Солиқлар ва мажбурий тўловларнинг бюджетга ва бюджетдан ташқари фондларга ўз вақтида тушиши механизмини такомиллаштириш, муддатида тўланмаган солиқлар ва бошқа тўловларни қисқартириш, солиқ тўлашдан бош тортишларнинг олдини олиш ҳисобига солиқлар йиғилишини ошириш, солиқ ва тўлов интизомини мустаҳкамлаш мақсадида Вазирлар Маҳкамаси қарор қилади:

1. Солиқ ва тўлов интизомини мустаҳкамлаш бўйича Ҳукумат комиссияси иловага* мувофиқ таркибда ташкил этилсин.

2. Қуйидагилар Ҳукумат комиссиясининг асосий вазифалари ва фаолияти йўналишлари этиб белгилансин:

хўжалик юритувчи субъектлар томонидан солиқ тўғрисидаги қонун ҳужжатларига риоя қилиниши, солиқлар ва мажбурий тўловларнинг ўз вақтида ва тўлиқ тўланиши устидан назорат қилишни амалга ошириш;

бюджетдан муддатда тўланмаган қарзларни қисқартириш ва амалдаги қонун ҳужжатларига мувофиқ тўланиши керак бўлган солиқлар ва мажбурий тўловларнинг тўлиқ ундирилишини таъминлаш юзасидан чора-тадбирлар ишлаб чиқиш.

3. Ҳукумат комиссиясига қуйидаги ҳуқуқлар берилсин:

Ўзбекистон Республикаси Давлат солиқ қўмитаси ва Молия вазирлигининг таклифлари бўйича пения ҳисоблашни тўхтатган ҳолда муддатида тўланмаган солиқлар ва бошқа тўловлар бўйича муддатни чўзиш ва (ёки) бўлиб-бўлиб тўлашга рухсат бериш;

тармоқ ва ҳудудлар бўйича муддатида тўланмаган солиқлар ва бошқа тўловларни қисқартириш бўйича ҳар ойлик топшириқларни белгилаш, топшириқлар бажарилмаслигига амалдаги қонун ҳужжатларига мувофиқ айбдорлар жавобгарликка тортилган ҳолда тўлов интизомини қўпол равишда бузиш деб қаралсин;

молия, солиқ ва божхона органлари фаолиятини текширишни ташкил этиш;

солиқ тўғрисидаги қонунлар бузилганлиги учун идораларнинг мулкчилик шаклларидан қатъи назар, корхоналар ва ташкилотларнинг жойлардаги давлат ҳокимияти ва бошқаруви органларининг раҳбарларини эгаллаб турган лавозимидан озод этишгача бўлган жавобгарликка тортиш тўғрисидаги таклифларни Ҳукуматнинг кўриб чиқиши учун киритиш.

4. Ҳукумат комиссияси икки ҳафта муддатда:

комиссия тўғрисидаги Низомни ишлаб чиқсин ва тасдиқлаш учун Вазирлар Маҳкамасига киритсин;

муддатида тўланмаган солиқлар ва бошқа тўловлар ҳосил бўлишининг асосий сабаблари бўйича идоралар, корхоналар ва ташкилотлар рўйхатини аниқлаган ҳолда тармоқ ва ҳудудлар бўйича бюджетга муддатида тўланмаган солиқлар ва тўловлар пайдо бўлиши миқдорлари ва сабабларини пухта таҳлил қилсин.

5. Ўзбекистон Республикаси Молия вазирлиги:

республика бюджети ва маҳаллий бюджетлар ўртасидаги ўзаро ҳисоб-китобларни аниқлаштиришда ўзаро ҳисоб-китоблар бўйича берилиши керак бўлган субвенция ёки маблағларни Ҳукумат комиссияси томонидан белгиланган муддатда тўланмаган солиқлар ва бошқа тўловларни қисқартириш бўйича ойлик топшириқнинг бажарилмаган суммасига камайтирсин;

республика бюджети даромадлари ва харажатлари бўйича пул ўтказилишининг Вақтинчалик тартибини бир ҳафта муддатда тасдиқласин.

6. Ўзбекистон Республикаси Марказий банки ва Молия вазирлигининг:

векселларнинг барча турлари муомалада бўлиши муддатини уч ойдан кўп бўлмаган даврга чегаралаш;

янги векселлар эмиссиясини ва илгари муомалага чиқарилган векселларнинг қийматини тўлаш ҳажмларини йил чораклари бўйича тенг миқдорда тақсимлаш;

хўжалик юритувчи субъектлар томонидан векселлар билан операцияларни амалга оширишда векселнинг ҳар бир муомалада бўлишини хизмат кўрсатувчи банкда албатта рўйхатдан ўтказиш;

бюджетга муддатида тўланмаган солиқлар ва бошқа тўловлар мавжуд бўлган тақдирда хўжалик юритувчи субъектларнинг товарлар (ишлар, хизматлар) учун векселлар қиймати тўланадиган ойда векселлар билан ҳақ тўлашини тақиқлаш;

тижорат банклари томонидан хўжалик юритувчи субъектнинг бюджет олдида муддатида тўланмаган солиқлар ва бошқа тўловлари мавжуд бўлган тақдирда пул маблағларини солиқлар ва мажбурий тўловлар бўйича қарзларни тўлаш учун унинг ҳисоб-китоб счётига ўтказган ҳолда банк векселларининг қийматини ўз вақтида ва муддатидан илгари тўлашни таъминлаш тўғрисидаги таклифлари қабул қилинсин.

