Ўзбекистон Республикаси Президентининг «Қимматли қоғозлар бозорини ривожлантириш ва республиканинг фонд бозорида хорижий инвесторлар иштирокини кенгайтириш борасидаги қўшимча чора-тадбирлар тўғрисида» 1997 йил 31 мартдаги ПФ-1740-сон Фармонини бажариш юзасидан, мулкнинг давлат улушини бошқариш механизмини такомиллаштириш, шунингдек акциядорлик жамиятларини бошқаришда акциядорлар ролини ошириш мақсадида Вазирлар Маҳкамаси қарор қилади:

1. Ўзбекистон Республикаси Давлат мулки қўмитаси тегишли вазирликлар, идоралар, корпорациялар, компаниялар, уюшмалар билан биргаликда:

давлат корхоналарини хусусийлаштириш натижасида ташкил этилган ҳар бир акциядорлик жамияти бўйича акцияларни жойлаштириш (сотиш)нинг жорий аҳволини шу йилнинг 31 декабригача қайта рўйхатдан ўтказсин;

Ўзбекистон Республикаси Президентининг 1997 йил 31 мартдаги ПФ-1740-сон Фармони 1-банди қоидаларига мувофиқ хусусийлаштирилган корхоналар акциялари пакетининг зарур ҳолларда қайта тақсимланишини таъминласин;

қонун ҳужжатларида белгиланган муддатларда (эмиссия проспекти рўйхатдан ўтказилган санадан бошлаб бир йил мобайнида) хусусийлаштирилган корхоналарнинг жойлаштирилмаган акцияларини, давлат мулки сифатида қолдирилган акциялардан ташқари, юридик ва жисмоний, шу жумладан хорижий юридик ва жисмоний шахслар иштирокидаги эркин бозорда сотишга қўйсин;

1998 йил ва кейинги йилларга мўлжалланган хусусийлаштириш дастурини шакллантиришда ташкил этиладиган акциядорлик жамиятлари эмиссия проспектларида акциялар Ўзбекистон Республикаси Президентининг юқорида кўрсатилган Фармонига қатъий мувофиқ равишда жойлаштирилишини назарда тутсин.

2. Ўзбекистон Республикаси Макроиқтисодиёт ва статистика вазирлиги, Давлат мулки қўмитаси, Молия вазирлиги манфаатдор вазирликлар ва идоралар билан биргаликда устав жамғармасида 25 фоиздан ортиқ акциялар пакети давлат ихтиёрида сақлаб қолинадиган тармоқлар ва хўжалик юритувчи субъектлар рўйхатини тасдиқлаш учун икки ҳафта муддатда Вазирлар Маҳкамасига киритсин.

Бунда 25 фоиздан ортиқ акциялар пакетини улуш сифатида давлат ихтиёрида сақлаб қолишга фақат мамлакатнинг келажакдаги илмий-техника имкониятларини белгиловчи, шунингдек Ўзбекистон Республикасининг иқтисодий хавфсизлигини таъминловчи тармоқлар ва корхоналар бўйича йўл қўйилиши назарда тутилсин.

3. Белгилаб қўйилсинки, давлат улуши акциялар пакетининг 25 фоизидан ортиқ бўлган акциядорлик жамиятларида Вазирлар Маҳкамасининг тегишли комплекси томонидан тайинланадиган ишончли вакил томонидан Кузатувчи кенгашда давлат вакиллиги таъминланади. Ишончли вакилга акциядорлик жамияти устав жамғармасидан давлат улушига мувофиқ уни бошқаришда иштирок этиш ҳуқуқи берилади.

4. Белгилансинки, мазкур қарорнинг 1-банди учинчи хатбошида кўрсатиб ўтилган акциядорлик жамиятлари акциялар пакетини қайта тақсимлаш қўшимча акциялар чиқариш йўли билан уларнинг устав жамғармасини белгиланган тартибда кўпайтириш асосида амалга оширилади.

Бунда акциядорлик жамиятининг устав жамғармасидан давлат улушини кўпайтириш:

акциядорлик жамияти фаолият кўрсатишининг бутун даврида қўшилган ва унинг ихтиёрида қолдирилган, устав жамғармасини кўпайтириш пайтигача индексация қилинган дивидендлар суммаси;

акциядорлик жамияти фаолият кўрсатишининг бутун даврида моддий-техника базасини ривожлантириш ёки ўз айланма маблағларини тўлдириш учун давлат томонидан берилган, устав жамғармасини кўпайтириш пайтигача индексация қилинган маблағлар;

акциядорлик жамияти фаолият кўрсатишининг бутун даврида уни реконструкция қилиш учун ва техник қайта жиҳозлаш учун Давлат мулки қўмитаси томонидан берилган, устав жамғармасини кўпайтириш пайтигача қайтарилмаган мақсадли кредитлар;

устав жамғармасини кўпайтириш учун Ўзбекистон Республикаси Давлат мулки қўмитаси томонидан белгиланган тартибда йўналтириладиган хусусийлаштиришдан тушган маблағлар ҳисобига амалга оширилади;

Бунда Ўзбекистон Республикаси Давлат мулки қўмитасига сезиларли иқтисодий имкониятга эга бўлмаган, асосий ишлаб чиқариш фондларининг эскириши 50 фоиздан ортиқ бўлган акциядорлик жамиятларини зарур ҳолларда, белгиланган тартибда хусусий корхоналарга айлантириш тавсия этилсин.

5. Ўзбекистон Республикаси Давлат мулки қўмитаси Молия вазирлиги билан биргаликда Ўзбекистон Республикаси Президентининг 1997 йил 31 мартдаги ПФ-1740-сон Фармони қоидаларига мувофиқ эмитент корхоналар томонидан сотиб олинган акциялар улушини тўлиқ жойлаштириш жараёни, акциялар корхоналарнинг айланма маблағлари ҳисобига сотиб олинган ҳолларда эса бу маблағларнинг корхоналар счётига қайтарилиши устидан қаттиқ назорат ўрнатсин.

Белгилансинки, акциядорлик жамиятлари ўз акцияларини сотиб олмайдилар (меҳнат жамоаси улуши бундан мустасно), инвестиция ташкилотлари эса акцияларни сотиш юзасидан битишувларни Ўзбекистон Республикаси Давлат мулки қўмитаси рухсатисиз рўйхатдан ўтказа олмайдилар.

6. Ўзбекистон Республикаси Молия вазирлиги марказий аппарати таркибида Хўжалик юритувчи субъектлар томонидан мулкнинг давлат улуши бўйича дивидендлар ҳисобланиши ва улардан фойдаланилишини назорат қилиш бошқармаси, шунингдек маҳаллий молия органлари таркибида тегишли бўлимлар ташкил этилсин, Улар ходимларининг умумий чекланган сони 1-иловага мувофиқ 63 нафар, шу жумладан марказий аппарат ходимлари сони 11 нафар этиб белгилансин.

Белгилансинки, янги ташкил этилаётган Бошқарма ва бўлимлар харажатлари, Ўзбекистон Республикаси Давлат мулки қўмитаси марказий аппарати ва унинг ҳудудий бўлимлари харажатлари учун белгиланган бюджет маблағларини тегишли суммага қисқартирган ҳолда, республика бюджети маблағлари ҳисобига амалга оширилади.

7. Хўжалик юритувчи субъектлар томонидан давлат мулки улуши бўйича дивидендлар ҳисобланиши ва улардан фойдаланишни назорат қилиш бошқармасига қуйидаги функциялар юклансин:

давлат мулкидан тушадиган даромадлар барча турларини ҳисобга олиш ва уларнинг мониторинги;

давлат улуши акциялари (пайлари) бўйича дивидендлар (даромадлар) тўғри ва тўлиқ ҳисобланиши, шунингдек акциялар давлат улуши бўйича дивидендлардан мақсадли (корхоналарни ривожлантириш ва техник қайта жиҳозлаш) фойдаланилиши устидан мунтазам назорат қилиш, давлат улуши бўйича мақсадли фойдаланилмаган дивидендларни белгиланган тартибда давлат бюджетга олиб қўйиш ҳуқуқи берилади;

давлат бадали (улуши) мавжуд бўлган корхоналарнинг молиявий-иқтисодий аҳволи тўғрисида электрон маълумотлар базасини яратиш ва юритиш.

Ўзбекистон Республикаси Молия вазирлиги Давлат солиқ қўмитаси билан биргаликда корхоналар томонидан давлат пайлари, акциялар пакети бўйича дивидендлардан фойдаланиш тартибини бир ой муддатда ишлаб чиқсин ва тасдиқласин.

