Ўзбекистон Республикаси Ҳукумати ва Туркия Республикаси Ҳукумати (кейинги ўринларда «Аҳдлашувчи Томонлар» деб аталувчилар), 1994 йил 23 июнда имзоланган Ўзбекистон Республикаси Ҳукумати ва Туркия Жумҳурияти Ҳукумати ўртасида ҳаво транспорти тўғрисидаги Битимга (кейинги ўринларда «Битим» деб юритилади) қуйидаги ўзгартиришлар киритишга келишиб олдилар:

Мазкур Битимнинг «СОЛИҚ ВА БОШҚА ЙИҒИМ ВА БОЖЛАРДАН ОЗОД ҚИЛИШ» тўғрисидаги 6-моддаси қуйидаги таҳрирда ўзгартирилсин:

«1. Ҳар бир Аҳдлашувчи Томон ёки тайинланган авиакорхона томонидан халқаро ҳаво қатновларида фойдаланилаётган ҳаво кемалари, шунингдек, ушбу кемада рўйхатдаги доимий асбоб-ускуналар, ёқилғи ва мойлаш маҳсулотлари таъминоти, борт захиралари (жумладан, озиқ-овқат маҳсулотлари, ичимлик ва тамаки маҳсулотлари), бундай ҳаво кемалари, башарти ушбу асбоб-ускуналар ва таъминотлар бошқа Аҳдлашувчи Томон ҳудудига келган вақтдан қайтиб кетгунга қадар ёки ушбу ҳудуд устида амалга ошириладиган парвозлар ёки парвозларнинг маълум қисми давомида ишлатилгунига қадар ҳаво кемаси ичида қолса, барча божхона божлари, назорат йиғимлари ва бошқа тўловлар ва солиқлардан озод қилинади.

2. Бундай солиқлар ва божлардан қуйидагилар ҳам озод қилинади, кўрсатилган хизмат учун олинадиган йиғимлар бундан мустасно:

а) Ҳар қандай Аҳдлашувчи Томон ҳудудида унинг маъмурияти белгилаган меъёрлар доирасида олинган ва бошқа Аҳдлашувчи Томоннинг халқаро ҳаво парвозларни амалга оширадиган ҳаво кемаси ичида фойдаланишга мўлжалланган захиралари;

b) Ҳар қандай Аҳдлашувчи Томон ҳудудига халқаро ҳаво парвозларида фойдаланиладиган бошқа Аҳдлашувчи Томоннинг тайинланган авиакорхонаси ҳаво кемасига техник хизмат кўрсатиш ёки уни таъмирлаш учун келтирилган эҳтиёт қисмлар ва доимий асбоб-ускуналар;

с) бир Аҳдлашувчи Томоннинг тайинланган авиакорхонаси халқаро ҳаво парвозларида фойдаланадиган ҳаво кемасида ишлатиш учун мўлжалланган ёқилғи ва мойлаш таъминотлари, ҳатто бу таъминотлар ҳаво кемасига олинган Аҳдлашувчи Томон ҳудудининг устида амалга ошириладиган парвозлар давомида ишлатилганда ҳам;

d) Аҳдлашувчи Томонлардан бирининг тайинланган авиакорхонаси томонидан ўзининг фойдаланиш эҳтиёжлари учун келтирилган ёхуд келтириладиган хорижий авиакорхона белгисига эга бўлган реклама материаллари (каталоглар, прейскурантлар, тижорат брошюралари, моделлар, постерлар, брошюра ва бошқалар), ташув ҳужжатлари, бронлаш ва алоқа учун мўлжалланган электрон асбоб-ускуналар ва уларнинг эҳтиёт қисмлари, ваколатхоналарнинг иш фаолиятини ва асбоб-ускуналарини юритиш учун мебель ва жиҳозлар, божхона қоидаларига асосан қайта олиб чиқилгунга ёки бошқа кўрсатмага қадар.

Юқорида келтирилган (а), (b), (с) ва (d) кичик бандларида кўрсатиб ўтилган материаллар божхона назорати ёки текшируви остида бўлиши талаб қилиниши мумкин.».

Мазкур Битимнинг «ҲАЖМ ҚОИДАЛАРИ» тўғрисидаги 10-моддаси 4-банди қуйидаги таҳрирда ўзгартирилсин:

«4. Аҳдлашувчи Томонларнинг тайинлаган авиакорхоналари амалга оширадиган келишилган қатновлар, умумий ҳажм ва ташув ҳуқуқи биринчи навбатда Аҳдлашувчи Томонлар авиация маъмуриятлари томонидан ушбу қатновлар бошланишидан аввал ўзаро белгиланади. Ушбу ҳажм ва қатновлар миқдори вақт-вақти билан қайд этилган маъмуриятлар томонидан кўриб чиқилиши ёки ўзгартирилиши мумкин.».

