Ўзбекистон Республикаси Олий Мажлиси Қонунчилик палатасининг «Электрон парламент» тизими ҳамда Ўзбекистон Республикаси Олий Мажлиси Қонунчилик палатасининг мажлисларини аҳолига тўғридан-тўғри эфирга узатиш тизимини такомиллаштиришга доир ишларни ташкил этиш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Президентининг 2021 йил 28 декабрдаги ПҚ-67-сонли Қарори билан тасдиқланган Ўзбекистон Республикаси ва Корея Республикаси ўртасида устувор йўналишларда ўзаро манфаатли ҳамкорликни янада кенгайтиришга қаратилган Амалий ҳаракатлар режаси («Йўл ҳаритаси») 10-бандининг ижроси доирасида Ўзбекистон Республикаси Олий Мажлиси Қонунчилик палатаси ҳамда Корея Республикасининг Корея Халқаро ҳамкорлик агентлиги (KOICA) ўртасида муҳокамалар баённомаси имзоланганлиги маълумот учун қабул қилинсин.

2. «Ўзбекистон Республикаси Олий Мажлиси Қонунчилик палатасининг «Электрон парламент» тизимини ҳамда Ўзбекистон Республикаси Олий Мажлиси Қонунчилик палатаси мажлисларини аҳолига тўғридан-тўғри эфирга узатиш тизимини такомиллаштириш» лойиҳаси доирасида амалга оширилиши лозим бўлган чора-тадбирлар режаси иловага мувофиқ тасдиқлансин.

3. Ўзбекистон Республикаси Олий Мажлиси Қонунчилик палатаси фаолиятига «Электрон парламент» тизимини жорий этишга доир чора-тадбирларни амалга ошириш бўйича комиссия ҳамда Ўзбекистон Республикаси Олий Мажлиси Қонунчилик палатасининг Девони «Ўзбекистон Республикаси Олий Мажлиси Қонунчилик палатасининг «Электрон парламент» тизими ҳамда Ўзбекистон Республикаси Олий Мажлиси Қонунчилик палатаси мажлисларини аҳолига тўғридан-тўғри эфирга узатиш тизимини такомиллаштириш» лойиҳасини самарали ташкил этиш билан боғлиқ ишларни амалга оширсин.

4. Мазкур Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Қодиров зиммасига юклатилсин.

5. Ушбу Қарор қабул қилинган кундан эътиборан кучга киради.