Ўзбекистон Республикаси Олий Мажлиси Қонунчилик палатаси Спикери ўринбосари О. Тожиевнинг «Ўзбекистон Республикаси Олий Мажлиси Қонунчилик палатаси ва унинг органлари фаолияти оммавий ахборот воситаларида ёритилишини ташкил этиш борасидаги ишларнинг ҳолати тўғрисида»ги ахборотини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Қонунчилик палатаси фаолиятининг очиқлиги ва ошкоралигини таъминлаш ҳамда уни оммавий ахборот воситаларида кенг ёритиш борасида бир қатор ишлар амалга оширилган.

Ўтган даврда депутатлар корпусининг қонун ижодкорлиги, назорат-таҳлил фаолияти ҳақида жамоатчиликка ишончли ва тезкор ахборот етказишга устувор вазифа сифатида қаралган.

Ўзбекистон Республикаси Олий Мажлисининг Қонунчилик палатаси (бундан буён матнда Қонунчилик палатаси деб юритилади) ва унинг органлари фаолиятини оммавий ахборот воситаларида, шу жумладан Интернет жаҳон ахборот тармоқларида кенг ёритиб бориш, долзарб масалалар юзасидан депутатларнинг тезкор ва холис муносабатларини ташкил этиш ҳамда қонун лойиҳаларининг мазмун-моҳиятини халқчил услубда етказишга алоҳида эътибор берилган.

Ҳисобот даврида Қонунчилик палатасининг 22 та мажлиси, шу жумладан 3 та «ҳукумат соати» оммавий ахборот воситаларида кенг ва батафсил ёритилган, 17 та матбуот анжумани, 14 та брифинг ўтказилган.

Қонунчилик палатаси Девонининг Парламент ахборот маркази (бундан буён матнда Марказ деб юритилади) томонидан Қонунчилик палатаси ва депутатлар фаолияти ҳақида оммавий ахборот воситаларида, шу жумладан давлат ва нодавлат телеканалларда 4 374 марта, радиоканалларда 5 197 марта кўрсатув, эшиттириш, интервью, ахборот лавҳалари ва репортажлар тайёрланиб, эфирга узатилиши ташкил қилинган. Қонунчилик палатасининг расмий веб-сайтида 908 та, бошқа Интернет жаҳон ахборот тармоғи сайтларида 2 218 та, босма матбуот нашрларида эса 1 175 та мақола ва ахборот эълон қилинган.

Қонунчилик палатаси фаолияти тўғрисида тайёрланган 1 966 та медиа маҳсулот, шу жумладан 120 та видеоролик, 83 та интервью «Telegram», «Facebook», «Instagram», «YouTube» каби ижтимоий тармоқлардаги палатанинг расмий саҳифаларига жойлаштирилган.

Бундан ташқари ўтган даврда Марказ томонидан замонавий медиа лойиҳалар, хусусан, «Aksent reportaj» лойиҳасининг 49 та, «Backstage» лойиҳасининг 4 та, «Aksent dayjest» лойиҳасининг 47 та, «Депутат муносабати» лойиҳасининг 23 та, «Mоtiv» лойиҳасининг 11 та, «Markaziy Osiyo Markazida» лойиҳасининг 6 та, «Aksent Live» лойиҳасининг 8 та сони тайёрланиб эълон қилинган.

Шу билан бирга ўтган даврда Қонунчилик палатаси фаолиятининг оммавий ахборот воситаларида, шу жумладан Интернет жаҳон ахборот тармоқларида кенг ёритиб борилишини ҳамда долзарб масалалар юзасидан депутатларнинг чиқишларини ташкил этиш борасидаги ишлар таҳлили ҳали бу борада эътибор қаратилиши лозим бўлган муайян масалалар мавжудлигини кўрсатмоқда.

Хусусан, жамоатчиликнинг парламент фаолиятига доир янгиликлардан кенг фойдаланишини таъминлаш мақсадида янгидан-янги медиа лойиҳаларни тақдим қилиб бориш муҳим аҳамият касб этмоқда.

Шунингдек бугунги кунда Қонунчилик палатаси депутатларининг оммавий ахборот воситалари ва ижтимоий тармоқлардаги чиқишларини ташкил этишга қаратилган услубий тавсияларни ишлаб чиқиш зарурати юзага келмоқда.

Қонунчилик палатасида амалга оширилган ишлар юзасидан қўмиталар, сиёсий партиялар фракциялари билан ҳамкорликда ҳар чорак якуни бўйича матбуот анжуманлари ва брифинглар ташкил этиш ҳамда ушбу тадбирларда журналистларнинг иштирокини таъминлаш мақсадга мувофиқдир.

Юқорида баён этилганлардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Спикери ўринбосари О. Тожиевнинг «Ўзбекистон Республикаси Олий Мажлиси Қонунчилик палатаси ва унинг органлари фаолияти оммавий ахборот воситаларида ёритилишини ташкил этиш борасидаги ишларнинг ҳолати тўғрисида»ги ахбороти маълумот учун қабул қилинсин.

2. Марказ:

Қонунчилик палатасининг очиқлиги ва шаффофлигини таъминлаш, депутатлар корпуси фаолияти тўғрисида жамоатчиликка ўз вақтида, тезкор ва холис ахборот етказиш борасидаги ишларни янада кучайтириш;

жамоатчиликнинг Қонунчилик палатаси фаолиятига доир янгиликлардан кенг фойдаланишини таъминлашга қаратилган янги медиа лойиҳаларни тақдим этиш;

Қонунчилик палатаси депутатларининг оммавий ахборот воситалари ва ижтимоий тармоқлардаги чиқишларини ташкил этиш юзасидан услубий тавсиялар лойиҳасини ишлаб чиқиш;

Қонунчилик палатасининг қўмиталари, сиёсий партиялар фракциялари билан ҳамкорликда уларнинг фаолияти юзасидан матбуот анжуманлари ва брифинглар ташкил этиб бориш ҳамда ушбу тадбирларда журналистларнинг иштирокини таъминлаш;

депутатларнинг ижтимоий тармоқларда кенг муҳокамага сабаб бўладиган масалалар юзасидан тезкор ва холис муносабат билдиришида уларга яқиндан кўмаклашиш чораларини кўрсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари О. Тожиевнинг зиммасига юклатилсин.

4. Ушбу Қарор қабул қилинган кундан эътиборан кучга киради.