперт кенгашига масалани такроран кўриб чиқишни таклиф этишга ҳақли.

9. ОАК Раёсати ёки раҳбариятининг топшириғига биноан, шунингдек эксперт кенгаши қарори билан ихтисослараро ёки фан соҳалариаро туташ мавзулардаги диссертацияларни кўриб чиқиш учун ОАКнинг фан соҳалари бўйича бўлинмалари бир неча эксперт кенгашининг қўшма мажлисини ташкил қилишлари мумкин.

10. Фан соҳалари бўйича бўлинма штатидаги ходим шу эксперт кенгаши мутасаддиси эксперт кенгаши мажлисида қатнашиш ҳуқуқига эга бўлиб, у эксперт кенгашининг илмий котиби билан биргаликда аттестация иши ҳужжатларининг тўкис сақланиши, уларнинг ўз вақтида кўриб чиқилиши учун масъулдир, у эксперт кенгаши аъзоларининг ишини ҳисобга олиб боради.

Эксперт кенгаши қарорига мувофиқ унинг мажлисида ушбу Низом 4-моддасининг в-бандида кўрсатиб ўтилган кишилардан ташқари у ёки бу масалани кўриб чиқишда қатнашиши зарур бўлган бошқа эксперт кенгашларининг аъзолари ва мутахассислари ҳам иштирок этишлари мумкин.

11. Эксперт кенгашининг мажлисида диссертация иши бўйича расмий оппонент ёки ҳимоя қилувчининг илмий раҳбари, илмий маслаҳатчиси бўлган аъзолари, шунингдек кўриб чиқилаётган диссертация бўйича етакчи ташкилот тақризини имзолаган эксперт кенгаши аъзолари иштирок этмайдилар.

12. Эксперт кенгашининг қарорлари ва хулосаларини раислик қилувчи, маърузачи-кенгаш аъзоси ва эксперт кенгашининг илмий котиби имзолайди ҳамда улар мажлисдан кейин беш кундан кечиктирмай ОАКнинг фанлар бўйича тегишли бўлинмасига топширилади.

13. Эксперт кенгашида фан доктори илмий даражасини ва профессор илмий унвонини бериш ҳақидаги илтимосномани кўриб чиқиш муддати олти ойдан, номзодлик диссертациясини ҳамда доцент ва катта илмий ходим илмий унвонларини бериш ҳақидаги илтимосномаларни кўриб чиқиш муддати тўрт ойдан ошмаслиги керак.

Эксперт кенгашида кенгашлар ташкил қилиниши ва фаолияти хусусидаги материалларни кўриб чиқиш муддати икки ойдан ошмаслиги лозим.

14. Эксперт кенгаши ҳар йили 10 январдан кечиктирмай ОАКнинг фан соҳалари бўйича бўлинмасига ўтган йил мобайнидаги ўз фаолияти тўғрисида белгиланган шаклда ҳисобот топширади.

15. Эксперт кенгаши аъзоларининг ва экспертларнинг илмий ва илмий-педагог ходимларни аттестациядан ўтказиш борасидаги ишига ҳақ тўлаш тартиби Ўзбекистон Вазирлар Маҳкамаси томонидан ўрнатилади.