Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия (бундан буён матнда Конституциявий комиссия деб юритилади) раиси А. Саидовнинг Конституциявий комиссия томонидан ўтган даврда олиб борилган ишлар тўғрисидаги ахборотини эшитиб, Ўзбекистон Республикаси Олий Мажлисининг Қонунчилик палатаси таъкидлайдики, ўтган даврда мамлакатимизда конституциявий ислоҳотларни самарали амалга ошириш борасида барча зарур чора-тадбирлар кўрилган.

Хусусан, Конституциявий комиссия ўз ишини очиқ ва ошкоралик тамойиллари асосида олиб борган.

Аҳолининг фикрлари ва таклифларини «Meningkonstitutsiyam.uz» электрон платформаси, 1341 қисқа рақамли колл-маркази, почта алоқаси, маҳаллалар, халқ депутатлари маҳаллий Кенгашлари, «Telegram» мессенжеридаги махсус бот орқали ҳамда бевосита қабул қилиш, кўриб чиқиш, саралаш, таснифлаш, умумлаштириш, уларнинг ягона базасини шакллантириш ишлари изчил давом эттирилган.

Ўтган даврда Ўзбекистон Республикасининг Конституциясига ўзгартиш ва қўшимчалар киритиш бўйича аҳоли, фуқаролик жамияти институтлари, илмий-тадқиқот муассасалари томонидан тақдим этилган таклифлар сони 60 мингдан ортган.

Билдирилган фикр-мулоҳазаларнинг ва таклифларнинг таҳлили халқимизнинг янги даврдаги ўзгаришларга бефарқ бўлмасдан, ўзи ташаббус кўрсатиб, мамлакатда кечаётган кенг кўламли ислоҳотларнинг фаол иштирокчиси бўлишга интилаётганлигини ҳамда конституциявий ислоҳотларни хайрихоҳлик ва якдиллик билан қўллаб-қувватлаётганлигини кўрсатмоқда.

Кенг жамоатчиликнинг таклифлари, фикр-мулоҳазалари асосида шакллантирилган якуний таклифлардан келиб чиқиб, «Ўзбекистон Республикасининг Конституциясига ўзгартиш ва қўшимчалар киритиш тўғрисида»ги Ўзбекистон Республикаси Конституциявий қонуни лойиҳаси ишлаб чиқилган.

Жорий йил 20 июнь куни Ўзбекистон Республикаси Президенти Ш.М. Мирзиёевнинг Конституциявий комиссия аъзолари билан учрашуви давомида халқимиз сиёсий-ҳуқуқий тафаккурининг ёрқин ифодаси бўладиган янгиланаётган Конституция ҳақида билдирган фикр-мулоҳазалари, белгилаб берган 4 та устувор йўналиш ҳамда уларнинг ҳар бири бўйича илгари сурилган таклиф ва ташаббуслари асосида Конституциявий қонун лойиҳаси янада такомиллаштирилган.

Жамият эҳтиёжларидан келиб чиқиб илгари сурилган ушбу таклиф ва ташаббусларнинг Конституциявий қонун лойиҳасига чуқур сингдирилиши «инсон – жамият – давлат» тамойили асосида амалга оширилаётган ислоҳотларни изчил давом эттиришга ҳамда «Инсон қадри учун» деган эзгу ғояни тўла рўёбга чиқаришга хизмат қилиши билан муҳим аҳамиятга эгадир.

Конституциявий қонун лойиҳасини такомиллаштиришда инсон ҳуқуқлари, эркинликлари ва қадр-қимматини янада юксалтириш, ижтимоий ҳимоя тизимини кучайтириш, меҳнат муносабатларини яхшилаш, ёшларнинг ҳуқуқларини ва манфаатларини муҳофаза қилиш, таълимни, илм-фанни ривожлантириш, хусусий мулкнинг дахлсизлигини таъминлаш, фуқаролик жамияти институтларини тараққий эттириш, оила институтини мустаҳкамлаш, экология ва атроф-муҳитни асраш каби муҳим масалаларга ҳам алоҳида эътибор қаратилган.

Юқоридагилардан келиб чиқиб, Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, Конституциявий комиссия раиси А. Саидовнинг Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия томонидан ўтган даврда олиб борилган ишлар тўғрисидаги ахбороти маълумот учун қабул қилинсин.

2. Конституциявий комиссия ўз фаолиятини давом эттириб, фуқаролардан келиб тушаётган таклифларни умумлаштирган ҳолда, уларни Ўзбекистон Республикаси Олий Мажлисининг Қонунчилик палатасига киритиб бориши қайд этиб ўтилсин.

3. Ушбу Қарор қабул қилинган кундан эътиборан кучга киради.