8. Ўзбекистон Республикаси Давлат мулки қўмитаси ва унинг ҳудудий бўлинмалари Хўжалик юритувчи субъектлар томонидан давлат мулки улуши бўйича дивидендлар ҳисобланиши ва улардан фойдаланилишини назорат қилиш бошқармасига ва унинг ҳудудий бўлимларига улар ўзларига юкланган функциялар бажарилишини таъминлашлари учун хусусийлаштирилган корхоналар тўғрисидаги ахборотлар тақдим этилишини таъминласинлар.

9. Қуйидагилар:

Хусусийлаштириладиган корхоналар акциялари билан биржа ва биржадан ташқари бозорларда битишувларни амалга ошириш тартиби 2-иловага мувофиқ;

Хусусийлаштириладиган давлат корхоналари акцияларини сотиш бўйича инвестиция тендерларини ўтказиш тартиби 3-иловага мувофиқ тасдиқлансин.

10. Ўзбекистон Республикаси Давлат мулки қўмитаси:

Молия вазирлиги билан биргаликда хусусийлаштирилган корхоналар акцияларини траст асосида бошқариш, шу жумладан уларнинг устав жамғармасини шакллантириш учун хўжалик уюшмаларига бериш тартибини бир ой муддатда ишлаб чиқсин ва тасдиқлаш учун Вазирлар Маҳкамасига тақдим этсин;

«Акциядорлик жамиятлари ва акциядорлар ҳуқуқларини ҳимоя қилиш тўғрисида» Ўзбекистон Республикаси Қонунига мувофиқ акциядорлик жамияти фаолиятининг муҳим масалаларини ҳал қилишда акциядорлар ҳуқуқларини, унинг ижро этувчи аппарати раҳбариятининг акциядорларга ҳисоб беришини таъминловчи комплекс чора-тадбирларни ишлаб чиқсин ва жорий этсин.

11. Ўзбекистон Республикаси Молия вазирлиги, Давлат мулки қўмитаси ва Марказий банки Ўзбекистон Республикаси норезидентлари томонидан қимматли қоғозларга маблағлар қўйиш, шунингдек сармояни ва қимматли қоғозларга қўйилган инвестициялардан олинган дивидендларни олиб чиқиб кетиш тартиби тўғрисида бир ой муддатда Вазирлар Маҳкамасига таклифлар киритсинлар.

12. Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолиятини мувофиқлаштириш ва назорат қилиш маркази «Хўжалик юритувчи субъектларнинг қимматли қоғозлар бозорида инвестиция ташкилотлари сифатидаги фаолиятини лицензиялаш тўғрисида Низом» ҳамда «Инвестиция ташкилотлари фаолиятининг иқтисодий нормативлари тўғрисида Низомларни икки ҳафта муддатда тайёрласин ва тасдиқласин.

13. Ўзбекистон Республикаси Меҳнат вазирлиги акциядорлик жамиятларида меҳнат муносабатларини ҳуқуқий тартибга солиш бўйича тавсияномаларни бир ой муддатда ишлаб чиқсин ва эълон қилсин.

14. Ўзбекистон Республикаси Президенти ҳузуридаги Давлат ва жамият қурилиши академияси Ўзбекистон Республикаси Давлат мулки қўмитаси билан биргаликда 1997-1998 ўқув йилидан бошлаб корхоналар ва уларнинг хўжалик бирлашмалари раҳбарлари учун акциядорлик жамиятларида бошқарув асослари тўғрисида махсус курслар ташкил этсин.

15. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари В.А. Чжен ва Ўзбекистон Республикаси Молия вазири Ж.Б. Сайфиддинов зиммасига юклансин.

1.1. Ушбу Тартиб «Қимматли қоғозлар бозорининг фаолият кўрсатиш механизми тўғрисида» Ўзбекистон Республикаси Қонунига, Ўзбекистон Республикаси Президентининг «Қимматли қоғозлар бозорини ривожлантириш ва республиканинг фонд бозорида хорижий инвесторлар иштирокини кенгайтириш борасидаги қўшимча чора-тадбирлар тўғрисида» 1997 йил 31 мартдаги ПФ-1740-сон Фармонига ҳамда Ўзбекистон Республикасининг қимматли қоғозлар бозори тўғрисидаги бошқа қонунчилик ва норматив-ҳуқуқий ҳужжатларига мувофиқ ишлаб чиқилган ва биржа ва биржадан ташқари савдоларда (сотувларини ўтказиш тартиби алоҳида норматив ҳужжатлар билан тартибга солинадиган хусусийлаштирилган инвестиция фондлари томонидан акцияларни сотиш бўйича кимошди савдоларидан ташқари) хусусийлаштирилаётган корхоналар акцияларини сотиш тартибини белгилайди.

1.2. Ушбу Тартиб мақсадлари учун қуйидаги иборалардан фойдаланилади:

* биржа савдоси — фонд биржасида (товар-хом ашё ёки валюта биржаси фонд бўлимида) қонунчиликка мувофиқ биржа томонидан белгиланадиган тартибда ва шартларда амалга ошириладиган қимматли қоғозларнинг олди-сотди жараёни;

* биржадан ташқари савдо — фонд биржасидан ташқарида қимматли қоғозларнинг олди-сотди жараёни;

* битишув қатнашчилари — битишув бўйича томонлар ёки уларнинг битишувни тузиш топшириғини бажаришни бевосита хоҳлаган ёки бажарувчи ва битишувни тузиш шартларини белгилаш ваколатига эга бўлган вакиллари;

* лот — Давлат мулки қўмитаси номидан акциялар қўйилганда ва сотилганда вакил қилинган агент томонидан битишувларда белгиланадиган ўлчов бирлиги;

* таклиф нархи — сотувчи томонидан савдога қўйилган 1 та акциянинг нархи;

* битишув нархи — тузилган олди-сотди шартномасига мувофиқ 1 та акциянинг нархи;

* битишув суммаси — амалга оширилган битишув асосида сотилган (сотиб олинган) барча акцияларнинг умумий қиймати;

* акциянинг курс қиймати (акция курси) — агар биржа ёки биржадан ташқари савдолар қоидалари билан нарх белгилашнинг бошқача усули белгиланмаган бўлса, қимматли қоғозларнинг биржа ёки биржадан ташқари бозорларида тузилган битишувнинг охирги нархи (битишувнинг миқдорий ҳажми эмитент томонидан чиқарилган қимматли қоғозлар умумий миқдорининг камида 5 фоизини ташкил қилган тақдирда);

* Давлат мулки қўмитасининг хусусийлаштирилаётган корхоналар акцияларини савдога қўйиш бўйича вакил қилинган агенти (вакил қилинган агент) — Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолият кўрсатишини мувофиқлаштириш ва назорат қилиш маркази (бундан кейин Марказ деб аталади) ёки Давлат мулки қўмитаси томонидан вакил қилинган бошқа орган;

* савдо фаоллиги коэффициенти — инвестиция воситачиси (брокер) томонидан сотилган акциялар миқдорий ҳажмининг вакил қилинган агент топшириғига биноан биржа савдоларига қўйилган акциялар бўйича аниқланадиган охирги календарь ой мобайнида қўйилган акциялар умумий миқдорий ҳажмига нисбатан тенг бўлган кўрсаткич.

2.1. Давлат мулки қўмитасининг ёки у вакил қилган органнинг қуйидагиларни тасдиқлаш тўғрисидаги қарори (буйруғи) хусусийлаштириладиган корхоналар акцияларини биржа ва биржадан ташқари савдоларга қўйиш учун асос ҳисобланади:

— давлат улуши пакетлари (эмитент устав жамғармасининг кўпи билан 25 фоизи), меҳнат жамоаси улуши (кўпи билан 26 фоиз), хорижий инвестор улуши (камида 25 фоизи), шунингдек эркин сотиладиган улуши (ёки Вазирлар Маҳкамаси қарорларига мувофиқ акцияларни бошқача тақсимлаш) белгиланган ҳолдаги акциялар эмиссияси проспекти;

— акцияларни жойлаштириш ва сотиш тартиби, муддатлари;

— хусусийлаштириладиган корхоналар акцияларини қуйиш ҳуқуқига эга бўлиш юзасидан буюртманома (тендер)лар танловини ўтказиш баённомаси (1-иловага мувофиқ).

2.2. Эмиссия проспекти бўйича тақсимланган ва сотиб олинмаган улушларни (давлат улушидан ташқари) сотиш қийматли қоғозлар чиқарилиши рўйхатдан ўтказилгандан кейин бир йил ўтгач амалга оширилади. Акцияларнинг давлат улушини сотиш Ўзбекистон Республикаси Вазирлар Маҳкамасининг тегишли қарори қабул қилингандан кейин амалга оширилади.

