Ўзбекистон Республикаси Олий Мажлисининг Қонунчилик палатаси томонидан 2021 йил 15 июнда қабул қилинган «Жиноий фаолиятдан олинган даромадларни легаллаштиришга қарши курашиш тартиби янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси Қонуни 2021 йил 26 июнда Ўзбекистон Республикаси Олий Мажлисининг Сенати томонидан рад этилганлигини эътиборга олиб, Ўзбекистон Республикаси Олий Мажлисининг Қонунчилик палатаси қарор қилади:

1. «Жиноий фаолиятдан олинган даромадларни легаллаштиришга қарши курашиш тартиби янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Ўзбекистон Республикаси Қонуни бўйича келишмовчиликларни бартараф этиш учун Ўзбекистон Республикаси Олий Мажлиси Сенатининг таклифига кўра келишув комиссияси тузилсин.

2. Қонунчилик палатаси депутатлари Адхам Хурсанбаевич Шадманов, Даврон Рахимович Арипов ва Зухра Турсуновна Шадиева Ўзбекистон Республикаси Олий Мажлисининг Қонунчилик палатасидан мазкур комиссия таркибига сайлансин.

3. Мазкур Қонун муҳокамаси жараёнида билдирилган мулоҳазаларнинг тузатишлар тарзида таърифлаб берилиши таклиф қилинган ҳолда Ўзбекистон Республикаси Олий Мажлисининг Сенатига мурожаат этилсин.

4. Келишув тартиб-таомилларида иштирок этиш учун Ўзбекистон Республикаси Бош прокуратурасининг вакили таклиф этилсин.

5. Ушбу Қарор Ўзбекистон Республикаси Олий Мажлисининг Сенатига ва Ўзбекистон Республикаси Бош прокуратурасига юборилсин.

6. Ушбу Қарор қабул қилинган кундан эътиборан кучга киради.