2022 — 2026 йилларга мўлжалланган Янги Ўзбекистоннинг тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастурининг 2022 йилда бажарилиши юзасидан Ўзбекистон Республикаси Вазирлар Маҳкамасининг ҳисоботи тўғрисида

Давлат дастурининг барча йўналишлари ижросини таъминлашга қаратилган тегишли ишчи гуруҳлар тузилиб, назорат режаси асосида ҳар ойда танқидий муҳокама қилиб бориш тартиби жорий этилган.

Кўрилган чора-тадбирлар натижасида Давлат дастурининг ижроси доирасида жами 256 та норматив-ҳуқуқий ҳужжат, шу жумладан Ўзбекистон Республикасининг 9 та қонуни, Ўзбекистон Республикаси Президентининг 82 та фармони, қарори ва фармойиши, Олий Мажлис палаталарининг 5 та қарори, Вазирлар Маҳкамасининг 47 та қарори қабул қилинган.

Инсон қадрини юксалтириш ва эркин фуқаролик жамиятини янада ривожлантириш орқали халқпарвар давлат барпо этиш борасида сезиларли ишлар амалга оширилган.

Хусусан, ихчам ва профессионал давлат бошқаруви тизими жорий қилиниб, ижро этувчи ҳокимият органларининг сони 61 тадан 28 тага қисқартирилган. Вазирлик ва идораларнинг 21 тасида сифат менежменти тизимининг халқаро стандарти жорий этилди.

«Давлат фуқаролик хизмати тўғрисида»ги Ўзбекистон Республикаси Қонуни қабул қилиниши давлат фуқаролик хизмати тизимини замонавий стандартлар асосида ташкил этиш учун ҳуқуқий асос яратди.

«Электрон ҳукумат» тизимининг ривожлантирилиши ҳамда электрон давлат хизматлари кўрсатиш борасидаги бюрократик тўсиқлар қисқартирилиши натижасида мобиль-ID тизими жорий этилиб, 38 турдаги давлат хизматини Ягона интерактив давлат хизматлари порталида электрон рақамли имзо билан тасдиқлаш талаб этилмаслиги белгиланди.

Мамлакатимизда адолат ва қонун устуворлиги тамойилларини тараққиётнинг энг асосий ҳамда зарур шартига айлантириш борасида таъсирчан чоралар кўрилган.

Жумладан, «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги Ўзбекистон Республикаси Қонуни қабул қилинган. Ушбу Қонун соҳадаги низоли вазиятларнинг олдини олиш, мулкдорлар ҳуқуқларини ҳимоя қилишни кучайтириш учун асос бўлиб хизмат қилмоқда.

«Электрон суриштирув ва дастлабки тергов» ягона ахборот тизими жорий этилиши натижасида судга қадар иш юритиш, шу жумладан суриштирув ва дастлабки тергов органлари фаолияти рақамлаштирилиб, тезкор ахборот алмашиш тизими яратилган.

Миллий иқтисодиётни жадал ривожлантириш ва юқори ўсиш суръатларини таъминлаш доирасида амалга оширилган ишлар натижасида ялпи ички маҳсулот ҳажми 2021 йилга нисбатан 105,7 фоизни ташкил этган.

«Очиқ бюджет» ахборот портали орқали «Менинг йўлим» дастури ишга туширилиши натижасида туманларнинг (шаҳарларнинг) маҳаллий бюджет параметрлари доирасида 188,5 млрд. сўмлик 380 та лойиҳани амалга ошириш таъминланган.

Умумий қиймати 700 млн. доллардан ортиқ бўлган тўғридан-тўғри хорижий инвестицияларни жалб этиш ҳисобига Тошкент, Бухоро ва Хоразм вилоятларида қуввати 1 354 МВтга тенг 7 та электр станцияси ишга туширилган.

Инвестиция дастурлари доирасида 11,8млрд. долларлик хорижий инвестициялар ўзлаштирилган, шунингдек 15 млрд. долларлик товар ва хизматлар экспорти (махсус экспортсиз) амалга оширилган.

Адолатли ижтимоий сиёсат юритиш, инсон капиталини ривожлантириш борасида ҳам муайян ишлар бажарилган.

Жумладан, иш ўринлари яратиш, аҳоли даромадларини ошириш орқали камбағалликни қисқартириш мақсадида аҳолининг бандлигини таъминлаш дастурига асосан 251 минг нафар киши доимий, мавсумий ва вақтинчалик ишларга жалб этилиб, йиллик прогноз кўрсаткич 118,3 фоизга бажарилган.

Мактабгача таълимдаги қамров даражасини ошириш бўйича зарур чоралар кўрилган. Хусусан, 647,6 минг нафар 6 ёшли болалар мактабга тайёрлов тизими билан қамраб олиниб, қамров даражаси 67 фоиздан 90 фоизга етказилган.

Тиббий хизмат сифатини ошириш мақсадида 106 та оилавий шифокор пункти ва поликлиника, 1 000 та маҳалла тиббиёт пункти ташкил этилган, бу орқали 3,5 млн аҳолига бирламчи тиббий хизмат яқинлаштирилган.

