Ўзбекистон Республикаси Олий Мажлиси Қонунчилик палатаси Меҳнат ва ижтимоий масалалар қўмитасининг (бундан буён матнда Қўмита деб юритилади) 2022 йил январь — ноябрь ойларидаги фаолияти тўғрисидаги ахборотини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Қўмита томонидан ижтимоий соҳадаги ислоҳотларнинг ҳуқуқий асосларини мустаҳкамлаш, аҳоли бандлигини таъминлаш, меҳнат муносабатларини тартибга солишга доир қонун ҳужжатлари ижросини доимий назорат қилиш, сайловчилар билан доимий мулоқот ўрнатиш борасида муайян ишлар амалга оширилган.

Хусусан, ҳисобот даврида аҳолини ижтимоий муҳофаза қилиш жараёнларини такомиллаштириш каби муҳим йўналишларнинг ҳуқуқий асосларини яратишга қаратилган 9 та қонун лойиҳаси кўриб чиқилиб, Ўзбекистон Республикаси Олий Мажлисининг Қонунчилик палатаси (бундан буён матнда Қонунчилик палатаси деб юритилади) томонидан қабул қилинган.

Қонун лойиҳаларини маромига етказиш, уларда тўғридан-тўғри амал қилувчи механизмларни акс эттириш ҳамда уларни кенг жамоатчилик ва соҳа мутахассислари иштирокида муҳокама қилиш мақсадида ишчи гуруҳнинг 89 та йиғилиши ҳамда экспертлар гуруҳининг 18 та йиғилиши ташкил этилган.

Ҳисобот даврида Қўмита томонидан жами 23 та назорат-таҳлил тадбири ўтказилган. Улардан 11 таси давлат ва хўжалик бошқаруви органлари раҳбарларининг ахборотини эшитишга, 12 таси қонун ҳужжатларининг ижро этилиш ҳолатини ўрганишга ҳамда Қонунчилик палатаси ва Қўмита қарорларининг ижросини мониторинг қилишга оид тадбирлардир.

Бундан ташқари Қўмита ташаббуси билан 16 август куни Ўзбекистон Республикаси Тиббий-ижтимоий хизматларни ривожлантириш агентлиги директори А. Инаковга «Кексалар, ногиронлиги бўлган шахслар ва аҳолининг ижтимоий ҳимояга муҳтож бошқа тоифаларига тиббий-ижтимоий хизматлар кўрсатиш борасида олиб борилаётган ишлар тўғрисида» парламент сўрови юборилган.

Шунингдек Қўмита томонидан 20 июль куни Қонунчилик палатаси мажлисида Ўзбекистон Республикаси бандлик ва меҳнат муносабатлари вазири Н. Хусановнинг «2022 йилда янги иш ўринларини ташкил этиш ва аҳоли бандлигига кўмаклашиш бўйича дастурларнинг ижроси юзасидан амалга оширилаётган ишлар тўғрисида»ги ахбороти эшитилиши ташкил этилган.

Ҳисобот даврида Қўмита томонидан қонун лойиҳалари муҳокамасига, ислоҳотларнинг аҳамиятини сайловчиларга етказиш, муҳим тармоқ ва соҳалардаги мавжуд муаммоларни таҳлил қилиш ҳамда уларни бартараф этиш юзасидан тегишли таклифлар ишлаб чиқишга бағишланган 42 та давра суҳбати, 31 та семинар ва 9 та конференция ўтказилган.

Жорий йилнинг дастлабки ўн бир ойида жисмоний ва юридик шахслардан Қўмита аъзолари номига келган жами 592 та мурожаат «Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунига мувофиқ белгиланган тартибда кўриб чиқилган.

Қўмита фаолияти ҳақида кенг жамоатчиликни хабардор қилиш, назорат-таҳлил тадбирлари якунлари ва Қўмита масъуллигида кўриб чиқилаётган қонун лойиҳаларининг мазмун-моҳиятини аҳолига мунтазам равишда етказиш мақсадида оммавий ахборот воситаларида ва ижтимоий тармоқларда 4 198 марта чиқиш қилинган.

Шу билан бирга Қўмита томонидан ўтган даврда амалга оширилган ишлар таҳлили Қўмита фаолиятини самарали ташкил этишда эътибор қаратиши лозим бўлган айрим масалалар мавжудлигини кўрсатмоқда.

Жумладан, ҳудудларда янги иш ўринларини яратиш, аҳоли бандлигини таъминлаш борасидаги вазифаларнинг бажарилиш ҳолати юзасидан мутасаддиларнинг ахборотини эшитиш борасидаги ишларни янада кучайтириш лозим.

Шунингдек Ўзбекистон Республикаси Президенти фармон ва қарорларининг, давлат дастурлари ҳамда Қонунчилик палатаси қарорларидаги Қўмита фаолиятига тааллуқли бўлган бандларнинг ижро этилиши устидан таъсирчан парламент назоратини амалга оширишга алоҳида эътибор қаратиш мақсадга мувофиқ.

Қўмитанинг жисмоний ва юридик шахсларнинг мурожаатлари билан ишлаш соҳасидаги ишларини, шунингдек кўриб чиқилаётган қонун лойиҳалари ва ўтказилаётган назорат-таҳлил тадбирларининг мазмун-моҳиятини доимий равишда жамоатчиликка етказиш борасидаги фаолиятини тизимли ташкил этиш бўйича тегишли чора-тадбирлар кўриш муҳим аҳамият касб этади.

Юқорида баён этилганлардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Меҳнат ва ижтимоий масалалар қўмитасининг 2022 йил январь — ноябрь ойларидаги фаолияти тўғрисидаги ахбороти маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Меҳнат ва ижтимоий масалалар қўмитасига:

республика ҳудудларида янги иш ўринларини яратиш, аҳоли бандлигини таъминлаш борасидаги вазифалар ижроси юзасидан назорат-таҳлил тадбирларини кучайтириш;

қонун лойиҳаларини ишлаб чиқиш ва Қўмита масъуллигида бўлган қонун лойиҳаларини маромига етказишда, назорат-таҳлил тадбирларини ўтказишда доимий равишда кенг жамоатчиликни, соҳа мутахассисларини ва экспертларни жалб этиш;

жисмоний ва юридик шахслардан Қўмитага келган мурожаатларда кўтарилаётган долзарб муаммоларни ҳар томонлама таҳлил қилиш, уларнинг юзага келиш сабабларини ўрганиш, кўтарилган масалаларга ечим топиш борасида тегишли давлат органлари томонидан кўрилаётган чоралар устидан таъсирчан парламент назоратини амалга ошириш;

қабул қилинган қонун ҳужжатларининг, жумладан янги таҳрирдаги Ўзбекистон Республикаси Меҳнат кодексининг мазмун-моҳияти ва аҳамиятини аҳоли ва иш берувчилар ўртасида кенг тарғиб қилишга қаратилган тадбирларни ўтказиш;

Қўмита фаолиятини оммавий ахборот воситаларида кенг ёритиш, шунингдек кўриб чиқилаётган қонун лойиҳаларининг ва ўтказилаётган назорат-таҳлил тадбирларининг мазмун-моҳиятини доимий равишда жамоатчиликка етказиш чораларини кўриш тавсия этилсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари У. Иноятов зиммасига юклатилсин.

4. Ушбу Қарор қабул қилинган кундан эътиборан кучга киради.