Ўзбекистон Республикаси қишлоқ хўжалиги вазири Ж. Ходжаевнинг «Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегияси бажарилиши бўйича амалга оширилаётган ишлар тўғрисида»ги ахборотини эшитиб, Ўзбекистон Республикаси Олий Мажлиси Қонунчилик палатаси таъкидлайдики, кейинги йилларда мамлакатимизда ер муносабатларини тартибга солишга, қишлоқ хўжалигини модернизациялашга, озиқ-овқат хавфсизлигини таъминлашга, ушбу соҳага бозор муносабатларини жорий этишга қаратилган кенг кўламли ислоҳотлар амалга оширилмоқда.

Ўтган даврда Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясида (бундан буён матнда Стратегия деб юритилади) белгиланган вазифаларнинг ижросини таъминлаш доирасида Ўзбекистон Республикаси Президентнинг 5 та Фармони ва 8 та қарори, Ўзбекистон Республикаси Вазирлар Маҳкамасининг 11 та қарори қабул қилинди, қатор чора-тадбирлар дастурлари ишлаб чиқилиб тасдиқланган.

Кўрилган чора-тадбирлар, озиқ-овқат хавфсизлигини таъминлаш бўйича амалга оширилган тизимли ишлар натижасида 2021 йилда мамлакатимиз «Глобал озиқ-овқат хавфсизлиги» индексида 113 та мамлакат орасида 78-ўринни эгаллаб (2020 йилда 83-ўринда эди), 5 поғонага юқорилаган.

Қулай агробизнес муҳитини ва қўшилган қиймат занжирини яратиш мақсадида шу йилнинг ўтган даврида 25 та пахта-тўқимачилик, 80 та ғаллачилик, 13 та шоличилик ва 1 та дориворлар етиштириш кластери фаолияти йўлга қўйилган.

Мева-сабзавотларни қайта ишлаш соҳасини янада ривожлантириш, тадбиркорларга қўшимча имкониятлар яратиш учун шу йилнинг ўзида қуввати 88 минг тонна бўлган 8 та замонавий агрологистика маркази ва 51,5 минг тонна қувватга эга 56 та совутгичли омборхона қуриб, ишга туширилган.

Қишлоқ хўжалиги соҳасида инвестициявий жозибадорликни ошириш ва хорижий инвестицияларни кенг жалб қилишга алоҳида эътибор қаратилиб, жорий йилнинг ўтган даврида халқаро молия институтлари иштирокидаги 7 та лойиҳа доирасида 154 млн. долларлик маблағлар ўзлаштирилган. Мазкур маблағлар ҳисобидан 367 та лойиҳа молиялаштирилди ва 7 173 та янги иш ўринлари яратилган.

Ўтган даврда депутатлар ҳам соҳа ривожини таъминлаш, ер майдонларидан мақсадли ва самарали фойдаланилиши, мазкур муносабатларни тартибга солувчи қонун ҳужжатларининг яратилиши масалаларига алоҳида эътибор қаратдилар, жойларга чиққан ҳолда мавжуд ҳолат ва муаммоларни ўргандилар. Ўрганишлар якунларидан келиб чиқиб, кенг жамоатчилик вакилларининг таклифлари асосида депутатлар ташаббуси билан «Деҳқон хўжалиги тўғрисида»ги ва «Томорқа хўжалиги тўғрисида»ги мутлақо янги қонун лойиҳалари ишлаб чиқилиб, қабул қилинди.

Ер участкалари ажратишнинг шаффоф ва бозор тамойилларига асосланган тартибини жорий этишга, қишлоқ хўжалигига мўлжалланмаган ер участкаларидан самарали фойдаланишга қаратилган «Ер участкаларини ажратиш ва улардан фойдаланиш, шунингдек ерларни ҳисобга олиш ва давлат ер кадастрини юритиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси Қонуни қабул қилинди.

Шунингдек Қонунчилик палатасининг тегишли қўмитаси, мутасадди вазирликлар, идоралар ва фуқароларнинг ер тўғрисидаги қонунчиликни такомиллаштиришга оид таклифлари асосида амалдаги Ер кодексининг янги таҳрири ишлаб чиқилиб, айни пайтда кодекс лойиҳасини белгиланган тартибда Қонунчилик палатасига киритиш чоралари кўрилмоқда.

Шу билан бирга, Стратегия доирасида ердан фойдаланувчилар реестри бўйича 3 млн гектардан ортиқ суғориладиган ерларнинг мониторингини йўлга қўйиш, беш турдаги асосий қишлоқ хўжалиги экинларининг (пахта, ғалла, шоли, картошка, мойли экин) экилишини космик суръатлар ёрдамида таҳлил қилишга доир вазифалар ижроси тўлиқ якунланмаган.

Муҳокамалар давомида депутатлар қишлоқ хўжалигида сувни тежовчи технологиялардан самарали фойдаланиш кўламини кенгайтириш, кластерлар фаолиятини такомиллаштириш, қишлоқ хўжалик маҳсулотларининг нархи барқарор бўлишини таъминлаш юзасидан таъсирчан чоралар кўриш зарурлигини қайд этиб ўтдилар.

Юқорида баён этилганлардан келиб чиқиб, «Парламент назорати тўғрисида»ги Ўзбекистон Республикаси Қонунининг 10-моддасига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси қишлоқ хўжалиги вазири Ж. Ходжаевнинг «Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегияси бажарилиши бўйича амалга оширилаётган ишлар тўғрисида»ги ахбороти маълумот учун қабул қилинсин.

2. Ўзбекистон Республикаси Қишлоқ хўжалиги вазирлиги (Ж. Ходжаев):

Стратегияда 2021 йилда амалга оширилиши белгиланган чора-тадбирларнинг ўз вақтида ва сифатли ижро этилишини таъминласин;

қишлоқ хўжалигини рақамлаштириш ва соҳага замонавий ахборот-коммуникация технологияларини ҳамда ресурс тежовчи ва интенсив агротехнологияларни жорий этишга эътиборни кучайтирсин;

қишлоқ жойларини мувозанатли ва барқарор тараққий эттиришга кўмаклашишни назарда тутувчи қишлоқ ҳудудларини ривожлантиришга оид дастурлар тизимли бажарилишига эришсин;

қишлоқ хўжалиги ва озиқ-овқат маҳсулотларини ишлаб чиқариш, сақлаш, қайта ишлаш ҳамда сотишда замонавий кооперация муносабатларини янада кенгайтирсин;

қишлоқ хўжалиги тармоқларида кластерларни ташкил этиш ва ривожлантиришга инвестиция лойиҳаларини кенг жалб этсин;

беш турдаги асосий қишлоқ хўжалиги экинларининг (пахта, ғалла, шоли, картошка, мойли экин) экилишини космик тасвирга тушириш ёрдамида таҳлил қилиш бўйича бошланган ишларни якунига етказсин.

3. Ўзбекистон Республикаси Олий Мажлиси Қонунчилик палатасининг Аграр ва сув хўжалиги масалалари қўмитаси Стратегия доирасида амалга оширилаётган ишлар устидан мунтазам равишда парламент назоратини ўрнатсин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Хаитов зиммасига юклатилсин.

5. Ушбу Қарор қабул қилинган кундан эътиборан кучга киради.