2.3. Алоҳида ҳолларда Ўзбекистон Республикаси Вазирлар Маҳкамаси хорижий инвесторлар иштирокида ташкил этилаётган акциядорлик жамиятлари акцияларини тендер шартларида тақсимлашнинг алоҳида тартиби тўғрисида қарор қабул қилиши мумкин.

2.4. Биржа ва биржадан ташқари бозорларда акцияларни сотиш қўйилаётган акциялар миқдорига кўра лотлар билан амалга оширилади:

* 1 мингтагача — акциялар пакети 1 та лот билан қўйилади;

* 1 мингдан 3 мингтагача — акциялар пакети 2 та лотга бўлинади;

* 3 мингдан 5 мингтагача — акциялар пакети 3 та лотга бўлинади;

* 5 мингдан кўп — акциялар пакети 4 та лотга бўлинади.

2.4.1. 1 та лотдаги акциялар миқдори эмитент устав жамғармасидан 35 ва ундан кўп фоизга ошган тақдирда лот қўшимча равишда бўлинади.

Акциялар биржа савдоларида сотилган тақдирда лот харидор талабига қараб бўлиниши мумкин.

3.1. Битишувлар бўйича барча тўловлар Давлат мулки қўмитасининг ёки Давлат мулки қўмитаси томонидан қимматли қоғозлар билан ҳисоб-китоб клиринг операцияларини ўтказишга вакил қилинган ташкилотнинг ҳисоб-китоб счётларига ўтказилади.

3.2. Акцияларни қимматли қоғозларнинг биржадан ташқари бозорида сотишда, битишув тузиш учун харидор, кафолат сифатида пул маблағларини Давлат мулки қўмитасининг ёки унинг ҳудудий бошқармалари ҳисоб-китоб счётига депонентга қўйишга мажбурдир. Депонентга қўйиладиган маблағларнинг энг кам миқдори битишув суммасининг камида 30 фоизини ташкил қилиши керак.

3.3. Акцияларни биржа бозорида сотишда инвестор номидан иш кўрадиган брокер, агар битишув харидор томонидан депонентга қўйилган ҳақиқий маблағлар миқдори акциялар бўйича амалга оширилган битишув суммасининг 30 фоизидан кам бўлса, акцияларни нархи бўйича сотиб олиш юзасидан буюртманома бериш ҳуқуқига эга бўлмайди.

Акс ҳолда брокер — харидор барча зарур тўловларни амалга ошириш бўйича тўлиқ жавоб беради.

3.4. Пул маблағлари ушбу фойдалар асосида 15 банк кунидан кўп бўлмаган муддатда ўтказилади.

Қимматли қоғозларни сотиб олувчи депонентга маблағларни эмитент номини кўрсатган ҳолда ҳам ва кўрсатмасдан ҳам қўйиш ҳуқуқига эгадир.

3.5. Акциялар олди-сотдиси бўйича битишув тузилгандан кейин қимматли қоғозларни сотиб олувчи олди-сотди шартномаси бўйича маблағларнинг қолганини қонунчиликда кўрсатилган муддат мобайнида тўлашга мажбурдир.

3.6. Битишув харидор айби билан бекор қилинган тақдирда қимматли қоғозларни сотувчи депонентга қўйилган маблағлардан фонд биржасидаги воситачилик йиғими тўлаш ва брокерга тўлов бўйича кўрилган зарарларни, шунингдек шартномада кўзда тутилган жарималар санкцияларини, маблағларнинг қолганини харидорга қайтарган ҳолда, мустақил равишда ушлаб қолиш ҳуқуқига эгадир.

3.7. Битишув тузилмаган тақдирда, пул маблағларини депонентга қўйиш муддати тугагандан кейин Давлат мулки қўмитаси ёки унинг пулни депонентга қабул қилган ҳудудий бошқармаси депонентга қўйилган маблағларни харидорга 5 банк куни мобайнида қайтаради.

4.1. Биржа савдоларига акцияларнинг қуйидаги пакетлари қўйилади:

а) эркин сотиш учун мўлжалланган акциялар;

б) Ўзбекистон Республикаси Вазирлар Маҳкамасининг чеклашларига эга бўлмаган бошқа улушлар акциялари пакетлари, акциялар эмиссияси проспектида белгиланган жойлаштириш муддатлари тугагандан кейин.

Хусусийлаштирилаётган корхоналар акциялари пакетларини биржа савдосида сотиш ва битишувлар бўйича ҳисоб-китобларни ўтказиш қуйидаги тартибда амалга оширилади:

* хусусийлаштирилаётган корхоналарнинг белгилаб қўйилган баҳоси бўйича суммаси 500 та энг кам ойлик иш ҳақи миқдоридан ошадиган акциялари пакетларини биржа савдоларига қўйиш учун инвестиция воситачилари ўртасида қўйиш ҳуқуқига эга бўлиш учун буюртманомалар танлови ўтказилади, сўнгра Давлат мулки қўмитаси ва брокер ўртасида акциялар пакетини сотиш юзасидан шартнома-топшириқ тузилади (2-илова);

* белгилаб қўйилган қиймати бўйича суммаси 500 та энг кам ойлик иш ҳақи миқдоридан кам бўлган акциялар пакетларини сотиш юзасидан шартнома-топшириқлар вакил қилинган агент томонидан савдо фаоллиги энг юқори бўлган брокерларга берилади;

* сотиш учун мўлжалланган акциялар пакетларини брокерлар учун захирада сақлаш муддати 15 иш кунини ташкил қилади (вакил қилинган агент томонидан кейинчалик кўпи билан 2 марта узайтириш ҳуқуқи билан). Ушбу муддат тугагандан кейин тузилган шартнома-топшириқлар бажарилмаган қисми (яъни акцияларнинг сотилмаган миқдори) бўйича албатта бекор қилиниши, сотилмаган қимматли қоғозлар эса Давлат мулки қўмитасининг «Вақт» миллий депозитарийсидаги счётида тикланиши керак;

* битишув тузилгандан ва тўлов маблағлари сотувчининг ҳисоб-китоб счётига тушгандан кейин Давлат мулки қўмитаси фонд биржасига воситачилик ҳақини биржа қоидалари билан белгиланган миқдорда 5 банк куни мобайнида тўлашга мажбурдир;

* акциялар пакетини сотиш юзасидан шартнома-топшириқлар брокерлар билан, улар томонидан аниқ харидор — кутиладиган инвестор жалб қилинган ва белгилаб қўйилган баҳоси бўйича акциялар суммасининг 100 фоизи Давлат мулки қўмитаси счётига депонент қилинган, шунингдек қолган тўлов маблағларининг айнан қонунчиликда кўрсатилган муддатларда тушиши таъминланган тақдирда, буюртманома (тендер)лар танловини ўтказмасдан тузилади.

4.2. Қимматли қоғозлар биржа бозорида битишувларни рўйхатдан ўтказиш савдоларда битишувлар тузилган кунда фонд биржасининг тегишли тузилмалари томонидан амалга оширилади.

4.3. Хусусийлаштириладиган корхоналар акцияларини фонд биржаси орқали ўзаро ҳаракати 3-иловадаги схемага мувофиқ амалга оширилади.

5.1. Хусусийлаштирилаётган корхоналарнинг акциялар пакетлари биржадан ташқари бозорда юридик шахсларга муқаррар равишда тендер асосида, жисмоний шахсларга эса — фонд дўконлари орқали сотилади.

5.2. Тендер ўтказиш шартлари ва муддатларини белгилайдиган Давлат мулки қўмитаси ёки у вакил қилган орган тендер ташкилотчиси ҳисобланади.

5.3. Тендер савдоларида ўтказиш шартларига биноан тендерда қатнашиш ҳуқуқига эга бўлган ва тендер ташкилотчисига қатнашиш учун буюртманома берган ҳар қандай юридик ва жисмоний шахслар қатнашишлари мумкин.

5.4. Акциялар пакетининг айнан бир пакетига бир нечта буюртманома мавжуд бўлган тақдирда тендернинг қатнашчи — ғолиби битишув томони бўлади.