7. Тижорат банкларига:

1996 йил 15 декабргача Ўзбекистон Республикаси Марказий банкига векселлар қийматини тўлашни йил чораклари бўйича тақсимлаган ва муддатини кўрсатган ҳолда 1997 йил учун банк векселлари ва банкдан ташқари ташкилотлар векселлари эмиссияси миқдорлари тўғрисидаги таклифни киритиш;

хўжалик юритувчи субъектларга кредит-ҳисоб-китоб хизмати кўрсатувчи ўзига қарашли барча муассасаларда векселлар билан операцияларни рўйхатдан ўтказувчи махсус таркибий бўлинмалар ташкил этиш тавсия қилинсин.

Марказий банк ва тижорат банклари векселлар эмиссиясига рухсатнома беришда Ўзбекистон Республикаси Давлат солиқ қўмитаси ва Молия вазирлигига банклар ва банкдан ташқари ташкилотларнинг векселлари чиқарилиши ва қиймати тўланиши муддатлари тўғрисида ахборот берсинлар.

Ўзбекистон Республикаси Давлат солиқ қўмитаси ва Молия вазирлиги бюджетга тўловлар бўйича вексель эгаларининг қарздорлигини тугатиш тартибини бир ҳафта муддатда ишлаб чиқсинлар ва тасдиқласинлар.

8. Ўзбекистон Республикаси Давлат солиқ қўмитаси барча ҳудудий солиқ органларида муддатида тўланмаган солиқлар ва тўловларни ундириш ҳамда солиқлар ва бюджетга тўловлар бўйича қарзларни қарздор корхонанинг мол-мулкидан ундириш бўйича мустақил бўлинмаларни ходимларнинг тасдиқланган чекланган сони доирасида ташкил этсин.

9. Солиқ тўлашдан бош тортиш учун фойдаланиладиган ғайриқонуний нақд пул муомаласини қисқартириш мақсадида республика солиқ органлари юридик шахслар, шунингдек юридик шахс бўлмаган ҳолда тадбиркорлик фаолияти билан шуғулланувчи юридик ва жисмоний шахслар ўртасида нақд пул маблағлари билан ҳисоб-китоб қилиш ҳоллари аниқланганда (маҳсулотни ташиш бўйича транспорт хизмати кўрсатиш ҳам шу жумлага киради), амалдаги қонун ҳужжатлари билан рухсат берилган ҳоллар бундан истисно, ҳам харидор, ҳам сотувчи тўғрисидаги ишни ҳар иккала томонга жарима санкцияларини қўллаган ҳолда ҳуқуқни муҳофаза қилиш органларига оширсинлар.

10. Солиқ ва молия органларига:

ўзлари жойлашган жой бўйича солиқ органларида ҳисобда турмаганлиги ёки ўз вақтида турмаганлиги учун корхоналар ва ташкилотларнинг мансабдор шахсларига, шунингдек фуқароларга;

тўловларни муддатида тўламаган корхоналардан ундириш тўғрисида солиқ органларининг инкассо топшириқлари бажарилмаган тақдирда, шунингдек корхоналар ва ташкилотларга солиқ органларида ҳисобда турганлик тўғрисида маълумотнома тақдим этилмаган ҳолда ҳисоб-китоб счётлари ёки бошқа счётлар очилганда банк муассасалари ва бошқа кредит муассасалари раҳбарларига;

бюджет олдида қарздор бўлган корхонага инкассо топшириғи ўз вақтида қўйилмаган тақдирда солиқ органлари раҳбарларига энг кам ойлик иш ҳақининг беш бараваридан ўн бараваригача бўлган миқдорда маъмурий жарималар солиш ҳуқуқи берилсин.

11. Ўзбекистон Республикаси Молия вазирлиги Давлат солиқ қўмитаси билан биргаликда ўн кун муддатда солиқ органлари ходимларини моддий рағбатлантиришнинг амалдаги тизимини такомиллаштирсин ва кўриб чиқиш учун Вазирлар Маҳкамасига киритсин.

12. Вазирлар Маҳкамасининг «Банкротлик тўғрисида» Ўзбекистон Республикаси Қонунини амалга ошириш чора-тадбирлари ҳақида» 1995 йил 17 июлдаги 273-сон қарори ўз кучини йўқотган деб ҳисоблансин.

13. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда мазкур қарордан келиб чиққан ҳолда амалдаги қонун ҳужжатлари ва норматив ҳужжатларга ўзгартиришлар ва қўшимчалар киритиш тўғрисидаги таклифни Вазирлар Маҳкамасига киритсин.

14. Мазкур қарорнинг бажарилишини назорат қилиш Бош вазирнинг ўринбосари Б.С. Ҳамидов ва Марказий банк раиси Ф.М. Муллажонов зиммасига юклансин.