Ўзбекистон Республикаси Олий Мажлиси Қонунчилик палатаси ҳузуридаги Ёшлар парламентининг (бундан буён матнда Ёшлар парламенти деб юритилади) 2023 йилдаги фаолияти тўғрисидаги ахборотини кўриб чиқиб, Ўзбекистон Республикаси Олий Мажлиси Қонунчилик палатаси таъкидлайдики, ҳисобот даврида Ёшлар парламенти томонидан ёшларни ҳар томонлама қўллаб-қувватлаш, уларнинг мамлакатда олиб борилаётган ислоҳотлар ҳамда ижтимоий-сиёсий жараёнлардаги иштирокига кўмаклашиш, парламент ҳаётига жалб қилиш, ҳуқуқий онги ва саводхонлигини оширишга устувор вазифа сифатида қаралган.

Ёшлар парламенти аъзоларининг Ўзбекистон Республикаси Олий Мажлиси Қонунчилик палатасидаги (бундан буён матнда Қонунчилик палатаси деб юритилади) сиёсий партиялар фракциялари билан ҳамкорлиги йўлга қўйилиб, уларнинг фракция мажлисларида иштирок этиб бориши таъминланган.

Ўтган давр мобайнида Ёшлар парламенти томонидан ёшларни қонун ижодкорлиги жараёнига жалб этиш ҳамда қабул қилинаётган қонунларни ёшлар орасида кенг тарғиб қилиш масалаларига алоҳида эътибор берилган. 2023 йилда Ўзбекистон Республикаси Олий Мажлиси Қонунчилик палатасида кўриб чиқилган қонун лойиҳаларидан 21 таси юзасидан 455 та таклиф тайёрланган.

Шунингдек қонун ижодкорлиги ва ҳуқуқни қўллаш амалиётининг муҳим масалаларини ёшлар иштирокида муҳокама этишга, Қонунчилик палатаси қўмиталари ҳамда сиёсий партиялар фракциялари фаолияти тўғрисида ёшларни кенг хабардор қилишга қаратилган 2 210 та тадбир ўтказилган.

Жумладан «Парламент ва ёшлар», «Қонун ижодкорлигида ёшларнинг ўрни», «Ёшларга қонунчиликда қандай имтиёзлар бор?», «Ёш олимлар лигаси», «Ёш адолатчилар», «Ёш академиклар», «Ёш экологлар», «Ёш сиёсатчилар лигаси», «Ёшларга ҳуқуқий кўмак», «Ёшлар ҳуқуқлари — эътиборда» каби мавзуларда ўтказилган тадбирларда 10 мингдан зиёд ёшлар қамраб олинган.

Қонунчилик палатаси депутатларининг ҳудудлардаги учрашувлари, назорат-таҳлил тадбирлари ва сайловчилар билан мулоқотлари жараёнида Ёшлар парламенти аъзоларининг 61 маротаба бевосита иштирок этиши таъминланган.

Шу билан бирга Ёшлар парламенти томонидан давлат органлари билан ҳам фаол ҳамкорлик йўлга қўйилган бўлиб, унинг 150 нафар аъзоси 21 та вазирлик ва идорага бириктирилган. Бунинг амалий натижаси ўлароқ ҳисобот йилида 13 та вазирлик ва идорада амалий учрашувлар ташкил этилган.

Ўтган даврда хориждаги ёшлар ҳамда чет давлатларнинг қонун чиқарувчи органлари ҳузуридаги Ёшлар парламентлари билан ҳамкорлик кўлами сезиларли даражада кенгайган. Ёшлар парламент аъзолари 21 та халқаро тадбирда, шу жумладан 9 та хорижий давлатда ўтказилган анжуманларда иштирок этган. Беларусь Республикаси Миллий Ассамблеяси ҳузуридаги ҳамда Россия Федерацияси Федерал Мажлиси Давлат Думаси ҳузуридаги Ёшлар парламенти ўртасида ҳамкорлик учрашувлари ўтказилган.

Ёшлар парламенти фаолияти ҳақида жамоатчиликни, айниқса ёшларни кенг хабардор қилиш мақсадида унинг аъзолари томонидан оммавий ахборот воситаларида жами 10 456 марта чиқиш қилинган.

Шу билан бирга Ёшлар парламентининг ҳисобот давридаги фаолиятининг таҳлили бу борада эътибор қаратилиши лозим бўлган айрим масалалар ҳам мавжудлигини кўрсатмоқда.

Хусусан Ёшлар парламентининг Қонунчилик палатасининг қўмиталари билан амалий ҳамкорлигини ҳамда қонун ижодкорлиги ва назорат-таҳлил тадбирларидаги иштирокини янада кенгайтириш борасидаги ишлар етарли даражада ташкил этилмаган.

Шунингдек талаба-ёшлар билан ишлаш, уларни ўтказиладиган тадбирларга жалб этиш қамровини кенгайтириш, ўзаро амалий ҳамкорликни кучайтириш мақсадга мувофиқ.

Юқорида баён этилганлардан келиб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатаси ҳузуридаги Ёшлар парламенти раиси Ш. Жолдасованинг Ўзбекистон Республикаси Олий Мажлиси Қонунчилик палатаси ҳузуридаги Ёшлар парламентининг 2023 йилдаги фаолияти тўғрисидаги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Ёшлар масалалари бўйича комиссияси (М. Валиев):

Ёшлар парламентининг ишини самарали ташкил этиш, Ёшлар парламенти аъзоларини Қонунчилик палатаси фаолиятига янада кенгроқ жалб қилиш;

Ўзбекистон Республикаси Олий Мажлиси Қонунчилик палатасининг қўмиталари томонидан ўтказиладиган назорат-таҳлил тадбирларида Ёшлар парламенти аъзоларининг фаол иштирокини таъминлаш;

Ёшлар парламентининг вазирлик ва идоралар билан амалий ҳамкорликни кучайтириш ишларига кўмаклашиш чораларини кўрсин.

3. Ўзбекистон Республикаси Олий Мажлиси Қонунчилик палатаси ҳузуридаги Ёшлар парламенти (Ш. Жолдасова):

Ёшлар парламентининг Ўзбекистон Республикаси Олий Мажлиси Қонунчилик палатасининг қўмиталари билан ўзаро ҳамкорлик қилиш борасидаги ишларини янада жонлантириш;

Ёшлар парламенти аъзоларининг талаба-ёшлар билан амалий ҳамкорлигини янада кучайтириш ҳамда ўтказиладиган тадбирларга уларни янада кенгроқ жалб қилиш;

Ёшлар парламенти аъзолари томонидан ўзлари бириктирилган ташкилотлар раҳбарлари томонидан ёшлар билан ишлаш бўйича амалга оширилаётган ишлар ҳолатини ўрганиб бориш чораларини кўрсин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари О. Тожиев зиммасига юклатилсин.

5. Ушбу Қарор қабул қилинган кундан эътиборан кучга киради.