Ўзбекистон Республикаси Олий Мажлиси Қонунчилик палатаси Фан, таълим, маданият ва спорт масалалари қўмитасининг (бундан буён матнда Қўмита деб юритилади) 2023 йилдаги фаолияти тўғрисидаги ахборотини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Қўмита томонидан иқтисодий ислоҳотларни янада чуқурлаштириш, фан-техника, таълим, туризм, маданият, спорт ва миллий архив иши каби қатор соҳалардаги муносабатларни тартибга солишга доир қонун ҳужжатлари ижросини доимий назорат қилиш, сайловчилар билан мунтазам мулоқот ўрнатиш борасида муайян ишлар амалга оширилган.

Хусусан, ҳисобот даврида мамлакатимизда фан, таълим, маданият ва спорт масалалари соҳаларини такомиллаштиришнинг ҳуқуқий асосларини яратишга қаратилган 8 та қонун лойиҳаси кўриб чиқилиб, шундан 6 таси Ўзбекистон Республикаси Олий Мажлисининг Қонунчилик палатаси (бундан буён матнда Қонунчилик палатаси деб юритилади) томонидан қабул қилинган.

Қонун лойиҳаларини маромига етказиш ҳамда уларнинг ҳар жиҳатдан пишиқ ва мукаммал бўлишини таъминлаш мақсадида Қўмита масъул бўлган қонун лойиҳалари муҳокамаси бўйича ишчи гуруҳнинг жами 27 та йиғилиши ўтказилган.

Ҳисобот даврида Қўмита томонидан жами 13 та назорат-таҳлил тадбири ташкил этилган. Улардан 10 таси республика ижро этувчи ҳокимият органлари ва маҳаллий ижро этувчи ҳокимият органлари раҳбарларининг ахборотини эшитишга, 3 таси қонун ва қонуности ҳужжатларининг ижро этилиш ҳолатини ўрганишга оид тадбирлардир.

Шунингдек Қўмита ташаббуси билан жорий йил 15 март куни Ўзбекистон Республикаси мактабгача ва мактаб таълими вазири Х. Умаровага «Мактабларда қўшимча ўқувчи ўрнини яратиш ҳамда мактабларнинг моддий-техника таъминотини мустаҳкамлаш борасида амалга оширилаётган ишлар тўғрисида» ҳамда 21 июнъ куни Ўзбекистон Республикаси ёшлар сиёсати ва спорт вазири А. Икрамовга «Аҳолининг кенг қатламлари, шу жумладан жисмоний имконияти чекланган ҳамда ногиронлиги бўлган шахслар ўртасида спорт ва жисмоний тарбия бўйича оммавий тадбирларни ташкил этиш борасида амалга оширилаётган чора-тадбирлар тўғрисида» парламент сўровлари юборилган.

Ўтган даврда Қўмита томонидан қонун лойиҳалари муҳокамасига, мамлакатимизда иқтисодий ислоҳотларни янада чуқурлаштиришга, фан-техника, таълим, туризм, маданият, спорт ва миллий архив иши соҳаларида олиб борилаётган ислоҳотларнинг аҳамиятини сайловчиларга тушунтиришга, тегишли тармоқ ва соҳалардаги мавжуд муаммоларни таҳлил қилиш ҳамда уларни бартараф этиш юзасидан таклифлар ишлаб чиқишга қаратилган 5 та давра суҳбати, 1 та семинар, 2 та конференция ҳамда 3 та маънавий-маърифий тадбир ўтказилган.

Жисмоний ва юридик шахслардан Қўмита аъзолари номига келган жами 603 та мурожаат «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунига мувофиқ белгиланган тартибда кўриб чиқилган.

Қўмита фаолияти ҳақида кенг жамоатчиликни хабардор қилиш, назорат-таҳлил тадбирлари якунлари ҳамда Қўмита масъуллигида кўриб чиқилаётган қонун лойиҳаларининг мазмун-моҳиятини аҳолига мунтазам равишда етказиш мақсадида оммавий ахборот воситалари ва ижтимоий тармоқларда 2 427 марта чиқиш қилинган.

Шу билан бирга ўтган даврда амалга оширилган ишлар таҳлили Қўмита ўз фаолиятини самарали ташкил этишда эътибор қаратиши лозим бўлган айрим масалалар мавжудлигини кўрсатмоқда.