5.5. Хусусийлаштириладиган корхоналар акциялари пакетларини биржадан ташқари бозорда жойлаштириш ва тузилган битишувлар бўйича ҳисоб-китобларни ўтказиш қуйидагича амалга оширилади:

* тендерга қўйиладиган акциялар пакетлари «Вақт» миллий депозитарийси томонидан, захирага қўйиш муддатини белгилайдиган вакил қилинган агентнинг ёзма топшириғи асосида Давлат мулки қўмитасининг «Депо» счётида ёки унинг ҳудудий бошқармаларининг «Депо» счётида захирага қўйилади;

* тендер ташкилотчиси белгилайдиган шартларда ва муддатларда тендер ғолиби аниқланади;

* тендер ғолиби аниқланмаган тақдирда тендер кечроқ муддатга қолдирилиши мумкин. Тендер ташкилотчиси белгилаган муддат мобайнида тендер ғолиби томонидан сотиб олинмаган акцияларни Давлат мулки қўмитаси биржа савдоларига қўяди;

* олди-сотди шартномалари депозитарийга битишув тузилгандан кейин тақдим этилади. Тузилган олди-сотди шартномалари амалда бўлиш муддати тугагач бажарилмаган қисми бўйича муқаррар равишда бекор қилиниши керак;

* тузилган битишув тўлангандан кейин ва харидор томонидан депозитар хизматлари (битишувни рўйхатдан ўтказиш, «Депо» счётлари бўйича пул ўтказиш ва шу кабилар) ҳақи тўланган вакил қилинган агент акцияларни харидор счётига 5 иш куни мобайнида ўтказишга мажбурдир;

* кўрсатиладиган депозитар хизматлар тўлови қимматли қоғозлар харидори томонидан амалга оширилади.

5.6. Биржадан ташқари битишувларни рўйхатдан ўтказиш Миллий депозитарий ёки бошқа инвестиция институтлари томонидан Ўзбекистон Республикаси қонунчилиги билан белгиланган тартибда амалга оширилади.

5.7. Хусусийлаштириладиган корхона меҳнат жамоасига акциялар улушини сотиш тартиби Давлат мулки қўмитаси томонидан белгиланади.

6.1. Марказ ёки Давлат мулки қўмитаси вакил қилган бошқа орган Давлат мулки қўмитасининг хусусийлаштирилаётган корхоналар акцияларини савдога қўйиш бўйича вакил қилинган агенти ҳисобланади.

6.2. Қуйидагилар вакил қилинган агент вазифалари жумласига киради:

* давлат корхоналарини қайта ўзгартириш йўли билан ташкил қилинган акциядорлик жамиятларининг қимматли қоғозлари дастлабки эмиссиясини маҳаллий ва халқаро фонд бозорларида жойлаштиришни ташкил этиш бўйича Давлат мулки қўмитасининг вакил қилинган агенти бўлиш;

* биржа ва биржадан ташқари бозорларда қимматли қоғозларни дастлабки жойлаштириш ҳуқуқи учун инвестиция институтлари ўртасида тендерлар ўтказиш;

* акцияларни нархлаш доимий мониторингини амалга ошириш;

* биринчи жойлаштириш чоғида қимматли қоғозларнинг бозор нархини аниқлаш;

* савдо фаоллиги коэффициентларини ва бошқа кўрсаткичларни аниқлаш;

* қимматли қоғозларнинг биржа ва биржадан ташқари бозорида ўтказилган савдолар якунлари бўйича ҳар ҳафтада Давлат мулки қўмитасига ахборотлар тақдим этиш.

6.3. Вакил қилинган агент қуйидаги ҳуқуқларга эгадир:

* битишув барча қатнашчилари ҳисоботларининг шакли ва даврийлигини белгилаш;

* сотувга қўйиладиган акциялар пакетлари ҳажми ва рўйхатини тартибга солиш;

* бозор конъюнктурасини ва Ҳукуматнинг акцияларни сотиш бўйича топшириқлари бажарилишини ҳисобга олган ҳолда акцияларнинг таклиф нархини аниқлаш;

* амалдаги қонунчиликда назарда тутилган бошқа чора-тадбирларни кўриш.

6.4. Биржадан ташқари бозорда акцияларнинг таклиф нархи Давлат мулки қўмитаси ёки у вакил қилган агент томонидан белгиланади. Хусусийлаштирилаётган корхоналарнинг акциялари белгилаб қўйилганидан паст нархда сотилиши мумкин эмас.

7.1. Биржа ва биржадан ташқари бозорлардаги савдолар қуйидаги принциплар асосида амалга оширилиши керак:

* ҳуқуқий таъминлаш;

* ошкоралик;

* барча инвесторларнинг тенг ҳолда киришини таъминлаш;

* рақобатни таъминлаш ва рағбатлантириш;

* ўзаро ҳисоб-китоблар кафолати;

* битишувларни амалга ошириш учун барча қулайликларни яратиш.

7.2. Вакил қилинган агент, акциялар савдога қўйилгунгача, эмитентлар тўғрисидаги дастлабки ахборотлар бўйича ҳам, улар томонидан чиқариладиган қимматли қоғозлар бўйича ҳам тенг қулайликларни таъминлайди.

7.3. Хусусийлаштириладиган корхоналар акциялари савдога қўйилишидан кечи билан 15 кун олдин, вакил қилинган агент томонидан эмитентлар тўғрисидаги ахборот (акциядорлик жамиятларининг номи ва юридик реквизитлари, сотувга қўйиладиган акциялар пакетлари ва бошқа зарур маълумотлар) эълон қилинади.

8.1. Сотувчи ёки харидор ёки уларнинг вакиллари (инвестиция институтлари), агар битишувлар якунлари қонунчиликда белгиланган қоида ва нормаларнинг бузилишига олиб келса, битишувлар тузиш, олди-сотди шартномаси томони бўлиш, уни имзолаш ҳуқуқига эга бўлмайди.

8.2. Битишувлар тузишда рўйхатдан ўтказувчи инвестиция институти, агар битишувлар қонунчиликни бузган ҳолда тузилган бўлса ёки битишувлар якунлари қонунчиликда белгиланган тартиб ва нормаларнинг бузилишига олиб келса, уларни рўйхатдан ўтказмасликка мажбурдир.

8.3. Депозитарий (ва ёки реестр эгаси) қуйидагиларга мажбурдир:

* агар битишувлар қонунчиликни бузган ҳолда тузилган бўлса ёки битишувлар якунлари қонунчиликда белгиланган қоида ва нормаларнинг бузилишига олиб келса, битишувларни рўйхатдан ўтказмаслик ва «Депо» счётлари бўйича пул ўтказишларни амалга оширмаслик;

* қимматли қоғозлар бозори қатнашчиларининг, инвесторларнинг битишувни рўйхатдан ўтказиш, натижаси қонунчиликда белгиланган қоида ва нормалар бузилишига олиб келувчи «Депо» счётлари бўйича пул ўтказиш тўғрисидаги мурожаати ҳақида Марказга дарҳол хабар қилиш.

8.4. Битишувларнинг барча аъзолари амалдаги қонунчиликнинг бузилиши ҳоллари тўғрисида Марказий бузилишлар аниқланган вақтдан бошлаб 2 кун муддатда хабардор қилишга мажбурдирлар.

9.1. Депозитарий қуйидагиларга мажбурдир:

* акциялар эгаларининг акцияларга бўлган ҳуқуқларини сақлаш ва сўзсиз тасдиқлаш;

* депонентлар счётлари бўйича ёзувларни сақлаш ва юритиш, уларга асосли ўзгаришларни киритиш функциясини зарур даражада амалга ошириш;

* хусусийлаштирилаётган корхоналар акцияларини инвестиция воситалари ва вакил қилинган агент ўртасидаги шартнома-топшириқлар асосида сотиш учун захирага қўйишни амалга ошириш;

* тўлиқ тўлов тасдиқлангандан кейин ва фақат вакил қилинган агент фармойиши бўйича акцияларни «Депо» счётлари бўйича сотувчидан харидорга ўтказишни амалга ошириш.

9.2. Давлат мулки қўмитаси томонидан ҳисоб-китоб клиринг операцияларини ўтказиш бўйича вакил қилинган тижорат банки (ёки бошқа ихтисослаштирилган ташкилот) қуйидагиларга мажбурдир:

* ўзаро мажбуриятларни аниқлашда тайёрланган тўлов воситаларини ва бухгалтерия ҳужжатларини уларнинг қимматли қоғозлар бозори қатнашчилари билан (ҳисоб-китоблар шулар учун қилинади) шартномалари асосида ижро этишга қабул қилиш;

* харидорнинг тўлов қобилиятини, сотувчида сотиладиган қимматли қоғозларнинг мавжудлигини ва битишув бошқа параметрларининг мувофиқлигини аниқлаш мақсадида қимматли қоғозлар олди-сотди шартномалари шартларини кўриб чиқишни таъминлаш;

* тузиладиган битишувлар натижаларини тезкорлик билан умумлаштириш ва вакил қилинган агентни қимматли қоғозлар бозори конъюнктурасининг жорий ҳолати тўғрисида хабардор қилиш;

* битишувлар бўйича ҳисоб-китобларни ўтказиш учун зарур бўлган ҳужжатларни белгиланган тартибда расмийлаштириш;

* қимматли қоғозларни етказиб бериш бўйича мажбуриятларни ўзаро инобатга олиш йўли билан битишувларнинг ўз вақтида бажарилишини ва битишув томонларининг тўловларни амалга оширишини таъминлаш.

