Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия (бундан буён матнда Конституциявий комиссия деб юритилади) раиси А. Саидовнинг Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия фаолияти тўғрисидаги ахборотини эшитиб, ўтган қисқа даврда мамлакатимизда конституциявий ислоҳотларни амалга ошириш борасида барча ташкилий-ҳуқуқий чоралар кўрилганлигини қайд этади.

Хусусан, Ўзбекистон Республикаси Олий Мажлиси палаталари Кенгашларининг Қўшма қарори билан Конституциявий комиссия тўғрисидаги Низом тасдиқланган, Конституциявий комиссиянинг Йиғма ахборот-таҳлил гуруҳи ва Матбуот хизмати фаолияти йўлга қўйилган.

Конституциявий комиссия низом асосида фаолиятини олиб бориб, ташкилий ишларнинг ва белгилаб олинган тадбирларнинг ўз вақтида ва сифатли амалга оширилишини таъминлаш мақсадида ўзининг иш режасини ишлаб чиқиб, аъзолар ўртасида вазифалар тақсимлаб олинган.

Келиб тушган таклифларни кўриб чиқиш, саралаш, таснифлаш ва умумлаштириш, таклифларнинг ягона базасини шакллантириш мақсадида Таклифлар билан ишлаш гуруҳи тузилган.

Шунингдек Конституциявий комиссия томонидан «Ўзбекистон Республикаси Конституциясига ўзгартиш ва қўшимчалар киритишга қаратилган таклифларни олиш, умумлаштириш ва уларга жавоб қайтариш тартиби тўғрисида»ги Низом ишлаб чиқилиб, у Ўзбекистон Республикаси Олий Мажлиси палаталари Кенгашларининг Қўшма қарори билан тасдиқланган.

Конституциявий комиссия иши самарадорлигини таъминлаш мақсадида унинг фаолиятига илмий-тадқиқот муассасалари, тегишли вазирлик ва идоралар мутахассислари, шунингдек соҳа экспертлари жалб этилиб, илғор хорижий давлатларнинг конституциявий тажрибаси чуқур ва ҳар томонлама ўрганилган.

Аҳоли фикрлари ва таклифларини узвий ва ўз вақтида қабул қилишнинг, умумлаштиришнинг, уларга жавоб қайтаришнинг аниқ механизмлари жорий қилиниб, «Meningkonstitutsiyam.uz» электрон платформаси, 1341 қисқа рақамли колл-маркази, почта алоқаси, маҳаллалар, халқ депутатлари маҳаллий Кенгашлари, «Telegram» мессенжеридаги махсус бот орқали таклифларни қабул қилиш тизими йўлга қўйилган.

Ўзбекистон Республикаси Олий Мажлиси Қонунчилик палатасининг Фуқаролар қабулхонаси биносида махсус хона ажратилиб, фуқаролар ўз таклифларини Конституциявий комиссияга бевосита тақдим этишлари учун зарур шароитлар яратилган.

Ўтган даврда Ўзбекистон Республикаси Конституциясига ўзгартиш ва қўшимчалар киритиш бўйича аҳоли, фуқаролик жамияти институтлари, илмий-тадқиқот муассасалари томонидан жами 40 139 та таклиф билдирилган.

Уларда «инсон — жамият — давлат» тамойили асосида инсон ҳуқуқлари, эркинликлари ва қадр-қимматини юксалтириш, ижтимоий ҳимояни кучайтириш, муносиб меҳнат шароитларини яратиш, ёшларни ҳар томонлама қўллаб-қувватлаш, таълим, илм-фан соҳаларини тараққий эттириш, хусусий мулк дахлсизлигини янада мустаҳкамлаш, фуқаролик жамияти институтларининг ролини ошириш, оила институтини ривожлантириш, бой тарихий ва маданий меросимизни сақлаш, экологик ҳуқуқлар ва атроф-муҳитни муҳофаза қилиш каби масалаларга алоҳида эътибор қаратилган.

