«Парламент назорати тўғрисида»ги Ўзбекистон Республикаси Қонунининг 14-моддасига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. «Мамлакатимизда тиббий хизматлар кўрсатиш соҳасида интеграциялашган ахборот тизимлари ва давлат тиббий суғуртаси механизмларини жорий этиш ҳолати тўғрисида»ги Ўзбекистон Республикаси Олий Мажлиси Қонунчилик палатасининг парламент сўровига Ўзбекистон Республикаси соғлиқни сақлаш вазири А. Иноятов томонидан юборилган ёзма жавоб маълумот учун қабул қилинсин.

2. Ўзбекистон Республикаси Олий Мажлиси Қонунчилик палатаси Фуқароларнинг соғлиғини сақлаш масалалари қўмитаси ҳамда Инновацион ривожланиш, ахборот сиёсати ва ахборот технологиялари масалалари қўмитаси мамлакатимизда соғлиқни сақлаш тизимини рақамлаштириш ҳамда давлат тиббий суғуртаси механизмларининг жорий этилиши ҳолати устидан парламент назоратини амалга оширсин.

3. Ўзбекистон Республикаси Соғлиқни сақлаш вазирлиги соғлиқни сақлаш тизимини рақамлаштириш ҳамда давлат тиббий суғуртаси механизмларини жорий этиш борасида амалга оширилаётган ишлар юзасидан ҳар чоракда Ўзбекистон Республикаси Олий Мажлисининг Қонунчилик палатасига ахборот киритиб борсин.

4. Ушбу Қарор қабул қилинган кундан эътиборан кучга киради.