9.3. Фонд биржаси қуйидагиларга мажбурдир:

* қимматли қоғозларнинг нормал муомалада бўлиши, уларнинг бозор нархларини аниқлаш ва улар тўғрисидаги ахборотларни зарур даражада тарқатиш, қимматли қоғозлар қатнашчиларининг касб-ҳунар даражасини юқори даражада тутиш учун зарур шарт-шароитларни таъминлаш;

* сотувга қўйиладиган қимматли қоғозларнинг эмитентларнинг молия-хўжалик ва биржа томонидан белгиланган талаблар бўйича бошқа кўрсаткичларининг мувофиқлигини назарда тутувчи экспертизасини ўтказиш, эмитентнинг ишчанлик нуфузини ҳамда унинг молиявий ишончлилиги тўғрисида ахборот берувчи бошқа мажбуриятларни баҳолаш;

* савдога қўйиладиган қимматли қоғозларнинг молиявий жиҳатдан барқарор эмитентлар нархланадиган акциялари рўйхатини ўз ичига олувчи биржа листингини мунтазам юритиш;

* қимматли қоғозларнинг биржадаги савдоси якунлари асосида қимматли қоғозларни нархлашни (акциялар курсини, энг паст ва энг юқори нархларини, курс қиймати ўзгаришини ва шу кабиларни) амалга ошириш;

* инвестиция институтлари номидан вакиллик қилувчи биржа савдолари операторлари (трейдерлар) ўқувини ўтказиш;

* қимматли қоғозлар операциялари бўйича келишмовчиликларни ўз вақтида кўриб чиқиш.

10.1. Акциялар пулини тўлашнинг қонунчиликда назарда тутилган муддати ўтиб кетган тақдирда вакил қилинган агент олди-сотди шартномасини бекор қилишга ва регистрга тегишли равишда ёзиб қўйиш учун битишувни рўйхатдан ўтказувчига шартноманинг ҳақиқий эмас деб топилгани тўғрисида хабар қилишга мажбурдир.

Битишувни рўйхатдан ўтказувчи вакил қилинган агентнинг битишув ҳақиқий эмаслиги тўғрисидаги аризасини ёки битишувнинг бекор қилингани тўғрисидаги суд қарорини олгандан кейин, тегишли ёзувлар қайд этилгач, Давлат мулки қўмитаси счётида акцияларни тиклаш учун бу ҳақда икки кун муддатда депозитарийга хабар қилишга мажбурдир.

10.2. Акцияларни сотиб олувчи битишув суммасини битишув тузилган кундан бошлаб 5 банк куни мобайнида тўламаган тақдирда олди-сотди шартномаси бекор қилинади ва айбдор томон бошқа томонга битишув суммасининг 12 фоизи миқдорида жарима тўлайди.

10.3. Ушбу Тартиб талабларини бажармаганлик, тўлиқ ва (ёки) ўз вақтида бажармаганлик учун, шунингдек амалдаги қонунчилик бузилган тақдирда битишув қатнашчилари қонунчиликда белгиланган тартибда жавоб берадилар.

1. Қимматли қоғозлар бозорида рақобатни рағбатлантириш, хусусийлаштирилган корхоналар акцияларини «Тошкент» республика фонд биржасида савдоларга қўйишда барча инвестиция воситачиларига тенг шароитлар яратиш мақсадида Давлат мулки қўмитасининг Вакил қилинган агенти хусусийлаштирилган корхоналар акцияларини сотиш ҳуқуқини олишга брокерлик идоралари буюртманомалари танловини ўтказади.

2. Танловда қатнашиш учун буюртманомалар хусусийлаштирилган корхоналар акциялар пакетини Давлат мулки қўмитаси номидан қўйиш хоҳишини билдирган брокерлик идоралари томонидан вакил қилинган агентга берилади.

3. Танловга вакил қилинган агент томонидан тасдиқланган рўйхат бўйича акциядорлик жамиятлари акциялари пакетларини сотишга буюртманомалар берилади.

Мазкур рўйхат бўйича ахборот танлов ўтказилишидан камида бир ҳафта олдин очилади ва Республика биржа маркази биносида махсус стендларда ёритилади.

4. Буюртманомалар танловига «Тошкент» республика фонд биржасида аккредитация қилинган брокерлик идоралари қўйилади.

5. Бир буюртманомани сотиб олишнинг дастлабки нархи энг кам ойлик иш ҳақининг икки баравари миқдорига тенгдир. Танловда қадам дастлабки нархнинг 10 фоизи миқдорида белгиланади. Олиб борувчи кимошди савдоси мавжуд бўлган тақдирда қадамни ошириш ҳуқуқига эгадир.

6. Танлов қуйидаги тартибда ўтади:

олиб борувчи биринчи буюртманоманинг бошланғич дастлабки баҳосини эълон қилади. Ушбу нарх бўйича буюртманомани сотиб олишни хоҳловчи кимошди савдоси қатнашчиси ўз тартиб рақамини кўтаради, шундан кейин олиб борувчи овоз чиқариб ушбу тартиб рақамини уч мартагача қайд этади. Қатнашчилардан ҳеч бири нархни кўтармаса, «уч» деб саналгандан кейин битишув тугалланган ҳисобланади, бу биржа бонгига зарб уриб қайд этилади;

баҳони оширишни хоҳлаган қатнашчи олиб борувчи «уч» деб эълон қилишигача ўз тартиб рақамини кўтариши керак;

бир буюртманомага бир неча қатнашчилар бўлган тақдирда олиб борувчи кимошди савдосини ва қадамни эълон қилади. Буюртманомани сотиб олиш учун энг юқори нархни таклиф қилган қатнашчи битишув томони бўлади.

7. Танлов натижалари бўйича баённома тузилади, унда:

брокерлик идораси тартиб рақами;

брокерлик идораси вакилининг фамилияси, исми ва отасининг исми;

акциядорлик жамиятларининг номи;

лотлар ва акциялар сони;

кимошди савдосида буюртманомага тўлов маблағи суммаси акс эттирилади.

8. Тўлов танловдан кейин икки кун муддатда вакил қилинган агентнинг ҳисоб-китоб счётига ўтказилади.

9. Агар тўлов белгиланган муддатларда ўтказилмаса, буюртманомаларни сотиб олишга битишув бекор қилинади.

10. Брокерлик идоралари танловдан кейин бир кун ичида Марказ ёки унинг ҳудудий бўлимлари билан белгиланган шаклда акциялар пакетларини сотишга шартнома-топшириқни расмийлаштиришлари керак.

11. Хусусийлаштирилган корхоналар акцияларини сотувга қўйиш ҳуқуқини олган инвестиция воситачиси мазкур Қоидаларда белгиланган тартибда:

ўзи қўйиш ҳуқуқини олган акциялар пакетини белгиланган муддатда Миллий депозиторийга захирага қўйишга;

уларни сотиш ҳуқуқини олган акцияларнинг барча пакетини шартнома-топшириқда белгиланган муддатларда «Тошкент» республика фонд биржаси савдосига қўйишга;

шартнома-топшириқда қайд этилган муддат давомида ўз ҳуқуқидан фойдаланишга;

олди-сотди битишувини тузишда вакил қилинган агентнинг манфаатлари ва топшириқларига мувофиқ ҳаракатни амалга оширишга;

шартнома-топшириқда назарда тутилган шартларнинг зарур даражада бажарилиши учун жавоб беришга;

захирага қўйиш муддати тамом бўлгандан кейин акциялар пакетини мажбурий тартибда Давлат мулки қўмитасининг «Депо» счётида тиклашга мажбурдир.

Қуйидаги ҳуқуқларга эга бўлади:

акцияларнинг ўзи эгалик қилиш ҳуқуқини олган пакетининг сотувчиси бўлиш ва айни вақтда, бошқа инвестиция воситачилари томонидан биржага қўйиладиган акциялар пакетлари харидори бўлиш;

вакил қилинган агентнинг ва «Тошкент» республика фонд биржасининг розилигисиз, бироқ сотувга қўйгунга қадар мажбурий тартибда маълум қилган ҳолда учинчи шахсга сотиш ҳуқуқини бериш.