Аҳолининг барча қатламларидан келиб тушган фикр-мулоҳаза ва таклифларни ўз вақтида кўриб чиқиш ҳамда таҳлил қилиш мақсадида Конституциявий комиссиянинг 4 та йиғилиши ўтказилган. Уларда Ўзбекистон Республикаси Конституциясига ўзгартиш ва қўшимчалар киритиш бўйича тақдим этилган таклифлар моддама-модда муҳокама қилиниб, маъқулланган.

Кенг жамоатчиликдан келиб тушган таклифлар мутахассислар ва экспертларни жалб қилган ҳолда, ҳар томонлама кўриб чиқилиб, якуний таклифлар шакллантирилган.

Билдирилган фикр-мулоҳаза ва таклифлар таҳлили халқимизнинг мамлакатда бўлаётган кенг кўламли ўзгаришларга бефарқ эмаслигини, фуқаролар ислоҳотларнинг фаол иштирокчиси бўлишга интилаётганлигини ва конституциявий ислоҳотларни ҳар томонлама, якдиллик билан қўллаб-қувватлаётганини кўрсатмоқда.

Ўтган даврда Конституциявий комиссия фаолиятида очиқлик ва ошкораликни таъминлашга устувор аҳамият қаратилган.

Шу мақсадда ишлаб чиқилган Медиа-режа асосида оммавий ахборот воситалари вакиллари учун 2 та брифинг ва 1 та матбуот анжумани ўтказилган.

Конституциявий комиссиянинг ўтган даврдаги фаолияти оммавий ахборот воситалари ҳамда Интернет жаҳон ахборот тармоғида жами 9 576 марта ёритилган.

Бундан ташқари, Конституциявий комиссия аъзолари, депутатлар ва сенаторлар томонидан ҳудудларда қатор учрашувлар ташкил этилиб, аҳоли билан тўғридан-тўғри мулоқотлар олиб борилган.

Бундай учрашувлар давомида конституциявий ислоҳотларнинг мазмун-моҳияти ва аҳамияти фуқароларга етказилиб, Конституциявий комиссияга таклифларни юбориш механизмлари тушунтирилган.

Аҳоли ва фуқаролик жамияти институтларидан таклифлар келаётганлигини инобатга олиб, Конституциявий комиссия ўз фаолиятини давом эттириши, тайёрланган якуний таклифлар асосида Конституциявий комиссия аъзолари бўлган бир гуруҳ депутатлар томонидан Ўзбекистон Республикаси Конституцияга ўзгартиш ва қўшимчалар киритиш бўйича қонун лойиҳасини ишлаб чиқиб, қонунчилик ташаббуси ҳуқуқи асосида Ўзбекистон Республикаси Олий Мажлиси Қонунчилик палатасига киритиши мақсадга мувофиқдир.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Конституциявий комиссия раиси А. Саидовнинг Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия фаолияти тўғрисидаги ахбороти маълумот учун қабул қилинсин.

2. Кенг жамоатчиликнинг фикр-мулоҳазалари ва таклифлари асосида Ўзбекистон Республикаси Конституциясига ўзгартиш ва қўшимчалар киритиш бўйича ишлаб чиқилиб, Конституциявий комиссия томонидан қўллаб-қувватланган таклифлар маъқуллансин.

3. Ўзбекистон Республикаси Олий Мажлиси Қонунчилик палатасининг бир гуруҳ депутатлари томонидан Ўзбекистон Республикаси Конституциясига ўзгартиш ва қўшимчалар киритиш бўйича қонун лойиҳасини тайёрлаш ва уни қонунчилик ташаббуси ҳуқуқи асосида Ўзбекистон Республикаси Олий Мажлиси Қонунчилик палатасига киритиш борасида ишлар олиб борилаётганлиги қайд этиб ўтилсин.

4. Конституциявий комиссия ва унинг ҳузуридаги Йиғма ахборот-таҳлил гуруҳи, Таклифлар билан ишлаш гуруҳи, Матбуот хизмати ўз фаолиятларини давом эттириб, фуқаролардан келаётган таклифларни умумлаштириб борсин ва уларни Ўзбекистон Республикаси Олий Мажлиси Қонунчилик палатасига киритсин.

5. Ушбу Қўшма қарор қабул қилинган кундан эътиборан кучга киради.