Ўзбекистон Республикаси Олий Мажлиси Қонунчилик палатаси Спикери ўринбосари Х. Гаппоровнинг «Ўзбекистон Республикаси Олий Мажлиси Қонунчилик палатасида 2022 йилнинг I чорагида жисмоний ва юридик шахсларнинг мурожаатлари билан ишлаш ҳолати тўғрисида»ги ахборотини эшитиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, Ўзбекистон Республикаси Олий Мажлиси Қонунчилик палатаси (бундан буён матнда Қонунчилик палатаси деб юритилади) томонидан мурожаатлар билан ишлаш самарадорлигини ошириш, депутатларнинг аҳоли билан тўғридан-тўғри мулоқот қилиш борасидаги фаолияти натижадорлигини таъминлаш борасида тизимли ишлар амалга оширилган.

Ўтган даврда халқ билан очиқ ва самарали мулоқот олиб бориш, жойларда аҳолини қийнаётган муаммоларни ўрганиш ва ҳал қилиш, фуқаролар томонидан кўтарилаётган масалаларни ижро ҳокимияти органлари олдига қўйиш депутатлар корпуси фаолиятининг бош мезонига айланди.

Ҳисобот даврида Қонунчилик палатасига жисмоний ва юридик шахслардан 3 000 га яқин мурожаат келиб тушди. Уларнинг 600 дан зиёди депутатларнинг сайловчилар билан тўғридан-тўғри мулоқоти жараёнида қабул қилинган.

Шу билан бирга, Қонунчилик палатасининг фуқаролар қабулхонасида 1 200 нафарга яқин жисмоний шахслар ва юридик шахсларнинг вакиллари қабули ташкил этилиб, улардан 700 га яқин мурожаат қабул қилинди, 500 нафардан зиёд мурожаатчига ҳуқуқий тушунтиришлар берилди.

Мурожаатларда кўтарилган масалаларнинг соҳалар кесимидаги таҳлили шуни кўрсатмоқдаки, жорий йилнинг ўтган даврида давлат ҳокимияти органлари фаолиятига оид 1 128 та, қонунчилик, суд-ҳуқуқ соҳасига оид 867 та, ижтимоий соҳага оид 551 та, молия-кредит масалалари бўйича 137 та ва бошқа соҳаларга оид 254 та мурожаатни ташкил этади.

Бугунги кунда келиб тушган шикоятлар ва аризалар орасида қонун ҳужжатларини такомиллаштиришга қаратилган асослантирилган таклифлар ҳам сезиларли равишда кўпайиб бормоқда. Хусусан, ўтган давр мобайнида мурожаатчилардан қонун ҳужжатлари нормаларини такомиллаштиришга доир 150 дан ортиқ таклиф келиб тушган. Мазкур таклифлар масъул қўмиталар томонидан бирма-бир кўриб чиқилиб, уларнинг айримлари қонун ижодкорлиги жараёнида инобатга олинган.

Депутатлар томонидан давлат ва хўжалик бошқаруви органларига юборилган мурожаатларнинг кўриб чиқилиши юзасидан тизимли мониторинг амалга оширилиб, таъсирчан парламент назорати ўрнатилди. Хусусан, қўмиталар мажлисларида мурожаатларда кўтарилган масалалар қай даражада ҳал этилаётганлиги бўйича 4 маротаба давлат органлари раҳбарларининг ахбороти эшитилди.

Шунингдек мурожаатларда кўтарилаётган тизимли муаммолар ва камчиликларни ҳал этиш юзасидан тегишли мансабдор шахслар номига жами 86 та депутат сўрови юборилди.

Қонунчилик палатаси депутатларининг халқ депутатлари маҳаллий Кенгашлар депутатлари билан жисмоний ва юридик шахсларнинг мурожаатларини кўриб чиқиш ҳамда уларда кўтарилган тизимли муаммоларни ҳал этиш борасидаги ҳамкорлиги ҳам самарали ташкил этилди.

Юқоридагилардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Қонунчилик палатаси Спикери ўринбосари Х. Гаппоровнинг «Ўзбекистон Республикаси Олий Мажлиси Қонунчилик палатасида 2022 йилнинг I чорагида жисмоний ва юридик шахсларнинг мурожаатлари билан ишлаш ҳолати тўғрисида»ги ахбороти маълумот учун қабул қилинсин.

2. Қонунчилик палатасидаги сиёсий партиялар фракцияларига:

ҳудудларда депутатларнинг сайёр қабулларини ташкил этиш;

сайлов округларида депутатлар ёрдамчиларининг жисмоний ва юридик шахслар мурожаатларини қабул қилиш, уларнинг таҳлилини юритиш ҳамда депутатлар томонидан мурожаатларнинг кўриб чиқилишига кўмаклашиш борасидаги фаолиятини янада кучайтириш тавсия этилсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари Х. Гаппоров зиммасига юклатилсин.

4. Ушбу Қарор қабул қилинган кундан эътиборан кучга киради.