Мазкур Битимнинг «ТАРИФЛАРНИ БЕЛГИЛАШ» тўғрисидаги 13-моддаси қуйидаги таҳрирда ўзгартирилсин:

«1. Ҳар бир Аҳдлашувчи Томоннинг тайинланган авиакорхоналари томонидан ўз ҳудуди орқали амалга ошириладиган халқаро ҳаво қатновлари учун белгиланган тарифлар барча тегишли омилларни, жумладан эксплуатация харажатлари, оқилона фойда ва бошқа авиакорхоналарнинг тарифларини ҳисобга олган ҳолда оқилона даражада бўлиши лозим. Аҳдлашувчи Томонларнинг қуйидаги аралашувлари чегараланиши лозим:

а) асоссиз камситувчи нархлар ва амалиётларнинг олдини олиш;

b) устунлик ҳолатини суиистеъмол қилиш туфайли асоссиз юқори ёки чегараланган нархлардан истеъмолчиларни ҳимоя қилиш; ва

с) авиакорхоналарни давлатнинг бевосита ёки билвосита субсидияси ёки қўллаб-қувватлаши туфайли нархларни сунъий пасайтиришдан ҳимоя қилиш.

2. 1-бандга мувофиқ Аҳдлашувчи Томонлардан бирининг тайинлаган авиакорхоналари тарафидан белгиланган тарифлар бошқа Аҳдлашувчи Томон авиация маъмуриятига тасдиқлаш учун тақдим этилиши талаб этилмаслиги лозим.

3. Ҳеч қайси Аҳдлашувчи Томон ўзининг тайинлаган авиакорхонаси(лари)га алоҳида ёки бошқа авиакорхона(лар) билан биргаликда бозор рақобатидаги ўзининг бозордаги устунлик мавқеини суиистеъмол қилган ҳолда, бошқа Аҳдлашувчи Томоннинг тайинланган авиакорхонасига ножўя таъсир кўрсатиш орқали унинг жиддий заифлашуви ёки бундай рақобатчини йўналишдан четлатилишига сабаб бўлувчи ёки бўлиши мумкин бўлган тарифларнинг белгиланишига йўл қўймаслиги лозим.

4. Аҳдлашувчи Томонлар тарифларни белгилаш бўйича қуйидаги амалиётларни чуқурроқ таҳлил қилинишига олиб келиши мумкин бўлган эҳтимолий адолатсиз рақобат амалиёти сифатида кўриб чиқишга розилик билдирадилар, агар:

а) йўналишлар бўйича ундириладиган тариф ва ставкалар жами миқдори тегишли хизматларни кўрсатиш билан боғлиқ харажатларини қоплаш учун етарли бўлмаса;

b) бундай амалиёт вақтинча эмас, балки давомий характерга эга бўлса;

с) бундай амалиёт бошқа Аҳдлашувчи Томоннинг тайинлаган авиакорхоналарига жиддий иқтисодий таъсир этса ёки жиддий зарар етказадиган бўлса; ва

d) йўналишда устунлик ҳолати суиистеъмол қилинганини кўрсатувчи хатти-ҳаракатлар бажарилса.

5. Авиация маъмуриятларидан бири белгиланган ёки таклиф этилган тарифлардан норози бўлган ҳолларда, Аҳдлашувчи Томонлардан бирининг сўровига биноан, авиация маъмуриятлари мазкур масалани музокаралар йўли билан ҳал этишга ҳаракат қиладилар. Ҳар қандай шароитда ҳам Аҳдлашувчи Томоннинг авиация маъмурияти бошқа Аҳдлашувчи Томон тайинлаган авиакорхонаси тарифининг кучга кириши ёки давом этиши учун бир томонлама ҳаракат олиб бормаслиги лозим.

6. Юқорида кўрсатилганлардан қатъи назар, Аҳдлашувчи Томонлардан бирининг тайинланган авиакорхоналари бошқа Аҳдлашувчи Томоннинг сўровига мувофиқ, тарифларни белгилашга оид маълумотларни бундай маъмуриятлар томонидан белгиланган тартибда ва шаклларда тақдим этадилар.

7. Аҳдлашувчи Томонларнинг ҳеч бири бошқа Аҳдлашувчи Томоннинг тайинланган авиакорхонасига биринчи рад талабидан воз кечиши, нархларни нисбатдан ошиб кетиши, қаршилик кўрсатмаслик учун тўлов ёки мазкур Битимнинг мақсадларига мос келмайдиган ҳажм, қатновлар давомийлиги ва ташувга тааллуқли ҳар қандай талабни юкламайди.».

Мазкур Баённома Битимнинг ажралмас қисми ҳисобланади ва Аҳдлашувчи Томонлар унинг кучга кириши учун зарур бўлган барча давлат ички процедураларини якунлаганликлари ҳақида сўнгги ёзма хабарнома дипломатик каналлар орқали олинган санадан бошлаб кучга киради.

Мазкур Баённоманинг амал қилиши Битимнинг 18-моддасига мувофиқ Битимнинг амал қилиши тугатилиши билан бир вақтда тугатилади.

Тошкент шаҳрида 2018 йил 30 апрелда икки нусхада, ҳар бири ўзбек, турк ва инглиз тилларида тузилди, бунда барча матнлар тенг аутентикдир.

Талқин қилишда келишмовчиликлар юзага келган тақдирда, инглиз тилидаги матн устувор ҳисобланади.