Кейинги ўринларда «Мижоз» деб аталадиган, Низом асосида иш кўрувчи Ўзбекистон Республикаси Давлат мулки қўмитаси номидан, раиснинг биринчи ўринбосари ____________ бир томондан ва кейинги ўринларда «Брокер» деб аталадиган, Устав ва 199__ йил «___» __________даги ___-сон лицензия асосида иш кўрувчи ___-сон БК номидан _______________ иккинчи томондан ушбу шартномани қуйидагилар ҳақида туздилар:

1.1. Мазкур шартнома шартларига, «Тошкент» республика фонд биржасида қимматли қоғозлар билан операцияларни амалга ошириш қоидалари»га ва «Хусусийлаштириладиган корхоналарнинг акцияларини биржа ва биржадан ташқари сотувларга қўйиш тартиби тўғрисидаги қоидалар»га мувофиқ мазкур шартнома (узайтириш ҳуқуқи билан, бироқ 2 мартадан кўп эмас) имзоланган кундан бошлаб 15 иш кунида Мижознинг номидан ва унинг ҳисобидан қуйидаги акцияларни сотиш бўйича битишув тузишни Мижоз топширади, Брокер эса ўз зиммасига олади:

1.1.1. Эмитент ________________________;

1.1.2. Тоифа _________________________;

1.1.3. Номинал ______________ сўм;

1.1.4. Акциялар сони ___________________ дона;

1.1.5. Устав жамғармасидаги фоиз __________________________;

1.1.6. Сотиладиган улуш __________________________;

1.1.7. Таклиф нархи (1 донаси учун) _______________ сўм;

1.1.8. _______сўмдан кам бўлмаган нархда сотиш;

1.1.9. Мазкур чиқарилишнинг давлат рўйхатидан ўтказилиш санаси ________

1.2. Битишув тури __________ муддатли

1.3. Акцияларни бериш муддати _______ пул маблағлари Мижознинг ҳисоб-китоб счётига тушгандан кейин 5 кун ичида.

1.4. Топшириқ тури: лимитли.

1.4.1. Сотилган акциялар ҳақини тўлаш муддати; сотишга битишув тузилгандан кундан бошлаб 5 иш куни ичида.

1.5. Биржадан ташқари бозорда битишув тузишда Брокер-Харидордан талаб қилиниши зарур бўлган кафолатлар: пул маблағлари Мижознинг ҳисоб-китоб счётига депонентга қўйилганлиги ҳақида кўчирма ёки қарз мажбуриятлари битишув суммасининг камида 30% миқдорида вакил қилинган банкларга қўйилганлиги ҳақида кўчирма.

2.1. Брокер қуйидагиларга мажбурдир:

2.1.1. Мазкур шартнома имзолангандан кейин икки кун ичида шартномада кўрсатилган акциялар сотувга қўйилиши ҳақида «Тошкент» республика фонд биржасига буюртманома бериш.

2.1.2. 2 нусхада ёзма хабар (харидорнинг кафолати, брокернинг ҳисоботи)ни ва мазкур шартноманинг 1.5.-бандига мувофиқ маблағлар ҳақиқатда депонентга қўйилганлигини тасдиқловчи ҳужжатни тақдим этиш йўли билан Мижозга топшириқнинг қандай бажарилаётганлиги, шу жумладан битишув тузилган пайтдан бошлаб бир сутка давомида битишувлар тузилиши ҳақида Мижозга маълум қилиш.

2.1.3. Олди-сотди шартномасида мазкур шартноманинг биринчи бўлимида баён қилинган шартлар ҳамда қуйидагилар баён қилинсин:

сотилган акциялар учун пул маблағлари Мижознинг счётига тушган пайтдан бошлаб у тўлиқ бажарилган деб ҳисобланиши кўрсатилсин;

битишув харидорнинг айби билан бекор қилинган тақдирда сотувчининг фонд биржасига воситачилик йиғими тўлаш ва Брокерга мукофот пули тўлаш, шунингдек шартномада назарда тутилган жазо жарималарини тўлаш бўйича кўрилган зарарларни, кейинчалик қолган маблағларни харидорга қайтарган ҳолда, депонентга қўйилган пул маблағларидан мустақил ушлаб қолишга бўлган ҳуқуқи тўғрисидаги алоҳида шартлар назарда тутилсин.

2.1.4. Битишувлар белгиланган муддатда тузилмаган тақдирда мазкур битим асосида Давлат мулки қўмитасининг «Депо» счётида захирага қўйилган акциялар пакети дарҳол тиклансин.

2.2. Брокер қуйидаги ҳуқуқларга эга бўлади:

2.2.1. Мижоздан мазкур шартнома шартлари бажарилишини талаб қилиш;

2.2.2. Топшириқ зарур даражада бажарилгандан кейин шартнома бўйича унга тегишли бўлган мукофот пулини талаб қилиш;

2.2.3. Унинг томонидан акциялари қўйиладиган эмитентлар тўғрисидаги зарур дастлабки ахборотни олиш.

2.3. Мижоз қуйидагиларга мажбурдир:

2.3.1. Топшириқ зарур даражада бажарилганда Брокерга тузилган битишув суммасининг 1 фоизи миқдорида мукофот пули ва битишув баҳоси таклиф баҳосидан ошишининг 5 фоизи миқдорида қўшимча мукофот тўлаш;

2.3.2. Битишув тузилган пайтдан бошлаб 5 банк куни ичида битишув суммасининг 1 фоизи миқдорида фонд биржасига воситачилик ҳақи тўлаш;

2.3.3. Тўлов маблағлари битишувга ҳақ тўлаш учун Мижознинг бухгалтериясига тушишини кузатиш;

2.3.4. Тўлов маблағлари тушгандан кейин акцияларнинг 5 кун ичида берилишини таъминлаш.

2.4. Мижоз қуйидаги ҳуқуқларга эга бўлади:

2.4.1. Брокердан мазкур шартнома шартлари зарур даражада бажарилишини талаб қилиш.

2.4.2. Мазкур шартнома шартлари бажарилмаган тақдирда мукофот пули тўламаслик.

2.4.3. Брокер томонидан сотилган қимматли қоғозлар учун пул маблағлари муддатида тушмаган тақдирда Брокер билан тузилган шартномани бекор қилиш.

3.1. Мазкур шартномада баён қилинган топшириқ шартлари Брокер томонидан зарур даражада бажарилмаган тақдирда, Брокер Мижозга кўрилган зарарларни, шу жумладан қуйидагиларни тўлайди:

мазкур шартноманинг 1.5.-банди бажарилмаган тақдирда Брокер депонентга қўйилган маблағлардан тўлаш назарда тутилган барча тўловлар амалга оширилиши учун жавоб беради;

«Тошкент» республика фонд биржасига савдоларга буюртманомалар бериш муддати кечиктирилганда Брокерга кечиктирилган ҳар бир кун учун топшириқ суммасининг 0,2 фоизи миқдорида пеня солинади;

мазкур шартнома бажарилиши муддати тамом бўлгандан кейин захирага қўйилган акциялар Давлат мулки қўмитаси счётига тиклаш кечиктирилганда Брокерга кечиктирилган ҳар бир кун учун топшириқ суммасининг 0,2 фоизи миқдорида пеня солинади;

Брокер томонидан мазкур шартнома 6.2-бандининг 3-қисмида белгиланган муддат бузилганда Брокерга кечиктирилган ҳар бир кун учун топшириқ суммасининг 0,2 фоизи миқдорида пеня солинади.

3.2. Мижоз томонидан Брокерга мукофот пули тўланмаган тақдирда Мижозга кечиктирилган ҳар бир кун учун топшириқ суммасининг 0,2 фоизи миқдорида пеня солинади.

4.1. Брокер томонидан мазкур шартноманинг 2.1.2.-бандига мувофиқ ҳужжатлар тақдим этилгач, мижоз беш банк куни ичида Брокерга тузилган битишув суммасининг 1 фоизи миқдорида мукофот тўлаш ва битишув баҳоси таклиф баҳосидан ошишининг 5 фоизи миқдорида қўшимча тўлаш мажбуриятини олади.

5.1. Томонлар ўзлари ўртасидаги келишмовчиликларни музокаралар йўли билан ҳал этиш учун барча чора-тадбирларни кўришга аҳдлашдилар.

5.2. Томонлар ўзаро келишувга эришмаган тақдирда келишмовчиликлар амалдаги қонун ҳужжатларига мувофиқ ҳал этилади.

6.1. Мазкур шартнома имзоланган вақтдан бошлаб кучга киради ва 15 кун ичида амал қилади. Томонларнинг келишувига кўра шартнома худди шундай муддатга узайтирилиши мумкин, бироқ 2 мартадан кўп эмас.

6.2. Шартнома:

зарур даражада бажарилгач;

топшириқ Мижоз томонидан бекор қилинса;

мазкур шартнома имзолангандан кейин 2 кун ичида Мижозга ёзма равишда тақдим этиладиган топшириқни Брокер рад этса;

қонун ҳужжатларида назарда тутилган бошқа ҳолларда тўхтатилиши мумкин.