Жумладан янгиланган Ўзбекистон Республикаси Конституциясидан келиб чиққан ҳолда, Қўмита масъул бўлган қонунларни инвентаризациядан ўтказиш, унинг якуни бўйича таклифларни тайёрлаш ва экспертлар гуруҳининг мажлисларида муҳокама қилиш зарур.

Қўмита масъуллигида кўриб чиқилган ва қабул қилинган қонунларни мониторинг қилган ҳолда уларда белгиланган қонуности ҳужжатларнинг ўз вақтида қабул қилиниши борасида вазирлик ва ташкилотларнинг масъулиятини оширишга қаратилган ишларини янада кучайтириш лозим.

Соҳага оид қонунлар бўйича халқаро тажрибани ўрганиш, қонун лойиҳаларини ишлаб чиқиш ва маромига етказиш бўйича ишларга кенг жамоатчиликни, соҳа мутахассисларини ва экспертларни доимий равишда жалб этиш, бу борада Олий Мажлис Қонунчилик палатаси ҳузуридаги Парламент тадқиқотлари институти билан ҳамкорликни кучайтириш мақсадга мувофиқдир.

Бундан ташқари Қўмита ўз фаолият йўналишидан келиб чиқиб, амалдаги қонун ҳужжатларини такомиллаштириш юзасидан асослантирилган таклифлар тайёрлаш ва уларни қонунларда акс эттириш бўйича ташаббус билан чиқиш борасидаги ишларни самарали ташкил этиши талаб қилинади.

Ўзбекистон Республикаси Президентининг фармон ва қарорлари, давлат дастурлари ҳамда Қонунчилик палатаси қарорларида назарда тутилган Қўмита фаолиятига тааллуқли бўлган масалаларнинг ижро этилиши устидан таъсирчан парламент назоратини амалга оширишга алоҳида эътибор қаратиш муҳим аҳамиятга эга.

Қўмитанинг жисмоний ва юридик шахсларнинг мурожаатлари билан ишлаш соҳасидаги, қонун лойиҳалари ва назорат-таҳлил тадбирларининг мазмун-моҳиятини кенг жамоатчиликка етказиш борасидаги фаолиятини тизимли ташкил этиш бўйича тегишли чора-тадбирларни амалга ошириш зарур бўлади.

Юқорида баён этилганлардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Фан, таълим, маданият ва спорт масалалари қўмитасининг 2023 йилдаги фаолияти тўғрисидаги ахборот маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Фан, таълим, маданият ва спорт масалалари қўмитасига:

қонун лойиҳаларини ишлаб чиқиш ва маромига етказишда, назорат- таҳлил тадбирларини ўтказишда доимий равишда кенг жамоатчиликни, соҳа мутахассисларини ва экспертларни жалб қилиш;

жисмоний ва юридик шахсларнинг Қўмитага юборилган мурожаатларида кўтарилаётган долзарб муаммоларни ҳар томонлама таҳлил қилиш, уларнинг юзага келиш сабабларини ўрганиш, кўтарилган масалаларга тўлиқ ечим топиш борасида тегишли давлат органлари томонидан кўрилаётган чоралар устидан таъсирчан парламент назоратини амалга ошириш;

қабул қилинган қонун ҳужжатларининг ижро этилиши ҳолатининг доимий мониторингини юритиш ва мониторинг натижаларини Қўмитада муҳокама қилиб бориш;

Ўзбекистон Республикаси Президентининг 2023 йил 11 сентябрдаги ПФ-158-сонли Фармони билан тасдиқланган «Ўзбекистон — 2030» стратегиясида белгиланган устувор вазифалар ижросини таъминлашда ўз фаолият йўналишига алоқадор вазирлик ва идораларнинг масъулиятини янада ошириш чораларини кўриш, бу борада улар билан ҳамкорликни мустаҳкамлаш;

Қўмита фаолиятини оммавий ахборот воситаларида кенг ёритиш, шунингдек кўриб чиқилаётган қонун лойиҳаларининг ва ўтказилаётган назорат-таҳлил тадбирларининг мазмун-моҳиятини доимий равишда жамоатчиликка етказиш чораларини кўриш тавсия этилсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Қодиров зиммасига юклатилсин.

4. Ушбу Қарор қабул қилинган кундан эътиборан кучга киради.