«Тиббиёт бригадалари»га қўшимча равишда 3 600 та педиатрия ҳамшираси ва доя штати ажратилган.

Оилавий шифокорлар томонидан бепул тарқатиладиган дорилар 45 турдан 70 турга етказилган, ушбу йўналишга ажратилаётган маблағлар ҳажми эса 2021 йилга нисбатан 3 баравар оширилган.

Оилавий поликлиникаларда 19 мингдан зиёд кундузги шифо ўринлари ташкил этилган. Натижада 740 минг нафар кишига шифохонага бормасдан, уйда даволаниш имконияти яратилган. Юқори технологик операцияга муҳтож 16 минг нафар бемордан 3 200 нафари вилоят ва туманларда даволанган.

Миллий манфаатлардан келиб чиққан ҳолда умумбашарий муаммоларга ёндашиш борасида мамлакатимизда атроф-муҳитни муҳофаза қилиш, фуқароларнинг соғлиғига жиддий зиён етказадиган экологик муаммоларни бартараф этиш бўйича тизимли ишлар олиб борилган.

Жумладан, чиқиндилар билан ишлаш йўналишида 79 та туман ва шаҳар хусусий шерикларга бириктирилган, 115 та чиқинди полигони рекультивация қилинган, аҳолининг санитар тозалаш хизмати билан қамрови 95 фоизга, чиқиндиларни қайта ишлаш ҳажми 32,4 фоизга етказилган.

Ҳудудларда ўрмонлар майдонини кенгайтириш ва ўрмон фонди ерларидан самарали фойдаланиш чоралари кўрилган ҳамда 208 минг гектар майдонда саксовул ва бошқа чўл ўсимликларидан «яшил қопламалар» яратилган.

Маънавий тараққиётни таъминлаш ва соҳани янги босқичга олиб чиқиш, мамлакатимиз хавфсизлигини ва мудофаа салоҳиятини кучайтириш, очиқ, прагматик ва фаол ташқи сиёсат олиб бориш йўналишида ҳам қатор ишлар амалга оширилган.

Хусусан, «Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида»ги Ўзбекистон Республикаси Қонуни қабул қилиниб, фавқулодда вазиятларнинг олдини олиш ва бартараф этишнинг замон талабларига мос янгича тизими яратилган.

Мамлакатнинг халқаро муносабатлардаги тенг ҳуқуқли субъект сифатидаги ролини ошириш мақсадида 15-16 сентябрда Самарқанд шаҳрида Ўзбекистон раислигида Шанхай ҳамкорлик ташкилотининг навбатдаги саммити ўтказилган.

Давлат дастурида белгиланган мақсад ва вазифаларнинг ўз вақтида бажарилишини таъминлаш, бу борадаги норматив-ҳуқуқий ҳужжатлар лойиҳаларини ишлаб чиқиш бўйича Ўзбекистон Республикаси Қонунчилик палатаси ва ҳукумат ўртасида самарали ҳамкорлик йўлга қўйилган.

Давлат дастуридаги тадбирларнинг бажарилиш ҳолатини Ўзбекистон Республикаси Қонунчилик палатаси қўмиталари томонидан доимий равишда парламент назорати шакллари асосида ўрганиб бориш, шу жумладан тегишли вазирлик ва идоралар раҳбарларининг ахборотини қўмита мажлисларида эшитиш ҳамда уларнинг якунлари бўйича тайёрланган тегишли таклифлар ва тавсияларни ҳукуматга киритиб бориш амалиётининг жорий этилиши мазкур вазифаларнинг изчил бажарилишини таъминлашда муҳим омил бўлди.

Шу билан бирга, Давлат дастурида жами 398 та бандда назарда тутилган 658 та яхлит ва кичик банддаги вазифаларнинг 518 таси ижро этилган, 37 тасининг ижро муддати узайтирилган ва 103 тасининг ижросини таъминлашга доир ишлар давом эттирилмоқда.

Жумладан, туманлараро перинатал марказларни ташкил этиш ва зарур тиббий техника ҳамда буюмлар билан жиҳозлаш (232-233-бандлар), талабалар турар жойларини давлат-хусусий шериклик асосида барпо этишда лойиҳаларни молиялаштиришнинг мақбул усулларини йўлга қўйиш (216-банд) бўйича бошланган ишлар якунланмаган.

Давлат дастуридаги баъзи бандларнинг бажарилиш муддати узайтирилганига қарамай, уларда назарда тутилган вазифаларнинг ижроси охирига етказилмаган. Хусусан, «Жиззахда ишлаб чиқаринг» саноат дастурини амалга ошириш орқали инвестиция ва йирик хорижий компанияларни жалб этиш бўйича ҳукумат қарорини қабул қилиш муддати узайтирилганлигига қарамасдан қарор йил якунига қадар қабул қилинмаган (167-банд).