7.1. Шартнома-топшириқ Брокерга акцияларни «Тошкент» республика фонд биржасида савдога қўйиш учун мазкур шартноманинг 6.1.-бандида назарда тутилган муддатда депозитарийга захирага қўйиш ҳуқуқини беради.

7.2. Олди-сотди шартномаси ва Брокернинг ҳисоботлари, иловалари билан биргаликда, нусхалари Ўзбекистон Республикаси Давлат мулки қўмитаси Бош молия бошқармасига тақдим этилиши керак.

1. Хусусийлаштириладиган корхоналар акцияларини жойлаштириш бўйича ҳуқуқларни қимматли қоғозлар сифатидаги давлат активларини сотиш бўйича Вакил қилинган агентга бериш.

2, 2а. Вакил қилинган агент томонидан акциялари пакетлари сотувга қўйиладиган эмитентлар тўғрисида инвесторларни оммавий ахборот воситалари орқали хабардор қилиш.

3. Инвестиция воситачилари ўртасида хусусийлаштириладиган корхоналарнинг акцияларини сотишга қўйиш ҳуқуқига танлов ўтказиш. Буюртманомалар танловини ўтказиш якунлари асосида инвестиция воситачилари (брокерлар) билан хусусийлаштириладиган корхоналарнинг акцияларини биржа савдоларига қўйишга шартнома-топшириқлар тузиш. Шартнома-топшириқ 15 иш кунига, узайтириш ҳуқуқи билан, бироқ икки мартадан кўп эмас, тузилади.

4. Сотувчининг брокери томонидан акциялар пакетини депозитарийга захирага қўйиш.

5. Инвестор (харидор) билан инвестиция воситачиси (брокер) ўртасида хусусийлаштириладиган корхоналар акцияларини сотиб олишга шартнома-топшириқлар тузиш.

6. Харидор томонидан битишувнинг мўлжалланаётган суммасининг камида 30 фоизи миқдоридаги пул маблағларини Ҳисоб-китоб-клиринг палатасига олдиндан депонентга қўйиш.

6а. Битишувнинг қолган суммаси ва воситачилик ҳақини инвестор томонидан қонунчиликда белгиланган муддат ичида (5 кун) тўлаш.

7. Сотувчининг брокери томонидан хусусийлаштириладиган корхона акциялари пакетини сотувга қўйиш;

Сотувчининг брокери томонидан хусусийлаштириладиган корхона акциялари пакетини сотиб олишга буюртманома бериш;

Давлат мулки қўмитаси номидан инвестиция воситачилари билан инвестор номидан унинг ўртасида олти-сотди шартномаси тузилиши.

8. 8а. Қимматли қоғозларнинг Давлат мулки қўмитаси счётидан инвесторнинг счётига ўтказилиши тўғрисида топшириқ ва депозитарийга воситачилик ҳақи тўлаш.

9. Акцияларни Давлат мулки қўмитаси «Депо» счётидан битишув суммаси тўлиқ тўлангандан кейин инвесторнинг «Депо» счётига ўтказиш.

10. Брокерга ва биржага воситачилик ҳақи ушлаб қолинган ҳолда битишув суммасини Давлат мулки қўмитасига тўлаш.

11. Сотувчининг брокерига битишув суммасининг 1 фоизи миқдорида ва қўшимча равишда битишув баҳосининг таклиф баҳосидан ортиқ суммасининг 5 фоизи миқдорида мукофот тўлаш.

12. Давлат мулки қўмитаси номидан биржага воситачилик ҳақи тўлаш.

13. Инвестор номидан биржага воситачилик ҳақи тўлаш.

14. Инвестор билан брокер ўртасидаги шартнома-топшириққа мувофиқ сотувчининг брокерига мукофот тўлаш.

1. Мазкур Тартиб хусусийлаштириладиган корхоналарнинг акцияларини кутиладиган инвесторларга сотиш бўйича тендерларни тайёрлаш, эълон қилиш ва ўтказиш тартибини, шартларини белгилайди.

2. Хусусийлаштириладиган корхоналарнинг акцияларини сотиб олиш учун тендер тизими ўзида хусусийлаштириладиган корхонанинг олдиндан айтиб ўтилган акциялар пакетини қайта сотиб олувчи ва улар томонидан тақдим этилган инвестиция лойиҳасининг (корхонани реконструкция қилиш ва ривожлантириш, уни молиявий қайта тузиш бўйича) бажарилишини кафолатловчи стратегик инвесторни танлов асосида танлаш усулини ифодалайди.

3. Мазкур Тартибнинг мақсади учун қуйидаги иборалардан фойдаланилади:

тендер — стратегик инвесторни танлаб олишнинг танлов шаклидир, у ўзида даъвогарлар томонидан тақдим этилган таклифларнинг уларнинг нуқтаи назарида тендер ҳужжатлари мазмунининг мезонларга мувофиқлигини ифодалайди;

тендер объекти — хусусийлаштириладиган корхона;

тендернинг мақсади — савдолар ўтказиладиган хусусийлаштириладиган корхонанинг аниқ, олдиндан айтиб ўтилган акциялар пакети;

тендер иштирокчиси (даъвогар) — тендер шартларига кўра танловда қатнашиш учун қўйилган юридик ва жисмоний шахслар ёки уларнинг бирлашмалари;

тендер ташкилотчиси — Ўзбекистон Республикаси Давлат мулки қўмитаси ёки тендер ўтказишга унинг томонидан вакил қилинган орган;

тендер ҳужжати — Тендер ўтказиш тўғрисида билдиришнома, Тендер ўтказиш қоидаси ва Ахборот меморандумдан иборат ҳужжатлар мажмуи, улар объект ва тендер мақсадининг техник, тижорат, ташкилий ва бошқа хил тавсифлари тўғрисидаги, шунингдек, тендер шартлари ва тартиботлари ҳақидаги дастлабки ахборотлардан иборат бўлади;

тендер комиссияси — ташкилотчи томонидан тендерни ташкил этиш ва уни ўтказиш учун тузиладиган доимий ёки вақтинчалик орган;

тендер таклифи — тендер ҳужжатларида белгиланадиган шартларда аниқ тендер мақсадига нисбатан шартнома тузиш таклифи.

4. Ўтказилиш усулига кўра тендер очиқ ёки ёпиқ бўлиши мумкин.

Очиқ тендерда хоҳиш билдирган барча юридик ва жисмоний шахслар — Ўзбекистон Республикасининг резидентлари ва норезидентлари қатнашадилар.

Ёпиқ тендер республиканинг олдиндан белгиланган ташкилотлари ва корхоналари, махсус хабарномалар юбориладиган хорижий корхоналар ва фирмалар иштирокида ўтказилади.

5. Тендер объектлари ва мақсади, тендер қатнашчилари доираси ва уни ўтказиш усули Ўзбекистон Республикаси Вазирлар Маҳкамасининг қарори билан белгиланади.

Тендерларни тайёрлаш ва уларни ўтказиш иловага мувофиқ схемага кўра амалга оширилади.

6. Тендерни тайёрлаш тендер ташкилотчиси ёки унинг топшириғига кўра махсус ташкил этиладиган тендер комиссияси томонидан амалга оширилади. Тендер комиссияси таркибига манфаатдор давлат бошқаруви органлари вакиллари, тендер объекти вакиллари, шунингдек, контракт асосида, мустақил мутахассислар, экспертлар ва консультантлар киритилади.

Тендер комиссиясининг таркиби ташкилотчи томонидан тасдиқланади. Комиссиянинг таркибий сони камида 7 киши бўлиши керак.

7. Ташкилотчи ёки унинг топшириғига кўра тендер комиссияси тайёргарлик даврида:

тендер ҳужжатларини ишлаб чиқади;

тендерда даъвогарлар бўлиб қатнашишни хоҳловчилар томонидан буюртманомалар берилиши учун муддатларни белгилайди;

даъвогарларнинг таклифларини баҳолаш мезонини ва контрактлар тузиш тартибини белгилайди;

савдолар (очиқ ёки ёпиқ) ўтказиш усулларини белгилайди;

тендер ўтказиш тўғрисидаги ахборотни эълон қилади ва тарқатади.

Тендер ҳужжати уни барча даъвогарлар бир хилда тушунадиган қилиб тузилиши керак. Ишларни тавсифлашда умумий қабул қилинган белгилар ва номлар қўлланилиши зарур.

8. Очиқ тендер ўтказишда эълон оммавий ахборот воситаларида, шунингдек, бевосита кутиладиган даъвогарларга таклифлар жўнатиш йўли билан эълон қилинади.