Давлат дастурида назарда тутилган айрим қонун лойиҳалари ҳанузгача парламент муҳокамасига киритилмаган. «Маданий фаолият ва маданият ташкилотлари тўғрисида»ги Ўзбекистон Республикаси Қонунига қўшимчалар киритиш ҳақида»ги (269-банд), «Ахборот кодексини тасдиқлаш тўғрисида»ги (324-банд), «Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига қўшимчалар киритиш ҳақидаги»ги (326-банд), «Сафарбарлик тайёргарлиги ва сафарбарлик тўғрисида»ги (329-банд) қонун лойиҳалари шулар жумласидандир.

Ўз навбатида ҳукумат томонидан аҳолини ўйлантириб келаётган қатор долзарб масалалар, хусусан, аҳолига энергия ресурсларини барқарор етказиб бериш, тежамкор технологияларни кенг жорий этиш, тиббий хизмат кўрсатиш сифати ва самарадорлигини ошириш, аҳоли бандлигини таъминлаш, шу жумладан муддатли ҳарбий хизматни ўтаб қайтган ёшларни, олий таълим муассасаларини тугатган талабаларни иш билан таъминлаш, таълим-тарбия тизимини янада яхшилаш, озиқ-овқат хавфсизлигини таъминлаш, дори воситалари ва тиббий буюмлар муомаласини тартибга солиш борасида зарур чора-тадбирлар кўрилишига алоҳида эътибор қаратилиши лозим.

Юқорида баён этилганлардан келиб чиқиб, «Парламент назорати тўғрисида»ги Ўзбекистон Республикаси Қонунининг 8¹-моддасига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. 2022 — 2026 йилларга мўлжалланган Янги Ўзбекистоннинг тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастурининг 2022 йилда бажарилиши юзасидан Ўзбекистон Республикаси Вазирлар Маҳкамасининг ҳисоботи маълумот учун қабул қилинсин.

2. Ўзбекистон Республикаси Вазирлар Маҳкамасига:

Давлат дастурининг ижро муддати узайтирилган ва бажарилиши тўлиқ якунланмаган бандларида белгиланган тадбирларни таҳлил қилиб, уларни келгусидаги давлат дастурларига киритиш чораларини кўриш;

Давлат дастурлари асосида қабул қилинган чора-тадбирлар дастурлари, «йўл хариталари» ҳамда бошқа ҳужжатларда белгиланган тадбирларнинг натижадорлигини таъминлашга вазирлик ва идоралар томонидан эътибор қаратиш;

Давлат дастурларида кўзда тутилган қонун лойиҳаларининг Ўзбекистон Республикаси Қонунчилик палатасига киритилишини таъминлаш чораларини кўриш;

туманлараро перинатал марказларни ташкил этиш ҳамда уларни зарур тиббий техника ва буюмлар билан жиҳозлаш юзасидан бошланган ишларни якунига етказиш устидан назоратни кучайтириш;

аҳоли бандлигини таъминлаш, шу жумладан муддатли ҳарбий хизматни ўтаб қайтган ёшларни, олий таълим муассасаларини тугатган талабаларни иш билан таъминлашга алоҳида эътибор қаратиш;

озиқ-овқат хавфсизлигини, шу жумладан, нархларнинг барқарорлигини таъминлашга доир ишларни янги босқичга олиб чиқиш;

энергетика соҳасида трансформация жараёнларини жадаллаштириш, шунингдек соҳага ижтимоий ҳимоя кафолатларини белгилаган ҳолда бозор механизмларини жорий этиш борасида бошланган ишларни жадаллаштириш;

дори воситалари ва тиббий буюмлар муомаласини тартибга солиш ҳамда аҳолига арзон ҳамда сифатли дори воситалари етказиб бериш тизимини такомиллаштириш устидан назоратни кучайтириш;

барча соҳа ва тармоқларга энергия жиҳатидан тежамкор технологияларни кенг жорий этиш, қайта тикланувчи энергия манбаларидан самарали фойдаланиш бўйича бошланган ишларни якунига етказиш;

Ўзбекистон Республикаси Қонунчилик палатасидаги сиёсий партиялар фракциялари томонидан кўтарилган масалаларни ҳал қилишга қаратилган чора-тадбирлар кўриш тавсия этилсин.

3. Ўзбекистон Республикаси Олий Мажлисининг Қонунчилик палатасидаги сиёсий партиялар фракцияларига:

Давлат дастури доирасида амалга оширилган ишларнинг моҳияти ва аҳамиятини кенг жамоатчиликка етказиб бориш;

давлат дастурларида белгиланган вазифаларнинг бажарилиши устидан ўз партиявий мақсад ва вазифаларидан келиб чиққан ҳолда таъсирчан парламент назоратини амалга ошириш тавсия этилсин.

4. Ўзбекистон Республикаси Олий Мажлиси Қонунчилик палатасининг қўмиталари давлат дастурларида белгиланган вазифаларнинг ижросини таъминлашда ўз фаолият йўналишларига алоқадор бўлган вазирлик ва идоралар билан ҳамкорликни мустаҳкамласин.

5. Ушбу Қарор Ўзбекистон Республикаси Вазирлар Маҳкамасига юборилсин.

6. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Хаитов зиммасига юклатилсин.

7. Ушбу Қарор қабул қилинган кундан эътиборан кучга киради.