9. Очиқ тендер тўғрисидаги эълон тендер ўтказилгунга қадар камида 6 ой олдин ва камида 3 та республика даврий нашрларида эълон қилинган бўлиши керак ва у тендер мақсади ҳамда объекти тўғрисидаги асосий зарур маълумотлардан ва қўшимча ахборот олиш манбаларидан иборат бўлиши керак.

10. Ёпиқ тендер ўтказишда ташкилотчи ёки унинг вакили олдиндан бўлажак даъвогарларни танлаб олади ва бўлажак тендерда қатнашиш таклифи билан уларга ахборот хати юборади. Бундай ҳолларда тендер тўғрисидаги эълон матбуотда эълон қилинмайди.

11. Ёпиқ тендер ўтказишда қатнашчилар сони тендер комиссияси томонидан белгиланади, бироқ камида 3 қатнашчи бўлиши керак.

12. Даъвогарлар томонидан тендер таклифини тақдим этиш тартиблари ва муддатлари тендерга оид ҳужжатлар билан белгиланади. Тўлдирилган тендер ҳужжатларидан ташқари корхона (ташкилот) унинг ишлаб чиқариш ва молия имкониятлари, ушбу корхона (ташкилот) томонидан илгари амалга оширилган ўхшаш лойиҳалар рўйхатлари тўғрисидаги маълумотлар ва бошқа маълумотлар ҳам тақдим этилади.

13. Белгиланган муддатдан кейин тушган тендерга оид таклифлар кўриб чиқилмайди. Тендер таклифини жўнатиш санаси почта штемпелига кўра белгиланади.

14. Даъвогар комиссия томонидан тендерга оид таклифлар кўриб чиқилишининг белгиланган муддатига қадар, бу ҳақда ёзма ҳолда ёки факс бўйича хабар бериб, ўз таклифини қайтариб олишга ҳақлидир.

15. Тендерга оид таклифларни кўриб чиқиш ва уларни баҳолаш уч босқичда ўтказилади:

1-босқич: тендерга оид таклифларнинг ҳужжатларни расмийлаштириш бўйича тендер ҳужжатларида белгиланган талабларга ва тендер объектини ривожлантиришнинг устувор йўналишларига мувофиқлигини баҳолаш. Шакл бўйича тақдим этилмаган ва иккинчи турга қўйилмаган таклифлар рад этилиши сабаблари кўрсатилган ҳолда тендер комиссиясининг баённомасида алоҳида ҳисоблаб чиқилади.

2-босқич: таклифларни эксперт жиҳатидан баҳолаш ва уларнинг энг истиқболлиларини танлаб олиш. Тушган таклифларни баҳолаш учун тендер ташкилотчиси томонидан тендер комиссиясида ишлаш учун экспертлар қўшимча жалб қилиниши мумкин.

3-босқич: инвестиция лойиҳасини амалга оширувчи томонларнинг ҳуқуқ ва мажбуриятларининг асосий параметрларини келишиб олиш. Тендерга оид таклифларни кўриб чиқишда тендер комиссияси, тендер ҳужжатларида ифодаланган баҳолаш мезонларига мувофиқ, икки-уч ташкилотнинг энг мос келадиган таклифларини танлаб олади ва улар билан музокаралар олиб боради.

16. 3-босқич якуни ва тендер ғолибини танлаш экспертларнинг хулосалари асосида, тендер комиссияси томонидан олдиндан ишлаб чиқилган ҳар бир лойиҳанинг сифатини миқдорий баҳолашга имкон берувчи мезонларга мувофиқ амалга оширилади ва улар Ўзбекистон Республикаси Ҳукумати билан келишиб олинган бўлиши керак.

17. Ҳар бир босқич натижалари бўйича тендер комиссияси барча аъзолари имзолаган, тендер ташкилотчиси томонидан тасдиқланган баённома расмийлаштирилади.

18. Тендер комиссияси ҳар бир босқичдан сўнг, тендер таклифлари рад этилганлиги сабаблари кўрсатилган ҳолда, тендер таклифлари рад этилганлиги тўғрисида даъвогарларга хабар беришга мажбурдир.

19. Тендер комиссияси тендерни ёпиш муддатини кейинга суришга ёки тендерни бекор қилишга ҳақлидир.

20. Тендер ҳужжатларини текширишда аниқланган хатолар мавжуд бўлганда тендер комиссияси даъвогарга ҳужжатларга тузатишлар киритиш имкониятини бериши мумкин.

21. Тендер ғолиби билан тендер предметини сотиб олиш учун шартнома тузилади. Ушбу шартнома томонларнинг инвестиция лойиҳасини амалга ошириш бўйича мажбуриятларини албатта ўз ичига олиши керак.

22. Тендерни ташкил этиш ва уни ўтказиш ташкилотчи маблағлари ҳисобига амалга оширилади.

23. Чекланмаган қатнашчилар сони билан очиқ тендер ўтказишда тендер ҳужжати даъвогарларга, қоидага кўра, ташкилотчи томонидан белгиланадиган миқдордаги пулга берилади.

24. Чекланган қатнашчилар сони билан ёпиқ тендер ўтказишда даъвогар комиссия тендер ҳужжатларини тақдим этгунга қадар кафолат пули қўяди, тендер шартлари билан белгиланган муддат тугагунга қадар у қайтариб сўраб олиниши мумкин эмас.

Тендерда ютган ҳолларда кафолат пули шартнома суммасига қўшилади, ютқазилганда даъвогарга қайтарилади.

Кафолат пулининг миқдори тендер ташкилотчиси томонидан белгиланади ва мўлжалланаётган битишувнинг умумий суммасининг 3-7 фоизини ташкил этади.

25. Даъвогарлар тендернинг шартлари билан олдиндан белгиланган муддат тугагунга қадар таклифлар асоссиз равишда қайтариб олинган ҳолларда, шунингдек тендерда ютганда шартнома тузишни рад этганда кафолатли гаров суммасини йўқотадилар.

26. Тендер натижалари бўйича пайдо бўладиган даъволар ва тендер натижалари ҳақиқий эмас деб эътироф этиш тўғрисидаги баҳслар қонун ҳужжатлари билан белгиланган тартибда суд органлари томонидан кўриб чиқилади.

27. Ташкилотчи, тендер комиссияси ва савдонинг бошқа қатнашчилари мазкур Низом билан белгиланган қоидаларга ва тендер ўтказиш тартиботларига риоя қилиниши учун ва тендер натижаларининг объективлиги учун қонун ҳужжатларида белгиланган тартибда жавоб берадилар.

1. Корхоналар рўйхатини тасдиқлаш, тендер ўтказиш йўли билан сотиладиган акциялар пакетини, тендер шаклларини, кутилаётган инвесторлар доирасини белгилаш.

2. Тендерни тайёрлаш ва ўтказиш гуруҳини, тендер комиссиясини тузиш, тендер ўтказиш муддатларини белгилаш.

3. Тендер ҳужжатлари лойиҳасини келишиб олиш.

4. Тендер ҳужжатларини оммавий ахборот воситалари орқали ёки тўғридан-тўғри кутилаётган инвесторлар ўртасида тарқатиш.

5. Инвестиция дастурларини ва тендер таклифларини ишлаб чиқиш, уларни тендер комиссиясига тақдим этиш.

6. Тендер таклифларини уч босқичда экспертизадан ўтказиш, унга қуйидагилар киради:

1-боскич — тендер таклифларининг ташкилотчи талабларига ва объектни ривожлантиришнинг устувор йўналишларига мувофиқлигини баҳолаш. 1-босқичдан ўтмаганларни улар таклифларининг рад этилиши сабабларини кўрсатган ҳолда чиқариб юбориш.

2-босқич — тендер комиссияси томонидан олдиндан ишлаб чиқилган мезонларга мувофиқ эксперт баҳолаш ва 2-3 та энг истиқболли тендер таклифларини танлаб олиш.

3-босқич — лойиҳанинг асосий параметрларини, томонларнинг ҳуқуқ ва мажбуриятларини келишиб олиш, тендер ғолибини танлаш.

7. Давлат мулки қўмитасига энг эътиборга лойиқ тендер таклифларини тақдим этиш, ДМҚнинг таклиф муаллифлари билан тўғридан-тўғри музокаралари, тақдим этилган лойиҳани амалга ошириш бўйича шартларни ва томонларнинг мажбуриятларини келишиб олиш.

8. Сотилиши режалаштирилаётган тендер предметини, инвестиция дастурини ва инвестиция дастурини амалга ошириш бўйича томонлар мажбуриятларини Ҳукумат билан келишиб олиш.

9. Тендер предметини сотиш тўғрисидаги, инвестиция дастурини амалга ошириш тўғрисидаги шартномаларни имзолаш, инвестиция дастурининг бажарилиши мониторинги.